TITUS
Black Yajur-Veda: Taittiriya-Samhita
Part No. 19
Previous part

Chapter: 5 
Paragraph: 1 
Verse: 1 
Sentence: 1=a    pūrṇā́ paścā́d utá pūrṇā́ purástād ún madʰyatáḥ paurṇamāsī́ jigāya / tásyāṃ devā́ ádʰi saṃvásanta uttamé nā́ka ihá mādayantām //
Sentence: 2=b    yát te devā́ ádadʰur bʰāgadʰéyam ámāvāsye saṃvásanto mahitvā́ / sā́ no yajñám pipr̥hi viśvavāre rayíṃ no dʰehi subʰage suvī́ram //
Sentence: 3=c    nivéśanī saṃgámanī vásūnāṃ víśvā rūpā́ṇi vásūny āveśáyantī / sahasrapoṣáṁ subʰágā rárāṇā sā́ na ā́ gan várcasā /=2   saṃvidānā́ //

Verse: 2 
Sentence: 1=d    ágnīṣomau pratʰamáu vīryèṇa vásūn rudrā́n ādityā́n ihá jinvatam / mādʰyáṁ hí paurṇamāsáṃ juṣétʰām bráhmaṇā vr̥ddʰáu sukr̥téna sātā́v átʰāsmábʰyaṁ sahávīrāṁ rayíṃ ní yacʰataṃ //
Sentence: 2    ādityā́ś cāṅgirasaś cāgnī́n ā́dadʰata té darśapūrṇamāsáu parípsan
Sentence: 3    téṣām áṅgirasāṃ níruptaṁ havír ā́sīd átʰādityā́ etáu hómāv apaśyan tā́v ajuhavus táto vái té darśapūrṇamāsáu //

Verse: 3 
Sentence: 1    pū́rva ā́labʰanta
Sentence: 2    darśapūrṇamāsā́v ālábʰamāna etáu hómau purástāj juhuyāt sākṣā́d evá darśapūrṇamāsā́v ā́ labʰate
Sentence: 3    brahmavādíno vadanti
Sentence: 4    sá tvái darśapūrṇamāsā́v ā́labʰeta yá enayor anulomáṃ ca pratilomáṃ ca vidyā́d íti \
Sentence: 5    amāvāsyā̀yā ūrdʰváṃ tád anulomám paurṇamāsyái pratīcī́naṃ tát pratilomám \
Sentence: 6    yát paurṇamāsī́m pū́rvām ālábʰeta pratilomám enāv ā́ labʰetāmúm apakṣī́yamāṇam ánv ápa //

Verse: 4 
Sentence: 1    kṣīyeta
Sentence: 2    sārasvatáu hómau purástāj juhuyād amāvāsyā̀ vái sárasvaty anulomám eváināv ā́ labʰate 'múm āpyā́yamānam ánv ā́ pyāyate \
Sentence: 3    āgnāvaiṣṇavám ékādaśakapālam purástān nír vapet sárasvatyai carúṁ sárasvate dvā́daśakapālam \
Sentence: 4    yád āgneyó bʰávaty agnír vái yajñamukʰáṃ yajñamukʰám evárddʰim purástād dʰatte
Sentence: 5    yád vaiṣṇavó bʰávati yajñó vái víṣṇur yajñám evā́rábʰya prá tanute
Sentence: 6    sárasvatyai carúr bʰavati sárasvate dvā́daśakapālo 'māvāsyā̀ vái sárasvatī pūrṇámāsaḥ sárasvān tā́v evá sākṣā́d ā́ rabʰata r̥dʰnóty ābʰyām \
Sentence: 7    dvā́daśakapālaḥ sárasvate bʰavati mitʰunatvā́ya prájātyai
Sentence: 8    mitʰunáu gā́vau dákṣiṇā sámr̥ddʰyai //

