Խօսեցաւ տ(է)ր ընդ մովսիսի եւ ընդ ահարոնի՝ եւ ասէ։
խօսեցարո́ւք ը(նդ) որդիսդ ի(սրաէ)լի՝ եւ ասացէ́ք. Ա́յս անասունք են զոր ուտիցէք յա(մենայ)ն անասնոց որ են ՛ի վ(ե)ր(այ) երկրի։
Զա(մենայ)ն անասուն թաթահերձ եւ կճղակաւոր, որոյ յերկուս բաժանեալ իցեն թաթքն՝ եւ որոճիցէ, յանասնոց՝ զայն կերիջիք։
Բայց յայնցանէ մի́ ուտիցէք, որք որոճիցեն եւ կճղակահերձ ո́չ իցեն։ Ո́ւղտ զի որոճայ՝ եւ թաթն ո́չ բաժանի, պի́ղծ իցէ նա ձեզ։
Եւ նապաստակ զի որոճայ՝ եւ թաթն ո́չ բաժանի՝ պի́ղծ իցէ նա ձեզ։
Եւ Ճագար զի որոճայ՝ եւ թաթն ո́չ բաժանի՝ պի́ղծ իցէ նա ձեզ։
Եւ խոզ՝ զի թաթահերձ է՝ եւ կճղակս ունի՝ եւ որոճայ ո́չ, պի́ղծ իցէ նա ձեզ։
՛ի մսոյ ն(ո)ց(ա) մի́ ուտիցէք, եւ ՛ի գէշ նոցա մի́ մերձենայցէք. քանզի պի́ղծ իցէ ձեզ այն։
Եւ այս է զոր ուտիցէք՝ յա(մենայ)նէ որ ՛ի ջուրս իցեն. Ամենայնի որոյ իցեն թեւք եւ թեփ՝ ՛ի ջուրս եւ ՛ի ծովս եւ ՛ի վտակս, զա́յնս ուտիցէք։
Եւ ա(մենայ)նի որոյ ո́չ իցեն թեւք եւ թեփ՝ ՛ի ջուրս եւ ՛ի ծովս եւ ՛ի վտակս, մի́ ուտիցէք, յա(մենայ)նէ զոր ջուրքն բղխիցեն, եւ յա(մենայ)ն շնչոյ կենդանւոյ որ ՛ի ջուրս։ քանզի պի́ղծ է այն, պի́ղծ լինիցի ձեզ.
՛ի մսոց նոցա մի́ ուտիցէք, եւ ՛ի մեռելոց ն(ո)ց(ա) գարշեսջի́ք։
Զի ա(մենայ)նի որոց ո́չ իցեն թեւք եւ թեփ՝ որ ՛ի ջուրս իցեն, պի́ղծ իցէ ձեզ այն։
Եւ ա́յս իցեն ՛ի թռչնոց՝ յորոց գարշիջիք, եւ ո́չ ուտիցի՝ այլ պի́ղծ իցէ ձեզ. Արծուի, եւ պասկուճ, եւ գետարծուի,
եւ անգղ, եւ ցին, եւ որինչ նմա́ն իցէ ն(ո)ց(ա).
