TITUS
Dadestan-i denig
Part No. 48
Previous part

Chapter: 47  
Paragraph: 1     47-om pursišn ud pāsox ān ī pursēd kū ohrmazd ud amahraspandān ud frawahrān ī ašōān az yazišn-xwāyišnīh ud urwāhmanīh ud rāmišn kāmag čēōn ayārīh ud frayādišn ī ōy kē-š yazišn framūd ud šahr-mardōmān ēg-išān frayādišn pad čē ēwēnag bawēd ud gannāg mēnōg ud dēwān ud druzān *bēšišn ud zanišn ud dard ud dušxwārīh čēōn ud pad čē ēwēnag bawēd
Paragraph: 2     čim ī yazišn čēōn ast ud čē ast yazišn kū weh ka kunēnd kē weh ka kunēnd ud čēōn weh ka kunēnd
Paragraph: 3     pāsox ēd kū ohrmazd ud amahraspandān az yazišn wuzurg šnāyišn pad-iš abēzagīhā nērang pad-iz ēn kū-š xwēš wābarīdag ud framān-bandag ī rāyēnāg čēōn-iš framūd ōy ī wisp-wehīh be ē ān ī bandagān ēkānagīh<ā> pādāšn ī purr baxt ēwar
Paragraph: 4     dēn-burdār ī rāstīhā ōšmārdārān az kardan ī yazišn ī yazadān ud šnāyišn ī weh-mēnōgān ud *zanišn ī *druzān abzūdan ī nēk-wārānīh Page of ed.: 43  ud waxšišn ī urwarān ud ābādānīh ī gēhān ud drust-rawišnīh-iz ī zīndagān ud tā-z ān ī frašgird-rawāgīh ud dāmān a-margīh az-iš būd guft ēstēd čimīgīhā
Paragraph: 5     čē yazadān meh u-š ham-padīragīhā dēwān a-kāmīhā u-šān zanišn ud bēšišn ī garān az-iš būd tāštīg
Paragraph: 6     yazišn čim dēn-bōzišnīh u-š xwāst čim ēn kū dēn ō dām frēstīhist ō šnāsagān rōšnīhā kū nē ān ī dānišn ī andar gētīgān xrad waxt bē ān-iz ī pad gētīgīg xrad nē dānīhēd ān-iz ī mēnōgān ud ān-iz ī mēnōgīg nērōg ō gētīgān nimūdan āgāhēnīdan rāy ān ī dēn
Paragraph: 7     kē gētīg-dānišnīg nigēz abāg ān ī gētīgān pad gētīgīg xrad be tuwān dānistan rāst ham-band u-š dānišn abar gugāy pad ān ī mēnōgīg-zōr bē az gētīgīg gugāy wābarīgān dāštan rāh ī šnāsišn ī drust
Paragraph: 8     ān *gōkān čim ī yazišn andar čē-m zamānīg ayādīh ō nibištan frēzišn ast gōkānīg ēn ēk nimāyišn ī abēzagīh andar abēzag stāyišnīh ī mēnōgān yazadān ast čēōn framūd ēstēd čēōn yazišn ī gāhānbār pēš az gāhānbār nimāyīhēd yaštār dō ayāb sē ǰar tan az ān ī nasūšīg rēmanīh ud az-iz ālūdagīh ī bērōnīg tan-iz čand sazēd *az-iz *rēm pāk kardan
Page of ed.: 44 
Paragraph: 9     ān-iz ī *gizistag xwāb pad ān ī dādīhā tōzišn az handām bērōnīhistan pad pāk nam ī az pākān gōspandān ud urwarān pas pad-iz ān ī frāz-tazāg āb ī yōǰdahr hamāgīhā tan šustan pad ān pāk bōy ud ān ī dādīhā nēwand tan-wastarag hu-bōy kardan
Paragraph: 10     pad spēd ud drust wahmanīg wastarag ēbyāstan ud zūrīh ī *āz ud *būšāsp ōgārdan frēh-būd ud abē-būd ān-iz rāy kū tā andar yazišn az suy ud tišn xwāb az frēhīh ud nihangīh az-iz kamīh ud *tandīh nē awištābīhīdan
