TITUS
Black Yajur-Veda: Taittiriya-Samhita
Part No. 23
Previous part

Chapter: 4 
Paragraph: 1 
Verse: 1 
Sentence: 1=a    raśmír asi kṣáyāya tvā kṣáyaṃ jinva prétir asi dʰármāya tvā dʰármaṃ jinvā́nvitir asi divé tvādívaṃ jinva saṃdʰír asy antárikṣāya tvā́ntárikṣaṃ jinva pratidʰír asi pr̥tʰivyái tvā pr̥tʰivī́ṃ jinva viṣṭambʰò 'si vŕ̥ṣṭyai tvā vŕ̥ṣṭiṃ jinva pravā́sy áhne tvā́har jinva \
Sentence: 2=b    anuvā́si rā́triyai tvā rā́triṃ jinvośíg asi //

Verse: 2 
Sentence: 1    vásubʰyas tvā vásūñ jinva tántur asi prajā́bʰyas tvā prajā́ jinva pr̥tanāṣā́ḍ asi paśúbʰyas tvā paśū́ñ jinva
Sentence: 2=c    revád asy óṣadʰībʰyas tváuṣadʰīr jinvābʰijíd asi yuktagrāvéndrāya tvéndraṃ jinvā́dʰipatir asi prāṇā́ya //

Verse: 3 
Sentence: 1    tvā prāṇáṃ jinva yantā́sy apānā́ya tvāpānáṃ jinva saṁsárpo 'si cákṣuṣe tvā cákṣur jinva vayodʰā́ asi śrótrāya tvā śrótraṃ jinva trivŕ̥d asi
Sentence: 2=d    pravŕ̥d asi saṃvŕ̥d asi vivŕ̥d asi saṁrohò 'si nīdrohò 'si prarohò 'si anurohò 'si
Sentence: 3=e    vasukò 'si véṣaśrir asi vásyaṣṭir asi //

Paragraph: 2 
Verse: 1 
Sentence: 1=a    rā́jñy asi prā́cī dig vásavas te devā́ ádʰipatayo 'gnír hetīnā́m pratidʰartā́ trivŕ̥t tvā stómaḥ pr̥tʰivyā́ṁ śrayatv ā́jyam uktʰám ávyatʰayat stabʰnātu ratʰaṃtaráṁ sā́ma prátiṣṭʰityai
Sentence: 2=b    virā́ḍ asi dakṣiṇā́ díg rudrā́s te devā́ ádʰipataya índro hetīnā́m pratidʰartā́ pañcadaśás tvā stómaḥ pr̥tʰivyā́ṁ śrayatu práugam uktʰám ávyatʰayat stabʰnātu br̥hát sā́ma prátiṣṭʰityai
Sentence: 3=c    samrā́ḍ asi prācī́cī dík //

Verse: 2 
Sentence: 1    ādityā́s te devā́ ádʰipatayaḥ sómo hetīnā́m pratidʰartā́ saptadaśás tvā stómaḥ pr̥tʰivyā́ṁ śrayatu marutvatī́yam uktʰám ávyatʰayat stabʰnātu vairūpáṁ sā́ma prátiṣṭʰityai
Sentence: 2=d    svarā́ḍ asy udī́cī díg víśve te devā́ ádʰipatayo váruṇo hetīnā́m pratidʰartáikaviṁśás tvā stómaḥ pr̥tʰivyā́ṁ śrayatu níṣkevalyam uktʰám ávyatʰayat stabʰnātu vairājáṁ sā́ma prátiṣṭʰityai \
Sentence: 3=e    ádʰipatny asi br̥hatī́ díṅ marútas te devā́ ádʰipatayaḥ //

Verse: 3 
Sentence: 1    bŕ̥haspátir hetīnā́m pratidʰartā́ triṇavatrayastriṁśáu tvā stómau pr̥tʰivyā́ṁ śrayatāṃ vaiśvadevāgnimāruté uktʰé ávyatʰayantī stabʰnītāṁ śākvararaivaté sā́manī prátiṣṭʰityai \
Sentence: 2=f    antárikṣāyárṣayas tvā pratʰamajā́ devéṣu divó mā́trayā variṇā́ pratʰantu vidʰartā́ cāyám ádʰpatiś ca té tvā sárve saṃvidānā́ nā́kasya pr̥ṣṭʰé suvargé loké yájamānaṃ ca sādayantu //