եւ ագռաւ, եւ որինչ նմա́ն իցէ նմա։
եւ ջայլեամն, եւ բու, եւ որոր, եւ որինչ նմա́ն իցէ նոցա։
եւ բազէ, եւ որինչ նման իցէ նմա. եւ հաւապատիր, եւ հողամաղ։
եւ քաջահաւ, եւ սոխակ, եւ հաւալուսն, եւ կարափ,
եւ արագիլ, եւ քարարդ, եւ որինչ նմա́ն իցէ նոցա. եւ յոպոպ, եւ չիղջ։
Եւ ա(մենայ)ն զեռուն թռչուն՝ որ գնայցէ ՛ի չորս, պի́ղծ լիցի ձեզ։
Այլ զա́յն ուտիցէք ՛ի զերնոց թռչնոց որ գնայցեն ՛ի չորս. որոյ իցեն կարթք ՛ի վերոյ քան զոտսն. ոստոստել նոքօք յերկրէ։
Եւ ա́յս իցեն զոր ուտիցէք ՛ի նոցանէ. զջորեակդ, եւ որ ինչ նմա́ն է նմա. եւ զխարագուլ, եւ որ ինչ նմա́ն է նմա. եւ զմարախ, եւ որ ինչ նմա́ն է նմա. եւ զօձամարտ, եւ որ ինչ նմա́ն իցէ նմա։
Ամենայն զեռուն թռչնոց, որ իցեն չո́րք ոտք, պի́ղծ իցէ ձեզ, մի́ նոքօք պղծիջիք։
ա(մենայ)ն որ մերձենայցէ ՛ի մեռեալ ն(ո)ց(ա)՝ պի́ղծ լինիցի մինչեւ ցերեկոյ։
եւ ա(մենայ)ն որ բառնայցէ զմեռեալ ն(ո)ց(ա)՝ լուասցէ́ զձորձս իւր, եւ պի́ղծ լիցի մինչեւ ցերեկոյ։
Յա(մենայ)ն անասնոց որ կճղակահե́րձ իցէ եւ մագի́լս սփռիցէ, եւ որոճիցէ ոչ՝ պի́ղծ լիցի ձեզ այն ա(մենայ)ն. եւ որ մերձեսցի ՛ի մեռեալ ն(ո)ց(ա)՝ պի́ղծ լիցի մինչեւ ցերեկոյ։
Եւ ա(մենայ)ն որ գնայցէ ՛ի ձեռս իւր, յա(մենայ)ն գազանաց որ գնայցէ ՛ի չորս, պի́ղծ լիցի ձեզ այն. ա(մենայ)ն որ մերձեսցի ՛ի մեռեալ ն(ո)ց(ա)՝ պիղծ լիցի մինչեւ ցերեկոյ։
եւ որ բառնայցէ ՛ի մեռելոյ ն(ո)ց(ա), լուասցէ́ զձորձս իւր, եւ պի́ղծ լիցի մինչեւ ցերեկոյ. զի այն ա(մենայ)ն պի́ղծ իցէ ձեզ։
Եւ ա́յս իցէ ձեզ պիղծ յա(մենայ)ն սողնոց՝ որ սողին ՛ի վ(ե)ր(այ) երկրի. աքիս, եւ մուկն, եւ տիտեռն, յոստին,
եւ մկնաքիս, եւ գետնառեւծ, եւ կովադիաց, եւ մուղէղ, եւ խլուրդ։
ա́յս ա(մենայ)ն պի́ղծ իցէ ձեզ յա(մենայ)ն սողնոց որ սողին ՛ի վերայ երկրի. ա(մենայ)ն որ մերձեսցի ՛ի մեռեալ ն(ո)ց(ա)՝ պի́ղծ լիցի ձեզ մինչեւ ցերեկոյ։
եւ յա(մենայ)նի յորոյ վերայ անկանիցի ՛ի մեռելոյ ն(ո)ց(ա)՝ պի́ղծ լիցի։
Եւ ա(մենայ)ն անօթ խեցեղէն, յոր անկանիցի ինչ ՛ի նոցանէն. եւ որինչ ՛ի ներքս կայցէ, պի́ղծ լիցի, եւ զայն բեկանիջի́ք։
