TITUS
Black Yajur-Veda: Taittiriya-Samhita
Part No. 22
Previous part

Chapter: 3 
Paragraph: 1 
Verse: 1 
Sentence: 1=a    apā́ṃ tvémant sādayāmy apā́ṃ tvodmant sādayāmy apā́ṃ tvā bʰásmant sādayāmy apā́ṃ tvā jyótiṣi sādayāmy apā́ṃ tvā́yane sādayāmi \
Sentence: 2=b    arṇavé sádane sīda samudré sádane sīda salilé sádane sīdāpā́ṃ kṣáye sīdāpā́ṁ sádʰiṣi sīda \
Sentence: 3=c    apā́ṃ tvā sádane sādayāmy apā́ṃ tvā sadʰástʰe sādayāmy apā́ṃ tvā púrīṣe sādayāmy apā́ṃ tvā yónau sādayāmy apā́ṃ tvā pā́tʰasi sādayāmi
Sentence: 4=d    gāyatrī́ cʰándas triṣṭúp cʰándo jágatī cʰándo 'nuṣṭúp cʰándaḥ paṅktíś cʰándaḥ //

Paragraph: 2 
Verse: 1 
Sentence: 1=a    ayám puró bʰúvas tásya prāṇó bʰauvāyanó vasantáḥ prāṇāyanó gāyatrī́ vāsantī́ gāyatriyái gāyatráṃ gāyatrā́d upāṁśúr upāṁśós trivŕ̥t trivŕ̥to ratʰaṃtaráṁ ratʰaṃtarā́d vásiṣṭʰa ŕ̥ṣiḥ prajā́patigr̥hītayā tváyā prāṇáṃ gr̥hṇāmi prajā́bʰyas \
Sentence: 2=b    ayáṃ dakṣiṇā́ viśvákarmā tásya máno vaiśvakarmaṇáṃ grīṣmó mānasás triṣṭúg graiṣmī́ triṣṭúbʰa aiḍám aiḍā́d antaryāmò 'ntaryāmā́t pañcadaśáḥ pañcadaśā́d br̥hád br̥háto bʰarádvāja ŕ̥ṣiḥ prajā́patigr̥hītayā tváyā mánaḥ //

Verse: 2 
Sentence: 1    gr̥hṇāmi prajā́bʰyas \
Sentence: 2=c    ayám paścā́d viśvávyācās tásya cákṣur vaiśvavyacasáṃ várṣāṇi cākṣuṣā́ṇi jágatī vārṣī́ jágatyā ŕ̥kṣamam ŕ̥kṣamāc cʰukráḥ śukrā́t saptadaśáḥ saptadaśā́d vairūpáṃ vairūpā́d viśvā́mitra ŕ̥ṣiḥ prajā́patigr̥hītayā tváyā cákṣur gr̥hnāmi prajā́bʰyas \
Sentence: 3=d    idám uttarā́t súvas tásya śrótraṁ sauváṁ śarác cʰrautry ànuṣtū́p śārady ànuṣṭúbʰaḥ svāráṁ svārā́n mantʰī́ mantʰína ekaviṁśá ekaviṁśā́d vairājáṃ vairājā́j jamádagnir ŕ̥ṣiḥ prajā́patigr̥hītayā //

Verse: 3 
Sentence: 1    tváyā śrótraṃ gr̥hṇāmi prajā́bʰyas \
Sentence: 2=e    iyám upári matís tásyai vā́ṅ mātī́ hemantó vācyāyanáḥ paṅktír haimantī́ paṅktyái nidʰánavan nidʰanaváta āgrayaṇá āgrayaṇā́t triṇavatrayastriṁśáu triṇavatrayastriṁśā́bʰyāṁ śākvararaivaté śākvararaivatā́bʰyāṃ viśvákarmárṣiḥ prajā́patigr̥hītayā tváyā vā́caṃ gr̥hṇāmi pr

