TITUS
Avestan Corpus
Part No. 18
Previous part

Chapter: 17 
Paragraph: 1 
Verse: a    1ahurəm. mazdąm. aṣ̌auuanəm. aṣ̌ahe. ratūm. yazamaide::
Verse: b    aməṣ̌ā. spəṇta. huxṣ̌aϑrā. huδā̊ŋhō. yazamaide.::

Paragraph: 2 
Verse: a    asniia. aṣ̌auuana. aṣ̌ahe. ratauuō. yazamaide::
Verse: b    hāuuanīm. aṣ̌auuanəm. aṣ̌ahe. ratūm. yazamaide::
Verse: c    sāuuaŋhaēm.1 vīsīmca. aṣ̌auuanəm. aṣ̌ahe. ratūm. yazamaide::
Verse: d    miϑrəm. vouru.gaoiiaoitīm.
Verse: e       hazaŋra.gaoṣ̌əm. baēuuarə.caṣ̌manəm.
Verse: f       aoxtō.nāmanəm. yazatəm. yazamaide::
Verse: g    rāma. xvāstrəm. yazamaide.::

Paragraph: 3 
Verse: a    rapiϑβinəm. aṣ̌auuanəm. aṣ̌ahe. ratūm. yazamaide::
Verse: b    frādat̰.fṣ̌āum.1 zaṇtuməmca. aṣ̌auuanəm. aṣ̌ahe. ratūm. yazamaide::
Verse: c    aṣ̌əm. vahištəm.
Verse: d       ātrəmca.2 ahurahe. mazdā̊. puϑrəm. yazamaide.::

Paragraph: 4 
Verse: a    uzaiieirinəm. aṣ̌auuanəm. aṣ̌ahe. ratūm. yazamaide::
Verse: b    frādat̰.vīrəm. dāx́iiuməmca.1 aṣ̌auuanəm. aṣ̌ahe. ratūm. yazamaide::
Verse: c    bərəzaṇtəm. ahurəm. xṣ̌aϑrīm.2 xṣ̌aētəm. apąm. napātəm. auruuat̰.aspəm. yazamaide::
Verse: d    apəmca. mazdaδātąm. aṣ̌aonīm. yazamaide.::

Paragraph: 5 
Verse: a    aiβisrūϑriməm.1 aibigāim. aṣ̌auuanəm. aṣ̌ahe. ratūm. yazamaide::
Verse: b    frādat̰.vīspąm.hujiiāitīm. zaraϑuštrōtəməmca. aṣ̌auuanəm. aṣ̌ahe. ratūm. yazamaide::
Verse: c    aṣ̌āunąm.2 vaŋuhīš.3 sūrā̊. spəṇtā̊. frauuaṣ̌aiiō. yazamaide::
Verse: d    γnā̊sca. vīrō.vąϑβā̊. yazamaide::
Verse: e    yāiriiąmca. huṣ̌itīm. yazamaide::
Verse: f    aməmca. hutaštəm.4 huraoδəm. yazamaide::
Verse: g    vərəϑraγnəmca. ahuraδātəm. yazamaide::
Verse: h    vanaiṇtīmca. uparatātəm. yazamaide.::

Paragraph: 6 
Verse: a    uṣ̌ahinəm. aṣ̌auuanəm. aṣ̌ahe. ratūm. yazamaide::
Verse: b    bərəjīm. nmānīmca. aṣ̌auuanəm. aṣ̌ahe. ratūm. yazamaide::
Verse: c    sraoṣ̌əm. aṣ̌īm. huraoδəm. vərəϑrājanəm. frādat̰.gaēϑəm. aṣ̌auuanəm. aṣ̌ahe. ratūm. yazamaide::
Verse: d    raṣ̌nūm. razištəm. yazamaide::
Verse: e    arštātəmca. frādat̰.gaēϑąm. varədat̰.gaēϑąm. yazamaide.::