Paragraph: 3 
Verse: 1 
Sentence: 1=a    ayám puró hárikeśaḥ sū́ryaraśmis tásya ratʰagr̥tsáś ca rátʰaujāś ca senānigrāmaṇyàu puñjikastʰalā́ ca kr̥tastʰalā́ cāpsarásau yātudʰā́nā hetī́ rákṣāṁsi práhetis \
Sentence: 2=b    ayáṃ dakṣiṇā́ viśvákarmā tásya ratʰasvanáś ca rátʰecitraś ca senānigrāmaṇyàu menakā́ ca sahajanyā́ cāpsarásau daṅkṣṇávaḥ paśávo hetíḥ páuruṣeyo vadʰáḥ práhetis \
Sentence: 3=c    ayám paścā́d viśvávyacās tásya rátʰeprotaś cā́samaratʰaś ca senānigrāmaṇyàu pramlócantī ca //

Verse: 2 
Sentence: 1    anumlócantī cāpsarásau sarpā́ hetír vyāgʰrā́ḥ práhetis \
Sentence: 2=d    ayám uttarā́t saṃyádvasus tásya senajíc ca suṣéṇaś ca senānigrāmaṇyàu viśvā́cī ca gʰr̥tā́cī cāpsarásāv ā́po hetír vā́taḥ práhetis \
Sentence: 3=e    ayám upáry arvā́gvasus tásya tā́rkṣyaś cā́riṣṭanemiś ca senānigrāmaṇyā̀v urváśī ca pūrvácittiś cāpsarásau vidyúd dʰetír avaspʰū́rjan práhetis
Sentence: 4=f    tébʰyo námas té no mr̥ḍayantu té yáṃ //

Verse: 3 
Sentence: 1    dviṣmó yáś ca no dvéṣṭi táṃ vo jámbʰe dadʰāmi \
Sentence: 2=g    āyós tvā sádane sādayāmy ávataś cʰāyā́yāṃ námaḥ samudrā́ya námaḥ samudrásya cákṣase
Sentence: 3=h    parameṣṭʰī́ tvā sādayatu diváḥ pr̥ṣṭʰé vyácasvatīm prátʰasvatīṃ vibʰū́matīm prabʰū́matīm paribʰū́matīṃ dívaṃ yacʰa dívaṃ dr̥ṁha dívam mā́ hiṁsīr víśvasmai prāṇā́yāpānā́ya vyānā́yodānā́ya pratiṣṭʰā́yai carítrāya sū́ryas tvābʰí pātu mahyā́ svastyā́ cʰardíṣā śáṃtamena táyā devátayāṅgirasvád dʰruvā́ sīda
Sentence: 4=i    prótʰad áśvo ná yávase aviṣyán yadā́ maháḥ saṃváraṇād vyástʰā / ā́d asy vā́to ánu vāti śocír ádʰa sma te vrájanaṃ kr̥ṣṇám asti //

Paragraph: 4 
Verse: 1 
Sentence: 1=a    agnír mūrdʰā́ diváḥ kakút patíḥ pr̥tʰivyā́ ayám / apā́ṁ rétāṁsi jinvati //
Sentence: 2=b    tvā́m agne púṣkarād ádʰy átʰarvā nír amantʰata / mūrdʰnó víśvasya vāgʰátaḥ //
Sentence: 3=c    ayám agníḥ sahasríṇo vā́jasya śatínas pátiḥ / mūrdʰā́ kavī́ rayīṇā́m //
Sentence: 4=d    bʰúvo yajñásya rájasaś ca netā́ yátrā niyúdbʰiḥ sácase śivā́bʰiḥ / diví mūrdʰā́naṃ dadʰiṣe suvarṣā́ṃ jihvā́m agne cakr̥ṣe havyavā́ham //
Sentence: 5=e    ábodʰy agníḥ samídʰā jánānām //