Paragraph: 2 
Verse: 1 
Sentence: 1    ŕ̥ṣayo vā́ índram pratyákṣaṃ nā́paśyan
Sentence: 2    táṃ vásiṣṭʰaḥ pratyákṣam paśyat
Sentence: 3    sò 'bravīd brā́hmaṇaṃ te vakṣyāmi yátʰā tvátpurohitāḥ prajā́ḥ prajaniṣyánté 'tʰa métarebʰya ŕ̥ṣibʰyo mā́ prá voca íti
Sentence: 4    tásmā etā́nt stómabʰāgān abravīt
Sentence: 5    táto vásiṣṭʰapurohitāḥ prajā́ḥ prā́jāyanta
Sentence: 6    tásmād vāsiṣṭʰó brahmā́ kāryàḥ práivá jāyate
Sentence: 7    raśmír asi kṣáyāya tvā kṣáyaṃ jinvéti //

Verse: 2 
Sentence: 1    āha devā́ vái kṣáyo devébʰya evá yajñám prā́ha
Sentence: 2    prétir asi dʰármāya tvā dʰármaṃ jinvéty āha manuṣyā̀ vái dʰármo manuṣyèbʰya evá yajñám prā́hā́nvitir asi divé tvā dívaṃ jinvéty āhaibʰyá evá lokébʰyo yajñám prā́ha
Sentence: 3    viṣṭambʰò 'si vŕ̥ṣṭyai tvā vŕ̥ṣṭiṃ jinvéty āha vŕ̥ṣṭiṃ evā́va //

Verse: 3 
Sentence: 1    runddʰe
Sentence: 2    pravā́sy anuvā́sī́ty āha mitʰunatvā́ya \
Sentence: 3    uśíg asi vásubʰyas tvā vásūñ jinvéty āhāṣṭáu vásava ékādaśa rudrā́ dvā́daśādityā́ etā́vanto vái devā́s tébʰya evá yajñám prā́ha \
Sentence: 4    ójo 'si pitŕ̥bʰyas tvā pitŕ̥̄ñ jinvéty āha devā́n evá pitŕ̥̄n ánu sáṃ tanoti
Sentence: 5    tántur asi prajā́bʰyas tvā prajā́ jinva //

Verse: 4 
Sentence: 1    íty āha pitŕ̥̄n evá prajā́ ánu sáṃ tanoti
Sentence: 2    pr̥tanāṣā́ḍ asi paśúbʰyas tvā paśū́ñ jinvéty āha prajā́ evá paśū́n ánu sáṃ tanoti
Sentence: 3    revád asy óṣadʰībʰyas tváuṣadʰīr jinvéty āháuṣadʰīṣv evá paśū́n práti ṣṭʰāpayati \
Sentence: 4    abʰijíd asi yuktágrāvéndrāya tvéndraṃ jinvéty āhābʰíjityā ádʰipatir asi prāṇā́ya tvā prāṇám //

Verse: 5 
Sentence: 1    jinvéty āha prajā́sv evá prāṇā́n dadʰāti
Sentence: 2    trivŕ̥d asi pravŕ̥d asī́ty āha mitʰunatvā́ya
Sentence: 3    saṁrohò 'si nīrohò 'sī́ty āha prájātyai
Sentence: 4    vasukò 'si véṣaśrir asi vásyaṣṭir asī́ty āha prátiṣṭʰityai //

Paragraph: 3 
Verse: 1 
Sentence: 1=a    agnínā devéna pŕ̥tanā jayāmi gāyatréṇa cʰándasā tr̥vŕ̥tā stómena ratʰaṃtaréṇa sā́mnā vaṣaṭkāréṇa vájreṇa pūrvajā́n bʰrā́tr̥vyān ádʰarān pādayāmy ávainān bādʰe práty enān nude 'smín kṣáye 'smín bʰūmiloké yò 'smā́n dvéṣṭi yáṃ ca vayáṃ dviṣmó víṣṇoḥ krámeṇā́ty enān krāmāmi \
Sentence: 2=b    índreṇa devéna pŕ̥tanā jayāmi tráiṣṭubʰena cʰándasā pañcadaśéna stómena br̥hatā́ sā́mnā vaṣaṭkāréṇa vájreṇa //