Paragraph: 7 
Verse: a    māhiia. aṣ̌auuana. aṣ̌ahe. ratauuō. yazamaide::
Verse: b    aṇtarəmā̊ŋhəm. aṣ̌auuanəm. aṣ̌ahe. ratūm. yazamaide::
Verse: c    pərənō.mā̊ŋhəm. vīṣ̌aptaϑəm.1 aṣ̌auuanəm. aṣ̌ahe. ratūm. yazamaide.::

Paragraph: 8 
Verse: a    yāiriia. aṣ̌auuana. aṣ̌ahe. ratauuō. yazamaide::
Verse: b    maiδiiōizarəmaēm.1 aṣ̌auuanəm. aṣ̌ahe. ratūm. yazamaide::
Verse: c    maiδiiōiṣ̌əməm.2 aṣ̌auuanəm. aṣ̌ahe. ratūm. yazamaide::
Verse: d    paitišhahīm. aṣ̌auuanəm. aṣ̌ahe. ratūm. yazamaide::
Verse: e    aiiāϑriməm.3 fraouruuaēštriməm.4 varṣ̌niharštəm.5 aṣ̌auuanəm. aṣ̌ahe. ratūm. yazamaide::
Verse: f    maiδiiāirīm. aṣ̌auuanəm. aṣ̌ahe. ratūm. yazamaide::
Verse: g    hamaspaϑmaēdaēm. aṣ̌auuanəm. aṣ̌ahe. ratūm. yazamaide::
Verse: h    sarəδa. aṣ̌auuana. aṣ̌ahe. ratauuō. yazamaide.::

Paragraph: 9 
Verse: a    vīspe. aṣ̌ahe. ratauuō. yazamaide.
Verse: b       yōi. həṇti. aṣ̌ahe. ratauuō. ϑraiiasca.1 ϑrisąsca. nazdišta. pairišhāuuanaiiō.
Verse: c       yōi. həṇti. aṣ̌ahe. yat̰. vahištahe. mazdō.frasāsta. zaraϑuštrō.fraoxta.::

Paragraph: 10 
Verse: a    ahura. miϑra. bərəzaṇta. aiϑiiajaŋha.1 aṣ̌auuana. yazamaide::
Verse: b    strə̄ušca. mā̊ŋhəmca. huuarəca. uruuarāhu. paiti. barəsmaniiāhu.
Verse: c       miϑrəm. vīspanąm. dax́iiunąm. daiŋ́hupaitīm.2 yazamaide::
Verse: d    (rōz.) ahurəm. mazdąm. raēuuaṇtəm. xvarənaŋuhaṇtəm.3 yazamaide::
Verse: e    (māh.) aṣ̌āunąm.4 vaŋuhīš.5 sūrā̊. spəṇtā̊. frauuaṣ̌aiiō.6 yazamaide.::

Paragraph: 11 
Verse: a    ϑβąm. ātrəm.1 ahurahe. mazdā̊. puϑrəm.2 yazamaide::
Verse: b    ātrəm. bərəzisauuaŋhəm.3 yazamaide::
Verse: c    ātrəm.1 vohu.friiānəm.4 yazamaide::
Verse: d    ātrəm.1 uruuāzištəm. yazamaide::
Verse: e    ātrəm.1 vāzištəm. yazamaide::
Verse: f    ātrəm.1 spə̄ništəm. yazamaide::
Verse: g    xṣ̌aϑrəm. nafəδrəm. nairiiō.saŋhəm. yazatəm. yazamaide::
Verse: h    ātrəm.1 vīspanąm. nmānanąm. nmānō.paitīm. mazdaδātəm.5
Verse: i       ahurahe. mazdā̊. puϑrəm. aṣ̌auuanəm. aṣ̌ahe. ratūm. yazamaide.
Verse: j          mat̰. vīspaēibiiō. ātərəbiiō.6::