Verse: 2 
Sentence: 1    práti dʰenúm ivāyatī́m uṣā́sam / yahvā́ iva prá vayā́m ujjíhānāḥ prá bʰānávaḥ sisrate nā́kam acʰá //
Sentence: 2=f    ávocāma kaváye médʰyāya váco vandā́ru vr̥ṣabʰā́ya vŕ̥ṣṇe / gáviṣṭʰiro námasā stómam agnáu divī́va rukmám urvyáñcam aśret //
Sentence: 3=g    jánasya gopā́ ajaniṣṭa jā́gr̥vir agníḥ sudákṣaḥ suvitā́ya návyase / gʰr̥tápratīko br̥hatā́ divispŕ̥śā dyumád ví bʰāti bʰaratébʰyaḥ śúciḥ //
Sentence: 4=h    tvā́m agne áṅgirasaḥ //

Verse: 3 
Sentence: 1    gúhā hitám ánv avindañ cʰiśriyāṇáṃ vánevane / sá jāyase matʰyámānaḥ sáho mahát tvā́m āhuḥ sáhasas putrám aṅgiraḥ //
Sentence: 2=i    yajñásya ketúm pratʰamám putóhitam agníṃ náras triṣadʰastʰé sám indʰate / índreṇa deváiḥ sarátʰaṁ sá barhíṣi sī́dan ní hótā yajátʰāya sukrátuḥ //
Sentence: 3=k    tvā́ṃ citraśravastama hávante vikṣú jantávaḥ / śocíṣkeśam purupriyā́gne havyā́ya vóḍʰave //
Sentence: 4=l    sákʰāyaḥ sáṃ vaḥ samyáñcam íṣam //

Verse: 4 
Sentence: 1    stómaṃ cāgnáye / várṣiṣṭʰāya kṣitīnā́m ūrjó náptre sáhasvate //
Sentence: 2=m    sáṁsam íd yuvase vr̥ṣann ágne víśvāny aryá ā́ / iḍás padé sám idʰyase sá no vásūny ā́ bʰara //
Sentence: 3=n    enā́ vo agníṃ námasorjó nápātam ā́ huve / priyáṃ cétiṣṭʰam aratíṁ svadʰvaráṃ víśvasya dūtám amŕ̥tam //
Sentence: 4=o    sá yojate aruṣó viśvábʰojasā sá dudravat svā̀hutaḥ / subráhmā yajñáḥ suśámī //

Verse: 5 
Sentence: 1    vásūnāṃ deváṁ rā́dʰo jánānām //
Sentence: 2=p    úd asya śocír astʰād ājúhvānasya mīḍʰúṣaḥ / úd dʰumā́so aruṣā́so divispŕ̥śaḥ sám agním indʰate náraḥ //
Sentence: 3=q    ágne vā́jasya gómata ī́śānaḥ sahaso yaho / asmé dʰehi jātavedo máhi śrávaḥ //
Sentence: 4=r    sá idʰānó vásuṣ kavír agnír īḍényo girā́ / revád asmábʰyam purvaṇīka dīdihi //
Sentence: 5=s    kṣapó rājann utá tmánā́gne vástor utóṣásaḥ / sá tigmajambʰa //

Verse: 6 
Sentence: 1    rakṣáso daha práti //
Sentence: 2=t    ā́ te agna idʰīmahi dyumántaṃ devā́járam / yád dʰa syā́ te pánīyasī samíd dīdáyati dyávī́ṣaṁ stotŕ̥bʰya ā́ bʰara //
Sentence: 3=u    ā́ te agna r̥cā́ havíḥ śukrásya jyotiṣas tape / súścandra dásma víśpate hávyavāṭ túbʰyaṁ hūyata íṣaṁ stotŕ̥bʰya ā́ bʰara //
Sentence: 4=v    ubʰé suścandra sarpíṣo dárvī śrīṇīṣa āsáni / utó na út pupūryāḥ //

