TITUS
Denkard Book 7
Part No. 9
Previous part

Chapter: 8  

Paragraph: 0   abar abdīh ī paydāgīhistan paydāg; paydāgīhist pas az hanǰābīhistan ī ērān xwadāyīh az ērānšahr tā hazangrōzem ī zarduxštān sar ud rasišn ī ōšīdar ī zarduxštān



Paragraph: 1     hād ēd abdīh wābarīgānīhist-iz pēš-kēdīgīhā āgāhīh abar ān ī nohom ud dahom sadōzem az abestāg paydāg.

Paragraph: 2     ān ī nūn wēnābdāg ī ēdōnīh nimūdār ast čiyōn: hanǰābišn ī ērān-xwadāyīh az ērānšahr ud wišōbišn ī dād, ēwēn ud ristag; [ī] pādixšāyīh ī wizārd-wars ud buland pēšag karesānīg.

Paragraph: 3     ud āgenēn āmēxtagīh ud paywandīh-iz ī awēšān har čahār wābarīhistan; ō abartar pāyag ud madan ī abāg-išān ī nigōnān xwurdagān tiragān ud abēdagān ī āwām; ud wišōbīhistan ud nigōnīhistan ī bowandag [ud] paydāg mardōm andar ān ī awēšān zamānag.

Paragraph: 4     ud frōd waštan ī xrad, xēm az ērān-dehān anērān ī dēn-rāstīh ud šarm nimūdan ud spās ud āštīh ud rādīh ud abārīg wehīh kē-šān winārišn mehmānīh abar xrad, xēm.

Page of ed.: 424 
Paragraph: 5     ud vasīh ud čērīh ī ahromōγīh ud druzanīh ud frēftārīh ud spazgīh ud sturgīh ud druxtārīh ud anaspāsīh ud anāštīh ud panīh ud abārīg wattarīh kē-šān band-iz ō xrad ud xēm ud hištan <ī> pahrēzīh ī ātaxš, āb ud gētīg amahraspand.

Paragraph: 6     ud stahmagīh ī agdēnīh ud uzdēs-paristagīh ud kamīh ī āzādagīh ud wēš pādixšāyīh ī āz pad tan ī mardōmān ud purrīh ī ǰud-dādestānīh abar ǰādūgīh ud was drāyišnīh ī was abar yazdān dēn stōwīh.

Paragraph: 7     xwadāyīh abēsēhēnīdan ī mardōm ēk abar did; awērānīh ī gyāgān, rōstāgān az must-iz garān ud duš-pādixšāyān ī anēr ī ēk abar did ud garān rēš ud zanišn ī abar gōspandān ud pazagīh ī mēnōg ī rāmišn az ērān dehān ud mehmānīh šēwan ud mōy ud snōhišn ud garzišn andar šahr ud a-windišn-kardanīh ud nēst-zōrīh zad-xwarrahīh ud kam-ziyišnīh mardōm.

Paragraph: 8     ud wasīh ī hēn ī sraxtag sraxtag padīriftagīh ī ahlomōγ andar sāstārān a-padīruftagīh ī ān ī hu-xēm ud dānāg ud zūd ud zūd rasišnīh ī niyāz sēǰ abārīg petyārag ud ō-škāfišn ud wartag-tāšišnīh ī andar-eš dehān ud gyāg ī ērān dehān tarwēnīdār

Paragraph: 9     ud abandīh dāštagīh ī dēn ī yazdān; nizārīh ud dardīh ud dušgōnīh ī hudēnān ud xrōsagīh ud xwastagīh ī dēn-burdārān ud druwandīh ud murnǰēnīdan ī kirbagīh ī frahist ī ērān dehān.

Paragraph: 10     any-iz was anāgīh ī andar ēn dō sadōzem pad abestāg ōšmurd ēstēd ī aziš widard u-š nūn-iz ēdōn winābdāg az-iš rasēd paydāg.

Page of ed.: 425 
Paragraph: 11     ud ēn-iz nihang-ē az-iš dēn gōwēd kū: ān āwān āhen -abar- gumēxt, kū az hamāg kustag nigerēnd āhenēn, kē andar ān ī sturg ānāstār ahlomōγ ā-š andar zād hēd.

Paragraph: 12     sturgīh-išān ēd kū: "-šān passand āwēnišn ī har dō, ēk"; u-šān ānāstārīh ēd kū; "hamē ka-šān tuwān anāgīh pad kasān kunēnd"; ka frāz pad karak ī ǰuwānān pīr paydāg bawēd; wadīh-zamānīh rāy, kē andar ān mard zāyēnd kē frazānag dōst hēnd, kū hērbedestān dastwarān nē dōst hēnd.

