TITUS
Black Yajur-Veda: Taittiriya-Samhita
Part No. 21
Previous part

Chapter: 2 
Paragraph: 1 
Verse: 1 
Sentence: 1=a    víṣṇoḥ krámo 'sy abʰimātihā́ gāyatráṃ cʰánda ā́ roha pr̥tʰivī́m ánu ví kramasva nírbʰaktaḥ sá yáṃ dviṣmó víṣṇoḥ krámo 'sy abʰiśastihā́ tráiṣṭubʰaṃ cʰánda ā́ rohāntárikṣam ánu ví kramasva nírbʰaktaḥ sá yáṃ dviṣmó víṣṇoḥ krámo 'sy arātīyató hantā́ jā́gataṃ cʰánda ā́ roha dívam ánu ví kramasva nírbʰaktaḥ sá yáṃ dviṣmó víṣṇoḥ //

Verse: 2 
Sentence: 1    krámo 'si śatrūyató hantā́nuṣṭubʰaṃ cʰánda ā́ roha díśó 'nu ví kramasva nírbʰaktaḥ sá yáṃ dviṣmáḥ /
Sentence: 2=b    ákrandad agní stanáyann iva dyáuḥ kṣā́mā rérihad vīrúdʰaḥ samañján / sadyó jajñānó ví hī́m iddʰó ákʰyad ā́ ródasī bʰānúnā bʰāty antáḥ //
Sentence: 3=c    ágne 'bʰyāvartinn abʰí na ā́ vartasvā́yuṣā várcasā sanyā́ medʰáyā prajáyā dʰánena //
Sentence: 4=d    ágne //

Verse: 3 
Sentence: 1    aṅgiraḥ śatáṃ te santv āvŕ̥taḥ sahásraṃ ta upāvŕ̥taḥ / tā́sām póṣasya póṣeṇa púnar no naṣṭám ā́ kr̥dʰi púnar no rayím ā́kr̥dʰi //
Sentence: 2=e    púnar ūrjā́ ní vartasva púnar agna iṣā́yuṣā / púnar naḥ pāhi viśvátaḥ //
Sentence: 3=f    sahá rayyā́ ní vartasvā́gne pínvasva dʰāráyā / viśvápsniyā viśvátas pári //
Sentence: 4=g    úd uttamáṃ varuṇa pā́śam asmád ávādʰamám //

Verse: 4 
Sentence: 1    ví madʰyamáṁ śratʰāya / átʰā vayám āditya vraté távā́nāgaso áditaye syāma //
Sentence: 2=h    ā́ tvāhārṣam antár abʰūr dʰruvás tiṣṭʰā́vicācaliḥ / víśas tvā sárvā vāñcʰantv asmín rāṣṭrám ádʰi śraya //
Sentence: 3=i    ágre br̥hánn uṣásām ūrdʰvó astʰān nirjagmivā́n támaso jyótiṣā́gāt / agnír bʰānúnā rúśatā sváṅga ā́ jātó viśvā sádmāny aprāḥ //
Sentence: 4=k    sī́da tvám mātúr asyā́ḥ //

Verse: 5 
Sentence: 1    upástʰe víśvāny agne vayúnāni vidvā́n / máinām arcíṣā mā́ tápasābʰí śūśuco 'ntár asyāṁ śukrájyotir ví bʰāhi //
Sentence: 2=l    antár agne rucā́ tvám ukʰā́yai sádane své / tásyās tváṁ hárasā tápañ jā́tavedaḥ śivó bʰava //
Sentence: 3=m    śivó bʰūtvā́ máhyam agné 'tʰo sīda śivás tvám / śivā́ḥ kr̥tvā́ díśaḥ sárvāḥ svā́ṃ yónim ihā́sadaḥ //
Sentence: 4=n    haṁsáḥ śuciṣád vásur antarikṣasád dʰótā vediṣád átitʰir duroṇasát / nr̥ṣád varasád vyomasád abjā́ gojā́ r̥tajā́ adrijā́ r̥tám br̥hát //

Paragraph: 2 
Verse: 1 
Sentence: 1=a    divás pári pratʰamáṃ jajñe agnír asmád dvitī́yam pári jātávedāḥ / tr̥tī́yam apsú nr̥máṇā ájasram índʰāna enaṃ jarate svādʰī́ḥ //
Sentence: 2=b    vidmā́ te agne tredʰā́ trayā́ṇi vidmā́ te sádma víbʰr̥tam purutrā́ / vidmā́ te nā́ma paramáṃ gúhā yád vidmā́ tám útsaṃ yáta ājagántʰa //
Sentence: 3=c    samudré tvā nr̥máṇā apsv àntár nr̥cákṣā īdʰe divó agna ū́dʰan / tr̥tī́ye tvā //