Verse: 2 
Sentence: 1    sahajā́n
Sentence: 2=c    víśvebʰir devébʰiḥ pŕ̥tanā jayāmi jā́gatena cʰándasā saptadaśéna stómena vāmadevyéna sā́mnā vaṣaṭkāréṇa vájreṇāparajā́n
Sentence: 3=d    índreṇa sayújo vayáṁ sāsahyā́ma pr̥tanyatáḥ / gʰnánto vr̥trā́ṇy apratí
Sentence: 4=e    yát te agne téjas ténāháṃ tejasvī́ bʰūyāsaṃ yát te agne várcas ténāháṃ vacasvī́ bʰūyāsaṃ yát te agne háras ténāháṁ harasvī́ bʰūyāsam //

Paragraph: 4 
Verse: 1 
Sentence: 1=a    yé devā́ yajñaháno yajñamúṣaḥ pr̥tʰivyā́m ádʰy ā́sate / agnír mā tébʰyo rakṣatu gácʰema sukŕ̥to vayám //
Sentence: 2=b    ā́ganma mitrāvaruṇā vareṇyā rā́trīṇām bʰāgó yuváyor yó ásti / nā́kaṃ gr̥hṇānā́ḥ sukr̥tásya loké tr̥tī́ye pr̥ṣṭʰé ádʰi rocané diváḥ //
Sentence: 3=c    yé devā́ yajñaháno yajñamúṣo 'ntárikṣé 'dʰy ā́sate / vāyúr mā tébʰyo rakṣatu gácʰema sukŕ̥to vayám //
Sentence: 4=d    yā́s te rā́trīḥ savitaḥ //

Verse: 2 
Sentence: 1    devayā́nīr antarā́ dyā́vāpr̥tʰivī́ viyánti / gr̥háiś ca sárvaiḥ prajáyā nv ágre súvo rúhāṇās taratā rájāṁsi //
Sentence: 2=e    yé devā́ yajñaháno yajñamúṣo divy ádʰy ā́sate / sū́ryo mā tébʰyo rakṣatu gácʰema sukŕ̥to vayám //
Sentence: 3=f    yénéndrāya samábʰaraḥ páyāṁsy uttaména havíṣā jātavedaḥ / ténāgne tvám utá vardʰayemáṁ sajātā́nāṁ śráiṣṭʰya ā́ dʰehy enam //
Sentence: 4    yajñaháno vái devā́ yajñamúṣaḥ //

Verse: 3 
Sentence: 1    santi tá eṣú lokéṣv āsata ādádāna vimatʰnānā́ yó dádāti yó yájate tásya / yé devā́ yajñahánaḥ pr̥tʰivyā́m ádʰy ā́sate yé antárikṣe yé divī́ty āhemā́n evá lokā́ṁs tīrtvā́ ságr̥haḥ sápaśuḥ suvargáṃ lokám eti \
Sentence: 2    ápa vái sómenejānā́d devátāś ca yajñáś ca krāmanty āgneyám páñcakapālam udavasānī́yaṃ nír vaped agníḥ sárvā devátāḥ //

Verse: 4 
Sentence: 1    pā́ṅkto yajñó devátāś caivá yajñáṃ cā́va runddʰe
Sentence: 2    gāyatró vā́ agnír gāyatrácʰandās táṃ cʰándasā vy ardʰayati yát páñcakapālaṃ karóty aṣṭā́kapālaḥ kāryò 'ṣṭā́kṣarā gāyatrī́ gāyatrò 'gnír gāyatrácʰandāḥ svénaiváinaṃ cʰándasā sám ardʰayati
Sentence: 3    paṅktyàu yājyānuvākyè bʰavataḥ pāṅkto yajñás ténaivá yajñā́n náiti //

Paragraph: 5 
Verse: 1 
Sentence: 1=a    sū́ryo mā devó devébʰyaḥ pātu vāyúr antárikṣād yájamāno 'gnír mā pātu cákṣuṣaḥ / sákṣa śū́ṣa sávitar víśvacarṣaṇa etébʰiḥ soma nā́mabʰir vidʰema te tébʰiḥ soma nā́mabʰir vidʰema te /
Sentence: 2=b    ahám parástād ahám avástād aháṃ jyótiṣā ví támo vavāra / yád antárikṣaṃ tád u me pitā́bʰūd aháṁ sū́ryam ubʰayáto dadarśāhám bʰūyāsam uttamáḥ samānā́nām //

