TITUS
Dadestan-i denig
Part No. 41
Previous part

Chapter: 40  
Paragraph: 1     40-om pursišn ān ī pursīd kū awēšān kē-šān dād ēd kū pad dēn ī māzdēsnān āstawānīh nē abāyēd būd ēn pad dād be gōwīhēd dēn ī māzdēsnān be hilēd dēn abāz stāyēd [ud] bē ō an-ērīh šawēd! ēg-iš čē ēwēn u-š wināh čē u-š wināh ī ham-dēnīh [ī] an-ēr abar ōh šawēd ayāb čiyōn bawēd [ud] *nakkīrāyīh ī az ēn wināh čiyōn ast ēg-imān rōšnīhā awiš framāyēd guft.
Paragraph: 2     pāsox ēd kū purnāy dēn ī weh be hišt rāy marg-arzān. dād ī an-ērīh-iz grift rāy marg-arzān. ī-š andar ēstišn pad ān ī abārōn dād wināh-iz ī awēšān pad dād dārēnd [ud] warzēnd ud pad ham-dādīh rāy abāg-išān ham-wināh.
Paragraph: 3     ka-z kas pad ān rāh ud kām ī ōy ham-panāhīh ī ōy hangōšīdag *srāyišnīh ī ōy dād ī weh hilēd ān ī wattar gīrēd pad-iz ān abārōnīh ham-wināh.
Paragraph: 4     ka a-petītīgīhā a-pašēmānīhā andar ān ī abārōn-dādīh frōd mīrēd ēg-iš ruwān gāh andar ān ī wattom axwān u-š pādifrāh ān ī was marg-arzānān u-š az dēwān garānīhā dast pad dast rasēd Page of ed.: 170  dard ud sējišn ud jōyišn ud was ēwēnag gand ud gazišn darrišn ud kirrēnišn hamist anāgīh ud dušxwāragīh u-š pad awēšān dād [ud] wurrōyišn andar ān ī wattom axwān anāgīh ast tā ān ī abdom axwān wardišn ka fraš(a)gird pad kāmag andar axwān dahīhed.
Paragraph: 5     bē agar-iš andar zīndagīh az ān ī gray petīt bawēd awēšān kē-š ō ān ī duš-dādīh frēbēnīd ō weh-dādīh hāzēnēd ān ī-š abārōnīhā pad dād nihād az rawāgīh kanēd [ud] rawāg wināhīhā abāz bandēd čē raft abāz wirāyēd [ud] nōg pad dēn ī māzdēsnān menišnīg abar ēstišnīg āstawān bawēd wināh ī-š rawāgēnīd bandēnēd [ud] pad xīr ud ranj ud tuwān kār-framān tōzēd ēd čē pad tan pad sedōš pādifrāh widārēd ēg āmurzišn windēd u-š ruwān bōzīhēd.
Paragraph: 6     čiyōn guft pad xwābarīh dād ī yazdān kū: weh-dēn ī yazdān māzdēsnān abarīgān pad tōzišn brēhēnīd kū wināh ī spayēiti pad-īš nē bawēd ā-š tōzišn az dēn paydāg.
Paragraph: 7     pad ham-gugāyīh guft kū: pōryōtkēš hamāg pad ēn ham-dādestān be būd hēnd kū az weh-dēnīh be petītīgīhā <be> rāh be ō dušox nēst.
Paragraph: 8     bē ān petitīgīh andar zīndagīh bawēd čē guft ēstēd kū: kē zīndag nē bawēd ahlaw kū wināh be nē wīzārēd ā-š murd nē baxšānd ān pāšom axwān.
Paragraph: 9     wināh nē kard weh az tōzišn [ud] petītīgīh.




Next part


This text is part of the TITUS edition of Dadestan-i denig.

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.