Verse: 2 
Sentence: 1    rájasi tastʰivā́ṁsam r̥tásya yónau mahiṣā́ ahinvan //
Sentence: 2=d    ákrandad agní stanáyann iva dyáuḥ kṣā́mā rérihad vīrúdʰaḥ samañján / sadyó jajñānó ví hī́m iddʰó ákʰyad ā́ ródasī bʰānúnā bʰāty antáḥ //
Sentence: 3=e    uśík pāvakó aratíḥ sumedʰā́ márteṣv agnír amŕ̥to nidʰāyi / íyarti dʰūmám aruṣám bʰáribʰrad úc cʰukréṇa śocíṣā dyā́m ínakṣat //
Sentence: 4=f    víśvasya ketúr bʰúvanasya gárbʰa ā́ //

Verse: 3xxx 
Sentence: 1    ródasī apr̥ṇāj jā́yamānaḥ / vīḍúṃ cid ádrim abʰinat parāyáñ jánā yád agním áyajanta páñca //
Sentence: 2=g    śrīṇā́m udāró dʰarúṇo rayīṇā́m manīṣā́ṇām prā́rpaṇaḥ sómagopāḥ / vásoḥ sūnúḥ sáhaso apsú rā́jā ví bʰāty ágra uṣásām idʰānáḥ //
Sentence: 3=h    yás te adyá kr̥ṇávad bʰadraśoce 'pūpáṃ deva gʰr̥távantam agne / prá táṃ naya pratarā́ṃ vásyo ácʰābʰí dyumnáṃ devábʰaktaṃ yaviṣṭʰa //
Sentence: 4=i    ā́ //

Verse: 4 
Sentence: 1    tám bʰaja sauśravaseṣv agna uktʰáuktʰa ā́ bʰaja śasyámāne / priyáḥ sū́rye priyó agnā́ bʰavāty új jāténa bʰinádad uj jánitvaiḥ //
Sentence: 2=k    tvā́m agne yájamānā ánu dyū́n víśvā vásūni dadʰire vā́ryāṇi / tváyā sahá dráviṇam icʰámānā vrajáṃ gómantam uśíjo ví vavruḥ //
Sentence: 3=l    dr̥śānó rukmá urvyā́ vy àdyaud durmárṣam ā́yuḥ śriyé rucānáḥ / agnír amŕ̥to abʰavad váyobʰir yád enaṃ dyáur ájanayat surétāḥ //

Paragraph: 3 
Verse: 1 
Sentence: 1=a    ánnapaté 'nnasya no dehy anamīvásya śuṣmíṇaḥ / prá pradātā́raṃ tāriṣa ū́rjaṃ no dʰehi dvipáde cátuṣpade //
Sentence: 2=b    úd u tvā víśve devā́ ágne bʰárantu cíttibʰiḥ / sá no bʰava śivátamaḥ suprátīko vibʰā́vasuḥ //
Sentence: 3=c    préd agne jyótiṣmān yāhi śivébʰir arcíbʰis tvám / br̥hádbʰir bʰānúbʰir bʰā́san mā́ hiṁsīs tanúvā prajā́ḥ //
Sentence: 4=d    samídʰāgníṃ duvasyata gʰr̥táir bodʰayatā́titʰim / ā́ //

Verse: 2 
Sentence: 1    asmin havyā́ juhotana //
Sentence: 2=e    práprāyám agnír bʰaratásya śr̥ṇve ví yát sū́ryo ná rócate br̥hád bʰā́ḥ / abʰí yáḥ pūrúm pŕ̥tanāsu tastʰáu dīdā́ya dáivyo átitʰiḥ śivó naḥ //
Sentence: 3=f    ā́po devīḥ práti gr̥hṇīta bʰásmaitát syoné kr̥ṇudʰvaṁ surabʰā́v u loké / tásmai namantāṃ jánayaḥ supátnīr mātéva putrám bibʰr̥tā́ sv ènam //
Sentence: 4=g    apsv àgne sádʰiṣ ṭáva //

Verse: 3 
Sentence: 1    sáuṣadʰīr ánu rudʰyase / gárbʰe sáñ jāyase púnaḥ //
Sentence: 2=h    gárbʰo asy óṣadʰīnāṃ gárbʰo vánaspátīnāṃ / gárbʰo víśvasya bʰūtásyā́gne gárbʰo apā́m asi //
Sentence: 3=i    prasádya bʰásmanā yónim apáś ca pr̥tʰivī́m agne / saṁsŕ̥jya mātŕ̥bʰis tváṃ jyótiṣmān púnar ā́sadaḥ //
Sentence: 4=k    púnar āsádya sádanam apáś ca pr̥tʰivī́m agne / śéṣe mātúr yátʰopástʰe 'ntár asyā́ṁ śivátamaḥ //
Sentence: 5=l    púnar ūrjā́ //

Verse: 4 
Sentence: 1    ní vartasva púnar agna iṣā́yuṣā / púnar naḥ pāhi viśvátaḥ //
Sentence: 2=m    sahá rayyā́ ní vartasvā́gne pinvasva dʰā́rayā / viśvápsniyā viśvátas pári //
Sentence: 3=n    púnas tvādityā́ rudrā́ vásavaḥ sám indʰatām púnar brahmā́ṇo vasunītʰa yajñáiḥ / gʰr̥téna tváṃ tanúvo vardʰayasva satyā́ḥ santu yájamānasya kā́māḥ //
Sentence: 4=o    bódʰā no asya vácaso yaviṣṭʰa máṁhiṣṭʰasya prábʰr̥tasya svadʰāvaḥ / pī́yati tvo ánu tvo gr̥ṇāti vandā́rus te tanúvaṃ vande agne //
Sentence: 5=p    sá bodʰi sūrír magʰávā vasudā́vā vásupatiḥ / yuyodʰy àsmád dvéṣāṁsi //