Verse: 7 
Sentence: 1    uktʰéṣu śavasas pata íṣaṁ stotŕ̥bʰya ā́ bʰara //
Sentence: 2=w    ágne tám adyā́śvaṃ ná stómaiḥ krátuṃ ná bʰadráṁ hr̥dispŕ̥śam / r̥dʰyā́mā ta óhaiḥ //
Sentence: 3=x    ádʰā hy àgne krátor bʰadrásya dákṣasya sādʰóḥ / ratʰī́r r̥tásya br̥ható babʰū́tʰa //
Sentence: 4=y    ābʰíṣ ṭe adyá gīrbʰír gr̥ṇánto 'gne dā́śema / prá te divó ná stanayanti śúṣmāḥ //
Sentence: 5=z    ébʰír no arkáir bʰavā́ no arvā́ñ //

Verse: 8 
Sentence: 1    súvar ná jyótiḥ / ágne viśvebʰiḥ sumánā ánīkaiḥ //
Sentence: 2=aa    agníṁ hótāram manye dā́svantam vásoḥ sūmúṁ sáhaso jātávedasam / vípraṃ ná jātávedasam //
Sentence: 3=bb    yá ūrdʰváyā svadʰvaró devó devā́cyā kr̥pā́ / gʰr̥tásya víbʰrāṣṭim ánu śukráśociṣa ājúhvānasya sarpíṣaḥ //
Sentence: 4=cc    ágne tvám no ántamaḥ / utá trātā́ śivó bʰava varūtʰyàḥ //
Sentence: 5=dd    táṃ tvā śociṣṭʰa dīdivaḥ / sumnā́ya nūnám īmahe sákʰibʰyaḥ //
Sentence: 6=ee    vásur agnír vásuśravāḥ / ácʰā nakṣi dyumáttamo rayíṃ dāḥ //

Paragraph: 5 
Verse: 1 
Sentence: 1=a    indrāgníbʰyāṃ tvā sayújā yujā́ yunajmy āgʰārā́bʰyāṃ téjasā várcasoktʰébʰi stómebʰiś cʰándobʰī rayyái póṣāya sajātā́nām madʰyamastʰéyāya máyā tvā sayújā yujā́ yunajmi \
Sentence: 2=b    ambā́ dulā́ nitatnír abʰráyantī megʰáyantī varṣáyantī cupuṇī́kā nā́māsi prajā́patinā tvā víśvābʰir dʰībʰír úpa dadʰāmi
Sentence: 3=c    pr̥tʰivy ùpapurám ánnena viṣṭā́ manuṣyā̀s te goptā́ro 'gnír víyatto 'syāṃ tā́m ahám prá padye sā́ //

Verse: 2 
Sentence: 1    me śárma ca várma cāstu \
Sentence: 2=d    ádʰidyaur antárikṣam bráhmaṇā viṣṭā́ marútas te goptā́ro vāyúr víyatto 'syāṃ tā́m ahám prá padye sā́ me śárma ca várma cāstu
Sentence: 3=e    dyáur áparājitām r̥téna viṣṭā́dityā́s te goptā́raḥ sū́ryo víyatto 'syāṃ tā́m ahám prá padye sā́ me śárma ca várma cāstu //

Paragraph: 6 
Verse: 1 
Sentence: 1=a    bŕ̥haspátis tvā sādayatu pr̥tʰivyā́ḥ pr̥ṣṭʰé jyótiṣmatīṃ víśvasmai prāṇā́yāpānā́ya víśvaṃ jyótir yacʰāgnís té 'dʰipatis \
Sentence: 2=b    viśvákarmā tvā sādayatv antárikṣasya pr̥ṣṭʰé jyótiṣmatīṃ víśvasmai prāṇā́yāpānā́ya víśvaṃ jyótir yacʰa vāyús té 'dʰipatiḥ
Sentence: 3=c    prajā́patis tvā sādayatu diváḥ pr̥ṣṭʰé jyótiṣmatīṃ víśvasmai prāṇā́yāpānā́yavíśvaṃ jyótir yacʰa parameṣṭʰī́ té 'dʰipatiḥ
Sentence: 4=d    purovātasánir asy abʰrasánir asi vidyutsániḥ //

