TITUS
Dadestan-i denig
Part No. 45
Previous part

Chapter: 44  
Paragraph: 1     44-om pursišn ud pāsox ān ī pursēd kū hērbedīh ayāb hāwištīh kadām hērbed bawēd kadām hāwišt kadām ān ī pad hērbedīh kadam ān ī pad hāwištīh abāyēd dāštan
Paragraph: 2     pāsox ēd kū hērbedīh ud hāwištīh ham-band mādayānīhā hērbedān hammōzēnd ud hāwištān hammōzēnd dānišn ī dēn ī ast abestāg ud zand
Page of ed.: 37 
Paragraph: 3     hērbedān hāwištān būd hēnd pad hammōxtan ī az xwēš herbed hāwišt-iz hammōxt dānišn hērbed bawēd abāg hammōxtār andar ēk tan bawēd hērbedīh ud hāwištīh.
Paragraph: 4     pad ān ī hāwištagīhā hammōxtēd az hērbed ī dānāgtar az xwēštan hērbedīh hammōzēd ō hāwišt ī hammōxtār-kāmag kē-š hammōzišn niyāz az-iz ōy
Paragraph: 5     ka andar xwēš hērbed hāwišt abar xwēš hāwišt hērbed ast čēōn ka gōwīhēd-iz kū pārs āsrōnān-pēšag-framādār abar ostān ud mowbedān ī pārs sālār ud pēšōbāy ī dēn waxš kard ast ī be wizīd pēšagīhā ī andar dēn
Paragraph: 6     hērbed abar zand-āgāhān ud hāwišt abar abestāg-*warmān āšnāgtar hērbed frāz az yaštan ī wisparad ud hād ud nērang-abzār abzār ī pad zand hāwištān frāz az nērang ī yazišn ud pādyābīh ud a-bādyābīh ud pākīh ud rēmanīh ud wināh pad društag be šnāxtan abzār ī abestāg
Paragraph: 7     harw dō pēšag az harw astīh ud hamāīg-astīh ud hamāg-wehīh ud frazām-pērōzīh ī yazadān ud hamāg-wattārīh ud nēst-wehīh ud abesīhēnišn ī dēwān be šnāxtan
Page of ed.: 38 
Paragraph: 8     yazadān-dōstīhā ān ī āsrōnīg xēm hammōxtan ud griftan ud dāštan frēzwānīg ud meh-dādestānīhā-tar

Next part


This text is part of the TITUS edition of Dadestan-i denig.

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.