TITUS
Denkard Book 7
Part No. 11
Previous part

Chapter: 10  

Paragraph: 0   abar abdīh ī pas az hazangrōzem ī ōšīdarān sar ud rasišn ī ōšīdarmāh tā hazangrōzem ī ōšīdarmāhān sar ud rasišn ī sōšāns az āgāhīh ī im zamānag.



Paragraph: 1     abdīh ī ōšīdarmāh pad zāyišn, tan ud xwarrah ud saxon ud kār, ēstišnīh ī xwaršēd mayān ī asmān wīst rōz drang ud ō abartom abzōn rasēd ī ān gōspandān pīm, čiyōn ān ī gōwēd kū: ēk-iz gāw az dōsēd ō ē-hazār mard, kū šīr and āwarēd čand ē-hazār mard, ud nizārīh ī suy ud tišn; čiyōn gōwēd kū: az ēk-iz pagān sagr bawēd sē šabag; kē sēnag masāy-ē xwarēd, ā-š se rōzān-šabān was.

Paragraph: 2-3     kamīgīh zarmānīh ud wēšīh ī zīndagīh, waxšišn ī ērīh ud āštīh ud[āštīh] ud rādīh ud rāmišn andar gēhān; čiyōn ēd ī dēn gōwēd kū: "ka pad ān ī abdom hazangrōzem, dah ān ī fradom zamestān be sazēd, Page of ed.: 440  ēg māzdēsn ō ham pursēnēnd kū: "dagr-wirēztar amā az ān gōspand ī hudāg čiyōn pēš būd, ku-mān xwarišn ud wistarag kam abāyēd. bowandagtar amā az ān gōspandān dōšāram mad ēstēd čiyōn mān pēš būd; ārādtar amā, az ān pīrīh andar wars abar waxšēd, čiyōn pēš abar waxšīd, frahāxttar amā ān nārīg ud aburnāyag menišn ud gōwišn ud kunišn čiyōn pēš az ān būd.

Paragraph: 4     ud ēn-iz čiš būd kū pad abēčihr ārāyīhēd ī pad kardag ud ray ud paswarzd be būd ēstēd. tōzišn-iz ārāyīhēd. karb ēwēnag druz menēd u-š pad ān ī wattom menišn be murnǰēnēd ǰud az ahlāyīh ǰud az ahlāyīh dōšišn.

Paragraph: 5     nazd ēdar andar axwān a-seǰīh rasēd čiyōn mān ān pad ašnawišn ašnūd; az pēšēnīgān, māzdēsnān rāst frāz-guftārān.

Paragraph: 6     nūn-iz, ka-z ēn dādestān, ēdōn amā meh-dāštār marag xrōšdōmandīhātar tuxšāgīhātar ahlāyīh ahlāyēnēm, kū kār ud kirbag kunēm.

Paragraph: 7     ēn-iz gōwēd kū: čē nē pad ān ī abdom hazangrōzem ān-ē az ān be widīrēd kē pad dār-snēh zanēnd kē-z az zarmānīh be widīrēnd.

Paragraph: 8     ka az ān ī ōy hazangrōzem mānd ēsted panǰāh ud se sāl, šīrēnīh ud čarbīh andar pīm ud urwar ēdōn spurrīgīhēd ī mardōm abe-niyāzīh ī az gōšt rāy, gōšt xwarišnīh hilēnd; u-šān xwarišn pīm ud urwar bawēd.

Paragraph: 9     ud ka se sāl mānd ēstēd, pīm xwarišnīh-iz hilēnd u-šān xwarišn, xwarišn āb ud urwar bawēd.

Page of ed.: 441 
Paragraph: 10     ud andar ān ī ōy hazārag, rānag bandīh ī dahāg, hangēzišn ī karšāsp ō zadan ī dahāg rasišn ī kayhusrō u-š hamhāgān ō ayārīh sōšāns pad frašagird-kardārīh ud winārišn ī frahist mardōm pad gāhānīg xēm ud dād, any-iz was abdīh ud škeftīh andar ōy ān hazangrōzem būd paydāg.

Paragraph: 11     ud ēn-iz gōwēd kū: ka ān hazangrōzem ī dudīgar pad dēn ī māzdēsnān be sazēd, čē pas fradom sadōzem brīn ast.

Paragraph: 12     u-š guft ohrmazd kū: xwaršēd abar nihumbēd.

Paragraph: 13     ud čē pas dudīgar ud sidīgar ud čahārom ud panǰom, šašom ud haftom ud haštom, nohom ud dahom sadōzem brīn.

Paragraph: 14     u-š guft ohrmazd kū: xwaršēd abar nihumbēd.

Paragraph: 15     ud ka ān ī dahom sadōzem sīh zamestān a-rānag, ō kanīg ō āb abar rawēd kē "gōwāg pid" ēd kū mād ī ōy ī gōwāg sōšāns, kū ēbgat petyārag be burdan nimūdār u-š az vohurōz ī frīyāngān ī andar dūdag ī isatwāstar ī pus zarduxšt az arwēz zād ēstēd frāz tōhmag.

Paragraph: 16     kē harwisp-tarwēnīdār nām ān kanīg, ēdōn harwisp-tarwēnīdār čiyōn ān ī pad zāyišn zāyēd, kē harwisp tarwēnēd, ān-iz ī az dēwān bēš ud ān-iz az mardōmān.

Paragraph: 17     ēg andar ān āb nišīnēd ka pānzdah sālag ast kanīg, ān andar dahēd kē ast kū sūdōmand pērōzgar nām tan-kardār-iz nām; ēdōn sūdōmand čiyōn harwisp axw ī astōmand sūdēnīdan; ēdōn tan-kardār čiyōn hām tanōmand ud gyānōmand astōmandān mardōmān a-sēǰīh abar xwāhēd

Page of ed.: 442 
Paragraph: 18     nē pēš az ān abāg mardān be nibastan nē ka pas ka ābustan bawēd; pēš az ān tā ka az ul zāyēd.

Paragraph: 19     ka ān mard sīh sālag bawēd, ān xwaršēd be ēstēd pad bālist ī ān asmān sīh rōz šab drang; ud abar ō ān gāh ān abāz be rasēd kū ān pad brēhēnišnīh frāz brēhēnēd.



Page of ed.: 443 
Next part


This text is part of the TITUS edition of Denkard Book 7.

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.