Paragraph: 11     ud pēš az yazišn pad xwēš hangām ud ān-iz ī sazišnīg ud paymānīg ud *pāk xwarišn xwardan ud ān ī ēwēnīg xwāb kardan andar *wahišt-tanīh(?) ud *wahišt-menišnīh(?) ud paymānīg-čihrīh andar ān ī ātaxšān-mān ke- bāstān-rōšnīh ud hu-bōyīh ud frārōnīh ud kirbagīgīh andar mehmān
Paragraph: 12     u-š dēwān az-iš *sāyag ō xwad wēnēnd kadag ast tārīkān ud wehān kē pad stāyišn frayād be ō gēhān rasēnd
Page of ed.: 45 
Paragraph: 13     ud ān ī yaštārān-gāh čēōn xwad ast gāh ī zōt ud hamkārān gyāg ī urwēs ud ādišt andaragīhā pāk kardan ud āb ī yōǰdahr abar paššixtan
Paragraph: 14     ān ī yazišn abzār abāg xwēš mardōm ī yaštār ud az ān šaš dām ī gētīgīg hōm *bōy ātaxš ud ayōxšust ud āb ud urwar čēōn passazagīhā ō ham burdan ān ī sagēn urwēs ud ān ī sang-gačēn hāwan ud abar-hāwan ud tašt ud māhrōb-pāyagīhā griftan pad yōǰdahr āb pādyābēnīdan
Paragraph: 15     ān ī rōšn ātaxš abar ān ī pāk ādišt pad ān ī hušk-ī-nigerīd ī yōǰdahr ēsm waxšēnīdan ud ān ī bēšaz bōy az urwarān ēwan xwēš hangāmīhā abar burdan ud ān ī yōǰdahr āb ī pad ān ī dēn-gōwišn nērang āšīxtan pad ān ī pāk ayōxšustēn ǰāmag
Paragraph: 16     ān ī hu-rust hōm ī-š *giyāh xwarrahōmand hōm kē-š dahišn ī zardušt abar būd ud daxšag ān ī spēd gōkarēn hōm kē-š a-margīh ī frašgird az-iš paydāg rāy u-š hēnīh ud sahm ī dēwān az-iš abāg ān ī hadanapāy urwar ī urwarān ud gōšōdāg pad xwēš gāh nihādan
Paragraph: 17     ān ī urwarīg-barsom pad ān ī urwarīg-parwand ō kustīg-gāh grih ēbyāstan ān ī šahrīwarīg-māhrōb pad gāh ī ān ī dahibedān dedim ī mādayān barsom wizārīhēd wirāst ēstēd awistardan
Page of ed.: 46 
Paragraph: 18     pad ham-barišnīh ī pākān gētīg-dahišnān čand abēzagīhātar šāyēd rasišn ī abēzagān hamāg daxšag ōstīgānēnīdan
Paragraph: 19     awēšān yaštārān kē-šān ān ī xwēš tan bērōn yōǰdahrēnīd ud pad pāk wastarag *nihumbīd(?) pad ān ī paymān<īg>-xwarišn suy ud pad ān ī dādīhā xwarišn tišn ud pad ēwēnag<īg> xwāb būšāsp ud pad ān ī xradīg zōr waran ud pad ān ī āsrōnīhā xēm xēšm ī wad ud drō ud wad-menišnīh az-iz andarōntom dil ud menišn ōgārdan pādixšāy
Paragraph: 20     abaxšagīh ud pašēmānīh ud petītīgīh ud tōxt-wināhīh ud wuzurg yōǰdahr-menišnīh xwāstan ud ayāftan čašm ī frāz-wēnāg dast ī pad-pādyāb ud abārīg hamāg handām ī tan nāmčištīg ānōh kū-š nam ud hidēr az-iš xūb-*kanišnīg ud ān ī pāk wastarag nihuftan uzwān < az> drō guftan ud dast az wināh pahrēxtan ud pādan menišn xūb-dārišnīhā ō yazadān-šnāsagīhā wīrāst ēstādan ud nōgīhā-iz gōwišnīg-petīt radīhā ōšmurdan
Paragraph: 21     ud ōy zōt abāg gōwišn ī mānsarīg ātaxš-gāh pērāmōn yōǰdahrēnīdan yazadān-stāyišnīhā be ō ān ī zōtān-gāh šudan ud raftan xwarrah ī ōy rōšnān-šahr ī yazadān ud frawahrān ī azbāyišnīg menīdan