Paragraph: 3 
Verse: 1 
Sentence: 1=a    prā́cī diśā́ṃ vasantá r̥tūnā́m agnír devátā bráhma dráviṇaṃ trivŕ̥t stómaḥ sá u pañcadaśávartanis tryávir váyaḥ kr̥tám áyānām purovātó vā́taḥ sā́naga ŕ̥ṣis \
Sentence: 2=b    daksiṇā́ diśā́ṃ grīṣmá rtūnā́m índro devátā kṣatráṃ dráviṇam pañcadaśá stómaḥ sá u saptadaśavartanir dityavā́ḍ váyas trétā́yānāṃ dakṣiṇādvātó vā́taḥ sanātána ŕ̥ṣiḥ
Sentence: 3=c    prātī́cī diśā́ṃ varṣā́ r̥tūnā́ṃ víśve devā́ devátā víṭ //

Verse: 2 
Sentence: 1    dráviṇaṁ saptadaśá stómaḥ sú uv ekaviṁśávartanis trivatsó váyo dvāparó 'yānām paścādvātó vā́to 'habʰū́na ŕ̥ṣis \
Sentence: 2=d    údicī diśā́ṁ śarád r̥tūnā́m mitrā́váruṇau devátā puṣṭáṃ dráviṇam ekaviṁśá stómaḥ sá u triṇavávartanis turyavā́ḍ váya āskandó 'yānām uttarādvātó vā́taḥ pratná ŕ̥ṣis \
Sentence: 3=e    ūrdʰvā́ diśā́ṁ hemantaśiśirā́v r̥tūnā́m bŕ̥haspátir devátā várco dráviṇaṃ triṇavá stómaḥ sá u trayastriṁśávartaniḥ paṣṭʰavā́d váyo 'bʰibʰū́r áyānāṃ viṣvagvātó vā́taḥ suparṇá ŕ̥ṣiḥ
Sentence: 4=f    pitáraḥ pitāmahā́ḥ páré 'vare té naḥ pāntu té no 'vantv asmín bráhmann asmín kṣatrè 'syā́m āśiṣy asyā́m purodʰā́yām asmín kármann asyā́ṃ deváhūtyām //

Paragraph: 4 
Verse: 1 
Sentence: 1=a    dʰruvákṣitir dʰruváyonir dʰruvā́si dʰruvā́ṃ yónim ā́ sīda sādʰyā́ / úkʰyasya ketúm pratʰamám purástād aśvínādʰvaryū́ sādayatām ihá tvā //
Sentence: 2=b    své dákṣe dákṣapitehá sīda devatrā́ pr̥tʰivī́ br̥hatī́ rárāṇā / svāsastʰā́ tanúvā sáṃ viśasva pitévaidʰi sūnáva ā́suśévāśvínādʰvaryū́ sādayatām ihá tvā //
Sentence: 3=c    kulāyínī vásumatī vayodʰā́ rayíṃ no vardʰa bahuláṁ suvī́ram //

Verse: 2 
Sentence: 1    ápāmatiṃ durmatím bā́dʰamānā rāyás póṣe yajñápatim ābʰájantī súvar dʰehi yájamānāya póṣam aśvínādʰvaryū́ sādayatām ihá tvā //
Sentence: 2=d    agnéḥ púrīṣam asi devayā́nī tā́ṃ tvā víśve abʰí gr̥ṇantu devā́ḥ / stómapr̥ṣṭʰā gʰr̥távatīhá sīda prajā́vad asmé dráviṇā́yajasvāśvínādʰvaryū́ sādayatām ihá tvā //
Sentence: 3=e    divó mūrdʰā́si pr̥tʰivyā́ nā́bʰir viṣṭámbʰanī diśā́m ábʰipatnī bʰúvanānām //

Verse: 3 
Sentence: 1    ūrmír drapsó apā́m asi viśvákarmā ta ŕ̥ṣir aśvínādʰvaryū́ sādayatām ihá tvā //
Sentence: 2=f    sajū́r r̥túbʰiḥ sajū́r vidʰā́bʰiḥ sajū́r vásubʰiḥ sajū́ rudráiḥ sajū́r ādityáiḥ sajū́r víśvair deváiḥ sajū́r deváiḥ sajū́r deváir vayonādʰáir agnáye tvā vaiśvānarā́yāśvínādʰvaryū́ sādayatām ihá tvā
Sentence: 3=g    prāṇám me pāhy apānám me pāhi vyānám me pāhi cákṣur ma urvyā́ ví bʰāhi śrótram me ślokaya \
Sentence: 4=h    apás pinváuṣadʰīr jinva dvipā́t pāhi cátuṣpād ava divó vŕ̥ṣṭim éraya //

