TITUS
Black Yajur-Veda: Taittiriya-Samhita
Part No. 24
Previous part

Chapter: 5 
Paragraph: 1 
Verse: 1 
Sentence: 1=a    námas te rudra manyáva utó ta íṣave námaḥ / námas te astu dʰánvane bāhúbʰyām utá te námaḥ //
Sentence: 2=b    yā́ ta íṣuḥ śivátamā śivám babʰū́va te dʰánuḥ / śivā́ śaravyā̀ yā́ táva táyā no rudra mr̥ḍaya //
Sentence: 3=c    yā́ te rudra śivā́ tanū́r ágʰorā́pāpakāśinī / táyā nas tanúvā śáṃtamayā gíriśantābʰí cākaśīhi //
Sentence: 4=d    yā́m íṣuṃ giriśanta háste //

Verse: 2 
Sentence: 1    bíbʰarṣy ástave / śivā́ṃ giritra tā́ṃ kuru mā́ hiṁsīḥ púruṣaṃ jágat //
Sentence: 2=e    śivéna vácasā tvā gíriśā́cʰā vadāmasi / yátʰā naḥ sárvam íj jágad ayakṣmáṁ sumánā ásat //
Sentence: 3=f    ádʰy avocad adʰivaktā́ pratʰamó dáivyo bʰiṣák / ahī́ṁś ca sárvāñ jambʰáyant sárvāś ca yātu dʰānyàḥ //
Sentence: 4=g    asáu yás tāmró aruṇá utá babʰrúḥ sumaṅgálaḥ / yé cemā́ṁ rudrā́ abʰíto dikṣú //

Verse: 3 
Sentence: 1    śritā́ḥ sahasraśó 'vaiṣāṁ héḍa īmahe //
Sentence: 2=h    asáu yó 'vasárpati nī́lagrīvo vílohitaḥ / utáinaṃ gopā́ adr̥śann ádr̥śann udahāryàḥ / utáinaṃ víśvā bʰūtā́ni sá dr̥ṣṭó mr̥ḍayāti naḥ //
Sentence: 3=i    námo astu nī́lagrīvāya sahasrākṣā́ya mīḍúṣe / átʰo yé asya sátvāno 'háṃ tébʰyo 'karaṃ námaḥ //
Sentence: 4=k    prá muñca dʰánvanas tvám ubʰáyor ā́rtniyor jyā́m / yā́ś ca te hásta íṣavaḥ //

Verse: 4 
Sentence: 1    párā tā́ bʰagavo vapa //
Sentence: 2=l    avatátya dʰánus tváṁ sáhasrākṣa śáteṣudʰe / niśī́rya śalyā́nām múkʰā śivó naḥ sumánā bʰava //
Sentence: 3=m    víjyaṃ dʰánuḥ kapardíno víśalyo bā́ṇavāṁ utá / áneśann asyéṣava ābʰúr asya niṣaṅgátʰiḥ //
Sentence: 4=n    yā́ te hetír mīḍʰuṣṭama háste babʰū́va te dʰánuḥ / táyāsmā́n viśvátas tvám ayakṣamáyā pári bʰuja //
Sentence: 5=o    námas te astv ā́yudʰāyā́nātatāya dʰr̥ṣṇáve / ubʰā́bʰyām utá te námo bāhúbʰyāṃ táva dʰánvane //
Sentence: 6=p    pári te dʰánvano hetír asmā́n vr̥ṇaktu viśvátaḥ / átʰo yá iṣudʰís távāré asmán ní dʰehi tám //

Paragraph: 2 
Verse: 1 
Sentence: 1=a    námo híraṇyabāhave senānyè diśā́ṃ ca pátaye námas \
Sentence: 2=b    námo vr̥kṣébʰyo hárikeśebʰyaḥ paśūnā́m pátaye námas \
Sentence: 3=c    námaḥ saspíñjarāya tvíṣīmate patʰīnā́m pátaye námas \
Sentence: 4=d    námo babʰluśā́ya vivyādʰíné 'nnānām pátaye námas \
Sentence: 5=e    námo hárikeśāyopavītíne puṣṭā́nām pátaye námas \
Sentence: 6=f    námo bʰavásya hetyái jágatām pátaye námas \
Sentence: 7=g    námo rudrā́yātatāvine kṣétrāṇām pátaye námas \
Sentence: 8=h    námaḥ sūtā́yā́hantyāya vánānām pátaye námas \
Sentence: 9=i    námaḥ //