Paragraph: 13     ud āzād-gōwišn hēnd, kū saxon čarbīhā gōwēnd; ud druwand hēnd ud purtagēnīdār gōwišn hēnd, kū gōwišn ī hērbedān, dastwarān agār kunēnd ud drīnēnd. axwōmandīh ud radōmandīh ud xwadāyīh ud dastwarīh pad duš-barišnīh barēnd, pad abārōn be ē-tāg ō ham barēnd.

Paragraph: 14     čiš ān gōwēnd: hagirz agīh ud ōy deh ī dāšt dādwar. ā-šān ō ān ī ganāg war abganēnd, ō dušox hēd, ka-šān ēd anāgīh padiš kunēnd, tā be ō druwandīh rasēnd, pad ōšmurišn abar ēstēnd ān ī duš-zahag ī dušwaft ī ahlomōγ ān ī wattar gurg ī purr vōiγn, purr-wattarīh.

Paragraph: 15     zanēnd ēdar dōst ō ōy ī dōst u-š xrīnēnd aziš ān ī xwēš kardārīh, kū hamē ka-šān tuwān, ā-š xwāstag be stanēnd ud ō ōy dahēnd kē-š az-iš abāz padixwēnēnd; ka nē ōy ī weh drahm xwāhēnd. ud driyōš ān ī any xrīnēnd, kū-š xwāstag be stanēnd u-š rēbēnēnd, ka garzišn kunēd.

Paragraph: 16     "abāz ēdōn nē ō tō dahēm" nē ēdar dōst ō ōy dōst ud Page of ed.: 426  nē brād ō ōy ī brād ud nē pus ō ōy ī pidar ud nē-z pidar ō ōy ī pusar handarzēnēd ud nē wurrōyēnēd. gyāg kāmag mānišn bawēnd, kū har gyāg-ē kū-šān abāyēd, be mānēnd. pad har brāhmag ī-šān abāyēd, be rawēnd; ud abar rāh sagālēnēnd pad rāh ī wābarīgānīh ud abzōn frahang, az nē dānišnīh gōwēnd:

Paragraph: 17     ēd sē abzōn frahang az ān ī amā be dānēm: "pad ulīh ī ān ī keh ud pad nigunīh ān ī meh; meh az ōy ī keh be āmōxtišnīh, kū pad har čiš-ē pad pay ī ōy sāstār bawēd".

Paragraph: 18     mōw mānāg mōw bawēd; sāstār mānāg kawīg bawēd; ud wayōg xēm wayōg bawēd; kanīg xēm xwad ō gušn haxtēd.

Paragraph: 19     ēg ka xēm ud xrad frōd wardēd az ērān-dehān, kū be šawēd, ēdōn abar ō ērān-dehān az nazdīgīh ī vōiγn ō ham dwārēd. nēst-čišīh ud zamestān-iz ī, kū dēwān-dād ī snōhišnōmand, kū wārān-iz kam bawēd ud seǰ ī nihān-rawišn ī frēftār, kū margīh wēš bawēd. ēdōn ī xrad-gaštag-iz ī druwand ud ahlomōγ-iz anahlaw pad hamhāgīh ō hamdwārēnd.

Paragraph: 20     čiyōn ān ī dōst; awēšān dawēnd kū: "xwar ud zan dehbed! čē-t xwarišn u-t zanišn. ātaxš-iz zan; pad-iz xwarišn xwar! awēšān kē srōšwarz hamīh pānag hēnd ud awēšān abar pad nayišn nayēnd driyōš ī ahlaw dādestān.

Paragraph: 21     kū-š ōškāftag be kunēnd u-š zanēnd u-š arad ān barēnd ī xwāstag, hēd ka-šān xwāstag barēnd ā-šān arad burd bawēd.

Paragraph: 22     ud andar ān āwān tō rāy, ā-m nē kāmag abēzag ahlaw spitāmān! Page of ed.: 427  āyišn nē be wurrōyišnīh ī šawišnīh ī waxš; kū mihr gōw āwarišn barišn nē abāyēd; awēšān ī kardag ahlomōγ ēd ī tō sraw wisēnēnd, abestāg ud zand, kū nizār be kunēnd; awēšān ī kardag ī ahlomōγ ān ī xwēš ruwān azārēnēnd ān ī kard xwāstag dōšāram rāy.