Paragraph: 5 
Verse: 1 
Sentence: 1    tryávir váyas triṣṭúp cʰándas \
Sentence: 2    dityavā́ḍ váyo virā́ṭ cʰándaḥ
Sentence: 3    páñcāvir váyo gāyatrī́ cʰándas
Sentence: 4    trivatsó váya uṣṇíhā cʰándas
Sentence: 5    turyavā́ḍ váyo 'nuṣṭúp cʰándaḥ
Sentence: 6    paṣṭʰavā́d váyo br̥hatī́ cʰándas \
Sentence: 7    ukṣā́ váyaḥ satóbr̥hatī cʰándas \
Sentence: 8    r̥ṣabʰó váyaḥ kakúc cʰándas \
Sentence: 9    dʰenúr váyo jágatī cʰándas \
Sentence: 10    anaḍvā́n váyaḥ paṅktíś cʰándas \
Sentence: 11    básto váyo vivaláṃ cʰándas \
Sentence: 12    vr̥ṣṇír váyo viśāláṃ cʰándaḥ
Sentence: 13    púruṣo váyas tandráṃ cʰándas \
Sentence: 14    vyāgʰró váyó 'nādʰr̥ṣṭaṃ cʰándaḥ
Sentence: 15    siṁhó váyaś cʰánidś cʰándas \
Sentence: 16    viṣṭambʰó váyó 'dʰipatiś cʰándaḥ
Sentence: 17    kṣatráṃ váyo máyaṃdaṃ cʰándas \
Sentence: 18    viśvákarmā váyaḥ parameṣṭʰī́ cʰándas \
Sentence: 19    mūrdʰā́ váyaḥ prajā́patiś cʰándaḥ //

Paragraph: 6 
Verse: 1 
Sentence: 1=a    índrāgnī ávyatʰamānām íṣṭakāṃ dr̥ṁhataṃ yuvám / pr̥ṣṭʰéna dyā́vāpr̥tʰivī́ antárikṣaṃ ca ví bādʰatām //
Sentence: 2=b    viśvákarmā tvā sādayatv antárikṣasya pr̥ṣṭʰé vyácasvatīm prátʰasvatīm bʰā́svatīṁ sūrimátīm ā́ yā́ dyā́m bʰā́sy ā́ pr̥tʰivī́m órv àntárikṣam antárikṣaṃ yacʰāntárikṣaṃ dr̥ṁhāntárikṣam mā́ hiṁsīr víśvasmai prāṇā́yāpānā́ya vyānā́yodānā́ya pratiṣṭʰā́yai carítrāya vāyús tvābʰí pātu mahyā́ svastyā́ cʰardíṣā //

Verse: 2 
Sentence: 1    śáṃtamena táyā devátayāṅgirasvád dʰruvā́ sīda /
Sentence: 2=c    rā́jñy asi prā́cī díg virā́ḍ asi dakṣiṇā́ dík samrā́ḍ asipratī́cī dík svarā́ḍ asy údīcī díg ádʰipatny asi br̥hatī́ { dik ^ díś } \
Sentence: 3=d    ā́yur me pāhi prāṇám me pāhy apānám me pāhi vyānám me pāhi cákṣur me pāhi śrótram me pāhi máno me jinva vā́cam me pinvātmā́nam me pāhi jyótir me yacʰa //