Verse: 2 
Sentence: 1    róhitāya stʰapátaye vr̥kṣā́ṇām pátaye námas \
Sentence: 2=k    námo mantríṇe vāṇijā́ya kákṣāṇām pátaye námas \
Sentence: 3=l    námo bʰuvantáye vārivaskr̥tā́yáuṣadʰīnām pátaye námas \
Sentence: 4=m    náma uccáirgʰoṣāyākrandáyate pattīnā́m pátaye námas \
Sentence: 5=n    námaḥ kr̥tsnavītā́ya dʰā́vate sátvanām pátaye námaḥ //

Paragraph: 3 
Verse: 1 
Sentence: 1=a    námaḥ sáhamānāya nivyādʰína āvyādʰínīnām pátaye námas \
Sentence: 2=b    námaḥ kakubʰā́ya niṣaṅgíṇe stenā́nām pátaye námas \
Sentence: 3=c    námo niṣaṅgíṇa eṣudʰimáte táskarāṇām pátaye námas \
Sentence: 4=d    námo váñcate pariváñcate stāyūnā́m pátaye námas \
Sentence: 5=e    námo niceráve paricarā́yā́raṇyānām pátaye námas \
Sentence: 6=f    námaḥ sr̥kāvíbʰyo jígʰāṁsadbʰyo muṣṇatā́m pátaye námas \
Sentence: 7=g    námo 'simádbʰyo ñaktaṃ cáradbʰyaḥ prakr̥ntā́nām pátaye námas \
Sentence: 8=h    náma uṣṇīṣíṇe giricarā́ya kuluñcā́nām pátaye námas \
Sentence: 9=i    námaḥ //

Verse: 2 
Sentence: 1    íṣumadbʰyo dʰanvāvíbʰyaś ca vo námas \
Sentence: 2=k    náma ātanvānébʰyaḥ pratidádʰānebʰyaś ca vo námas \
Sentence: 3=l    náma āyácʰadbʰyo visr̥jádbʰyaś ca vo námas \
Sentence: 4=m    námó 'syadbʰyo vídʰyadbʰyaś ca vo námas \
Sentence: 5=n    náma ā́sīnebʰyaḥ śáyānebʰyaś ca vo námas \
Sentence: 6=o    námaḥ svapádbʰyo jā́gradbʰyaś ca vo námas \
Sentence: 7=p    námas tíṣṭʰadbʰyo dʰā́vadbʰyaś ca vo námas \
Sentence: 8=q    námaḥ sabʰā́bʰyaḥ sabʰā́patibʰyaś ca vo námas \
Sentence: 9=r    námo áśvebʰyó 'śvapatibʰyaś ca vo námaḥ //

Paragraph: 4 
Verse: 1 
Sentence: 1=a    náma āvyādʰínībʰyo vivídʰyantībʰyaś ca vo námas \
Sentence: 2=b    náma úgaṇābʰyas tr̥ṁhatībʰyaś ca vo námas \
Sentence: 3=c    námo gr̥tsébʰyo gr̥tsápatibʰyaś ca vo námas \
Sentence: 4=d    námo vrā́tebʰyo vrā́tapatibʰyaś ca vo námas \
Sentence: 5=e    námo gaṇébʰyo gaṇápatibʰyaś ca vo námas \
Sentence: 6=f    námo vírūpebʰyo viśvárūpebʰyaś ca vo námas \
Sentence: 7=g    námo mahádbʰyaḥ kṣullakébʰyaś ca vo námas \
Sentence: 8=h    námo ratʰíbʰyo 'ratʰébʰyaś ca vo námas \
Sentence: 9=i    námo rátʰebʰyaḥ //

Verse: 2 
Sentence: 1    rátʰapatibʰyaś ca vo námas \
Sentence: 2=k    námaḥ sénābʰyaḥ senāníbʰyaś ca vo námas \
Sentence: 3=l    námaḥ kṣattŕ̥bʰyaḥ saṃgrahītŕ̥bʰyaś ca vo námas \
Sentence: 4=m    námas tákṣabʰyo ratʰakārébʰyaś ca vo námas \
Sentence: 5=n    námaḥ kúlālebʰyaḥ karmā́rebʰyaś ca vo námas \
Sentence: 6=o    námaḥ puñjíṣṭebʰyo niṣādébʰyaś ca vo námas \
Sentence: 7=p    náma iṣukŕ̥dbʰyo dʰanvakŕ̥dbʰyaś ca vo námas \
Sentence: 8=q    námo mr̥gayúbʰyaḥ śvaníbʰyaś ca vo námas \
Sentence: 9=r    námaḥ śvábʰyaḥ śvápatibʰyaś ca vo námaḥ //