Paragraph: 23     ud abar nohom ud dahom sadōzem ēn-iz gōwēd kū: "ān āwān rawēd, ēd kū rasēd spitāmān zarduxšt, ka was ahlomōγ radīh ud dastwarīh ahlawīh gōwēnd ud kam druwandīh |ud hanāsēnēnd āb ud hōšēnēnd urwar ud wisēnēnd harwisp ābādīh kē az ahlāyīh paydāgīh.

Paragraph: 24     abāz-iš az ōy pursīd zarduxšt kū: "čē ēdōn awēšān ohrmazd! pad ān dahēnd ka hanāsēnēnd āb ud hōšēnēnd urwar ud wisēnēnd harwisp ābādīh kē az ahlāyīh paydāgīh?"

Paragraph: 25     u-š guft ohrmazd kū: "dahēnd ēdōn awēšān pad awēšān zarduxšt! ka az ān meh gōwēnd hunušagān xwēšān rāy, čiyōn ān ī xwēš ruwān; kū nirmad ī awēšān rāy wēš gōwēnd kū ān ī xwēš rāy".

Paragraph: 26     be awēšān dahēnd ō kayagān, karabān, ō mardōm pah, ī wāstaryōš ud ō mardōm arwandasp, artēštār, ayāb ē čiyōn mān ēdar pad gōšt ān ī meh bahr gīrēm, kū-mān pādixšāyīh dahānd čiyōn ēdar pad gōšt be dahēm ān ī meh grāmīg kunēm.

Paragraph: 27     xwāstag ī druwand-iz ēdar zarduxšt! pad mayān-mānišnīh pad anārāstān buland wihīrišnīh, kū dādestān ī stabr kunēm ī padīrišn-gōwišntar čiyōn driyōš ī ahlaw dādestānīh abar arzānīg ahlaw, kē-š paydāg Page of ed.: 428  ahlāyīh franāmišn ī ō kār ud kirbag.

Paragraph: 28     abāz-iš az ōy pursīd kū: "ast ēdōn ēdar andar āwām ī dēn ī māzdēsnān gētīg paydāgīh pahlom? kū dēn ī māzdēsnān mehmānīh pad kas ast?"

Paragraph: 29     u-š guft ohrmazd kū: ast ēdōn andar awēšān mardān abar zarduxšt! čē ēdar hēnd āsrōn ī guftār; ud awēšān-iz mard hēnd ī xrōsag xwāstag andar axw ī astōmand seǰ-dādār ud murnǰēnišn-dādār ī wizend ud ǰādūg awēšān-iz rāy gōwēnd. mardōm ī druwand ī sāstār awēšān az tō be zarduxšt mehīhātar, ōzōmandīhātar, xrusdōmandīhātar ahlāyīh ahlāyēnd.

Paragraph: 30     kōr awēšān druz hēnd, kē ō tō hampursēnd ud anāgāh hēnd ī sāstār ud wēnāg awēšān-iz druz hēnd kē ō awēšān hampursēnd ud āgāhīh mēnēnd ud petyāragēnēnd. kū ēd gōwēnd kū: "mān ēd ī tō gōwē paydāg, kū nē ēdōn čiyōn tō gōwē" kē awēšān gōwēnd kū: nē man ēd ī tō mard! kār: kū-m nē abāyēd kardan. nē tō, kū tō-z nē abāyēd kardan, čē nē ēd ī ahlāyīh, kū nē kirbag.

Paragraph: 31     čē ēn ō ēd ī tō gōwišn, mēnišn dād ēstād: kē tō-z āgāh hē ān ī mēnīdār pahikār ōšīdār čegām-iz-ē ēdar spitāmān zarduxšt! čē abar pad gumēzag, ō āškāragīh rasēnēd kē ahlaw ayāb nē būd ēstēd ān ī xwēš ruwān.

Paragraph: 32     ud ēn-iz gōwēd kū: "awēšān ō tō gōwēm spitāmān zarduxšt! kē pad ān ī nohom ud dahom sadōzem, rasēnd kū druz azg bawēnd: awēšān andar Page of ed.: 429  aškam, ast kū frōd kirrēnišn hēnd; kē awēšān pad frāzīh, pad pēšōbāyīh ayāb pad abāzīh, ī pad pasōbāyīh; ayārēnēnd ān ī abārōnīhā".

Paragraph: 33     u-šān ēn-iz abar gōwēd: "awēšān mardān zanišntar hēnd" ēdōnīh guft ohrmazd kū: "ēd ahlaw! kē nasāy be kešēnd andar ēn gēhān pad pah ud stōr, awēšān atāxš bēšēnd ud āb-iz ī srāwtazišn; awēšān tan, mayax ud hēn-iz ī čaxragōmand ī sahmgen ī hazārgānag ayārīhišn tar bawēnd; kē nasāygarān druwand hēnd".