Paragraph: 7 
Verse: 1 
Sentence: 1=a    mā́ cʰándaḥ pramā́ cʰándaḥ pratimā́ cʰándo 'srīviś cʰándaḥ praṅktíś cʰánda uṣṇíhā cʰándo br̥hatī́ cʰándo 'nuṣṭúp cʰándo virā́ṭ cʰándo gāyatrī́ cʰándas triṣṭúp cʰándo jágatī cʰándaḥ pr̥tʰivī́ cʰándo 'ntárikṣaṃ cʰándo dyáuś cʰándaḥ sámāś cʰándo nákṣatrāṇi cʰándo mánaś cʰándo vā́k cʰándaḥ kr̥ṣíś cʰándo híraṇyaṃ cʰándo gáuś cʰándo 'jā́ cʰándó 'śvaś cʰándaḥ /
Sentence: 2    agnír devátā //

Verse: 2 
Sentence: 1    vā́to devátā sū́ryo devátā candrámā devátā vásavo devátā rudrā́ devátādityā́ devátā víśve devā́ devátā marúto devátā bŕ̥haspátir deváténdro devátā váruṇo devátā /
Sentence: 2=b    mūrdʰā́si rā́ḍ dʰruvā́si dʰarúṇā yantry asi yámitrīṣé tvorjé tvā kr̥ṣyái tvā kṣémāya tvā yántrī rā́ḍ dʰruvā́si dʰáraṇī dʰartry àsi dʰáritry ā́yuṣe tvā várcase tváujase tvā bálāya tvā //

Paragraph: 8 
Verse: 1 
Sentence: 1    āśús trvŕ̥t \
Sentence: 2    bʰāntáḥ pañcadaśás \
Sentence: 3    vyòma saptadaśáḥ
Sentence: 4    prátūrtir aṣṭādaśás
Sentence: 5    tápo navadaśás \
Sentence: 6    abʰivartáḥ saviṁśás \
Sentence: 7    dʰarúṇa ekaviṁśás \
Sentence: 8    várco dvāviṁśáḥ
Sentence: 9    sambʰáraṇas trayoviṁśás \
Sentence: 10    yóniś caturviṁśás \
Sentence: 11    gárbʰāḥ pañcaviṁśás \
Sentence: 12    ójas triṇaváḥ
Sentence: 13    krátur ekatriṁśáḥ
Sentence: 14    pratiṣṭʰā́ trayastriṁśás \
Sentence: 15    bradʰnásya viṣṭápaṃ catustriṁśás \
Sentence: 16    nā́kaḥ ṣaṭtriṁśás \
Sentence: 17    vivartò 'ṣṭācatvāriṁśás \
Sentence: 18    dʰartráś catuṣṭomáḥ //

Paragraph: 9 
Verse: 1 
Sentence: 1=a    agnér bʰāgò 'si dīkṣā́yā ā́dʰipatyam bráhma spr̥táṃ tr̥vŕ̥t stómas \
Sentence: 2=b    índrasya bʰāgò 'si víṣṇor ā́dʰipatyaṃ kṣatráṁ spr̥tám pañcadaśá stómas \
Sentence: 3=c    nr̥cákṣasām bʰāgò 'si dʰātúr ā́dʰipatyaṃ janítraṁ spr̥táṁ saptadaśá stómas \
Sentence: 4=d    mitrásya bʰāgò 'si váruṇasyā́dʰipatyaṃ divó vr̥ṣṭír vā́tā spr̥tā́ ekaviṁśá stomás \
Sentence: 5=e    ádityai bʰāgò 'si pūṣṇá ā́dʰipatyam ója spr̥táṃ triṇavá stómas \
Sentence: 6=f    vásūnām bʰāgò 'si //

Verse: 2 
Sentence: 1    rudrā́ṇām ā́dʰipatyaṃ cátuṣpāt spr̥táṃ caturviṁśá stómas \
Sentence: 2=g    ādityā́nām bʰāgò 'si marútām ā́dʰipatyaṃ gárbʰā spr̥tā́ḥ pañcaviṁśá stómas \
Sentence: 3=h    devásya savitúr bʰāgò 'si bŕ̥haspáter dā́hipatyaṁ samī́cīr díśa spr̥tā́ś catuṣṭomá stómas \
Sentence: 4=i    yā́vānām bʰāgò 'sy áyāvānām ā́dʰipatyam prajā́ spr̥tā́ś catuścatvāriṁśá stómas \
Sentence: 5=k    r̥bʰūṇā́m bʰāgò 'si víśveṣāṃ devā́nām ā́dʰipatyam bʰūtáṃ níśāntaṁ spr̥táṃ trayastriṁśa stómaḥ //

