TITUS
Avestan Corpus
Part No. 11
Previous part

Chapter: 10 
Paragraph: 1 
Verse: a    viš.1 apąm. iδa. patəṇtu.2
Verse: b       vī. daēuuā̊ŋhō.3 vī. daēuuaiiō::4
Verse: c    vaŋhuš. sraoṣ̌ō. mitaiiatu.5
Verse: d       aṣ̌iš. vaŋuhi.6 iδa. miϑnatu.7
Verse: e    aṣ̌iš. vaŋuhi.8 rāmiiat̰.9 iδa.10
Verse: f       upa. imat̰. nmānəm. yat̰. āhūiri.11
Verse: g       yat̰. haomahe. aṣ̌auuazaŋhō.12::

Paragraph: 2 
Verse: a    fratarəmcit̰. tē.1 hauuanəm.2
Verse: b       vaca. upa.staomi. huxratuuō.3
Verse: c          yō. ąsuš.4 haṇgəuruuaiieiti::5
Verse: d    uparəmcit̰. tē. hauuanəm.
Verse: e       vaca. upa.staomi. huxratuuō.6
Verse: f          yahmi. niγne.7 narš. aojaŋha.8::

Paragraph: 3 
Verse: a    staomi. maēγəmca.1 vārəmca.2
Verse: b       yā. tē.3 kəhrpəm. vaxṣ̌aiiatō.4
Verse: c          barṣ̌nuš.5 paiti. gairinąm::
Verse: d    staomi. garaiiō.6 bərəzaṇtō.7
Verse: e       yaϑra.8 haoma. urūruδuṣ̌a.9::

Paragraph: 4 
Verse: a    staomi. ząm. pərəϑβīm. paϑanąm.
Verse: b       vərəziiaŋhuuąm.1 xvāparąm.2
Verse: c       barəϑrīm.3 tē. haoma. aṣ̌āum::4
Verse: d    staomi. zəmō. yaϑa.5 raoδahe.
Verse: e       hubaoiδiš. auruuō.6 carānəm.7
Verse: f       uta. mazdā̊.8 huruϑma::9
Verse: g    haoma. raose.10 gara. paiti.
Verse: h       uta. frāδaēṣ̌a.11 viṣ̌paϑa.12
Verse: i       haiϑīmca.13 aṣ̌ahe. xā̊.14 ahi.15::

Paragraph: 5 
Verse: a    varəδaiiaŋuha.1 (rāspī::) mana. vaca.2
Verse: b       vīspə̄sca.3 paiti. varṣ̌ajīš.4
Verse: c       vīspə̄sca. paiti. frasparəγə̄.5
Verse: d       vīspə̄sca. paiti. frauuāxṣ̌ə̄.6::

Verse: R1a       vīspə̄sca. paiti. varṣ̌ajīš.
Verse: R1b       vīspə̄sca. paiti. frasparəγə̄.
Verse: R1c       vīspə̄sca. paiti. frauuāxṣ̌ə̄. (du. bār.)::

Verse: R2a       vīspə̄sca. paiti. varṣ̌ajīš.
Verse: R2b       vīspə̄sca. paiti. frasparəγə̄.
Verse: R2c       vīspə̄sca. paiti. frauuāxṣ̌ə̄.


Paragraph: 6  zōt̰::
Verse: a    haomō. uxṣ̌iieiti.1 stauuanō::2
Verse: b    aϑa. nā.3 yō.4 dim.5 staoiti.
Verse: c       vərəϑrająstarō.6 bauuaiti::
Verse: d    nitəmacit̰.7 haoma. hūitiš.8
Verse: e    nitəmacit̰.7 haoma. stūitiš.
Verse: f    nitəmacit̰.7 haoma. xvarəitiš.9
Verse: g       hazaŋraγniiāi.10 asti. daēuuanąm.::

Paragraph: 7 
Verse: a    nasiieiti.1 haϑra. frākərəsta.2
Verse: b       †ahmat̰.3 haca. nmānāt̰. āhitiš.4
Verse: c       yaϑra. bāδa.5 upāzaiti.6
Verse: d       yaϑra. bāδa.5 upastaoiti.7
Verse: e          haomahe. baēṣ̌aziiehe.   
Verse: f             ciϑrəm. dasuuarə.8 baēṣ̌azəm.
Verse: g          *ahe. vīse. uta.9 maēϑanəm.*::