Paragraph: 34     awēšān rāy ō tō gōwēm spitāmān zarduxšt! kū: "pad ān nohom ud dahom sadōzem rasēnd ōy ī druz, hunušag hēnd [ud] rēšgār ī ganāg-mēnōg; ēk-iz az awēšān zanišntar čiyōn dah dēwēsn; ud awēšān-iz ō ēn ī man murnǰēnišn dahēnd, ō ēn ī man dēn; kē zanišnōmandīh gōwēnd kū ka zīstan šāyēd pad rāh ī amā; ud druwand hēnd ud pad mehīh kāhēnd.

Paragraph: 35     wattarīh-iz kū pad pēšōbāyīh ud pasōbāyīh kunēnd wināh. kē tō dawāg halag gōwēnd abēzag spitāmān! ud dawāg awēšān; gōwēnd kē ēd ī tō dēn ī māzdēsn zanēnd.

Paragraph: 36     awēšān zarduxšt! be az tō, ān-iz ī rēxw windišn apparēnd. ud tar ēd ī ō ēzišn menēnd ud tar niyāyišn zarduxšt! ud tar ān ī har dō wābarīgānīh menēnd, abestāg ud zand kē tō man frāz guft, kē az mēnōgān abzōnīgtom hēm.

Paragraph: 37     rēš ī wattar srāyēnd pahlom kunišn ō mardōm; a-paymān kušišnīh kē az ān ī wattar kunišn, urwāhmanīh gōwēnd; ān-iz murnǰēnēnd, ān ī xwēš Page of ed.: 430  ruwān; murnǰēnēnd astōmandān gēhān; awēšān xrōsišn dahēnd ō ruwān ud dēn-iz abar čē ēwēnag rāyēnīdan ī hu-dēn mardōm.

Paragraph: 38     ud ēn-iz gōwēd kū: "zarduxšt pursīd az ohrmazd kū: "čē ēdōn ō awēšān framāyēm kē nē pad dār-snēh tuwānīg hēnd; kū-šān abzār nēst, u-šān nē spāh ud nē abar pānag u-šān was bēšītār".

Paragraph: 39     guft-iš ohrmazd kū: "awēšān tušt-mēnišn mard waxšēnišn daxšag ī pad ōš. kē nē ast pad spāh tuwānīg hēnd u-šān was bēšītār".

Paragraph: 40     ud abar sazīhistan ī pādixšāyīh az wattarān ī im zamānag; ēn-iz gōwēd kū; pursīd zarduxšt kū: "ān ohrmazd! kē kay ud karab ān ī dušxwadāytom pad pādixšāyīh, abāz ō wehān gumēxtēd?"

Paragraph: 41     u-š guft ohrmazd kū ān-iz zarduxšt!

Paragraph: 42     pursīd-iš zarduxšt kū: "ān-iz ohrmazd kē awēšān ī ān ō xwadāyīh abāz ō wehān gumēxtēd ēn čiyōn kaysar ī xāgān?"

Paragraph: 43     u-š guft ohrmazd kū ān-iz zarduxšt!

Paragraph: 44     abar im wattarān ēn-iz gōwēd kū: "awēšān ka āgāh hēnd ud andar dānēnd dramag az ahlāyīh dōšēnd, kū-šān pārag weh sahēd az kār ud kirbag; tom ān dōšēnd az rōšnīh ud ān ī wattom axwān, dōšēnd az ān ī pahlom axwān; awēšān abāgēnēnd dušwarīh".

Paragraph: 45     awēšān-iz rāy ō tō gōwēm kū: "zanišntar hēnd az gaz ī šēb; ī čiyōn gurg ud šagr, ud awēšān pad kēn ud bēš hamē az ān franāmēnd tā ka ān mard rasēd kē čihrōmayān ī ahlaw abāg wazr ī pērōzgar.

Page of ed.: 431 
Paragraph: 46     abāg panǰāh se mardān rawēd ī hāwištān ī amāwand ī buland frāz-nigerīdār ī kār ud dādestān ī frāx-suft ī stabr bāzāy ī was marīh, kū-šān dīdan stabr ī se sahēgēnīh kū-šān dēw ud wattarīh aziš tarsēnd.

Paragraph: 47     ud ān zanēd ganāg-mēnōg abāg dāmān ān se azg ī paydāg; kū druz yazēd pad āgenēn-yazišnīh ēd-iz kē pad buland pēšagīh rawēnd, pad asp ī turk dēwīh-iz ī wizārd-wars, tāzīg; ud šēdasp-iz kalasāyīg hrōmāy.