Paragraph: 4 
Verse: 1 
Sentence: 1=a    ápeta vī́ta ví ca sarpatā́to yé 'tra stʰá purāṇā́ yé ca nū́tanāḥ / ádād idáṃ yamò 'vasā́nam pr̥tʰivyā́ ákrann imám pitáro lokám asmai //
Sentence: 2=b    agnér bʰásmāsy agnéḥ púrīṣam asi
Sentence: 3=c    saṃjñā́nam asi kāmadʰáraṇam máyi te kāmadʰáraṇam bʰūyāt
Sentence: 4=d    sáṃ yā́ vaḥ priyā́s tanúvaḥ sám priyā́ hŕ̥dayāni vaḥ / ātmā́ vo astu //

Verse: 2 
Sentence: 1    sámpriyaḥ sámpriyās tanúvo máma //
Sentence: 2=e    ayáṁ só agnír yásmint sómam índraḥ sutáṃ dadʰé jaṭʰáre vāvaśānáḥ / sahasríyaṃ vā́jam átyaṃ ná sáptiṁ sasavā́nt sánt stūyase jātavedaḥ //
Sentence: 3=f    ágne divó árṇam ácʰā jigāsy ácʰā devā́ṁ ūciṣe dʰíṣṇiyā yé / yā́ḥ parástād rocané sū́ryasya yā́ś cāvástād upatíṣṭʰanta ā́paḥ //
Sentence: 4=g    ágne yát te diví várcaḥ pr̥tʰivyā́ṃ yád óṣadʰīṣu //

Verse: 3 
Sentence: 1    apsú vā yajatra / yénāntárikṣam urv ā̀tatántʰa tveṣáḥ sá bʰānúr arṇavó nr̥cákṣāḥ //
Sentence: 2=h    purīṣyā̀so agnáyaḥ prāvaṇébʰiḥ sajoṣasaḥ / juṣántāṁ havyám ā́hutam anamīvā́ íṣo mahī́ḥ //
Sentence: 3=i    íḍām agne purudáṁsaṁ saníṃ góḥ śaśvattamáṁ hávamānāya sādʰa / syā́n naḥ sunús tánayo vijā́vā́gne sā́ te sumatír bʰūtv asmé //
Sentence: 4=k    ayáṃ te yónir r̥tvíyo yáto jātó árocatʰāḥ / táṃ jānán //

Verse: 4 
Sentence: 1    agna ā́ rohā́tʰā no vardʰayā rayím //
Sentence: 2=l    cíd asi táyā devátayāṅgiravád dʰruvā́ sīda
Sentence: 3=m    paricíd asi táyā devátayāṅgirasvád dʰruvā́ sīda
Sentence: 4=n    lokám pr̥ṇa cʰidrám pr̥ṇā́tʰo sīda śivā́ tvám / indrāgnī́ tvā bŕ̥haspátir asmín yónāv asīṣadan //
Sentence: 5=o    tā́ asya sū́dadohasaḥ sómaṁ śrīṇanti pŕ̥śnayaḥ / jánman devā́nāṃ víśas triṣv ā́ rocané divaḥ //

Paragraph: 5 
Verse: 1 
Sentence: 1=a    sám itaṁ sáṃ kalpetʰāṁ sámpriyau rociṣṇū́ sumanasyámānau / íṣam ū́rjam abʰí saṃvásānau śaṃ vām mánāṁsi sáṃ vratā́ sám u cittā́ny ā́karam //
Sentence: 2=b    ágne purīṣyādʰipā́ bʰavā tváṃ naḥ / íṣam ū́rjaṃ yájamānāya dʰehi //
Sentence: 3=c    purīṣyàs tvám agne rayimā́n puṣṭimā́ṁ asi / śivā́ḥ kr̥tvā́ díśaḥ sárvāḥ svā́ṃ yónim ihā́sadaḥ //
Sentence: 4=d    bʰávataṃ naḥ sámanasau sámokasau //

Verse: 2 
Sentence: 1    arepásau / mā́ yajñáṁ hiṁsiṣṭam mā́ yajñápatiṃ jātavedasau śiváu bʰavatam adyá naḥ //
Sentence: 2=e    mātéva putrám pr̥tʰivī́ purīṣyàm agníṁ své yónāv abʰār ukʰā́ / tā́ṃ víśvair deváir r̥túbʰiḥ saṃvidānáḥ prajā́patir viśvákarmā ví muñcatu //
Sentence: 3=f    yád asya pāré rájasaḥ śukráṃ jyótir ájāyata / tán naḥ parṣad áti dvíśó 'gne vaiśvānara svā́hā //
Sentence: 4=g    námaḥ sú te nirr̥te viśvarūpe //

