TITUS
Denkard Book 7
Part No. 10
Previous part

Chapter: 9  

Paragraph: 0   abar abdīh ī pas az hazangrōzem ī zarduxštān sar ud rasišn ī ōšīdar tā hazangrōzem ī ōšīdarān sar ud rasišnīh ī ōšīdarmāh az āgāhīh ī im zamānag



Paragraph: 1     abdīh ī ōšīdar ō zāyišn, tan, xwarrah ud saxon ud kār; ēstišn ī xwaršēd dah rōz mayān asmān; abesīhišn ī čahār zang tōhmag druz; dād<an> ī sē zarmē xwābargarīh ō urwarān; nizārīhistan ī frēbūd ud abēbūd, wēš-zōrīhistan ī paymān; rāmīhistan ī anērīh; weh-dōstīh; meh waxšišnīh ī dēn dānāgīh ud stāyīdan čand srādag mārgen dēn ī māzdēsnān; zad<an> ī ōšīdar māzanīgīh ī čarān

Paragraph: 2-3     pad ān panǰom sadōzem az ham hazangrōzem, paydāgīh, haft sālag ǰādūg malkus, andar sāl ān ī sraw pad harwisp kišwar kē haft be madan ud rasišn ī malkūsān zamestān abesīhišn ī frahist mardōm ud gōspand andar se zamestān, andar-iz ān ī čahārom; pad škeftīh ī ān zamestān ān ī malkūs ǰādūgīh ud frōd mīrišnīh ī gušnag zahagān ī malkūs andar ān ī Page of ed.: 436  čahārom zamestān pad ān ī dahmān āfrīn.

Paragraph: 4     āhumbišn ī ǰamkard war, madan ī mardōm ud gōspand aziš, abāz purr-rawišnīh ī mardōm ud gōspand az awēšān abērtar būdan.

Paragraph: 5     pas az ān zamestān, was ud wuzurg abzōn abar ān ī gōspandān pīm; ud wēš-srāyišnīh ī mardōm az pīm; ud kam-uzēnagīh ī gōspandān tan, purrīh ud frāxīh ī gēhān ud xwēdīh ī hambāstag mardōm ud wuzurg-waxšišnīh ī rādīh.

Paragraph: 6     ud nizārīh ī škōhīh andar mardōmān, čiyōn ān ī dēn gōwēd kū: "ēdōn-iz ān zarduxšt! ka az ān ī padīriftār dušwārtar ast, čiyōn ān ī dādār, ī ēdōn andar axw ī astōmand frāz rādīh, be dahišnīh ān pad mānišn mānēd".

Paragraph: 7     ud ēn-iz gōwēd kū: "ka ān zamestān be sazēd kē guft kū was tagarg ud murǰēnīdār ēg ō māzdēsnān dad abar rawēd sizd ī frāx-raftār; ud ēdōn menēnd kū: "nē amā pas māzdēsn kēnēnd: wēš az ān, čiyōn ān ī xwēš zahag pus" ī ēdōn ēdar māzdēsn ō gōspand ī hudāg a-kēnīh dōšāram abar barēnd.

Paragraph: 8     ēg ašwahišt ō māzdēsnān az abartar nēmag abar be xwānēd ēdōn gōwēd kū: "māzdēsn hēd! ma kas ēdōn gōspand be kuštār bawēd! čiyōn ān pēš be kuštār būd hēd".

Paragraph: 9     handarzēnēd waxšišn pad dād; handarzēnēd wazdwarīh pad tan. māzdēsn dad ud gōspand, be kušīd! ān az awēšān be kušēd kē ō ašmā ayārēnēd; kē ō ašmā gōwēd kū ayārōmandīh ī ašmā rāy ō ašmā gōwēd kū: "māzdēsn hēd! xwarēd man pad wazdwarīh, pēš az ān tā Page of ed.: 437  ka man gaz ōdarāy be ǰōyēd!"

Paragraph: 10     ud handarzēnēd waxšišn; handarzēnēd wazdwarīh māzdēsn, gōspand be kušēnd ān-iz az awēšān kē ō awēšān ayārēnēd kū: "māzdēsn hēd! xwarēd man pad wazdwarīh, pēš az ān tā ka man gaz, ōdarāy be ǰōyēd!"

