TITUS
Dadestan-i denig
Part No. 47
Previous part

Chapter: 46  
Paragraph: 1     46-om pursišn ud pāsox ān ī pursēd kū andar mēzd ī weh-dēnān kē-š mard panǰāh ayāb ē-sad wēš ayāb kam čēōn ka bawēd andar hēnd ud mard haft kē-šān pad dēn kardārīh kard ēstēd abāg awēšān ham-mēzd hēnd az ān haft mard ast kē-šān panǰ nask ast kē-šān šaš baxšišn ī abestāg warm ud tuwān hēnd yašt u-šān zand ī ēč fragard nē warm u-šān harw haft pad rāh ī pēšgāhīh pahikār
Page of ed.: 40 
Paragraph: 2     ud ōy kē-š sīh fragard ī pad zand warm gōwēd kū pēšgāhīh ān ī man ud gāh ī man weh abāyēd dāštan ud būdan čē zand ud šāyist-ne-šāyist man weh dānēm ud gāh ī man weh abāyēd būd čē ēn gāh ī dēn hamē ka be ō mardōmān nē nimāyēm andar dēn ne bōzišn<īg> hēm ud ašmā pad gāh ī man ma pahikārēd če nē sazāg pahikārd čē ēn sabukīh ud an-ērīh ō dēn hamē āwarēd nē ō man
Paragraph: 3     ud awēšān-iz haft mard be ō ōy hamē gōwēnd kū gāh ān ī amā meh hamē abāyēd būd čē amā pad zōtīh ī xwēš harw mard čand nask tuwān yašt hamāg *az mēzd pad bahr bahrōmandtar abāyēd dāštan
Paragraph: 4     ud awēšān kē-šān abestāg wēš warm ayāb ōy ke zand ud šāyist-nē-šāyist weh dānēd ud kehīh ud mehīh ī pad ēn dar čēōn-imān pursīd ēg-imān andar rōšn framāyēd kardan čē ka pad ēn dar kehīh ud mehīh nimāyed ēg-iš meh-sūdīh bowandagīhā ast
Paragraph: 5     pāsox ēd kū az ān ī nibišt kū sīh fragard pad zand warm ud abārīg-iz ast kē-šān panǰ nask ast šaš nask ī abestāg warm az ān kadam fragardīh ud kadām naskīh nē wizīd ud wizīn ī abar wēš-abzārīh ud kam-abzārīh nē paydāg čē nask ast ī az čand nask meh ud fragard ast ī az čand fragard meh
Paragraph: 6     bē ān kē-š panǰ nask ī abestāg warm ān-iz kē-š sīh fragard ī pad zand warm ǰud ǰud brēh ud mar dānistan harw ēk brēh ī pad zand pad Page of ed.: 41  haft brēh ī ǰud az zand ō mar kard ud hangōšēnīd abāyēd u-š az-iš paydāgīhēd kū kē wēš abzār ud kē kam
Paragraph: 7     ka-š tis andar nēst ān rāy ǰuttar bē ka abarmānd ud framān-xwadāyān gāh ī kār ī pad-iš gumārdag ayāb nōg-zōtīh ayāb gāhānbār-radīh ayāb griftag-pēšgāhīh ayāb ham-čim rāy ǰuttar bawēd tā hamē ān ī wēš-abzārtar gāh ī meh ud bahr ī wēš handāxtan sazāg
Paragraph: 8     ka *hāwandīhā sazāgōmand ud abzārōmand ayāb wēšīh ud kamīh ī-šān abzār nāmčištīg nē paydāg ān kē-š zand wēš warm ud wēš yašt pad xwarišn pad *padēxtar dāštan čimīg sahēm u-šān harw dō rāh ī arzānīgīh wuzurg ud frāx āzarm ud sūd purrīhā niyābag
Paragraph: 9     abzār ī pad zand ud ān ī pad abestāg āgenēn ham-ayār čē abestāg-yaštārān-iz niyāz ō āgāhīh ī az zand abar nērang ud šāyist-nē-šāyist ī yazišn ān ī az zand āgāhīh pad kārīgtar sūdīhēd ka-šān yazišn weh rawāgīhēd
Paragraph: 10     ud awēšān harw dō ēwēn abzārōmand ēk ō did dōst ī payrāstār ud stāyīdār ud abrangēnīdār ud dēn-dōstān ō-šān harw dōān dōst ī hu-čašm ud payrāstār
Page of ed.: 42 
Paragraph: 11     ka-z ēk abar did hamēmāl-gōwišn paydāg bawēnd az niyāz ayāb az stahmagīh petyārag ōh bawēd abar-išān abaxšāyīdār u-šān bahr nē kāstār ud ō ham-zōrīh ud hu-sāzīh hāxtār būdan čimīg

Next part


This text is part of the TITUS edition of Dadestan-i denig.

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.