Verse: 3 
Sentence: 1    ayasmáyaṃ ví cr̥tā bandʰám etám / yaména tváṃ yamyā̀ saṃvidānóttamáṃ nā́kam ádʰi rohayemám //
Sentence: 2=h    yát te devī́ nírr̥tir ābabándʰa dā́ma grīvā́sv avicartyám / idáṃ te tád ví ṣyāmy ā́yuṣo ná mádʰyād átʰā jīváḥ pitúm addʰi prámuktaḥ //
Sentence: 3=i    yásyās te asyā́ḥ krūrá āsáñ juhómy eṣā́m bandʰā́nām avasárjanāya / bʰū́mir íti tvā jánā vidúr nírr̥tiḥ //

Verse: 4 
Sentence: 1    íti tvāhám pári veda viśvátaḥ //
Sentence: 2=k    ásunvantam áyajamānam icʰa stenásyetyā́ṃ táskarasyā́nv eṣi / anyám asmád icʰa ṣá ta ityā́ námo devi nirr̥te túbʰyam astu //
Sentence: 3=l    devī́m aháṃ nírr̥tiṃ vándamānaḥ pitéva putráṃ dasaye vácobʰiḥ / víśvasya yā́ jā́yamānasya véda śíraḥśiraḥ práti sūrī́ ví caṣṭe //
Sentence: 4=m    nivéśanaḥ saṃgámano vásūnāṃ víśvā rūpā́bʰí caṣṭe //

Verse: 5 
Sentence: 1    śácībʰiḥ / devá iva savitā́ satyádʰarméndro ná tastʰau samaré patʰīnā́m //
Sentence: 2=n    sáṃ varatrā́ dadʰātana nír āhāvā́n kr̥ṇotana / siñcā́mahā avaṭám udríṇaṃ vayáṃ víśvā́hā́dastam ákṣitam //
Sentence: 3=o    níṣkr̥tāhāvam avaṭáṁ suvaratráṁ suṣecanám / udríṇaṁ siñce ákṣitam //
Sentence: 4=p    sī́rā yuñjanti kaváyo yugā́ ví tanvate pŕ̥tʰak / dʰī́rā devéṣu sumnayā́
Sentence: 5=q    yunákta sī́rā ví yugā́ tanota kr̥té yónau vapatehá //

Verse: 6 
Sentence: 1    bī́jam / girā́ ca śruṣṭíḥ sábʰarā ásan no nédīya ít sr̥ṇyā̀ pakvám ā́yat //
Sentence: 2=r    lā́ṅgalam pávīravaṁ suśévaṁ sumatítsaru / úd ít kr̥ṣati gā́m ávim prapʰarvayàṃ ca pī́varīm / prastʰā́vad ratʰavā́hanam //
Sentence: 3=s    śunáṃ naḥ pʰā́lā ví tudantu bʰū́miṁ śunáṃ kīnā́śā abʰí yantu vāhā́n / śunám parjányo mádʰunā páyobʰiḥ śúnāsīrā śunám asmā́su dʰattam //
Sentence: 4=t    kā́maṃ kāmadugʰe dʰukṣva mitrā́ya váruṇāya ca / índrāyāgnáye pūṣṇá óṣadʰībʰyaḥ prajā́bʰyaḥ //
Sentence: 5=u    gʰr̥téna sī́tā mádʰunā sámaktā víśvair deváir ánumatā marúdbʰiḥ / ū́rjasvatī páyasā pínvamānāsmā́nt sīte páyasābʰyā́vavr̥tsva //

Paragraph: 6 
Verse: 1 
Sentence: 1=a    yā́ jātā́ óṣadʰayo devébʰyas triyugám purā́ / mándāmi babʰrū́ṇām aháṁ śatáṃ dʰā́māni saptá ca //
Sentence: 2=b    śatáṃ vo amba dʰā́māni sahásram utá vo rúhaḥ / átʰā śatakratvo yūyám imám me agadáṃ kr̥ta //
Sentence: 3=c    púṣpāvatīḥ prasū́vatīḥ pʰalínīr apʰalā́ utá / áśvā iva sajítvarīr vīrúdʰaḥ pārayiṣṇávaḥ //
Sentence: 4=d    óṣadʰīr íti mātaras tád vo devīr úpa bruve / rápāṁsi vigʰnatī́r ita rápaḥ //

Verse: 2 
Sentence: 1    cātáyamānāḥ //
Sentence: 2=e    aśvattʰé vo niṣádanam parṇé vo vasatíḥ kr̥tā́ / gobʰā́ja ít kílāsatʰa yát sanávatʰa pū́ruṣam //
Sentence: 3=f    yád aháṃ vājáyann imā́ óṣadʰīr hásta ādadʰé / ātmā́ yákṣmasya naśyati purā́ jīvagŕ̥bʰo yatʰā //
Sentence: 4=g    yád óṣadʰayaḥ saṃgácʰante rā́jānaḥ sámitāv iva / vípraḥ sá ucyate bʰiṣág rakṣohā́mīvacā́tanaḥ //
Sentence: 5=h    níṣkr̥tir nā́ma vo mātā́tʰā yūyáṁ stʰa sáṃkr̥tīḥ / sarā́ḥ patatríṇīḥ //

