TITUS
Avestan Corpus
Part No. 45
Previous part

Chapter: 44 
Tat̰.ϑβā.pərəsa Hāitiš



Paragraph: 1 
Verse: a    tat̰. ϑβā. pərəsā.   ərəš.mōi.1 vaocā. ahurā:2
Verse: b    3nəmaŋhō. ā.   yaϑā.4 nəmə̄.5 xṣ̌māuuatō.
Verse: c    mazdā.6 friiāi.7   ϑβāuuąs. sax́iiāt̰.8 mauuaitē.
Verse: d    at̰.nə̄.9 aṣ̌ā.10   friiā.11 dazdiiāi.12 hākurənā.13
Verse: e    yaϑā.nə̄.14 ā.   vohū. jimat̰.15 manaŋhā.

Paragraph: 2 
Verse: a    tat̰. ϑβā. pərəsā.   ərəš.mōi.1 vaocā. ahurā.
Verse: b    kaϑā. aŋhə̄uš.2   vahištahiiā. paouruuīm.
Verse: c    kāϑə̄.3 sūidiiāi.4   yə̄.ī.5 paitiṣ̌āt̰.6
Verse: d    huuō.zī. aṣ̌ā.   spəṇtō. irixtəm.7 vīspōibiiō.8
Verse: e    hārō.9 mainiiū.10   ahūmbiš.11 uruuaϑō.12 mazdā.13

Paragraph: 3 
Verse: a    tat̰. ϑβā. pərəsā.   ərəš.mōi. vaocā. ahurā:
Verse: b    kasnā. ząϑā.1   patā.2 aṣ̌ahiiā. pouruiiō.3
Verse: c    kasnā. xvə̄ṇg.4   starə̄mcā.5 dāt̰. aduuānəm.
Verse: d    kə̄. yā.6 mā̊.7   uxṣ̌iieitī.8 nərəfsaitī.9 ϑβat̰.10
Verse: e    tācīt̰.11 mazdā.   vasəmī.12 aniiācā.13 vīduiiē.14

Paragraph: 4 
Verse: a    tat̰. ϑβā. pərəsā.   ərəš.mōi.1 vaocā. ahurā:
Verse: b    kasnā. dərətā.2   ząmcā. adə̄. nabā̊scā.3
Verse: c    auuapastōiš.4   kə̄. apō. uruuarā̊scā.
Verse: d    kə̄. vātāi.5   duuąnmaibiiascā.6 yaogət̰.7 āsū.
Verse: e    kasnā. vaŋhə̄uš.   mazdā.8 dąmiš.9 manaŋhō.

Paragraph: 5 
Verse: a    tat̰. ϑβā. pərəsā.   ərəš.mōi. vaocā. ahurā:
Verse: b    kə̄. huuāpā̊.1   raocā̊scā. dāt̰. təmā̊scā.2
Verse: c    kə̄. huuāpā̊.3   xvafnəmcā.4 dāt̰. zaēmācā.5
Verse: d    kə̄. yā.6 uṣ̌ā̊.   arə̄m.piϑβā.7 xṣ̌apācā.
Verse: e    yā̊.8 manaoϑrīš.9   cazdōṇghuuaṇtəm.10 arəϑahiiā.

Paragraph: 6 
Verse: a    tat̰. ϑβā. pərəsā.   ərəš.mōi.1 vaocā. ahurā.
Verse: b    yā. frauuaxṣ̌iiā.2   yezī.3 tā. aϑā.4 haiϑiiā:
Verse: c    aṣ̌əm.5 š́iiaoϑanāiš.6   dəbązaitī.7 ārmaitiš.8
Verse: d    taibiiō.9 xṣ̌aϑrəm.   vohū. cinas.10 manaŋhā.
Verse: e    kaēibiiō.11 azīm.12   rāniiō.skərətīm.13 gąm. taṣ̌ō.

Paragraph: 7 
Verse: a    tat̰. ϑβā. pərəsā.   ərəš.mōi.1 vaocā. ahurā.
Verse: b    kə̄. bərəxδąm. tāšt.2   xṣ̌aϑrā. mat̰. ārmaitī.
Verse: c    kə̄. uzəmə̄m.3 cōrət̰.4   viiānaiiā.5 puϑrəm.6 piϑrē.7
Verse: d    azə̄m.8 tāiš. ϑβā.   fraxṣ̌nī.9 auuāmī.10 mazdā.
Verse: e    spəṇtā. mainiiū.   vīspanąm. dātārəm.11

Paragraph: 8 
Verse: a    tat̰. ϑβā. pərəsā.   ərəš.mōi. vaocā. ahurā.
Verse: b    məṇdaidiiāi.1   yā.tōi.2 mazdā. ādištiš.3
Verse: c    yācā. vohū.   uxδā. fraṣ̌ī.4 manaŋhā.
Verse: d    yācā. aṣ̌ā.   aŋhə̄uš.5 arə̄m. vaēdiiāi.6
Verse: e    kā. mə̄.7 uruuā.   vohū. uruuāṣ̌at̰.8 āgəmat̰.9 tā.