Paragraph: 10 
Verse: 1 
Sentence: 1    ékayāstuvata prajā́ adʰīyanta prajā́patir ádʰipatir āsīt
Sentence: 2    tisŕ̥bʰir astuvata bráhmāsr̥jyata bráhmaṇas pátir ádʰipatir āsīt
Sentence: 3    pañcábʰir astuvata bʰūtā́ny asr̥jyanta bʰūtā́nām pátir ádʰipatir āsīt
Sentence: 4    saptábʰir astuvata saptarṣáyo 'sr̥jyanta dʰātā́dʰipatir āsīt \
Sentence: 5    navábʰir astuvata pitáro 'sr̥jyantā́ditir ádʰipatny āsīt \
Sentence: 6    ekādaśábʰir astuvatartávo 'sr̥jyantārtavó 'dʰipatir āsīt
Sentence: 7    trayodaśábʰir astuvata mā́sā asr̥jyanta saṃvatsaró 'dʰipatiḥ //

Verse: 2 
Sentence: 1    āsīt
Sentence: 2    pañcadaśábʰir astuvata kṣatrám asr̥jyaténdró 'dʰipatir āsīt
Sentence: 3    saptadaśábʰir astuvata paśávo 'sr̥jyanta bŕ̥haspátir ádʰipatir āsīt \
Sentence: 4    navadaśábʰir astuvata śūdrāryā́v asr̥jyetām ahorātré ádʰipatnī āstām
Sentence: 5    ékaviṁśatyāstuvatáikaśapʰāḥ paśávo 'rṣjyanta váruṇó 'dʰipatir āsīt
Sentence: 6    tráyoviṁśatyāstuvata kṣudrā́ḥ paśávo 'sr̥jyanta pū́ṣā́dʰipatir āsīt
Sentence: 7    páñcaviṁśatyāstuvatāraṇyā́ḥ paśávo 'sr̥jyanta vāyúr ádʰipatir āsīt
Sentence: 8    saptáviṁśatyāstuvata dyā́vāpr̥tʰivī́ ví //

Verse: 3 
Sentence: 1    aitāṃ vásavo rudrā́ ādityā́ ánu vy ā̀yan téṣām ā́dʰipatyam āsīt \
Sentence: 2    návaviṁśatyāstuvata vánaspátayo 'sr̥jyanta sómó 'dʰipatir āsīt \
Sentence: 3    ékatriṁśatāstuvata prajā́ asr̥jyanta yā́vānāṃ cā́yāvānāṃ cā́dʰipatyam āsīt
Sentence: 4    tráyastriṁśatāstuvata bʰūtā́ny aśāmyan prajā́patiḥ parameṣṭʰy ádʰipatir āsīt //

Paragraph: 11 
Verse: 1 
Sentence: 1=a    iyám evá sā́ yā́ pratʰamā́ vyáucʰad antár asyā́ṃ carati práviṣṭā / vadʰū́r jajāna navagáj jánitrī tráya enām mahimā́naḥ sacante //
Sentence: 2=b    cʰándasvatī uṣásā pépiśāne samānáṃ yónim ánu saṃcáratnī / sū́ryapatnī ví carataḥ prajānatī́ ketúṃ kr̥ṇvāné ajáre bʰū́riretasā //
Sentence: 3=c    r̥tásya pántʰām ánu tisrá ā́gus tráyo gʰarmā́so ánu yótiṣā́guḥ / prajā́m ékā rákṣaty ū́rjam ékā //