Verse: 3 
Sentence: 1    stʰana yád āmáyati níṣ kr̥ta //
Sentence: 2=i    anyā́ vo anyā́m avatv anyā́nyásyā úpāvata / tā́ḥ sárvā óṣadʰayaḥ saṃvidānā́ idám me prā́vatā vácaḥ //
Sentence: 3=k    úc cʰúṣmā óṣadʰīnāṃ gā́vo goṣṭʰā́d iverate / dʰánaṁ saniṣyántīnām ātmā́naṃ táva pūruṣa //
Sentence: 4=l    áti víśvāḥ pariṣṭʰā́ stená iva vrajám akramuḥ / óṣadʰayaḥ prā́cucyavur yát kíṃ ca tanúvāṁ rápaḥ //
Sentence: 5=m    yā́ḥ //

Verse: 4 
Sentence: 1    ta ātastʰúr ātmā́naṃ yā́ āviviśúḥ páruḥparuḥ / tā́s te yákṣmaṃ ví bādʰantām ugró madʰyamaśī́r iva //
Sentence: 2=n    sākáṃ yakṣma prá pata śyenéna kikidīvínā / sākáṃ vā́tasya dʰrā́jyā sākáṃ naśya nihā́kayā //
Sentence: 3=o    aśvāvatī́ṁ somavatī́m ūrjáyantīm údojasam / ā́ vitsi sárvā óṣadʰīr asmā́ ariṣṭátātaye //
Sentence: 4=p    yā́ḥ pʰalínīr yā́ apʰalā́ apuṣpā́ yā́ś ca puṣpíṇīḥ / bŕ̥haspátiprasūtās tā́ no muñcantv áṁhasaḥ //
Sentence: 5=q    yā́ḥ //

Verse: 5 
Sentence: 1    óṣadʰayaḥ sómarājñīḥ práviṣṭāḥ pr̥tʰivī́m ánu / tā́sāṃ tvám asy uttamā́ prá ṇo jīvā́tave suva //
Sentence: 2=r    avapátantīr avadan divá óṣadʰayaḥ pári / yáṃ jīvám aśnávāmahai ná sá riṣyāti pū́ruṣaḥ //
Sentence: 3=s    yā́ś cedám upaśr̥ṇvánti yā́ś ca dūrám párāgatāḥ / ihá saṃgátya tā́ḥ sárvā asmai sáṃ datta bʰeṣajám //
Sentence: 4=t    mā́ vo riṣat kʰanitā́ yásmai cāháṃ kʰánāmi vaḥ / dvipác cátuṣpad asmā́kaṁ sárvam astv anāturám //
Sentence: 5=u    óṣadʰayaḥ sáṃ vadante sómena sahá rā́jñā / yásmai karóti brāhmaṇás táṁ rājan pārayāmasi //

Paragraph: 7 
Verse: 1 
Sentence: 1=a    mā́ no hiṁsīj janitā́ yáḥ pr̥tʰivyā́ yó vā dívaṁ satyádʰarmā jajā́na / yáś cā́páś candrā́ br̥hatī́r jajā́na kásmai devā́ya havíṣā vidʰema //
Sentence: 2=b    abʰyā́vartasva pr̥tʰivi yajñéna páyasā sahá / vapā́ṃ te agnír iṣitó 'va sarpatu //
Sentence: 3=c    ágne yát te śukráṃ yác candráṃ yát pūtáṃ yád yajñíyam / tád devébʰyo bʰarāmasi //
Sentence: 4=d    íṣam ū́rjam ahám itá ā́ //

Verse: 2 
Sentence: 1    dada r̥tásya dʰā́mno amŕ̥tasya yóneḥ / ā́ no góṣu viśatv áuṣadʰīṣu jáhāmi sedím ánirām ámīvām //
Sentence: 2=e    ágne táva śrávo váyo máhi bʰrājanty arcáyo vibʰāvaso / bŕ̥hadbʰāno śávasā vā́jam uktʰyàṃ dádʰāsi dāsúṣe kave //
Sentence: 3=f    irajyánn agne pratʰayasva jantúbʰir asmé rā́yo amartya / sá darśatásya vápuṣo ví rājasi pr̥ṇákṣi sānasíṁ rayím //
Sentence: 4=g    ū́rjo napāj jātavedaḥ suśastíbʰir mándasva //