Verse: 2 
Sentence: 1    asi stanayitnusánir asi vr̥ṣṭisánir asi \
Sentence: 2=e    agnér yā́ny asi devā́nām agneyā́ny asi
Sentence: 3=f    vāyór yā́ny asi devā́nāṃ vāyoyā́ny asi \
Sentence: 4=g    antárikṣasya yā́ny asi devā́nām antarikṣayā́ny asi \
Sentence: 5=h    antárikṣam asy antárikṣāya tvā
Sentence: 6=i    salilā́ya tvā sárṇīkāya tvā sátīkāya tvā kétāya tvā prácetase tvā vívasvate tvā divás tvā jyótiṣa ādityébʰyas tvā \
Sentence: 7=k    r̥cé tvā rucé tvā dyuté tvā bʰāsé tvā jyótiṣe tvā
Sentence: 8=l    yaśodā́ṃ tvā yáśasi tejodā́ṃ tvā téjasi payodā́ṃ tvā páyasi varcodā́ṃ tvā várcasi draviṇodā́ṃ tvā dráviṇe sādayāmi ténárṣiṇā téna bráhmaṇā táyā devátayāṅgirasvád dʰruvā́ sīda //

Paragraph: 7 
Verse: 1 
Sentence: 1=a    bʰūyaskŕ̥d asi varivaskŕ̥d asi prā́cy asy ūrdʰvā́sy antarikṣasád asy antárikṣe sīda \
Sentence: 2=b    apsuṣád asi śyenasád asi gr̥dʰrasád asi suparṇasád asi nākasád asi
Sentence: 3=c    pr̥tʰivyā́s tvā dráviṇe sādayāmy antárikṣasya tvā dráviṇe sādayāmi divás tvā dráviṇe sādayāmi diśā́ṃ tvā dráviṇe sādayāmi draviṇodā́ṃ tvā dráviṇe sādayāmi
Sentence: 4=d    prāṇám me pāhy apānám me pāhi vyānám me //

Verse: 2 
Sentence: 1    pāhy ā́yur me pāhi viśvā́yur me pāhi sarvā́yur me pāhi \
Sentence: 2=e    ágne yát te páraṁ hŕ̥n nā́ma tā́v éhi sáṁ rabʰāvahai pā́ñcajanyeṣv ápy edʰy agne
Sentence: 3=f    yā́vā áyāvā évā ū́māḥ sábdaḥ ságaraḥ sumékaḥ //

Paragraph: 8 
Verse: 1 
Sentence: 1    agnínā viśvāṣā́ṭ
Sentence: 2    sū́ryeṇa svarā́ṭ
Sentence: 3    krátvā śácīpátis \
Sentence: 4    r̥ṣabʰéṇa tváṣṭā
Sentence: 5    yajñéna magʰávān
Sentence: 6    dákṣiṇayā suvargás \
Sentence: 7    manyúnā vr̥trahā́
Sentence: 8    sáuhārdyena tanūdʰā́d \
Sentence: 9    ánnena gáyaḥ
Sentence: 10    pr̥tʰivyā́sanot \
Sentence: 11    r̥gbʰír annādás \
Sentence: 12    vaṣaṭkāréṇarddʰáḥ
Sentence: 13    sā́manā tanūpā́s \
Sentence: 14    virā́jā jyótiṣmān
Sentence: 15    bráhmaṇā somapā́s \
Sentence: 16    góbʰir yajñáṃ dādʰāra kṣatréṇa manuṣyā̀n
Sentence: 17    áśvena ca rátʰena ca vajrī́ \
Sentence: 18    r̥túbʰiḥ prabʰúḥ
Sentence: 19    saṃvatsaréṇa paribʰū́s
Sentence: 20    tápasā́nādʰr̥ṣṭaḥ
Sentence: 21    sū́ryaḥ sán tanū́bʰiḥ //