Եւ ա(մենայ)ն կերակուր որ ուտիցի, եւ անկանի ՛ի վ(ե)ր(այ) նորա ՛ի ջրոյ անտի՝ պի́ղծ լիցի. եւ ա(մենայ)ն ըմպելի որ ըմպիցի յա(մենայ)ն ամանի՝ պի́ղծ լիցի։
եւ յա(մենայ)ն յոր ինչ անկանիցի ՛ի մեռելոյ ն(ո)ց(ա)՝ պի́ղծ լիցի։ Եւ թոնիրք եւ կասկարայք՝ քակեսցին. քանզի պղծեալ են, եւ պի́ղծք իցեն ձեզ։
Բա́յց յաղբերաց ջրոց, եւ ՛ի ջրհորոց, եւ ՛ի ջրակուտաց. որ սո́ւրբ լինիցին ձեզ։ Եւ ա(մենայ)ն որ մերձենայցէ ՛ի պղծութի(ւն)ս շնչոյ մեռելոյ ն(ո)ց(ա), պի́ղծ լիցի։
Իսկ եթէ անկանիցի ինչ ՛ի մեռելոյ ն(ո)ց(ա) ՛ի վերայ ա(մենայ)ն սերման սերմանելոյ, որ սերմանիցի. սո́ւրբ լիցի։
ապա թէ հեղուցու ջուր ՛ի վերայ ա(մենայ)ն սերման, եւ անկանիցի ինչ անդր ՛ի մեռելոց ն(ո)ց(ա), անսո́ւրբ լիցի ձեզ։
Եւ եթէ մեռանիցի ի́նչ յանասնոց որ ձեզ ուտելի են, որ մերձենայցէ ՛ի մեռեալ ն(ո)ց(ա)՝ պի́ղծ լիցի մինչեւ ցերեկոյ։
եւ որ բառնայցէ ՛ի մեռելոյ նոցա՝ լուասցէ́ զձորձս իւր, եւ պի́ղծ լիցի մինչեւ ցերեկոյ։
Եւ ա(մենայ)ն սողուն որ սողի ՛ի վերայ երկրի, պի́ղծ լիցի ձեզ, եւ մի́ կերիցի։ Ամենայն որ սողի ՛ի վ(ե)ր(այ) որովայնի իւրոյ։
եւ ա(մենայ)ն որ գնայցէ ՛ի չորս, մինչեւ ցա(մենայ)ն բազմոտանիս, յա(մենայ)ն զեռնոց՝ որ զեռայցեն ՛ի վերայ երկրի, մի́ ուտիցէք. զի պի́ղծ է այն ձեզ։
Եւ մի́ գարշեցուցանիցէք զանձինս ձեր ա(մենայ)ն սողնովք, որ սողոցին ՛ի վ(ե)ր(այ) երկրի. եւ մի́ պղծիցիք նոքօք, եւ մի́ լինիցիք անսուրբք նոքօք։
Ե́ս եմ տ(է)ր ա(ստուա)ծ ձեր. եւ սրբիջի́ք՝ եւ սո́ւրբք լինիջիք. զի ս(ուր)բ եմ ես տ(է)ր ա(ստուա)ծ ձեր. եւ մի́ պղծիցէք զանձինս ձեր ա(մենայ)ն զեռնովք՝ որ շարժիցին ՛ի վ(ե)ր(այ) երկրի։
Զի ե́ս եմ տ(է)ր ա(ստուա)ծ, որ հանի զձեզ յերկրէն եգիպտացւոց լինել ձեզ ա(ստուա)ծ, եւ եղիջիք սո́ւրբք՝ զի ես ս(ուր)բ եմ։
Ա́յս օրէն լինիցի վ(ա)ս(ն) անասնոց՝ եւ թռչնոց եւ ա(մենայ)ն շնչոյ որ շրջիցի ՛ի ջուրս, եւ ա(մենայ)ն շնչոյ որ շրջիցի ՛ի վերայ երկրի։
Որոշել ՛ի մէջ սրբոյն եւ ՛ի մէջ անսրբոյն. եւ խելամուտ առնել զորդիսդ ի(սրաէ)լի ՛ի մէջ ուտելեացն կենդանածնաց. եւ ՛ի մէջ չուտելեացն անասնոց։