Verse: 3 
Sentence: 1    dʰītíbʰir hitáḥ / tvé íṣaḥ sáṃ dadʰur bʰū́riretasaś citrótayo vāmájātāḥ //
Sentence: 2=h    pāvakávarcāḥ śukrávarcā ánūnavarcā úd iyarṣi bʰānúnā / putráḥ pitárā vicárann úpāvasy ubʰé pr̥ṇakṣi ródasī //
Sentence: 3=i    r̥tā́vānam mahiṣáṃ viśvácarṣaṇim agníṁ sumnā́ya dadʰire puró jánāḥ / śrútkarṇaṁ saprátʰastamam tvā girā́ dáivyam mā́nuṣā yugā́ //
Sentence: 4=k    niṣkartā́ram adʰvarásya prácetasaṃ kṣáyantaṁ rā́dʰase mahé / rātím bʰŕ̥gūṇām uśíjaṃ kavíkratum pr̥ṇákṣi sānasím //

Verse: 4 
Sentence: 1    rayím //
Sentence: 2=l    cíta stʰa paricíta ūrdʰvacítaḥ śrayadʰvaṃ táyā devátayāṅgirasvád dʰruvā́ḥ sīdata //
Sentence: 3=m    ā́ pyāyasva sám etu te viśvátaḥ soma vŕ̥ṣṇiyam / bʰávā vā́jasya saṃgatʰé //
Sentence: 4=n    sáṃ te páyāṁsi sám u yantu vā́jāḥ sáṃ vŕ̥ṣṇiyāny abʰimātiṣā́haḥ / āpyā́yamāno amŕ̥tāya soma diví śrávānsy uttamā́ni dʰiṣva //

Paragraph: 8 
Verse: 1 
Sentence: 1=a    abʰy àstʰād víśvāḥ pŕ̥tanā árātīs tád agnír āha tád u sóma āha / bŕ̥haspátiḥ savitā́ tán ma āha puṣā́ mādʰāt sukr̥tásya loké //
Sentence: 2=b    yád ákrandaḥ pratʰamáṃ jā́yamāna udyánt samudrā́d utá vā púrīṣāt / śyenásya pakṣā́ hariṇásya bāhū́ úpastutaṃ jánima tát te arvan //
Sentence: 3=c    apā́m pr̥ṣṭʰám asi yónir agnéḥ samudrám abʰítaḥ pínvamānam / várdʰamānam maháḥ //

Verse: 2 
Sentence: 1    ā́ ca púṣkaraṃ divó mā́trayā varṇā́ pratʰasva //
Sentence: 2=d    bráhma jajñānám pratʰamám purástād ví sīmatáḥ surúco vená āvaḥ / sá budʰníyā upamā́ asya viṣṭʰā́ḥ satáś ca yónim ásataś ca vívaḥ //
Sentence: 3=e    hiraṇyagarbʰáḥ sám avartatā́gre bʰūtásya jātáḥ pátir éka āsīt / sá dādʰāra pr̥tʰivī́ṃ dyā́m utémā́ṃ kásmai devā́ya havíṣā vidʰema //
Sentence: 4=f    drapsáś caskanda pr̥tʰivī́m ánu //

Verse: 3 
Sentence: 1    dyā́m imáṃ ca yónim ánu yáś ca pū́rvaḥ / tr̥tī́yaṃ yónim ánu saṃcárantaṃ drapsáṃ juhomy ánu saptá hótrāḥ //
Sentence: 2=g    námo astu sarpébʰyo yé ké ca pr̥tʰivī́m ánu / yé antárikṣe yé diví tébʰyaḥ sarpébʰyo námaḥ //
Sentence: 3=h    yè 'dó rocané divó yé vā sū́ryasya raśmíṣu / yéṣām apsú sádaḥ kr̥táṃ tébʰyaḥ sarpébʰyo námaḥ //
Sentence: 4=i    yā́ íṣavo yātudʰā́nānāṃ yé vā vánaspátīṁr ánu / yé vāvaṭéṣu śérate tébʰyaḥ sarpébʰyo námaḥ //

Paragraph: 9 
Verse: 1 
Sentence: 1=a    dʰruvā́si dʰarúṇā́str̥tā viśvákarmaṇā súkritā / mā́ tvā samudrá úd vadʰīn mā́ suparṇó 'vyatʰamānā pr̥tʰivī́ṃ dr̥ṁha //
Sentence: 2=b    prajā́patis tvā sādayatu pr̥tʰivyā́ḥ pr̥ṣṭʰé vyácasvatīm prátʰasvatīm prátʰo 'si pr̥tʰivy àsi bʰū́r asi bʰū́mir asy áditir asi viśvádʰāyā víśvasya bʰúvanasya dʰartrī́ pr̥tʰivī́ṃ yacʰa pr̥tʰivī́ṃ dr̥ṁha pr̥tʰivī́m mā́ hiṁsīr víśvasmai prāṇā́ya vyānā́yodānā́ya pratiṣṭʰā́yai //

Verse: 2 
Sentence: 1    carítrāyāgnís tvābʰí pātu mahyā́ svastyā́ cʰardíṣā śáṃtamena táyā devátayāṅgirasvád dʰruvā́ sīda
Sentence: 2=c    kā́ṇḍātkāṇḍāt praróhantī páruṣaḥparuṣaḥ pári / evā́ no dūrve prá tanu sahásreṇa śaténa ca //
Sentence: 3=d    yā́ śaténa pratanóṣi sahásreṇa viróhasi tásyās te devīṣṭake vidʰéma havíṣā vayám //
Sentence: 4=e    áṣāḍʰāsi sáhamānā sáhasvā́rātīḥ sáhasvārātīyatáḥ
Sentence: 5=f    sáhasva pŕ̥tanāḥ sáhasva pr̥tanyatáḥ sahásravīryā //