Paragraph: 9 
Verse: 1 
Sentence: 1    prajā́patir mánasā \
Sentence: 2    ándʰó 'cʰetas \
Sentence: 3    dʰātā́ dīkṣā́yām \
Sentence: 4    savitā́ bʰr̥tyā́m
Sentence: 5    pūṣā́ somakráyaṇyām \
Sentence: 6    váruṇa úpanaddʰas \
Sentence: 7    ásuraḥ krīyámāṇas \
Sentence: 8    mitráḥ krītáḥ
Sentence: 9    śipiviṣṭá ā́sāditas \
Sentence: 10    naráṃdʰiṣaḥ prohyámānas \
Sentence: 11    ádʰipatir ā́gataḥ
Sentence: 12    prajā́patiḥ praṇīyámānas \
Sentence: 13    agnír ā́gnīdʰre
Sentence: 14    bŕ̥haspátir ā́gnīdʰrāt praṇīyámānas \
Sentence: 15    índro havirdʰā́ne \
Sentence: 16    áditir ā́sāditas \
Sentence: 17    víṣṇur upāvahriyámāṇas \
Sentence: 18    átʰarvópottas \
Sentence: 19    yamò 'bʰíṣutas \
Sentence: 20    apūtapā́ ādʰūyámānas \
Sentence: 21    vāyúḥ pūyámānas \
Sentence: 22    mitráḥ kṣīraśrī́s \
Sentence: 23    mantʰī́ saktuśrī́s \
Sentence: 24    vaiśvadevá únnītas \
Sentence: 25    rúdra ā́hutas \
Sentence: 26    vāyúr ā́vr̥ttas \
Sentence: 27    nr̥cákṣāḥ prátikʰyātas \
Sentence: 28    bʰakṣá ā́gataḥ
Sentence: 29    pitr̥ṇā́ṃ nārāśaṁsás \
Sentence: 30    ásur ā́ttaḥ
Sentence: 31    síndʰur avabʰr̥tʰám avaprayán \
Sentence: 32    samudró 'vagataḥ
Sentence: 33    saliláḥ práplutaḥ
Sentence: 34    súvar udŕ̥caṃ gatáḥ //

Paragraph: 10 
Verse: 1 
Sentence: 1=a    kr̥ttikā nákṣatram agnír devátāgné rúca stʰa prajā́pater dʰatúḥ sómasyarcé tvā rucé tvā dyuté tvā bʰāsé tvā jyótiṣe tvā
Sentence: 2=b    rohiṇī́ nákṣatram prajā́patir devátā mr̥gaśīrṣáṃ nákṣatraṁ sómo devátārdrā nákṣatraṁ rudró devátā púnarvasū nákṣatram áditir devátā tiṣyò nákṣatram bŕ̥haspátir devátāśreṣā́ nákṣatraṁ sarpā́ devátā magʰā́ nákṣatram pitáro devátā pʰálgunī nákṣatram //

Verse: 2 
Sentence: 1    aryamā́ devátā pʰálgunī nákṣatram bʰágo devátā hásto nákṣatraṁ savitā́ devátā citrā́ nákṣatram índro devátā svātī́ nákṣatraṃ vāyúr devátā víśākʰe nákṣatram indrāgnī́ devátā anūrādʰā́ nákṣatram mitró devátā rohiṇī́ nákṣatram índro devátā vicŕ̥tau nákṣatram pitáro devátāṣāḍʰā́ nákṣatram ā́po devátāṣāḍʰā́ nákṣatraṃ víśve devā́ devátā śroṇā́ nákṣattraṃ víṣṇur devátā śráviṣṭʰā nákṣatraṃ vásavaḥ //

Verse: 3 
Sentence: 1    devátā śatábʰiṣaṅ nákṣatram índro devátā proṣṭʰapadā́ nákṣatram ajá ékapād devátā proṣṭʰapadā́ nákṣatram áhir budʰníyo devátā revátī nákṣatram pūṣā́ devátāśvayújau nákṣatram aśvínau devátāpabʰáraṇīr nákṣatraṃ yamó devátā
Sentence: 2=c    pūrṇā́ paścā́d yát te devā́ ádadʰuḥ //