Paragraph: 5 
Verse: 1 
Sentence: 1=a    námo bʰavā́ya ca rudrā́ya ca
Sentence: 2=b    námaḥ śarvā́ya ca paśupátaye ca
Sentence: 3=c    námo nī́lagrīvāya ca śitikáṇṭʰāya ca
Sentence: 4=d    námaḥ kapardíne ca vyùptakeśāya ca
Sentence: 5=e    námaḥ sahasrākṣā́ya ca śatádʰanvane ca
Sentence: 6=f    námo giriśā́ya ca śipiviṣṭā́ya ca
Sentence: 7=g    námo mīḍʰúṣṭamāya céṣumate ca
Sentence: 8=h    námo hrasvā́ya ca vāmanā́ya ca
Sentence: 9=i    námo br̥haté ca várṣīyase ca
Sentence: 10=k    námo vr̥ddʰā́ya ca saṃvŕ̥dʰvane ca //

Verse: 2 
Sentence: 1=l    námo ágriyāya ca pratʰamā́ya ca
Sentence: 2=m    náma āśáve cājirā́ya ca
Sentence: 3=n    námaḥ śī́gʰriyāya ca śī́bʰyāya ca
Sentence: 4=o    náma ūrmyā̀ya cāvasvanyā̀ya ca
Sentence: 5=p    námaḥ srotasyā̀ya ca dvī́pyāya ca //

Paragraph: 6 
Verse: 1 
Sentence: 1=a    námo jyeṣṭʰā́ya ca kaniṣṭʰā́ya ca
Sentence: 2=b    námaḥ pūrvajā́ya cāparajā́ya ca
Sentence: 3=c    námo madʰyamā́ya cāpagalbʰā́ya ca
Sentence: 4=d    námo jagʰanyā̀ya ca búdʰniyāya ca
Sentence: 5=e    námaḥ sobʰyā̀ya ca pratisaryā̀ya ca
Sentence: 6=f    námo yā́myāya ca kṣémyāya ca
Sentence: 7=g    náma urvaryā̀ya ca kʰályāya ca
Sentence: 8=h    námaḥ ślókyāya cāvasānyā̀ya ca
Sentence: 9=i    námo ványāya ca kákṣyāya ca
Sentence: 10=k    námaḥ śravā́ya ca pratiśravā́ya ca //

Verse: 2 
Sentence: 1=l    náma āśúṣeṇāya cāśúratʰāya ca
Sentence: 2=m    námaḥ śūrāya cāvabʰindaté ca
Sentence: 3=n    námo varmíṇe ca varūtʰíne ca
Sentence: 4=o    námo bilmíne ca kavacíne ca
Sentence: 5=p    námaḥ śrutā́ya ca śrutasenā́ya ca //

Paragraph: 7 
Verse: 1 
Sentence: 1=a    námo dundubʰyā̀ya cāhanavyā̀ya ca
Sentence: 2=b    námo dʰr̥ṣṇáve ca pramr̥śā́ya ca
Sentence: 3=c    námo dūtā́ya ca práhitāya ca
Sentence: 4=d    námo niṣaṅgíṇe ceṣudʰimáte ca
Sentence: 5=e    námas tīkṣṇéṣave cāyudʰíne ca
Sentence: 6=f    námaḥ svāyudʰā́ya ca sudʰánvane ca
Sentence: 7=g    námaḥ srútyāya ca pátʰyāya ca
Sentence: 8=h    námaḥ kāṭyā̀ya ca nīpyā̀ya ca
Sentence: 9=i    námaḥ sū́dyāya ca sarasyā̀ya ca
Sentence: 10=k    námo nādyā́ya ca vaiśantā́ya ca //

Verse: 2 
Sentence: 1=l    námaḥ kū́pyāya cāvaṭyā̀ya ca
Sentence: 2=m    námo várṣyāya cāvarṣyā́ya ca
Sentence: 3=n    námo megʰyā̀ya ca vidyutyā̀ya ca
Sentence: 4=o    náma īdʰríyāya cātapyā̀ya ca
Sentence: 5=p    námo vā́tyāya ca réṣmiyāya ca
Sentence: 6=q    námo vāstavyā̀ya ca vāstupā́ya ca //