Paragraph: 48     ud ān frahist pad dār hāzišnīh mardān ēg hāzēd hunsandīhā ud a-hunsandīhā; kē ōy nē hunsand, kū pad ān ī gōwēd nē ham-dādestān. ā-š hunsandīhā franāmēd zarduxšt! kū-š be ō dēn āwarēd.

Paragraph: 49     ham ōy pad ān wazr mehnīd ī kuwixm kū pad dast ī ō xwārīhēd; xwār dāštan pad ān ī čēr bāzāy ud pad ān ī gušn tōšn.

Paragraph: 50     be amāwandīh ud pērōzgarīh bandēd ō ān ī ōy dēn ī ohrmazd, ud pad ān ī amāwandīh ud pērōzgarīh hamē az ān ī franāmēd bawēnd ka awēšān rasēnd, kē pus ī zarduxšt hēnd, kē kunēnd frašagird andar axwān a-zarmān, a-marg ud a-sōyišn ud a-pōyišn dagr hamē tā ō wisp.

Paragraph: 51     ud abar brīnag ī dah sadōzem ī andar ēk hazangrōzem ī zarduxštān āgāhīh ī ōšīdar ī zarduxšt pus ēn-iz gōwēd kū: "ka ān sadōzem be sazēd, ī fradom pad dēn īm māzdēsnān az zarduxšt ō hampursagīh mad frāz, čē fradom sadōzem brīn ast.

Paragraph: 52     u-š guft ohrmazd kū; "xwaršēd be nihumbēd."

Page of ed.: 432 
Paragraph: 53     čē pas dudīgar ud sidīgar ud čahārom ud panǰom ud šašom ud haftom ud haštom ud nohom ud dahom sadōzem brīn ast?

Paragraph: 54     u-š guft ohrmazd kū: "xwaršēd abar nihumbēd".

Paragraph: 55     ēg ka ān ī dahom sadōzem sīh zamestān arānag, kū sīh zamestān abāz, kanīg ō āb abar rawēd, kē nāmīg pid-ē kū mad ī ōy nāmīg ōšīdar u-š az wahurōz ī friyāngān ī andar dūdag ī isatwāstar ī pus ī zarduxšt az arwēz zād ēstēd frāz tōhmag.

Paragraph: 56     ēg andar ān āb nišīnēd, xwarēd ud ōy awēšān šuhr abar ul frōgēd kē būd kū ahlaw zarduxšt sidīgar abdom ō hwōw bun frāz hišt ud ān pus andar dahēd kē ast waxšēnīdār-ahlāyīh nām.

Paragraph: 57     ka pānzdah sālag ast kanīg nē pēš az ān abāg mardān be nibastan nē ka pas tā ka ābustan bawēd pēš az ān tā ka ān ul zāyēd.

Paragraph: 58     ka ān mard sīh sālag bawēd, ān xwaršēd be ēstēd pad bālist ī asmān dah rōz ud dah šab drang ud abar ō ān gāh ān abāz be rasēd kū ān fradom pad frāz brēhēnišnīh frāz brēhēnīd; kū az čahār angust ēk angust andar gīrēd ud harwisp kišwar abar tābēd, kē haft.

Paragraph: 59     ēdōn-iz awēšān zarduxšt xwad ēdōn awēšān paydāgīh ast kū dānēnd kū hazangrōzem ī brīn, kē ēn dēn abar pad ašnawišn ašnūd. ēdōn awēšān kē nē, ēg-iz dānēnd kū čiš-ē ī ǰuttar ast.

Paragraph: 60     ēg ka ān mard sīh sālag bawēd, ān hampursēd ō amahraspandān ī Page of ed.: 433  huxwadāyān ī hudahāgān fradāg andar rōz ān ī rōšn rōz be paydāg ka axw ī ast a-most ud a-kay ud a-karab; kū pad čiš ī yazdān nē karr ud kōr ud awisānišn, kū-š xwēštan čiš ī yazdān ǰud nē kard ēstēd, ud purr gyān dādīg ēstēd, kū wārān būd ēstēd, ud āb gyāg-gyāg abāz ēstēd andar ērānwēz kū weh dāitī.

Paragraph: 61     ēd daxšagīhā ī abar sadōzem ī dō ast nohom ud dahom drustīh ī ān madan sazīhastan ēn mad ēstēd ud paydāg har dō abar drustīh ī abar ān rasēd guft ēstēd abar gugāy.



Page of ed.: 435 
Next part


This text is part of the TITUS edition of Denkard Book 7.

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.