Verse: 2 
Sentence: 1=c    ā́ samudrā́d ā́ntárikṣāt prajā́patir udadʰíṃ cyāvayātī́ndraḥ prá snautu marúto varṣayantu \
Sentence: 2=d    ún nambʰaya pr̥tʰivī́m bʰinddʰī́dáṃ divyáṃ nábʰaḥ / udnó divyásya no dehī́śāno ví sr̥jā dŕ̥tim //
Sentence: 3=e    paśávo vā́ eté yád ādityá eṣá rudró yád agnír óṣadʰīḥ prā́syāgnā́v ādityáṃ juhoti rudrā́d evá paśū́n antár dadʰāty átʰo óṣadʰīṣv evá paśū́n //

Verse: 3 
Sentence: 1    práti ṣṭʰāpayati
Sentence: 2=f    kavír yajñásya ví tanoti pántʰāṃ nā́kasya pr̥ṣṭʰé ádʰi rocané diváḥ / yéna havyáṃ váhasi yā́si dūtá itáḥ prácetā amútaḥ sánīyān //
Sentence: 3=g    yā́s te víśvāḥ samídʰaḥ sánty agne yā́ḥ pr̥tʰivyā́m barhiṣi sū́rye yā́ḥ / tā́s te gacʰantv ā́hutiṃ gʰr̥tásya devāyaté yájamānāya śárma //
Sentence: 4=h    āśā́sānaḥ suvī́ryaṁ rāyás póṣaṁ sváśviyam / bŕ̥haspátinā́ rāyā́ svagā́kr̥to máhyaṃ yájamānāya tiṣṭʰa //

Paragraph: 6 
Verse: 1 
Sentence: 1=a    sáṃ tvā nahyāmi páyasā gʰr̥téna sáṃ tvā nahyāmy apá óṣadʰībʰiḥ / sáṃ tvā nahyāmi prajáyāhám adyá sā́ dīkṣitā́ sanavo vā́jam asmé //
Sentence: 2=b    práitu bráhmaṇas pátnī védiṃ várṇena sīdatu /
Sentence: 3=c    átʰāhám anukāmínī své loké viśā́ ihá /
Sentence: 4=d    suprajásas tvā vayáṁ supátnīr úpa sedima / ágne sapatnadámbʰanam ádabdʰāso ádābʰyam //
Sentence: 5=e    imáṃ ví ṣyāmi váruṇasya pā́śam //

Verse: 2 
Sentence: 1    yám ábadʰnīta svitā́ sukétaḥ / dʰātúś ca yónau sukr̥tásya loké syonám me sahá pátyā karomi //
Sentence: 2=f    préhy udéhy r̥tásya vāmī́r ánv agnís té 'graṃ nayatv áditir mádʰyaṃ dadatāṁ rudrā́vasr̥ṣṭāsi yuvā́ nā́ma mā́ mā hiṁsīs \
Sentence: 3=g    vásubʰyo rudrébʰya ādityébʰyo víśvebʰyo vo devébʰyaḥ pannéjanīr gr̥hṇāmi
Sentence: 4=h    yajñā́ya vaḥ pannéjanīḥ sādayāmi
Sentence: 5=i    víśvasya te víśvāvato vŕ̥ṣṇiyāvataḥ //

Verse: 3 
Sentence: 1    távāgne vāmī́r ánu saṃdŕ̥śi víśvā rétāṁsi dʰiṣīya \
Sentence: 2=k    ágan devā́n yajñó ní devī́r devébʰyo yajñám aśiṣann asmínt sunvatí yájamāna āśíṣaḥ svā́hākr̥tāḥ samudreṣṭʰā́ gandʰarvám ā́ tiṣṭʰatā́nu / vā́tasya pátmann iḍá īḍitā́ḥ //

Paragraph: 7 
Verse: 1 
Sentence: 1    vaṣaṭkāró vái gāyatriyái śíro 'cʰinat tásyai rásaḥ párāpatat sá pr̥tʰivī́m prā́viśat sá kʰadirò 'bʰavad yásya kʰādiráḥ sruvó bʰávati cʰándasām evá rásenā́va dyati sárasā asyā́hutayo bʰavanti
Sentence: 2    tr̥tī́yasyām itó diví sóma āsīt táṃ gāyatry ā́harat tásya parṇám acʰidyata tát parṇò 'bʰavat tát parṇásya parṇatváṃ yásya parṇamáyī juhūḥ //