Paragraph: 8 
Verse: 1 
Sentence: 1=a    námaḥ sómāya ca rudrā́ya ca
Sentence: 2=b    námas tāmrā́ya cāruṇā́ya ca
Sentence: 3=c    námaḥ śaṃgā́ya ca paśupátaye ca
Sentence: 4=d    náma ugrā́ya ca bʰīmā́ya ca
Sentence: 5=e    námo agrevadʰā́ya ca dūrevadʰā́ya ca
Sentence: 6=f    námo hantré ca hánīyase ca
Sentence: 7=g    námo vr̥kṣébʰyo hárikeśebʰyas \
Sentence: 8=h    námas tārā́ya
Sentence: 9=i    námaḥ śambʰáve ca mayobʰáve ca
Sentence: 10=k    námaḥ śaṃkarā́ya ca mayaskarā́ya ca
Sentence: 11=l    námaḥ śivā́ya ca śivátarāya ca //

Verse: 2 
Sentence: 1=m    námas tī́rtʰyāya ca kū́lyāya ca
Sentence: 2=n    námaḥ pāryā̀ya cāvārtyā̀ya ca
Sentence: 3=o    námaḥ pratáraṇāya cottáraṇāya ca
Sentence: 4=p    náma ātāryā̀ya cālāṭyā̀ya ca
Sentence: 5=q    námaḥ śáṣpyāya ca pʰényāya ca
Sentence: 6=r    námaḥ sikatyā̀ya ca pravāhyā̀ya ca //

Paragraph: 9 
Verse: 1 
Sentence: 1=a    náma iriṇyā̀ya ca prapatʰyā̀ya ca
Sentence: 2=b    námaḥ kiṁśilā́ya ca kṣáyaṇāya ca
Sentence: 3=c    námaḥ kapardíne ca pulastáye ca
Sentence: 4=d    námo góṣṭʰyāya ca gŕ̥hyāya ca
Sentence: 5=e    námas tálpyāya ca géhyāya ca
Sentence: 6=f    námaḥ kāṭyā̀ya ca gahvareṣṭʰā́ya ca
Sentence: 7=g    námo hradayyā̀ya ca niveṣyyā̀ya ca
Sentence: 8=h    námaḥ pāṁsavyā̀ya ca rajasyā̀ya ca
Sentence: 9=i    námaḥ śúṣkyāya ca harityā̀ya ca
Sentence: 10=k    námo lópyāya colapyā̀ya ca //

Verse: 2 
Sentence: 1=l    náma ūrvyā̀ya ca sūrmyā̀ya ca
Sentence: 2=m    námaḥ parṇyā̀ya ca parṇaśadyā̀ya ca
Sentence: 3=n    námo 'pagurámāṇāya cābʰigʰnaté ca
Sentence: 4=o    náma ākkʰidaté ca prakkʰidaté ca
Sentence: 5=p    námo vaḥ kirikébʰyo devā́nāṁ hŕ̥dayebʰyas \
Sentence: 6=q    námo vikṣīṇakébʰyas \
Sentence: 7=r    námo vicinvatkébʰyas \
Sentence: 8=s    náma ānirhatébʰyas \
Sentence: 9=t    náma āmīvatkébʰyaḥ //

Paragraph: 10 
Verse: 1 
Sentence: 1=a    drā́pe ándʰasas pate dáridran nī́lalohita / eṣā́m púruṣāṇām eṣā́m paśūnā́m mā́ bʰér mā́ro mó eṣāṃ kíṃ canā́mamat //
Sentence: 2=b    yā́ te rudra śivā́ tanū́ḥ śivā́ viśvā́habʰeṣajī / śivā́ rudrásya bʰeṣajī́ táyā no mr̥ḍa jīváse //
Sentence: 3=c    imā́ṁ rudrā́ya taváse kapardíne kṣayádvīrāya prá bʰarāmahe matím / yátʰā naḥ śám ásad dvipáde cátuṣpade víśvam puṣṭám grāmé asmín //

Verse: 2 
Sentence: 1    ánāturam //
Sentence: 2=d    mr̥ḍā́ no rudrótá no máyas kr̥dʰi kṣayádvīrāya námasā vidʰema te / yác cʰáṃ ca yóś ca mánur āyajé pitā́ tád aśyāma táva rudra práṇītau //
Sentence: 3=e    mā́ no mahā́ntam utá mā́ no arbʰakám mā́ na úkṣantam utá mā́ na ukṣitám / mā́ no vadʰīḥ pitáram mótá mātáram priyā́ mā́ nas tanúvaḥ //