Verse: 3 
Sentence: 1    asi sā́ mā jinva //
Sentence: 2=g    mádʰu vā́tā r̥tāyaté mádʰu kṣaranti síndʰavaḥ / mā́dʰvīr naḥ santv óṣadʰīḥ //
Sentence: 3=h    mádʰu náktam utóṣási mádʰumat pā́rtʰivaṁ rájaḥ / mádʰu dyáur astu naḥ pitā́ //
Sentence: 4=i    mádʰumān no vánaspátir mádʰumāṁ astu sū́ryaḥ / mā́dʰvīr gā́vo bʰavantu naḥ //
Sentence: 5=k    mahī́ dyáuḥ pr̥tʰivī́ ca na imáṃ yajñám mimikṣatām / pipr̥tā́ṃ no bʰárīmabʰiḥ //
Sentence: 6=l    tád víṣṇoḥ paramám //

Verse: 4 
Sentence: 1    padáṁ sádā paśyanti sūráyaḥ / divī́va cákṣur ā́tatam //
Sentence: 2=m    dʰruvā́si pr̥tʰivi sáhasva pr̥tanyatáḥ / syūtā́ devébʰir amŕ̥tenā́gāḥ //
Sentence: 3=n    yā́s te agne sū́rye rúca udyató dívam ātanvánti raśmíbʰiḥ / tā́bʰiḥ sárvābʰī rucé jánāya nas kr̥dʰi //
Sentence: 4=o    yā́ vo devāḥ sū́rye rúco góṣv áśveṣu yā́ rúcaḥ / índrāgnī tā́bʰiḥ sárvābʰī rúcaṃ no dʰatta br̥haspate
Sentence: 5=p    virā́ṭ //

Verse: 5 
Sentence: 1    jyótir adʰārayat samrā́ḍ jyótir adʰārayat svarā́ḍ jyótir adʰārayat
Sentence: 2=q    ágne yukṣvā́ hí yé távāśvāso deva sādʰávaḥ / áraṃ váhanty āśávaḥ //
Sentence: 3=r    yukṣvā́ hí devahū́tamāṁ áśvāṁ agne ratʰī́r iva / ní hótā pūrvyáḥ sadaḥ //
Sentence: 4=s    drapsáś caskanda pr̥tʰivī́m ánu dyā́m imáṃ ca yónim ánu yáś ca pū́rvaḥ / tr̥tī́yaṃ yónim ánu saṃcárantaṃ drapsáṃ juhomy ánu saptá //

Verse: 6 
Sentence: 1    hótrāḥ //
Sentence: 2=t    ábʰūd idáṃ víśvasya bʰúvanasya vā́jinam agnér vaiśvānarásya ca / agnír jyótiṣā jyótiṣmān rukmó várcasā várcasvān //
Sentence: 3=u    r̥cé tvā rucé tvā
Sentence: 4=v    sám ít sravanti saríto ná dʰénāḥ / antár hr̥dā́ mánasā pūyámānāḥ / gʰr̥tásya dʰā́rā abʰí cākaśīmi / hiraṇyáyo vetasó mádʰya āsām //
Sentence: 5=w    tásmint suparṇó madʰukŕ̥t kulāyī́ bʰájann āste mádʰu devátābʰyaḥ / tásyāsate hárayaḥ saptá tī́re svadʰā́ṃ dúhānā amŕ̥tasya dʰā́rām //

Paragraph: 10 
Verse: 1 
Sentence: 1=a    ādityáṃ gárbʰam páyasā samañjánt sahásrasya pratimā́ṃ viśvárūpam / pári vr̥ṅgdʰi hárasā mā́bʰí mr̥kṣaḥ śatā́yuṣaṃ kr̥ṇuhi cīyámānaḥ //
Sentence: 2=b    imám mā́ hiṁsīr dvipā́dam paśūnā́ṁ sáhasrākṣa médʰa ā́ cīyámānaḥ / máyum āraṇyám ánu te diśāmi téna cinvānás tanúvo ní ṣīda //
Sentence: 3=c    vā́tasya dʰrā́jiṃ váruṇasya nā́bʰim áśvaṃ jajñānáṁ sarirásya mádʰye / śíśuṃ nadī́nāṁ hárim ádribuddʰam ágne mā hiṁsīḥ //