Verse: 2 
Sentence: 1    bʰávati saumyā́ asyā́hutayo bʰavanti juṣánte 'sya devā́ ā́hutīs \
Sentence: 2    devā́ vái bráhmann avadanta tát parṇá úpāśr̥ṇot suśrávā vái nā́ma yásya parṇamáyī juhū́r bʰávati ná pāpáṁ ślókaṁ śr̥ṇoti
Sentence: 3    bráhma vái parṇó víṇ marútó 'nnaṃ víṇ mārutò 'śvattʰó yásya parṇamáyī juhū́r bʰávaty ā́śvattʰy upabʰŕ̥d bráhmaṇaivā́nnam áva runddʰé 'tʰo bráhma //

Verse: 3 
Sentence: 1    evá viśy ádʰy ūhati
Sentence: 2    rāṣṭráṃ vái parṇó víḍ aśvattʰó yát parṇamáyī juhū́r bʰávaty ā́śvattʰy upabʰŕ̥d rāṣṭrám evá viśy ádʰy ūhati
Sentence: 3    prajā́patir vā́ ajuhot sā́ yátrā́hutiḥ pratyátiṣṭʰat táto víkaṅkata úd atiṣṭʰat tátaḥ prajā́ asr̥jata yásya váikaṅkatī dʰruvā́ bʰávati práty evā́syā́hutayas tiṣṭʰanty átʰo práivá jāyate \
Sentence: 4    etád vái sruvā́ṁ rūpáṃ yásyaiváṁrūpāḥ srúco bʰávanti sárvāṇy eváinaṁ rūpā́ṇi paśūnā́m úpa tiṣṭʰante nā́syā́parūpam ātmáñ jāyate //

Paragraph: 8 
Verse: 1 
Sentence: 1=a    upayāmágr̥hīto 'si prajā́pataye tvā jyótiṣmate jyótiṣmantaṃ gr̥hṇāmi dákṣāya dakṣavŕ̥dʰe rātáṃ devébʰyo 'gnijihvébʰyas tvartāyúbʰya índrajyeṣṭʰebʰyo váruṇarājabʰyo vā́tāpibʰyaḥ parjányātmabʰyo divé tvāntárikṣāya tvā pr̥tʰivyái tvā \
Sentence: 2=b    ápendra dviṣató mánó 'pa jíjyāsato jahy ápa yó no 'rātīyáti táṃ jahi
Sentence: 3=c    prāṇā́ya tvāpānā́ya tvā vyānā́ya tvā saté tvā́sate tvādbʰyás tváuṣadʰībʰyo víśvebʰyas tvā bʰutébʰyo yátaḥ prajā́ {F ákkʰidrā}* {W ákʰidrā} {ASS ákkʰidrā} {BI áríkʰadrā} {GOLS ákkʰidrā} ájāyanta tásmai tvā prajā́pataye vibʰūdā́vne jyótiṣmate jyótiṣmantaṃ juhomi //
Sentence: 3=cFn1       {FN The reading áríkʰadrā of BI is same as that of MSS which Caland shows in the note in the edition of BaudhŚS.}

Paragraph: 9 
Verse: 1 
Sentence: 1    yā́ṃ vā́ adʰvaryúś ca yájamānaś ca devátām antaritás tásyā ā́ vr̥ścyete
Sentence: 2    prājāpatyáṃ dadʰigraháṃ gr̥hṇīyāt
Sentence: 3    prajā́patiḥ sárvā devátās \
Sentence: 4    devátābʰya evá ní hnuvāte
Sentence: 5    jyeṣṭʰó vā́ eṣá gráhāṇām \
Sentence: 6    yásyaiṣá gr̥hyáte jyáiṣṭʰyam evá gacʰati
Sentence: 7    sárvāsāṃ vā́ etád devátānāṁ rūpáṃ yád eṣá gráhas \
Sentence: 8    yásyaiṣá gr̥hyáte sárvāṇy eváinaṁ rūpā́ṇi paśūnā́m úpa tiṣṭʰante \
Sentence: 9    upayāmágr̥hītaḥ //