Verse: 2 
Sentence: 1    vratám ékā rakṣati devayūnā́m //
Sentence: 2=d    catuṣṭomó abʰavad yā́ turī́yā yajñásya pakṣā́v r̥ṣayo bʰávantī / gāyatrī́ṃ triṣṭúbʰaṃ jágatīm anuṣṭúbʰam br̥hád arkáṃ yuñjānā́ḥ súvar ā́bʰarann idám //
Sentence: 3=e    pañcábʰir dʰātā́ ví dadʰāv idáṃ yát tā́sāṁ svásr̥̄r ajanayat páñcapañca / tā́sām u yanti prayavéṇa páñca nā́nā rūpā́ṇi krátavo vásānāḥ //
Sentence: 4=f    triṁśát svásāra úpa yanti niṣkr̥táṁ samānáṃ ketúm prátimuñcámānāḥ //

Verse: 3 
Sentence: 1    r̥tū́ṁs tanvate kaváyaḥ prajānatī́r mádʰyecʰandasaḥ pári yanti bʰā́svatīḥ //
Sentence: 2=g    jyótiṣmatī práti muñcate nábʰo rā́trī devī́ sū́ryasya vratā́ni / ví paśyanti paśávo jā́yamānā nā́nārūpā mātúr asyā upástʰe //
Sentence: 3=h    ekāṣṭakā́ tápasā tápyamānā jajā́na gárbʰam mahimā́nam índram / téna dásyūn vy àsahanta devā́ hantā́surāṇām abʰavac cʰácībʰiḥ //
Sentence: 4=i    ánānujām anujā́m mā́m akarta satyáṃ vádanty ánv icʰa etát / bʰūyā́sam //

Verse: 4 
Sentence: 1    asya sumatáu yátʰā yūyám anyā́ vo anyā́m áti mā́ prá yukta //
Sentence: 2=k    ábʰūn máma sumatáu viśvávedā ā́ṣṭa pratiṣṭʰā́m ávidad dʰí gādʰám / bʰūyā́sam asya sumatáu yátʰā yūyám anyā́ vo anyā́m áti mā́ prá yukta //
Sentence: 3=l    páñca vyùṣṭīr ánu páñca dóhā gā́m páñcanāmnīm r̥távó 'nu páñca / páñca díśaḥ pañcadaśéna kḷptā́ḥ samānámūrdʰnīr abʰí lokám ékam //

Verse: 5 
Sentence: 1=m    r̥tásya gárbʰaḥ pratʰamā́ vyūṣúṣy apā́m ékā mahimā́nam bibʰarti / sū́ryasyáikā cárati niṣkr̥téṣu gʰarmásyáikā savitáikāṃ ní yacʰati //
Sentence: 2=n    yā́ pratʰamā́ vyáucʰat sā́ dʰenúr abʰavad yamé / sā́ naḥ páyasvatī dʰukṣvóttarāmuttarāṁ sámām //
Sentence: 3=o    śukrárṣabʰā nábʰasā jyótiṣā́gād viśvárūpā śabalī́r agníketuḥ / samānám ártʰaṁ svapasyámānā bíbʰratī jarā́m ajara uṣa ā́gāḥ //
Sentence: 4=p    r̥tūnā́m pátnī pratʰaméyám ā́gād áhnāṃ netrī́ janitrī́ prajā́nām / ékā satī́ bahudʰóṣo vy ùcʰasy ájīrṇā tváṃ jarayasi sárvam anyát //

Paragraph: 12 
Verse: 1 
Sentence: 1=a    ágne jātā́n prá ṇudā naḥ sapátnān práty ájātāñ jātavedo nudasva / asmé dīdihi sumánā áheḍan táva syāṁ śárman trivárūtʰa udbʰít //
Sentence: 2=b    sáhasā jātā́n prá ṇudā naḥ sapátnān práty ájātāñ jātavedo nudasva / ádʰi no brūhi sumanasyámāno vayáṁ syāma prá ṇudā naḥ sapátnān //
Sentence: 3=c    catuścatvāriṁśá stómo várco dráviṇam \
Sentence: 4=d    ṣoḍaśá stóma ójo drávinam
Sentence: 5=e    pr̥tʰivyā́ḥ púrīṣam asi //