Paragraph: 11 
Verse: 1 
Sentence: 1=a    mádʰuś ca mā́dʰavaś ca vā́santikāv r̥tū́
Sentence: 2=b    śukráś ca śúciś ca gráiṣmāv r̥tū́
Sentence: 3=c    nábʰaś ca nabʰasyàś ca vā́rṣikāv r̥tū́
Sentence: 4=d    iṣáś corjáś ca śāradā́v r̥tū́
Sentence: 5=e    sáhaś ca sahasyàś ca háimantikāv r̥tū́
Sentence: 6=f    tápaś ca tapasyàś ca śaiśirā́v r̥tū́
Sentence: 7=g    agnér antaḥśleṣò 'si kálpetāṃ dyā́vāpr̥tʰivī́ kálpantām ā́pa óṣadʰīḥ kálpantām agnáyaḥ pŕ̥tʰaṅ máma jyáiṣṭʰyāya sávratāḥ //

Verse: 2 
Sentence: 1    yè 'gnáyaḥ sámanaso 'ntarā́ dyā́vāpr̥tʰivī́ śaiśirā́v r̥tū́ abʰí kálpamānā índram iva devā́ abʰí sáṃ viśantu
Sentence: 2=h    saṃyác ca prácetāś cāgnéḥ sómasya sū́ryasya \
Sentence: 3=i    ugrā́ ca bʰīmā́ ca pitr̥ṇā́ṃ yámasyéndrasya
Sentence: 4=k    dʰruvā́ ca pr̥tʰivī́ ca devásya savitúr marútāṃ váruṇasya
Sentence: 5=l    dʰartrī́ ca dʰáritrī ca mitrā́váruṇayor mitrásya dʰātúḥ
Sentence: 6=m    prā́cī ca prātī́cī ca vásūnāṁ rudrā́ṇām //

Verse: 3 
Sentence: 1    ādityā́nām \
Sentence: 2=n    té té 'dʰipatayas tébʰyo námas té no mr̥ḍayantu té yáṃ dviṣmó yáś ca no dvéṣṭi táṃ vo jámbʰe dadʰāmi
Sentence: 3=o    sahásrasya pramā́ asi sahásrasya pratimā́ asi sahásrasya vimā́ asi sahásrasyonmā́ asi sāhasrò 'si sahásrāya tvā \
Sentence: 4=p    imā́ me agna íṣṭakā dʰenávaḥ santv ékā ca śatáṃ ca sahásraṃ cāyútaṃ ca //

Verse: 4 
Sentence: 1    niyútaṃ ca prayútaṃ cā́rbudaṃ ca nyàrbudaṃ ca samudráś ca mádʰyaṃ cā́ntaś ca parārdʰáś cemā́ me agna íṣṭakā dʰenávaḥ santu ṣaṣṭʰíḥ sahásram ayútam ákṣīyamāṇā r̥tastʰā́ stʰartāvŕ̥dʰo gʰr̥taścúto madʰuścúta ū́rjasvatīḥ svadʰāvínīs tā́ me agna íṣṭakā dʰenávaḥ santu virā́jo nā́ma kāmadúgʰā amútrāmúṣmim̐ loké //

Paragraph: 12 
Verse: 1 
Sentence: 1=a    samíd diśā́m āśáyā naḥ suvarvín mádʰor áto mā́dʰavaḥ pātv asmā́n / agnír devó duṣṭárītur ádābʰya idáṃ kṣatráṁ rakṣatu pā́tv asmā́n //
Sentence: 2=b    ratʰaṃtaráṁ sā́mabʰiḥ pātv asmā́n gāyatrī́ cʰándasāṃ viśvárūpā / trivŕ̥n no viṣṭʰáyā stómo áhnāṁ samudró vā́ta idám ójaḥ pipartu //
Sentence: 3=c    ugrā́ diśā́m abʰíbʰūtir vayodʰā́ḥ śúciḥ śukré áhany ojasī́nā / índrā́dʰipatiḥ pipr̥tād áto no máhi //

