TITUS
Dadestan-i denig
Part No. 42
Previous part

Book: 41-92  
Pursishn 41-92


Page of ed.: 29 
Chapter: 41  
Paragraph: 1     41-om pursišn ud pāsox ān ī pursēd kū ōy kē pad weh-dēn ī mazdēsnān ēstēd mardōmān pad weh-dēnīh pānagīh ud ayārōmandīh kunēd ud mardōmān az anērīh ud ag-dēnīh be bōzēnēd ud az awēšān kē menišn dārēnd kū be ō anērīh ud ag-dēnīh šawēnd ēg-išān aziš abāz dārēd be ō anērīh nē šawēnd pad dēn ī mazdēsnān āstawān bawēnd ēg-iš dādestān čē ēwēnāg bawēd u-š kirbag čē ēwēnag bawēd
Paragraph: 2     pāsox ēd kū abēr stāyīdag ud farrox ud burzišnīg ud wuzurg-kirbag was-pādāšn u-š ahlawīh frārāst widarag ō ān ī pāšom axwān frāx ān ī ruwān rāmišn purr bawēd ud wuzurg ēmēd
Paragraph: 3     harw kirbag ī awēšān kē-š az anērīh ud ag-dēnīh pād pad dēn ī weh pattāyēnīd ud harw kirbag pas az ān kunēnd ka kard tōxšišn ud spās ī ōy rāy ī pad dēn pād az ag-dēnīh bōxt ēstēnd ōy ēdōn bawēd čēōn ka-š xwad rawāgēnīd hē ud abāg awēšān ham-spās ud ham-kirbag
Paragraph: 4     ud sāmān ud čandīh ī āōn kirbag gōkān nibištan nē bē āgāhīh ī az purr-ōšmār *kirbagān ī az mar rawāgīhēd
Page of ed.: 30 
Paragraph: 5     bē ka ham-rāh warzišnōmand ud ōstīgān pad wināh nē abespārīhēd ēg-iš gāh ī andar ahlawīh abēr wuzurg u-š andar gētīg wuzurg burzišn ud stāyišn ud abrang ī xwēš
Paragraph: 6     ud čand ōy ī abārōn-dād ud margarzān-dād ruwān pādifrāhōmandīh ud nāf ud paywand waštagīh az-iz rasišn ī mihr-drōz āōn ī-š andar dāmān ud *dēn-kardgarān bēš ud bīm ud xīndagīh
Paragraph: 7     ān ī frārōn-dād čēōn dastwarān pad mēnōg wuzurg-stāyišnīh ud nāf ud paywand weh-mēnōg rasišn čand pādāšn ī nēkīh purr-ummēd bawēd čēōn ān-iz guft ēstēd kū mardān ī huwaršt-warzīdārān ēg-išān paydāgīh bawēd pad frazandān

Next part


This text is part of the TITUS edition of Dadestan-i denig.

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.