Paragraph: 22     awēšān-iz ham-kārān hōyagīhā ud *dašnīhā ud *ham-waragīh ǰud Page of ed.: 47  ǰud pad xwēš gāh ēstādan ud yazadān menīdan pad šnāyišn ī ohnnazd ud tar-dahišnīh ī gannāg-mēnōg āškāragīhā-warzīdārīh frāz ō yazišn ēstēd ōy zōt ī weh-pēšōbāyīh ud abārīg hamkārīhā
Paragraph: 23     ast kē pad hāwanānīh ast kē pad ātaxš-*zēnēnīdārīh ast kē frāz-burdārīhā ast kē *āburdārīhā ast kē āsn-dārīhā ast kē gūmēzaggarīhā ast kē kār-framūdārīhā ud xwēš niyābag ī andar yazadān rāyēnēd andar yazišn rāyēnīdan
Paragraph: 24     pad pākīh ud abēzagīh ud rāstīh čand andar gumēzag-gētīg ast yazadān stāyišnīg yazišn sarēnīdan ka ān ī ahlaw ī wirāst-xēm abāg ōy ī abzār ī yōǰdahr kē was mēnōg-nērōgīg daxšag ayādēnišn ī yazadān kām ud druz a-kām āfrīn ēstēd sazāgīhā be ō ham madan
Paragraph: 25     pas ān ī wuzurg-nask ī xwānīhēd hādōxt ī xwad ast naskān-radān pad šnuman ī ān ī buland rad dwāzdah-homāst pad ān ī ēwāz ī a-drō kē-š hagriz ēč drō abar nē gōwīhēd ast bun ī harw rāstīh xwānīhēd abestāg wizārīhēd abēzag-stāyišnīh ī yazadān andar ān ī rōšn rōz pad ān ī frāyar-gāh tā-z šah dēn ī nērangīg rāst ōšmurišnīg a-wardišnīg-widār ud a-waxr ud a-zēfān
Paragraph: 26     ēd čē pad āfrīn ī yazadān ēd čē pad wizāyišn ī druzān ēd čē pad Page of ed.: 48  spās ī xwarrahōmandān ud wuzurg-kardārān ēd čē pad handarz ō dāmān framān-bandagān
Paragraph: 27     ēd čē pad abar rāst-sraw ī pēšēnīgān ī be-widardān ēd čē pad sazāg niwē ī ō ahlawān ēd čē weh-kunišnān ēd čē abāyišnīg ayāftan padistāg ēd čē a-wizīrišnīg ud āmurzišnīg ī dādār ēd čē pad any rāh ī wehīh-abgār ōšmurīhēd
Paragraph: 28     ka pas az parāhōm az bāmdād tā-z ō šab andar abēzag-stāyišnīh ud abēzag-gōwišnīh nē xward ud nē-z xwārīd ud nē-z kār wizārd nē-z saxwan gōwīhēd nē-z xwāb *kard nē-z ēč rēmanīh be ō tan hišt ud nē-z padisār ī ān ī dēnīg-gōwišn az ān framūdag wardēnīd ud nē-z menišn az ān ī rāstīh ud pākīh ǰudāgēnīd ud hamēšag gōwišn ī rāst padisārīhā ud handēšišnihā ān abestāg gōwīhēd u-š ham-kārān čē pāsox ēwēn ham-pattahīg ēwēnagīhā-ēwāz nask gōwēnd čē niyōxšišn niyābag yōǰdahr niyōxšēnd
Paragraph: 29     andar yazišn was-nērang daxšag ud nišān ī mēnōg-zōrīh paydāgīhēd ī ō dēwān tarsēnāg ud bēšēnāg ud ō yazadān azbāyāg ud urwāhmēnāg
Paragraph: 30     čēōn ān-iz ī pāk hōm ī pad čahār zōhr ī dēnīg-nērangīhā hunīhēd kē hangōšīdag-iz daxšagīhēd bawišn ud zāyišn ī čahār hu-dēnwar frēstagān ī būd yašt-frawahr zarduxšt ud hēnd ōšīdar ud ōšīdarmāh ud sōšāns
Page of ed.: 49 
Paragraph: 31     čēōn ān-iz ī *ayōxšustēn hāwan ī andar ān hōm-hunišnīh škāfīhēd u-š wāng abāg abestāg-gōwišnīh xwānīhēd kē ayādgār bawēd ī menišn ud gōwišn ud kunišn pad awēšān rāst-paygāmbarīh be ō gēhān rasišnīh
Paragraph: 32     čēōn ān ī frārōn nērang ī andar āb ī pad sē zamān kunēd kē gēhān-nimāy bawēd ī xwarrahōmand āb-stānišnīh ud wārān-kardārīh ud ān ī az wārāngarīh bēšazišnīh