Verse: 2 
Sentence: 1    asi prajā́pataye tvā jyótiṣmate jyótiṣmantaṃ gr̥hṇāmī́ty āha
Sentence: 2    jyótir eváinaṁ samānā́nāṃ karoti \
Sentence: 3    agnijihvébʰyas tvartāyúbʰya íty āha \
Sentence: 4    etā́vatīr vái devátās
Sentence: 5    tā́bʰya eváinaṁ sárvābʰyo gr̥hṇāti \
Sentence: 6    ápendra dviṣató mána íty āha
Sentence: 7    bʰrā́tr̥vyāpanuttyai
Sentence: 8    prāṇā́ya tvāpānā́ya tvéty āha
Sentence: 9    prāṇā́n evá yájamāne dadʰāti
Sentence: 10    tásmai tvā prajā́pataye vibʰūdā́vne jyótiṣmate jyótiṣmantaṃ juhomi //

Verse: 3 
Sentence: 1    íty āha
Sentence: 2    prajā́patiḥ sárvā devátāḥ
Sentence: 3    sárvābʰya eváinaṃ devátābʰyo juhoti \
Sentence: 4    ājyagraháṃ gr̥hṇīyāt téjaskāmasya
Sentence: 5    téjo vā́ ā́jyam \
Sentence: 6    tejasvy èvá bʰavati
Sentence: 7    somagraháṃ gr̥hṇīyād brahmavarcasákāmasya
Sentence: 8    brahmavarcasáṃ vái sómas \
Sentence: 9    brahmavarcásy èvá bʰavati
Sentence: 10    dadʰigraháṃ gr̥hṇīyāt paśúkāmasya \
Sentence: 11    ū́rg vái dádʰi \
Sentence: 12    ū́rk paśávas \
Sentence: 13    ūrjáivā́smā ū́rjam paśū́n áva runddʰe //

Paragraph: 10 
Verse: 1 
Sentence: 1=a    tvé krátum ápi vr̥ñjanti víśve dvír yád eté trír bʰávanty ū́māḥ / svādóḥ svā́dīyaḥ svādúnā sr̥jā sám áta ū ṣú mádʰu mádʰunābʰí yodʰi //
Sentence: 2=b    upayāmágr̥hīto 'si prajā́pataye tvā júṣṭaṃ gr̥hṇāmy eṣá te yóniḥ prajā́pataye tvā /
Sentence: 3    prāṇagrahā́n gr̥hṇāty etā́vad vā́ asti yā́vad eté gráhā stómāś cʰándāṁsi pr̥ṣṭʰā́ni díśo yāvad evā́sti tát //

Verse: 2 
Sentence: 1    áva runddʰe
Sentence: 2    jyeṣṭʰā́ vā́ etā́n brāhmaṇā́ḥ purā́ vidvā́m akran tásmāt téṣāṁ sárvā díśo 'bʰíjitā abʰūvan yásyaité gr̥hyánte jyáiṣṭʰyam evá gacʰaty abʰí díśo jayati
Sentence: 3    páñca gr̥hyante páñca díśaḥ sárvāsv evá dikṣv r̥̀dʰnuvanti
Sentence: 4    návanava gr̥hyante náva vái púruṣe prāṇā́ḥ prāṇā́n evá yájamāneṣu dadʰati
Sentence: 5    prāyaṇī́ye codayanī́ye ca gr̥hyante prāṇā́ vái prāṇagrahā́ḥ //

Verse: 3 
Sentence: 1    prāṇáir evá prayánti prāṇáir úd yanti
Sentence: 2    daśamé 'han gr̥hyante prāṇā́ vái prāṇagrahā́ḥ prāṇébʰyaḥ kʰálu vā́ etát prajā́ yanti yád vāmadevyáṃ yóneś cyávate daśamé 'han vāmadevyáṃ yóneś cyavate yád daśamé 'han gr̥hyánte prāṇébʰya evá tát prajā́ ná yanti //