Verse: 2 
Sentence: 1    ápso nā́ma /
Sentence: 2=f    évaś cʰándo várivaś cʰándaḥ śambʰū́ś cʰándaḥ paribʰū́ś cʰánda ācʰác cʰándo mánaś cʰándo vyácaś cʰándaḥ síndʰuś cʰándaḥ samudráṃ cʰándaḥ saliláṃ cʰándaḥ saṃyác cʰándo viyác cʰándo br̥hác cʰándo ratʰaṃtaráṃ cʰándo nikāyáś cʰándo vivadʰáś cʰándo gíraś cʰándo bʰrájaś cʰándaḥ saṣṭúp cʰándo 'nuṣṭúp cʰándaḥ kakúc cʰándas trikakúc cʰándaḥ kāvyáṃ cʰándo 'ṅkupáṃ cʰándaḥ //

Verse: 3 
Sentence: 1    padápaṅktiś cʰándo 'kṣárapaṅktiś cʰándo viṣṭārápaṅktiś cʰándaḥ kṣuró bʰŕ̥jvāñ cʰándaḥ pracʰác cʰándaḥ pakṣáś cʰánda evaś cʰándo várivaś cʰándo váyaś cʰándo vayaskŕ̥c cʰándo viśāláṃ cʰándo víṣpardʰāś cʰándaś cʰandíś cʰándo dūrohaṇáṃ cʰándas tandráṃ cʰándo 'ṅkāṅkáṃ cʰándaḥ //

Paragraph: 13 
Verse: 1 
Sentence: 1=a    agnír vr̥trā́ṇi jaṅgʰanad draviṇasyúr vipanyáyā / sámiddʰaḥ śukrá ā́hutaḥ //
Sentence: 2=b    tváṁ somāsi sátpatis tváṁ rā́jotá vr̥trahā́ / tvám bʰadró asi krátuḥ //
Sentence: 3=c    bʰadrā́ te agne svanīka saṃdŕ̥g gʰorásya sató víṣuṇasya cā́ruḥ / ná yát te śocís támasā váranta ná dʰvasmā́nas tanúvi répa ā́ dʰuḥ //
Sentence: 4=d    bʰadráṃ te agne sahasinn ánīkam upāká ā́ rocate sū́ryasya //

Verse: 2 
Sentence: 1    rúśad dr̥śé dadr̥śe naktayā́ cid árūkṣitaṃ dr̥śá ā́ rūpé ánnam //
Sentence: 2=e    sáinā́nīkena suvidátro asmé yáṣṭā devā́ṁ ā́yajiṣṭʰaḥ svastí / ádabdʰo gopā́ utá naḥ paraspā́ ágne dyumád utá revád didīhi //
Sentence: 3=f    svastí no divó agne pr̥tʰivyā́ viśvā́yur dʰehi yajátʰāya deva / yát sīmáhi divijāta práśastaṃ tád asmā́su dráviṇaṃ dʰehi citrám //
Sentence: 4=g    yátʰā hotar mánuṣaḥ //

Verse: 3 
Sentence: 1    devátātā yajñébʰiḥ sūno sahaso yájāsi / evā́no adyá samanā́ samānā́n uśánn agna uśató yakṣi devā́n //
Sentence: 2=h    agním īḍe puróhitaṃ yajñásya devám r̥tvíjam / hótāraṁ ratnadʰā́tamam //
Sentence: 3=i    vŕ̥ṣā soma dyumā́ṁ asi vr̥ṣā deva vŕ̥ṣavrataḥ / vŕ̥ṣā dʰármāṇi dadʰiṣe //
Sentence: 4=k    sā́ṃtapanā idáṁ havír márutas táj jujuṣṭana / yuṣmā́kotī́ riśādasaḥ //
Sentence: 5=l    yó no márto vasavo durhr̥ṇāyús tiráḥ satyā́ni marutaḥ //

Verse: 4 
Sentence: 1    jígʰāṁsāt / druháḥ pā́śam práti sá mucīṣṭa tápiṣṭʰena tápasā hantanā tám //
Sentence: 2=m    saṃvatsarī́ṇā marútaḥ svarkā́ urukṣáyāḥ ságaṇā mā́nuṣeṣu / tè 'smát pā́śān prá muñcantv áṁhasaḥ sāṃtapanā́ madirā́ mādayiṣṇávaḥ //
Sentence: 3=n    piprīhí devā́ṁ uśató yaviṣṭʰa vidvā́ṁ r̥tū́ṁr r̥tupate yajehá / yé dáivyā r̥tvíjas tébʰir agne tváṁ hótr̥ṇām asy ā́yajiṣṭʰaḥ //
Sentence: 4=o    ágne yád adyá viśó adʰvarasya hotaḥ pā́vaka //