Paragraph: 12 
Verse: a    1āpō. vaŋuhīš.2 vahištā̊. mazdaδātā̊. aṣ̌aonīš. yazamaide::
Verse: b    vīspā̊. āpō. mazdaδātā̊.3 aṣ̌aonīš. yazamaide::
Verse: c    vīspā̊. uruuarā̊. mazdaδātā̊. aṣ̌aonīš. yazamaide.::

Paragraph: 13 
Verse: a    mąϑrəm. spəṇtəm. ašxvarənaŋhəm.1 yazamaide::
Verse: b    dātəm. vīdōiiūm.2 yazamaide::
Verse: c    dātəm. zaraϑuštri.3 yazamaide::
Verse: d    darəγąm. upaiianąm. yazamaide::
Verse: e    daēnąm. vaŋuhīm.4 māzdaiiasnīm. yazamaide.::

Paragraph: 14 
Verse: a    gairīm. uṣ̌idarənəm.1 mazdaδātəm. aṣ̌axvāϑrəm. yazatəm. yazamaide::
Verse: b    vīspā̊. garaiiō.2 aṣ̌axvāϑrā̊. pouru.xvāϑrā̊. mazdaδāta. aṣ̌auuana. aṣ̌ahe. ratauuō. yazamaide::
Verse: c    uγrəm. kauuaēm. xvarənō. mazdaδātəm. yazamaide::
Verse: d    uγrəm. axvarətəm. xvarənō. mazdaδātəm. yazamaide::
Verse: e    aṣ̌īm. vaŋuhīm.3 yazamaide::
Verse: f    xṣ̌ōiϑnīm. bərəzaitīm. amauuaitīm. huraoδąm. xvāparąm. xvarənō. mazdaδātəm. yazamaide::
Verse: g    sauuō. mazdaδātəm. yazamaide.::

Paragraph: 15 
Verse: a    dahmąm. vaŋuhīm. āfritīm. yazamaide::
Verse: b    dahməmca. narəm. aṣ̌auuanəm. yazamaide::
Verse: c    uγrəm. taxməm. dāmōiš. upamanəm. yazatəm. yazamaide.::

Paragraph: 16 
Verse: a    imā̊. apasca. zəmasca. uruuarā̊sca. yazamaide::
Verse: b    imā̊. asā̊sca. ṣ̌ōiϑrā̊sca. gaoiiaoitīšca. maēϑaniiā̊sca.1 auuō.xvarənā̊sca. yazamaide::
Verse: c    iməmca. ṣ̌ōiϑrahe. paitīm. yazamaide.
Verse: d       yim. ahurəm. mazdąm.::

Paragraph: 17 
Verse: a    ratauuō. vīspe.1 mazišta. yazamaide.
Verse: b       aiiara. asniia. māhiia. yāiriia. sarəδa.::

Paragraph: 18 
Verse: a    1aṣ̌āunąm. vaŋuhīš.2 sūrā̊. spəṇtā̊. frauuaṣ̌aiiō.
Verse: b       staomi.3 zbaiiemi. ufiiemi::
Verse: c    yazamaide.4 nmāniiā̊. vīsiiā̊. zaṇtumā̊. dāx́iiumā̊.5 zaraϑuštrōtəmā̊.6::

Paragraph: 19 
Verse: a    1vīspe. aṣ̌auuanō. yazata. yazamaide::
Verse: b    vīspe. aṣ̌ahe. ratauuō. yazamaide::
Verse: c       hāuuanīm. paiti. ratūm.
Verse: d       sāuuaŋhaēm.2 vīsīmca. paiti. ratūm.
Verse: e       ratauuō. vīspe. mazišta. paiti. ratūm.::


Verse: Q1a    yeŋ́hē. hātąm.   āat̰. yesnē. paitī. vaŋhō.
Verse: Q1b    mazdā̊. ahurō. vaēϑā.   aṣ̌āt̰. hacā. yā̊ŋhąmcā.
Verse: Q1c    tąscā. tā̊scā. yazamaide.::::



Next part


This text is part of the TITUS edition of Avestan Corpus.

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.