TITUS
Dadestan-i denig
Part No. 44
Previous part

Chapter: 43  
Paragraph: 1     43-om pursišn ud pāsox ān ī pursēd kū mard-ē *abarmānīg ī abzārōmand kē-š andar dēn abzār ī wuzurg kard ēstēd u-š dastwarīh ud mowbedīh kard ēstēd ayāb-iš nē kard ēstēd bē-š abzār ī wuzurg andar dēn kard ēstēd
Paragraph: 2     ud andar šahr gyāg-ē kas nēst kē zand šāyist-nē-šāyist weh dānēd kū ōy pad gyāg-ē čēōn spāhān frāz rasēd mardōmān ī šahr hamāg-dēn ud was yazišn hamē framāyēnd ō kas kas az any šahrīhā driyōšān kē-šān abzār ud *abarmānīh ī ōy nēst be ō šahr hamē āyēnd ud hamāg-dēn ud was yazišn hamē padīrēnd
Page of ed.: 33 
Paragraph: 3     ān mard ī *abarmānīg ī abzārōmand gāh ī *abarmānīh ī xwēš ud gāh ī dēn ud gāh ī abzār ī-š ast rāy hu-škōhīhā ud šarmgēnīhā rawēd andar šahr ud kār-ē ud dādestān-ē az šahr nē xwāhēd ud kār-ē ud dādestān-ē dudīgar nē dānēd kardan kē-š sazāgīh pad-iš ast mardōmān ī šahr abzār ud kardārīh ī ān mard pad dēn kard ēstēd rāy az hamāg-dēn ud yazišn kār ī hamē framāyēnd ēg-išān ān mard bahr kardan u-šān bahr abāyēd dād ō ān mard ayāb čēōn abāyēd kardan u-šān awiš abāyēd handāxt ayāb nē
Paragraph: 4     ud hamāg-dēn ud kār ī sūd ī was abāyēd guftan kū tā ān kū tō mad ēstē ēg-imān be ō ōy ī azēr ī tō nē abāyēd framūdan ayāb čēōn kunišn bahr ī sūd ud nīrmad ī az abārīg dar ī-š ān abzār rāy awiš abāyēd handāxtan ayāb čēōn bahr ī abzār ud gāh ī dēn abarmānd amā mardōmān čēōn abāyēd handāxtan
Paragraph: 5     pāsox ēd kū mard-ē ī pad ān ēwēnag ī čēōn nibišt *abarmānīg ud abzār ud kardārīh ud hunar passazag pad bahr ud xūbīh abēr arzānīg ud pad-iz xūb-rāyēnīdārīh ī hamāg-dēn ud yazišn ī yazadān abēr ēmēdīg andar warōmandīh pad ān abāyēd dāštan kū paydāgtar ud xūbtar rāyēnēd az awēšān kū-šān abzār ud hunar ī ōy nēst ud abar-iz bahr ī nīrmad ī az yazišn ī yazadān arzānīgīh ī ōy wēš kē abzār ud hunar ud kardārīh pad dēn meh
Page of ed.: 34 
Paragraph: 6     ud mard ī čēōn nibišt ka-šān hamāg-dēn ud yazišn xūb rāyēnēd u-š abāz-framāyišnīh ud xūb-rawāgīh ī kār frārōn ud nīrmad ī xwēš handāxtan tuwān ud wuzurg-niyābagīhā awiš framūd u-š pad-iš bahrwar ud frāx-nīrmad ud padēx-windišn dāštan
Paragraph: 7     ān-iz ī kam-abzārtar ī kam-gāhtar az ōy pad čand dar arzānīg ast niyābag ī xwēš az-iš abāz griftan nē ēwēnag bē ōy ī wēš-abzār meh-bahrīhā ud ān ī mayānag-hunar mayānagīhā ud ōy ī kam-abzār ī nēkīh-arzānīgīhā passazagīhā ud niyābagīhā ud arzānīgīh ēdōn čēōn pad dēn gōwīhēd kū bahr ō ōy ī dēn-burdār panǰ niwēyēnd ud dō ōy ī mayānag ud ēk ō ōy ī nidom
Paragraph: 8     ud agar ān mard rad ud dastwar ī dānāg ayāb pad hunar ud wehīh ud abzār ī dēn ī mazdēsnān pāšom ī dēn-burdārān ī dānāg u-š dēnīg-xēmīh hamist dēnīg-bahrōmand-kār ī andar gyāg be ō ōy framāyēnd ud ōy ud abārīg arzānīgān ud niyābagōmandān ī andar gyāg niyābag ō gyāg rasišnīg čand sazēd ud niyābag ī xwēš bawēd hamāgīhā be ō ōy handāxtan xūb
Paragraph: 9     ud agar pad ān ī niyābag-baxšēnīdārīh nē spurrīg ud pad frāzīg-hunarīh ud frāzīg-wehīh ud wēš-abzārīh passazag ī meh gāh ud wēš bahr arzānīgīh pad xwēš niyābag-pāyagīhā bahrōmand kardan čīmīg Page of ed.: 35  čē paymān-nigerišnīh kns(?) niyābag-dahišnīh wizīdārīhā guft ēstēd kū nē a-paymānīg dastwar ǰāmāsp ī hwōwān
Paragraph: 10     pad ān ēwēnag ōy weh *abarmānīg ī wēš-abzār a-bahr dāštan abēr paymān ī ristagīhā bē hamāgān be ō ēk abzārōmand handāxtan abārīg-iz niyābagōmandān a-bahr kardan nē drust-wimandīhā ud paymānīhā čē ēk-iz ēk pad xwēš niyābag bahrēnīdan paymān-bōzišnīhā
Paragraph: 11     ǰud-iz az yazišn be ō āōn mard ī dēnīg weh-dilīhā pad ēwēnag *abarmānīg nīrmad handāxtan wuzurg kirbagtar kū ōy-iz *abarmānīg pad padīriftan wēš dastwarīhā ud ān ī xwad xwāstan abdom harw windišn čē bē ān ka pad ēč ēwēnag frārōn-kardārīh zīwišn xwāstan nē tuwānīg tā-š tis-iz pad ǰāmag pad ahlaw-dād xwāstan pad aǰgahānīh zīwistan nē bōzišnīg-rāh
Paragraph: 12     ān ī nē xwad xwāhēd dānāg-rādān a-xwāst dahēnd ō dahišngar wēš spās ud ō dōst-dāštār bōzišn wēš dēnīg dōstān gāh ī dēn-burdārān Page of ed.: 36  ēdōn abāyēd dādan ud dāštan čēōn passazag ō wuzurg mādag ī dēn meh ēmēd ī-šān abar dēn paywast čēōn guft ēstēd kū dādestānōmandān dastwar ān ī abzōnīg dēn čēōn-išān rāh ī ruwān-bōxtārīh abar dēn-burdārān
Paragraph: 13     ud abērtar ēwēnag čēōn dādīg šāhān šāh be ō stāyišnīg mowbedān mowbed guft kū pad ērīh pid hē ud amā tō pad tan pānag hēm ud tō amā pad ruwān pānag bawē
Paragraph: 14     ud ham handāzag dēn-dōstān az dēn-burdārān rāh ī ō ruwān-bōzišnīh xwāstan ud ō dēn-burdārān wuzurg-abrangīhā ud purr-āzarmīhā gāh ud sūd ud rāmišn handāxtan āōn čēōn ō ruwān-bōzišnān handāzēnd xūbīhā nē pad sāl bē pad māh windišn handāxtan ēwēn

Next part


This text is part of the TITUS edition of Dadestan-i denig.

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.