Paragraph: 33     čēōn ān ī šīr ī yōǰdahr pad ān ī xwarrahōmand nērang az yōǰdahrgōspand grift pad dō baxt ēstēd kē daxšag nimūdār ī ān wuzurg xwarrahōmand *šīr ēk ī ō duxt ī pouruǰīrā ī mazdēsn az ō ōšnar ī purr-xrad ēk frānak ī *wadragā ud az ō<y> be ō kay-kawād mad
Paragraph: 34     ud abar xwarrahōmand dēn-dastwarān was-paywandīhā āyaft guft ēstēd čēōn ān ī was-wizēnišn *nask ud zōhr ī frēzbānīg-darmān rāy bēšazēnīdārīhā andar ō yazišn ō wahrām ātaxš dahīhēd kē *dēwān zanēd ō abardom zōhr ī pad gēhān frazām az haṮĠayŌàš-gāw be Page of ed.: 50  ō weh-franaftār dahīhēd ō ātaxš ī mardōmān-tan gumēzīhēd u-š pad-iš bawēnd spur-sagr ud a-marg
Paragraph: 35     ud any-iz ast andar yazišn was daxšag ud nišān ī mēnōg rōzēnīdārīhā ud xwarrah-kārīhā ud warz-kārdīhā ī-šān gōkān abēr drāz ast
Paragraph: 36     ud agar ēwāz ēn hē kū pad ēk yazišn ī rōz-drahnāy and mard ī ahlaw andar yōǰdahrīh ī andarōn ud bērōn tan az hamāg handēšišn ud warzišn ī gētīgīg-kār ud kēnīgīhā ud āz-warzišnīhā abāz ēstē ud az hamāg drō ud zūrīh handēšišn ǰudāg ud gōwišn hamāg ān ī yazadān-kārīhā ud stāyīdārīhā ud āyaft-xwāstārīhā būd hē ēg-iz mēnōg-rāhīh ud yazadān-ēkānagīh az-iš paydāg
Paragraph: 37     ān ī and abzār ī az hammis weh-dahišnān čand abēzagīhātar šāyēd be ō burdan rāy nērōgēnāg ud ō abēzagīh ēmēdēnāg ud ē gumēzagēn sahmēnāg ud ō druzān tarsēnāg ud ō yazadān-iz šnāsēnāg
Paragraph: 38     yazišn ān ī weh ka ō<y> kunēd ī abēzag-xēm ud āsnūdag-xrad ud dēn-wāspuhragān ud yazadān-menīdār ud mēnōg-wēnišn ud pāk-menišn ud rāst-gōwišn ud xrad<īg>-kunišn ud yōǰdahr-tan ud šēbāg-uzwān ud warm-nask ud rāst-abestāg ud pādyāb-sāzišn ud xūb-nērang ud *a-waxr ud *a-zēfān
Page of ed.: 51 
Paragraph: 39     kē-š hōmānāg nazdīk pad ham-hunarān ham-ragīhā andar mān ī ātaxš ī hamēšag-waxš ud pas andar mān ī abārīg ātaxšān ī wahrām ud pas andar mān ī mazdēsnān ud abārīg wehān ud pas abārīg gyāg ī pāk ī *wuzurg-*pāyagtar yazīhēd
Paragraph: 40     ud ān ī stōš andar mān ī ātaxš-gāh ī ō ān ī widurdag nazdīktar
Paragraph: 41     yazišn ī ašoān frawahr andar pākīh ānōh kū ān ī māništ ī ān ī widurdag kē-š ruwān yazīhēd nazdīktar
Paragraph: 42     ān ī pērōzīhā andar kārezār rāy hēnīh handēmān razm
Paragraph: 43     ān ī sahm ud abārīg wināhišn az warz abāz dāštan rāy ud warz ān ī ǰōrdāyān pahīg rāy handēmān ǰaw
Paragraph: 44     ān ī *ahlišwang mehmān wāng-kun<išn>īh andar ān mān ī abārīg az ham-nimūnag ud handāzag ud hangōšīdag kardan ud dāštan čimīgīhā

Page of ed.: 52 
Next part


This text is part of the TITUS edition of Dadestan-i denig.

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.