Paragraph: 9 
Verse: a    tat̰. ϑβā. pərəsā.   ərəš.mōi.1 vaocā. ahurā:
Verse: b    kaϑā.mōi.2 yąm.   yaoš. daēnąm.3 yaoš. dānē.4
Verse: c    yąm. hudānāuš.5   paitišə.6 sax́iiāt̰.7 xṣ̌aϑrahiiā.
Verse: d    ərəṣ̌uuā. xṣ̌aϑrā.   ϑβāuuąs. asīštīš.8 mazdā.
Verse: e    hadəmōi.9 aṣ̌ā.   vohucā.10 š́iiąs.11 manaŋhā.

Paragraph: 10 
Verse: a    tat̰. ϑβā. pərəsā.   ərəš.mōi. vaocā. ahurā.
Verse: b    tąm. daēnąm.   yā. hātąm. vahištā.1
Verse: c    yā. mōi.2 gaēϑā̊.   aṣ̌ā. frādōit̰. hacə̄mnā.3
Verse: d    ārmatōiš.   uxδāiš. š́iiaoϑanā.4 ərəš. daidiiat̰.5
Verse: e    max́iiā̊.6 cistōiš.7   ϑβā. īštīš.8 usə̄n.9 mazdā.

Paragraph: 11 
Verse: a    tat̰. ϑβā. pərəsā.   ərəš.mōi. vaocā. ahurā.
Verse: b    kaϑā. tə̄ṇg. ā.1   vījə̄miiāt̰.2 ārmaitiš.3
Verse: c    yaēibiiō. mazdā.4   ϑβōi.5 vaš́iietē.6 daēnā.
Verse: d    azə̄m.7 tōi.8 āiš.   pouruiiō.9 frauuōiuuīdē.10
Verse: e    vīspə̄ṇg. aniiə̄ṇg.11   maniiə̄uš.12 spasiiā.13 duuaēṣ̌aŋhā.14

Paragraph: 12 
Verse: a    tat̰. ϑβā. pərəsā.   ərəš.mōi.1 vaocā. ahurā:
Verse: b    kə̄. aṣ̌auuā.   yāiš. pərəsāi.2 drəguuā̊. vā.
Verse: c    katārə̄m.3 ā.4   aṇgrō.5 vā. huuō. vā. aṇgrō.6
Verse: d    yə̄. mā.7 drəguuā̊.   ϑβā. sauuā. paitī.ərətē.8
Verse: e    ciiaŋhat̰.9 huuō. nōit̰.   aiiə̄m.10 aṇgrō.11 maniietē.12

Paragraph: 13 
Verse: a    tat̰. ϑβā. pərəsā.   ərəš.mōi.1 vaocā. ahurā:
Verse: b    kaϑā. drujəm.2   nīš. ahmat̰.3 ā. nīš.4 nāṣ̌āmā.5
Verse: c    tə̄ṇg. ā.6 auuā.7   yōi.8 asruštōiš. pərənā̊ŋhō.
Verse: d    nōit̰. aṣ̌ahiiā.   ādīuuiieiṇtī.9 hacə̄mnā.10
Verse: e    nōit̰. frasaiiā.11   vaŋhə̄uš. cāxnarə̄.12 manaŋhō.

Paragraph: 14 
Verse: a    tat̰. ϑβā. pərəsā.   ərəš.mōi. vaocā. ahurā:
Verse: b    kaϑā. aṣ̌āi.1   drujə̄m.2 diiąm.3 zastaiiō.
Verse: c    nī.4 hīm.5 mərąždiiāi.6   ϑβahiiā. mąϑrāiš.7 sə̄ṇghahiiā.8
Verse: d    ə̄mauuaitīm.   sinąm.9 dāuuōi.10 drəguuasū.
Verse: e    ā. īš.11 duuafṣ̌ə̄ṇg.   mazdā. anāṣ̌ē.12 ąstąscā.

Paragraph: 15 
Verse: a    tat̰. ϑβā. pərəsā.   ərəš.mōi. vaocā. ahurā:
Verse: b    yezī.1 ahiiā.   aṣ̌ā. pōi. mat̰.2 xṣ̌aiiehī.3
Verse: c    hiiat̰.4 hə̄m.5 spādā.   anaocaŋhā.6 jamaētē.7
Verse: d    auuāiš. uruuātāiš.   yā. tū.8 mazdā. dīdərəžō.9
Verse: e    kuϑrā.10 aiiā̊.   kahmāi. vananąm. dadā̊.