Verse: 3 
Sentence: 1    rudra rīriṣaḥ //
Sentence: 2=f    mā́ nas toké tánaye mā́ na ā́yuṣi mā́ no góṣu mā́ no áśveṣu rīriṣaḥ / vīrā́n mā́ no rudra bʰāmitó vadʰīr havíṣmanto námasā vidʰema te //
Sentence: 3=g    ārā́t te gogʰná utá pūruṣagʰné kṣayádvīrāya sumnám asmé te astu / rákṣā ca no ádʰi ca deva brūhy ádʰā ca naḥ śárma yacʰa dvibárhāḥ //
Sentence: 4=h    stuhí //

Verse: 4 
Sentence: 1    śrutaṃ gartasádaṃ yúvānam mr̥gáṃ ná bʰīmám upahatnúm ugrám / mr̥ḍā́ jaritré rudra stávāno anyáṃ te asmán ní vapantu sénāḥ //
Sentence: 2=i    pári ṇo rudrásya hetír vr̥ṇaktu pári tveṣásya durmatír agʰāyóḥ / áva stʰirā́ magʰávadbʰyas tanuṣva mī́ḍʰvas tokā́ya tánayāya mr̥ḍaya //
Sentence: 3=k    mī́ḍuṣṭama śívatama śivó naḥ sumánā bʰava / paramé vr̥kṣá ā́yudʰaṃ nidʰā́ya kŕ̥ttiṃ vásāna ā́ cara pínākam //

Verse: 5 
Sentence: 1    bíbʰrad ā́ gahi //
Sentence: 2=l    víkirida vílohita námas te astu bʰagavaḥ / yā́s te sahásraṁ hetáyo 'nyám asmán ní vapantu tā́ḥ //
Sentence: 3=m    sahásrāṇi sahasradʰā́ḥ bāhuvós táva hetáyaḥ / tā́sām ī́śāno bʰagavaḥ parācī́nā múkʰā kr̥dʰi //

Paragraph: 11 
Verse: 1 
Sentence: 1=a    sahásrāṇi sahasraśó yé rudrā́ ádʰi bʰū́myām / téṣāṁ sahasrayojané 'va dʰánvāni tanmasi //
Sentence: 2=b    asmín mahaty àrṇavè 'ntárikṣe bʰavā́ ádʰi /
Sentence: 3=c    nī́lagrīvāḥ śitikáṇṭʰāḥ śarvā́ adʰáḥ kṣamācarā́ḥ //
Sentence: 4=d    nī́lagrīvāḥ śitikáṇṭʰā dívaṁ rudrā́ úpaśritāḥ /
Sentence: 5=e    yé vr̥kṣéṣu saspíñjarā nī́lagrīvā vílohitāḥ /
Sentence: 6=f    yé bʰūtā́nām ádʰipatayo viśikʰā́saḥ kapardínaḥ /
Sentence: 7=g    yé ánneṣu vivídʰyanti pā́treṣu píbato jánān /
Sentence: 8=h    yé patʰā́m patʰirákṣaya ailabr̥dā́ yavyúdʰaḥ /
Sentence: 9=i    yé tīrtʰā́ni //

Verse: 2 
Sentence: 1    pracáranti sr̥kā́vanto niṣaṅgíṇaḥ /
Sentence: 2=k    yá etā́vantaś ca bʰū́yāṁsaś ca díśo rudrā́ vitastʰiré / téṣāṁ sahasrayojané 'va dʰánvāni tanmasi //
Sentence: 3=lmn    námo rudrébʰyo yé pr̥tʰivyā́ṃ yè 'ntárikṣe yé diví yéṣām ánnaṃ vā́to varṣám íṣavas tébʰyo dáśa prā́cīr dáśa dakṣiṇā́ dáśa prātī́cīr dáśódīcīr dáśordʰvā́s tébʰyo námas té no mr̥ḍayantu té yáṃ dviṣmó yáś ca no dvéṣṭi táṃ vo jámbʰe dadʰāmi //

Next part


This text is part of the TITUS edition of Black Yajur-Veda: Taittiriya-Samhita.

Copyright TITUS Project, Frankfurt a/M, 9.2.2018. No parts of this document may be republished in any form without prior permission by the copyright holder.