Paragraph: 11 
Verse: 1 
Sentence: 1=a    prá deváṃ devyā́ dʰiyā́ bʰáratā jātávedasam / havyā́ no vakṣad ānuṣák //
Sentence: 2=b    ayám u ṣyá prá devayúr hotā́ yajñā́ya nīyate / rátʰo ná yór abʰī́vr̥to gʰŕ̥ṇīvān cetati tmánā //
Sentence: 3=c    ayám agnír uruṣyaty amŕ̥tād iva jánmanaḥ / sáhasaś cit sáhīyān devó jīvā́tave kr̥táḥ //
Sentence: 4=d    íḍāyās tvā padé vayáṃ nā́bʰā pr̥tʰivyā́ ádʰi / jā́tavedo ní dʰīmahy ágne havyā́ya vóḍʰave //

Verse: 2 
Sentence: 1=e    ágne víśvebʰiḥ svanīka deváir ū́rṇāvantam pratʰamáḥ sīda yónim / kulāyínaṃ gʰr̥távantaṁ savitré yajñáṃ naya yájamānāya sādʰú //
Sentence: 2=f    sī́da hotaḥ svá u loké cikitvā́nt sādáyā yajñáṁ sukr̥tásya yónau / devāvī́r devā́n havíṣā yajāsy ágne br̥hád yájamāne váyo dʰāḥ //
Sentence: 3=g    ní hótā hotr̥ṣádane vídānas tveṣó dīdivā́ṁ asadat sudákṣaḥ / ádabdʰavratapramatir vásiṣṭʰaḥ sahasrambʰaráḥ śúcijihvo agníḥ //
Sentence: 4=h    tváṃ dūtás tvám //

Verse: 3 
Sentence: 1    u naḥ paraspā́s tváṃ vásya ā́ vr̥ṣabʰa praṇetā́ / ágne tokásya nas táne tanū́nām áprayucʰan dī́dyad bodʰi gopā́ḥ //
Sentence: 2=i    abʰí tvā deva savitar ī́śānaṃ vā́ryāṇām / sádāvan bʰāgám īmahe //
Sentence: 3=k    mahī́ dyáuḥ pr̥tʰivī́ ca na imáṃ yajñám mimikṣatām / pipr̥tā́ṃ no bʰárīmabʰiḥ //
Sentence: 4=l    tvā́m agne púṣkarād ádʰy átʰarvā nír amantʰata / mūrdʰnó víśvasya vāgʰátaḥ //
Sentence: 5=m    tám u //

Verse: 4 
Sentence: 1    tvā dadʰyáṅṅ ŕ̥ṣiḥ putrá īdʰe átʰarvaṇaḥ / vr̥traháṇam puraṃdarám //
Sentence: 2=n    tám u tvā pātʰyó vŕ̥ṣā sám īdʰe dasyuhántamam dʰanaṃjayáṁ ráṇeraṇe //
Sentence: 3=o    utá bruvantu jantáva úd agnír vr̥trahā́jani / dʰanaṃjayó ráṇeraṇe //
Sentence: 4=p    ā́ yáṁ háste ná kʰādínaṁ śíśuṃ jātáṃ ná bíbʰrati / viśā́m agníṁ svadʰvarám //
Sentence: 5=q    prá deváṃ devávītaye bʰáratā vasuvíttamam / ā́ své yónau ní ṣīdatu //
Sentence: 6=r    ā́ //

Verse: 5 
Sentence: 1    jātáṃ jātávedasi priyáṁ śiśītā́titʰim / syoná ā́ gr̥hápatim //
Sentence: 2=s    agnínāgníḥ sám idʰyate kavír gr̥hápatir yúvā / havyavā́ḍ juhvā̀syaḥ //
Sentence: 3=t    tváṁ hy àgne agnínā vípro vípreṇa sánt satā́ / sákaḥ sákʰyā samidʰyáse //
Sentence: 4=u    tám marjayanta sukrátum puroyā́vānam ājíṣu / svéṣu kṣáyeṣu vājínam //
Sentence: 5=v    yajñéna yajñám ayajanta devā́s tā́ni dʰármāṇi pratʰamā́ny āsan / té ha nā́kam mahimā́naḥ sacante yátra pū́rve sādʰyā́ḥ sánti devā́ḥ //

Next part


This text is part of the TITUS edition of Black Yajur-Veda: Taittiriya-Samhita.

Copyright TITUS Project, Frankfurt a/M, 9.2.2018. No parts of this document may be republished in any form without prior permission by the copyright holder.