Paragraph: 8 
Verse: a    vīspe. zī.1 aniiē.2 ^maδā̊ŋhō.3
Verse: b       aēṣ̌ma.4 haciṇte.5 xruuīm.druuō.6
Verse: c    āat̰. hō.7 yō. haomahe. maδō.
Verse: d       aṣ̌a. hacaite.8 uruuāsmana::
Verse: e    rəṇjaiti.9 haomahe. maδō::
Verse: f    yō. yaϑa. puϑrəm. taurunəm.10
Verse: g       haoməm. vaṇdaēta.11 maš́iiō.12
Verse: h    frā. ābiiō.13 tanubiiō.
Verse: i       haomō. vīsāite.14 baēṣ̌azāi.15::

Paragraph: 9 
Verse: a    haoma. dazdi. mē.1 baēṣ̌azanąm.
Verse: b       yābiiō. ahi.2 baēṣ̌azaδā̊::3
Verse: c    haoma. dazdi. mē.4 vārəϑraγninąm.5
Verse: d       yābiiō. ahi.2 vərəϑra.tauruuā̊::
Verse: e    frā. tē.6 vīsāi. uruuaϑō.7 staota::
Verse: f    uruuaϑəm.8 staotārəm. vaŋhaŋhəm.9
Verse: g       †daδō.10 aoxta. ahurō. mazdā̊.
Verse: h       yaϑa. aṣ̌əm. yat̰. vahištəm.::

Paragraph: 10 
Verse: a    auruuaṇtəm.1 ϑβā. dāmiδātəm.2
Verse: b       baγō. tataṣ̌at̰. huuāpā̊::
Verse: c    auruuaṇtəm.1 ϑβā. dāmiδātəm.2
Verse: d       baγō. nidaϑat̰. huuāpā̊.
Verse: e       haraiϑiiō.3 paiti. barəzaiiā̊.4::

Paragraph: 11 
Verse: a    āat̰. ϑβā. aϑra.1 spəṇta. fradaxšta.
Verse: b       mərəγa.2 vīžuuaṇca.3 vībarən.4
Verse: c          †auui.5 iš́ata.6 upāiri.saēna.7
Verse: d          auui.8 staēra.9 starō.sāra.10
Verse: e          †auui.8 kusrāδa.11 kusrō.patāδa.12
Verse: f          auui.8 paβrāna.13 viṣ̌paϑa.14
Verse: g          auui.8 spita.gaona.15 gairi.16::

Paragraph: 12 
Verse: a    āat̰. āhuua. pauruuatāhuua.1
Verse: b       pouru.sarəδō.2 vīraoδahe.3
Verse: c       haomō.4 gaoma. zairi.gaonō::
Verse: d    ā. tē.5 baēṣ̌aza.6 irīraϑarə.7
Verse: e       vaŋhə̄uš. manaŋhō. maiiābiiō::8
Verse: f    āat̰. mē. ahe. dušsaŋhahe.9
Verse: g       parāca. vaēpaiia.10 manō::
Verse: h    āat̰. ahe. nī. manō.11 manō.
Verse: i       yō. mē. dušsaŋhō.9 hištaite.12::

Paragraph: 13 
Verse: a    nəmō. haomāi. yat̰. kərənaoiti.
Verse: b       driγaoš.1 hauuat̰.masō.2 manō.
Verse: c          yaϑa. raēuuastəmahecit̰::3
Verse: d    nəmō. haomāi. yat̰. kərənaoiti.
Verse: e       driγaoš.1 hauuat̰.masō. manō.
Verse: f          yat̰. usnąm.4 aēiti.5 vaēδiia::6
Verse: g    pourunarəm.7 tūm. kərənūṣ̌i.8
Verse: h       spainiiaŋhəm.9 cistiuuastarəm.10
Verse: i          yasə. tē.11 bāδa.12 haoma. zāire.13
Verse: j             gauua. iristahe.14 baxṣ̌aite.15::

Paragraph: 14 
Verse: a    mā. mē.1 yaϑa. gāuš.2 drafṣ̌ō.
Verse: b       āsitō.3 ^vārəma. ^caire::4
Verse: c    fraṣ̌a.5 fraiiaṇtu.6 tē. maδō.
Verse: d       vərəziiaŋuhā̊ŋhō.7 jasəṇtu::8
Verse: e    †pairi. tē.9 haoma. aṣ̌āum.10
Verse: f       aṣ̌auuāzō.11 daδąmi. imąm. tanūm.
Verse: g          yā. mē. vaēnaite.12 huraoδa.::

Paragraph: 15 
Verse: a    auuaŋhərəzāmi.1 janiiaoš.2 ūnąm.3
Verse: b       mairiiaiiā̊.4 əuuītō.xarəδaiiā̊.5
Verse: c          yā. mainiieiṇti.6 dauuaiieiṇti.7
Verse: d             āϑrauuanəmca. haoməmca.
Verse: e          †hā. yā.8 dapta. apanasiieiti::
Verse: f       yā. tat̰. yat̰. haomahe. draonō.
Verse: g             nigā̊ŋhəṇti.9 nišhaδaiti.10
Verse: h          nōit̰. tąm. āϑrauuō.puϑrīm.
Verse: i          naēδa. dasti.11 hupuϑrīm.::