Verse: 2 
Sentence: 1    kṣatráṃ viśváto dʰārayedám //
Sentence: 2=d    br̥hát sā́ma kṣatrabʰŕ̥d vr̥ddʰávr̥ṣṇiyaṃ triṣṭúbʰáujaḥ śubʰitám ugrávīram / índra stómena pañcadaśéna mádʰyam idáṃ vā́tena ságareṇa rakṣa //
Sentence: 3=e    prā́cī diśā́ṁ saháyaśā yáśasvatī víśve devāḥ prā́vr̥ṣā́hnāṁ súvarvatī / idáṃ kṣatráṃ duṣṭáram astv ójó 'nādʰr̥ṣṭaṁ sahasríyaṁ sáhasvat //
Sentence: 4=f    vairūpé sā́mann ihá tác cʰakema jágatyainaṃ vikṣv ā́ veśayāmaḥ / víśve devāḥ saptadaśéna //

Verse: 3 
Sentence: 1    várca idáṃ kṣatráṁ salilávātam ugrám //
Sentence: 2=g    dʰartrī́ diśā́ṃ kṣatrám idáṃ dādʰāropastʰā́śānām mitrávad astv ójaḥ / mítrāvaruṇā śarádā́hnāṃ cikitnū asmái rāṣṭrā́ya máhi śárma yacʰatam //
Sentence: 3=h    vairājé sā́mann ádʰi me manīṣā́nuṣṭúbʰā sámbʰr̥taṃ vīryàṁ sáhaḥ / idáṃ kṣatrám mitrávad ārdrádānu mítrāvaruṇā rákṣatam ā́dʰipatyaiḥ //
Sentence: 4=i    samrā́ḍ diśā́ṁ sahásāmnī sáhasvaty r̥túr hemantó viṣṭʰáyā naḥ pipartu / avasyúvātāḥ //

Verse: 4 
Sentence: 1    br̥hatī́r nú śákvarīr imáṃ yajñám avantu no gʰr̥tā́cīḥ //
Sentence: 2=k    súvarvatī sudúgʰā naḥ páyasvatī diśā́ṃ devy àvatu no gʰr̥tā́cī / tváṃ gopā́ḥ puraetótá paścā́d bŕ̥haspate yā́myāṃ yuṅgdʰi vā́cam //
Sentence: 3=l    ūrdʰvā́ diśā́ṁ rántir ā́śáuṣadʰīnāṁ saṃvatsaréṇa savitā́ no áhnām / revát sā́mā́ticʰandā u cʰándójātaśatruḥ syonā́ no astu //
Sentence: 4=m    stómatrayastriṁśe bʰúvanasya patni vívasvadvāte abʰí naḥ //

Verse: 5 
Sentence: 1    gr̥ṇāhi / gʰr̥távatī savitar ā́dʰipatyaiḥ páyasvatī rántir ā́śā no astu //
Sentence: 2=n    dʰruvā́ diśā́ṃ viṣṇupatny ágʰorāsyéśānā sáhaso yā́ manótā / bŕ̥haspátir mātaríśvotá vāyúḥ saṃdʰuvānā́ vā́tā abʰí no gr̥ṇantu //
Sentence: 3=o    viṣṭambʰó divó dʰarúṇaḥ pr̥tʰivyā́ asyéśānā jágato víṣṇupatnī / viśvávyacā iṣáyantī súbʰūtiḥ śivā́ no astv áditir upástʰe //
Sentence: 4=p    vaiśvānaró na ū́tyā
Sentence: 5=q    pr̥ṣṭó diví \
Sentence: 6=r    ánu no 'dyā́numatis \
Sentence: 7=s    ánv íd anumate tvám \
Sentence: 8=t    káyā naś citrá ā́ bʰuvat
Sentence: 9=u    kó adyá yuṅkte //

Next part


This text is part of the TITUS edition of Black Yajur-Veda: Taittiriya-Samhita.

Copyright TITUS Project, Frankfurt a/M, 9.2.2018. No parts of this document may be republished in any form without prior permission by the copyright holder.