Verse: 5 
Sentence: 1    śoce véṣ ṭváṁ hí yájvā / r̥tā́ yajāsi mahinā́ ví yád bʰū́r havyā́ vaha yaviṣṭʰa yā́ te adyá //
Sentence: 2=p    agnínā rayím aśnavat póṣam evá divédive / yaśásaṃ vīrávattamam //
Sentence: 3=q    gayaspʰā́no amīvahā́ vasuvít puṣṭivárdʰanaḥ / sumitráḥ soma no bʰava //
Sentence: 4=r    gŕ̥hamedʰāsa ā́ gata máruto mā́pa bʰūtana / pramuñcánto no áṁhasaḥ //
Sentence: 5=s    pūrvī́bʰir hí dadāśimá śarádbʰir maruto vayám / máhobʰiḥ //

Verse: 6 
Sentence: 1    carṣaṇīnā́m //
Sentence: 2=t    prá budʰníyā īrate vo máhāṁsi prá ṇā́māni prayajyavas tiradʰvam / sahasríyaṃ dámyam bʰāgám etáṃ gr̥hamedʰī́yam maruto juṣadʰvam //
Sentence: 3=u    úpa yám éti yuvatíḥ sudákṣaṃ doṣā́ vástor havíṣmatī gʰr̥tā́cī / úpa sváinam arámatir vasūyúḥ //
Sentence: 4=v    imó agne vītátamāni havyā́jasro vakṣi devátātim ácʰa / práti na īṁ surabʰī́ṇi viyantu
Sentence: 5=w    krīḍáṃ vaḥ śárdʰo mā́rutam anarvā́ṇaṁ ratʰeśúbʰam //

Verse: 7 
Sentence: 1    káṇvā abʰí prá gāyata //
Sentence: 2=x    átyāso ná yé marútaḥ sváñco yakṣadŕ̥śo ná śubʰáyanta máryāḥ / té harmyeṣṭʰā́ḥ śiśavo ná śubʰrā́ vatsā́so ná prakrīḍínaḥ payodʰā́ḥ //
Sentence: 3=y    práiṣām ájmeṣu vitʰuréva rejate bʰū́mir yā́meṣu yád dʰa yuñjáte śubʰé / té krīḍáyo dʰúnayo bʰrā́jadr̥ṣṭayaḥ svayám mahitvám panayanta dʰū́tayaḥ //
Sentence: 4=z    upahvaréṣu yád ácidʰvaṃ yayíṃ váya iva marutaḥ kéna //

Verse: 8 
Sentence: 1    cit patʰā́ / ścótanti kóśā úpa vo rátʰeṣv ā́ gʰr̥tám ukṣatā mádʰuvarṇam árcate //
Sentence: 2=aa    agnímagniṁ hávīmabʰiḥ sádā havanta viśpátim / havyavā́ham purupriyám //
Sentence: 3=bb    táṁ hí śáśvanta ī́ḍate srucā́ deváṃ gʰr̥taścútā / agníṁ havyā́ya vóḍʰave //
Sentence: 4=cc    índrāgnī rocanā́ diváḥ
Sentence: 5=dd    śnátʰad vr̥trám
Sentence: 6=ee    índraṃ vo viśvátas pári \
Sentence: 7=ff    índraṃ náras \
Sentence: 8=gg    víśvakarman havíṣā vāvr̥dʰānás \
Sentence: 9=hh    víśvakarman havíṣā várdʰanena //

Next part


This text is part of the TITUS edition of Black Yajur-Veda: Taittiriya-Samhita.

Copyright TITUS Project, Frankfurt a/M, 9.2.2018. No parts of this document may be republished in any form without prior permission by the copyright holder.