Paragraph: 11     hunsandīhā māzdēsn gōspand kušēnd ud hunsandīhā māzdēsn gōspand brīnēnd ud husand gōspand ka man burēnd; ud husandīhā māzdēsn gōspand xwarēnd ud hunsand gōspand ka-š xwarēnd.

Paragraph: 12     ud ēg ka mēnōgān bawēnd ham-pāyīd; kuštār ud kē-z-iš kušēnd; ud brīdār ud ke-z-iš brīnēnd; ud xwardārān ke-z-iš xwarēnd.

Paragraph: 13     ud ēn-iz gōwēd kū: "ka ān sadōzem be sazēd, ī panǰom pad dēn ī māzdēsnān pad ān ī dudīgar: hazangrōzem ēg awēšān harwisp kē abar pad zamīg, axw ī <astōmand>, bawēnd druwand-iz ahlawān-iz; dō srišwadag ēr deh ahlaw hēnd, ud ēk srišwadag druwand; ud ham-ēdōn tūrān ān ī pērāmōn ērān, anērān pērāmōn ērān mānēnd, meh ēdar az ān andar axw ī astōmand abzōnīgīh pad mānišn mānēd čiyōn nūn.

Paragraph: 14     ud ēn-iz gōwēd kū: "ka ān hazangrōzem be sazēd ī fradom pad dēn ī māzdēsnān, čē pas fradom sadōzem brīn ast?".

Paragraph: 15     u-š guft ohrmazd kū: "xwaršēd abar nihumbēd".

Paragraph: 16     ud čē pas dudīgar ud sidīgar ud čahārom, panǰom, šašom, haftom ud haštom, nohom ud dahom sadōzem brīn ast".

Paragraph: 17     u-š guft ohrmazd kū: "xwaršēd abar nihumbēd".

Paragraph: 18     ēg ka ān ī dahom sadōzem sīh zamestān a-rānag, kanīg ō āb abar rawēd kē "weh-pid", kū ōy ī weh ōšīdarmāh ā-š mād, Page of ed.: 438  u-š az wahurōz ī friyāngān ī andar dūdag ī isatwāstar ī pus ī zarduxšt az arwēz zād ēstēd frāz tōhmag.

Paragraph: 19     ēg andar ān āb nišīnēd, xwarēd ōy, ān šuhr abar ul frōd, kē būd kū ahlaw zarduxšt dudīgar abdom ā-š ō hwōw bun ān frāz hišt ud ān, ān pus andar dahēd, kē ast kū waxšēnīdār-niyāyišn nām, kū rādīh be abzāyēnēd;

Paragraph: 20     ka pānzdah sālag, ziyānag nē pēš az ān abāg mardān be nibast ud nē-z pas ka ābustan bawēd, pēš az ān tā ka ān ul zāyēd.

Paragraph: 21     ka ān mard sīh sālag bawēd, ān xwaršēd be ēstēd pad bālist ī ān asmān; wīst rōz šab drang. harwisp kišwar abar tābēd kē haft.

Paragraph: 22     ēdōn-iz awēšān xwad paydāgīh ast kū: dānēnd kū hazangrōzem brīn, kē ēn dēn abar pad ašnūd, ašnūd ēdōn-iz; awēšān kē nē ēg-iz dānēnd kū čiš-ē ī ǰuttar ast.

Paragraph: 23     ka ān mard sīh sālag bawēd, ān hampursēd ō amahraspandān, hu-xwadāyān ī hu-dāgān, fradāg andar rōz ān ī rōšn rōz ī be paydāg. ka axw ī astōmand ast? a-must ud a-kay ud a-karb; kū pad čiš ī yazdān nē kōr ud nē karr ud awisānišn, kū-š xwēštan čiš ī yazdān ǰud nē kard ēstēd. ud purr gyān dād ēstēd, kū-š wārān būd ēstēd ud āb gyāg gyāg abāz andar ērānwēz kū weh dāitī.



Page of ed.: 439 
Next part


This text is part of the TITUS edition of Denkard Book 7.

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.