Paragraph: 16 
Verse: a    paṇcanąm.1 ahmi.
Verse: b       paṇcanąm.1 nōit̰. ahmi::
Verse: c    humatahe. ahmi.
Verse: d       dušmatahe. nōit̰. ahmi::
Verse: e    hūxtahe. ahmi.
Verse: f       dužūxtahe. nōit̰. ahmi::
Verse: g    huuarštahe.2 ahmi.
Verse: h       dužuuarštahe.3 nōit̰. ahmi::
Verse: i    sraoṣ̌ahe. ahmi.
Verse: j       asruštōiš.4 nōit̰. ahmi::
Verse: k    aṣ̌aonō. ahmi.
Verse: l       druuatō. nōit̰. ahmi.
Verse: m    at̰cit̰.5 ahmāt̰. yaϑa. apəməm.6
Verse: n       maniuuā̊.7 aŋhat̰. niuuāitiš.::

Paragraph: 17 
Verse: a    1āat̰. aoxta. zaraϑuštrō::
Verse: b       nəmō. haomāi. mazdaδātāi::2
Verse: c       vaŋhuš. haomō. mazdaδātō::
Verse: d       nəmō. haomāi::
Verse: e    vīspe. haoma. upastaomi.3
Verse: f       yat̰cit̰. barṣ̌nuṣ̌uua.4 gairinąm.
Verse: g       yat̰cit̰. jąfnuṣ̌uua. raonąm.5
Verse: h       yaēcit̰.6 ązahu.7 dərətā̊ŋhō.8
Verse: i          jaininąm. upadarəzāhu::9
Verse: j    ərəzataēna. haca. tašta.10
Verse: k       zaranaēnəm.11 aoi.12 taxṣ̌e::13
Verse: l    mā. tē.14 nīre.15 zəmi.16 paiti.
Verse: m       iϑa.17 raēuuaṇtō.18 arəjahe.19::

Paragraph: 18 
Verse: a    imā̊sə. tē.1 haoma. gāϑā̊.
Verse: b       imā̊. həṇti.2 staomāiiō.3
Verse: c       imā̊. həṇti. cīcaṣ̌ānā̊.4
Verse: d       ime.5 həṇti. aršuxδa.6 vācō.7
Verse: e          dāsmainiš.8 vārəϑraγniš.9
Verse: f          paiti.biṣ̌iš.10 baēṣ̌aziia.11::

Paragraph: 19 
Verse: a    †imā̊sə.1 tūmcit̰. māuuōiia::2
Verse: b    fraṣ̌a. fraiiaṇtu.3 tē. maδō.
Verse: c    raoxṣ̌na.4 fraiiaṇtu.3 tē. maδō::
Verse: d    rəṇjiiō.5 vazaiti.6 maδō.
Verse: e    vārəϑraγniš.7 həṇtəm.8 āstaoite.9
Verse: f       haϑra. ana. gāϑβiia.10 vaca::

Paragraph: 20 
Verse: a    1gauue. nəmō. gauue. nəmō.
Verse: b    gauue. uxδəm. gauue. vərəϑrəm.
Verse: c    gauue. xvarəϑəm.2 gauue. vastrəm::3
Verse: d    4gauuē. vərəziiātąm.
Verse: e       tąm. nə̄.5 xvarəϑāi. fṣ̌uiiō.6::

Paragraph: 21 
Verse: a    haoməm. zāirīm.1 bərəzaṇtəm.2 yazamaide::
Verse: b    haoməm. frāṣ̌mīm. frādat̰.gaēϑəm. yazamaide::
Verse: c    haoməm. dūraoṣ̌əm. yazamaide::
Verse: d    vīspe. haoma. yazamaide::
Verse: e    3zaraϑuštrahe. spitāmahe. iδa. aṣ̌aonō. aṣ̌īmca.4 frauuaṣ̌īmca. yazamaide.::


Verse: Q1a    5yeŋ́hē. hātąm.   āat̰. yesnē. paitī.6 vaŋhō.
Verse: Q1b    mazdā̊. ahurō. vaēϑā.   aṣ̌āt̰. hacā. yā̊ŋhąmcā.
Verse: Q1c    tąscā. tā̊scā. yazamaide.::::



Next part


This text is part of the TITUS edition of Avestan Corpus.

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.