Paragraph: 16 
Verse: a    tat̰. ϑβā. pərəsā.   ərəš.mōi. vaocā. ahurā.
Verse: b    1kə̄. vərəϑrəm.jā.2   ϑβā. pōi. sə̄ṇghā.3 yōi. həṇtī.4
Verse: c    ciϑrā.5 mōi. dąm.   ahūmbiš.6 ratūm. cīždī.
Verse: d    at̰. hōi. vohū.   səraoṣ̌ō.7 jaṇtū.8 manaŋhā.
Verse: e    mazdā. ahmāi.   yahmāi. vaṣ̌ī.9 kahmāicīt̰.10

Paragraph: 17 
Verse: a    tat̰. ϑβā. pərəsā.   ərəš.mōi.1 vaocā. ahurā.
Verse: b    kaϑā. mazdā.   zarəm.2 carānī.3 hacā. xṣ̌mat̰.
Verse: c    āskətīm.4 xṣ̌mākąm.   hiiat̰cā.5 mōi. x́iiāt̰. vāxš.6 aēṣ̌ō.
Verse: d    sarōi.7 būždiiāi.8   hauruuātā. amərətātā.
Verse: e    auuā. mąϑrā.   yə̄. rāϑəmō.9 aṣ̌āt̰. hacā.

Paragraph: 18 
Verse: a    tat̰. ϑβā. pərəsā.   ərəš.mōi. vaocā. ahurā:
Verse: b    kaϑā. aṣ̌ā.   tat̰. mīždəm.1 hanānī.2
Verse: c    dasā.3 aspā̊.4   arṣ̌nauuaitīš.5 uštrəmcā.6
Verse: d    hiiat̰.7 mōi.8 mazdā.9   apiuuaitī.10 hauruuātā.
Verse: e    amərətātā.11   yaϑā. hī.12 taēibiiō.13 dā̊ŋhā.

Paragraph: 19 
Verse: a    tat̰. ϑβā. pərəsā.   ərəš.mōi. vaocā. ahurā:
Verse: b    yastat̰. mīždəm.   hanəṇtē.1 nōit̰. dāitī.2
Verse: c    yə̄. īt̰.3 ahmāi.   ərəžuxδā.4 nā. dāitē.5
Verse: d    kā. tə̄m.6 ahiiā.   mainiš.7 aŋhat̰. pouruiiē.8
Verse: e    vīduuā̊. auuąm.   yā.īm.9 aŋhat̰. apə̄mā.10

Paragraph: 20 
Verse: a    ciϑənā.1 mazdā.   huxṣ̌aϑrā.2 daēuuā. ā̊ŋharə̄.3
Verse: b    at̰. īt̰.4 pərəsā.   yōi. piš́iieiṇtī.5 aēibiiō. kąm.6
Verse: c    yāiš. gąm. karapā.7   usixšcā.8 aēṣ̌əmāi.9 dātā.
Verse: d    yācā. kauuā.10   ^ąnmə̄nī.11 urūdōiiatā.12
Verse: e    nōit̰. hīm.13 mīzə̄n.14   aṣ̌ā. vāstrəm.15 frādaiŋ́hē.16::

Paragraph: 21  (..)
Verse: Q1Aa    uštā. ahmāi.   yahmāi. uštā. kahmāicīt̰.
Verse: Q1Ab    vasə̄.xṣ̌aiiąs.   mazdā̊. dāiiāt̰. ahurō.
Verse: Q1Ac    utaiiūitī.   təuuīṣ̌īm. gat̰.tōi. vasəmī.
Verse: Q1Ad    aṣ̌əm. dərədiiāi.   tat̰. mōi. dā̊. ārmaitē.
Verse: Q1Ae    rāiiō. aṣ̌īš.   vaŋhə̄uš. gaēm. manaŋhō.:: (..)

Verse: Q1Ba    uštā. ahmāi.   yahmāi. uštā. kahmāicīt̰.
Verse: Q1Bb    vasə̄.xṣ̌aiiąs.   mazdā̊. dāiiāt̰. ahurō.
Verse: Q1Bc    utaiiūitī.   təuuīṣ̌īm. gat̰.tōi. vasəmī.
Verse: Q1Bd    aṣ̌əm. dərədiiāi.   tat̰. mōi. dā̊. ārmaitē.
Verse: Q1Be    rāiiō. aṣ̌īš.   vaŋhə̄uš. gaēm. manaŋhō.::

Verse: Q2Aa    aṣ̌əm. vohū. vahištəm. astī::
Verse: Q2Ab    uštā. astī. uštā. ahmāi.
Verse: Q2Ac    hiiat̰. aṣ̌āi. vahištāi. aṣ̌əm.:: (..)

Verse: Q2Ba    aṣ̌əm. vohū. vahištəm. astī::
Verse: Q2Bb    uštā. astī. uštā. ahmāi.
Verse: Q2Bc    hiiat̰. aṣ̌āi. vahištāi. aṣ̌əm.

Verse: Q2Ca    aṣ̌əm. vohū. vahištəm. astī::
Verse: Q2Cb    uštā. astī. uštā. ahmāi.
Verse: Q2Cc    hiiat̰. aṣ̌āi. vahištāi. aṣ̌əm.

Verse: a    tat̰.ϑβā.pərəsąm. hāitīm. yazamaide.::

Verse: Q3a    yeŋ́hē. hātąm.   āat̰. yesnē. paitī. vaŋhō.
Verse: Q3b    mazdā̊. ahurō. vaēϑā.   aṣ̌āt̰. hacā. yā̊ŋhąmcā.
Verse: Q3c    tąscā. tā̊scā. yazamaide.



Next part


This text is part of the TITUS edition of Avestan Corpus.

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.