Verse: 2 
Sentence: 1    paramé vyòman //
Sentence: 2=d    imám mā́ hiṁsīr ékaśapʰam paśūnā́ṃ kanikradáṃ vājínaṃ vā́jineṣu / gaurám āraṇyám ánu te diśāmi téna cinvānás tanúvo ní ṣīda //
Sentence: 3=e    ájasram índum aruṣám bʰuraṇyúm agním īḍe pūrvácittau námobʰiḥ / sá párvabʰir r̥tuśáḥ kálpamāno gā́m mā́ hiṁsīr áditiṃ virā́jam //
Sentence: 4=f    imáṁ samudráṁ śatádʰāram útsaṃ vyacyámānam bʰúvanasya mádʰye / gʰr̥táṃ dúhānām áditiṃ jánāyā́gne mā́ //

Verse: 3 
Sentence: 1    hiṁsīḥ paramé vyòman / gavayám āraṇyám ánu te diśāmi téna cinvānás tanúvo ní ṣīda //
Sentence: 2=g    várūtriṃ tváṣṭur váruṇasya nā́bʰim áviṃ jajñānā́ṁ rájasaḥ párasmāt / mahī́ṁ sáhasrī́m ásurasya mayā́m ágne mā́ hiṁsīḥ párame vyòman //
Sentence: 3=h    imā́m ūrṇāyúṃ váruṇasya māyā́ṃ tvácam paśūnā́ṃ dvipádāṃ cátuṣpadām / tváṣṭuḥ prajā́nām pratʰamáṃ janítram ágne mā́ hiṁsīḥ párame vyòman / úṣṭram āraṇyám ánu //

Verse: 4 
Sentence: 1    te diśāmi téna cinvānás tanúvo ní ṣīda //
Sentence: 2=i    yó agnír agnés tápasó 'dʰi jātáḥ śócāt pr̥tʰivyā́ utá vā dívas pári / yéna prajā́ viśvákarmā vyā́naṭ tám agne héḍaḥ pári te vr̥ṇaktu //
Sentence: 3=k    ajā́ hy àgnér ájaniṣṭa gárbʰāt sā́ vā́ apaśyaj janitā́ram ágre / táyā róham āyann úpa médʰyāsaḥ táyā devā́ devátām ágra āyan / śarabʰám āraṇyám ānu te diśāmi téna cinvānás tanúvo ní ṣīda //

Paragraph: 11 
Verse: 1 
Sentence: 1=a    índrāgnī rocanā́ diváḥ pári vā́jeṣu bʰūṣatʰaḥ / tád vāṃ ceti prá rīvyàm //
Sentence: 2=b    śnátʰad vr̥trám utá sanoti vā́jam índrā yó agnī́ sáhurī saparyā́t / irajyántā vasavyàsya bʰū́reḥ sáhastamā sahásā vājayántā //
Sentence: 3=c    prá carṣaṇíbʰyaḥ pr̥tanā háveṣu prá pr̥tʰivyā́ riricātʰe diváś ca / prá síndʰubʰyaḥ prá giríbʰyo mahitvā́ préndrāgnī viśvā bʰúvanā́ty anyā́ //
Sentence: 4=d    máruto yásya hí //

Verse: 2 
Sentence: 1    kṣáye pātʰā́ divó vimahasaḥ / sá sugopā́tamo jánaḥ //
Sentence: 2=e    yajñáir vā yajñavāhaso víprasya vā matīnā́m / márutaḥ śriṇutā́ hávam //
Sentence: 3=f    śriyáse kám bʰānúbʰiḥ sám mimikṣire té raśmíbʰis tá ŕ̥kvabʰiḥ sukʰādáyaḥ / té vā́śīmanta iṣmíṇo ábʰīravo vidré priyásya mā́rutasya dʰā́mnaḥ //
Sentence: 4=g    áva te héḍa
Sentence: 5=h    úd uttamám /
Sentence: 6=i    káyā naś citrá ā́ bʰuvad ūtī́ sadā́vr̥dʰaḥ sákʰā / káyā śáciṣṭʰayā vr̥tā́ //

Verse: 3 
Sentence: 1=k    kó adyá yuṅkte dʰurí gā́ r̥tásya śímīvato bʰāmíno dúrhr̥ṇāyūn / āsánniṣūn hr̥tsváso mayobʰū́n yá eṣām bʰr̥tyā́m r̥ṇádʰat sá jīvāt //
Sentence: 2=l    ágne naya \
Sentence: 3=m    ā́ devā́nām \
Sentence: 4=n    śaṃ no bʰavantu
Sentence: 5=o    vā́jevāje
Sentence: 6=p    apsv àgne sádʰiṣ ṭáva sáuṣadʰīr ánu rudʰyase gárbʰe sáñ jāyase púnaḥ //
Sentence: 7=q    vŕ̥ṣā soma dyumā́ṁ asi vŕ̥ṣā deva vŕ̥ṣavrataḥ / vŕ̥ṣā dʰármāṇi dadʰiṣe //
Sentence: 8=r    imám me varuṇa
Sentence: 9=s    tát tvā yāmi
Sentence: 10=t    tváṃ no agne
Sentence: 11=u    sá tváṃ no agne //

Next part


This text is part of the TITUS edition of Black Yajur-Veda: Taittiriya-Samhita.

Copyright TITUS Project, Frankfurt a/M, 9.2.2018. No parts of this document may be republished in any form without prior permission by the copyright holder.