TITUS
Avestan Corpus
Part No. 13
Previous part

Chapter: 12    zōt̰::
Paragraph: 1 
Verse: a    nāismī.1 daēuuō::
Verse: b    frauuarānē.2 mazdaiiasnō. zaraϑuštriš. vīdaēuuō.3 ahura.t̰kaēṣ̌ō.4
Verse: c       staotā. aməṣ̌anąm. spəṇtanąm.
Verse: d       yaštā.5 aməṣ̌anąm. spəṇtanąm::
Verse: e    ahurāi. mazdāi. vaŋhauuē.6 vohumaitē.7 vīspā. vohū. cinahmī.8
Verse: f       aṣ̌āunē.9 raēuuaitē.10 xvarənaŋuhaitē.11
Verse: g          yā. zī.12 cīcā.13 vahištā.
Verse: h       yeŋ́hē.14 gāuš.
Verse: i       yeŋ́hē. aṣ̌əm.
Verse: j       yeŋ́hē. raocā̊.15
Verse: k       yeŋ́hē. raocə̄bīš. rōiϑβən.16 xvāϑrā.::

Paragraph: 2 
Verse: a    spəṇtąm.1 ārmaitīm. vaŋuhīm.2 vərənē::3
Verse: b       hā. mōi.4 astū::5
Verse: c    us. gə̄uš. stuiiē.6 tāiiāat̰cā.7 hazaŋhat̰cā::8
Verse: d       us. mazdaiiasnanąm.9 vīsąm. ziiānaiiaēcā.10 vīuuāpat̰cā.11::

Paragraph: 3 
Verse: a    fərā.1 maniiaēibiiō.2 rā̊ŋhē.3 vasə̄.yāitīm.4 vasə̄.ṣ̌əitīm.5
Verse: b       yāiš. upairī.6 āiia. zəmā.7 gaobīš. š́iieṇtī::8
Verse: c    nəmaŋhā.9 aṣ̌āi.10 uzdātā̊.11 paitī.12 auuat̰. stuiiē::13
Verse: d       nōit̰. ahmāt̰. āziiā̊nīm.14
Verse: e       nōit̰. vīuuāpəm.15 xštā.16
Verse: f          māzdaiiasnīš.17 aoi.18 vīsō.
Verse: g       nōit̰. astō.19
Verse: h       nōit̰. uštānahē.20 cinmānī.21::

Paragraph: 4 
Verse: a    vī. daēuuāiš.1 aγāiš.2 auuaŋhūš.3 anarətāiš.4 akō.dābīš.5 sarəm.6 mruiiē.7
Verse: b       hātąm. draojištāiš.
Verse: c       hātąm. paoṣ̌ištāiš.
Verse: d       hātąm. auuaŋhutəmāiš.8
Verse: e       vī. daēuuāiš.1   vī. daēuuauuat̰bīš.9
Verse: f       vī. yātuš.10   vī. yātumat̰bīš.
Verse: g       vī. kahiiācīt̰.11 hātąm. ātarāiš.12
Verse: h       vī. manə̄bīš.13   vī. vacə̄bīš.14
Verse: i       vī. š́iiaoϑanāiš.15   vī. ciϑrāiš::
Verse: j    vī. zī. anā. sarəm.6 mruiiē.7
Verse: k       yaϑanā.16 drəguuātā.17 rąxṣ̌aiiaṇtā.18::

Paragraph: 5 
Verse: a    aϑā. aϑā. cōit̰. ahurō. mazdā̊. zaraϑuštrəm. aδaxṣ̌aiiaētā.1
Verse: b       vīspaēṣ̌ū. fəraṣ̌naēṣ̌ū.2
Verse: c       vīspaēṣ̌ū. haṇjamanaēṣ̌ū.3
Verse: d          yāiš. apərəsaētəm.4 mazdā̊scā.5 zaraϑuštrascā::5

Paragraph: 6 
Verse: a    aϑā. aϑā. cōit̰. zaraϑuštrō. daēuuāiš. sarəm. viiāmruuītā.1
Verse: b       vīspaēṣ̌ū. fəraṣ̌naēṣ̌ū.2
Verse: c       vīspaēṣ̌ū. haṇjamanaēṣ̌ū.3
Verse: d          yāiš. apərəsaētəm.4 mazdā̊scā. zaraϑuštrascā::
Verse: e    aϑā. azə̄mcīt̰.5 yō. mazdaiiasnō. zaraϑuštriš.
Verse: f       daēuuāiš. sarəm. vīmruiiē.6
Verse: g          yaϑā. anāiš.7 viiāmruuītā.
Verse: h             yə̄. aṣ̌auuā. zaraϑuštrō.::

Paragraph: 7 
Verse: a    yā.varanā.1 āpō.
Verse: b    yā.varanā.2 uruuarā̊.3
Verse: c    yā.varanā.4 gāuš. hudā̊.5
Verse: d    yāuuaranō.6 ahurō. mazdā̊.
Verse: e       yə̄. gąm. dadā.7
Verse: f       yə̄. narəm. aṣ̌auuanəm.
Verse: g    yāuuaranō.8 as. zaraϑuštrō.
Verse: h    yāuuaranō.8 kauuā. vīštāspō.9
Verse: i    yāuuaranā.10 fəraṣ̌aoštrā.11 jāmāspā.
Verse: j    yāuuaranō.12 kascīt̰.13 saoš́iiaṇtąm.14 haiϑiiāuuarəząm.15 aṣ̌āunąm.16
Verse: k    tā.varənācā.17 t̰kaēṣ̌ācā. (rāspī::) mazdaiiasnō. ahmī.18::

Paragraph: 8 
Verse: a    mazdaiiasnō. zaraϑuštriš.1 frauuarānē.2 āstūtascā.3 frauuarətascā::4
Verse: b    āstuiiē.5 humatəm. manō.
Verse: c    āstuiiē.6 hūxtəm. vacō.
Verse: d    āstuiiē.6 huuarštəm.7 š́iiaoϑanəm.8::

Paragraph: 9 
Verse: a    āstuiiē. daēnąm.1 māzdaiiasnīm.
Verse: b       fraspāiiaoxəδrąm.2 niδāsnaiϑiṣ̌əm.3
Verse: c       xvaētuuadaϑąm.4 aṣ̌aonīm.
Verse: d       yā. hāitinąmcā.5 būš́iieiṇtinąmcā.6 mazištācā. vahištācā. sraēštācā.
Verse: e       yā.7 āhūiriš.8 zaraϑuštriš::
Verse: f    ahurāi. mazdāi. vīspā.9 vohū. cinahmī.10::
Verse: g    aēṣ̌ā. astī.11 daēnaiiā̊.12 māzdaiiasnōiš. āstūitiš.13::::



Next part


This text is part of the TITUS edition of Avestan Corpus.

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.