და იქმნა ოცდამეათესა წელსა, მეოთხესა თთუესა, ხუთსა თთჳსასა, და მე ვიყავ საშუალ ტყეუობისა მდინარესა ზედა ხობარისასა; და განეხუნეს ცანი და ვიხილე ხილვაჲ ღმრთისაჲ.
ხუთსა თთჳსასა; ესე წელიწადი მეხუთე ტყუეობისა იოაკიმ მეფისაჲ.
და იქმნა სიტყუაჲ უფლისაჲ ეზეკიილის მიმართ, ძისა ვუზისსა, მღდელისა, ქუეყანასა შინა ხალდეველთასა, მდინარესა ზედა ხობარისასა; და იქმნა მუნ ჩემ ზედა ჴელი უფლისაჲ.
და ვიხილე და აჰა სული აღმღებელი მოვიდოდა ბღოარით და ღრუბელი დიდი მას ზედა და მთოვარე გარემოჲს მისსა და ცეცხლი ელვარე; და საშუალ მისსა, ვითარცა ხილვაჲ ილეკტროისაჲ საშუალ ცეცხლისა, და მთოვარე მის შორის.
და საშუალ, ვითარცა მსგავსებაჲ ოთხთა ცხოველთაჲ, და ესე ხილვაჲ მათი: მსგავსებაჲ კაცისაჲ მათ ზედა;
და ოთხნი პირნი ერთსა და ოთხნი ფრთენი ერთსა;
და წჳენი მათნი მართლებ და ფრთოვნებ ფერჴნი მათნი და ნაბერწყალნი, ვითარცა აელვებული რვალი, და სუბუქებ ფრთენი მათნი.
და ჴელი კაცისაჲ ქუეშე კერძო ფრთეთა მათთასა, ოთხთა ზედა კერძოთა მათთა, და პირნი მათნი და ფრთენი მათნი ოთხთანივე მახლობელად სხუაჲ სხჳსად; და პირნი მათნი ოთხთანივე.
არა მიიქცეოდეს სლვასა შინა მათსა, თითოეული მათგანი პირისპირ პირისა თჳსისა ვიდოდა.
და მსგავსებაჲ პირთა მათთაჲ: პირი კაცისაჲ და პირი ლომისაჲ მარ\ჯუენით Page of ed. 1709: 152b ოთხთას, და პირი ზუარაკისაჲ მარცხენით ოთხთასა და პირი არწივისაჲ ოთხთაჲვე.
და ფრთენი მათნი განპყრობილ ზენაჲთ ოთხთასა, თითოეულად ორნი შეუღლვილებ ურთიერთას მიმართ და ორთა ზედ დაჰბურვიდეს ზედა კერძო სხეულსა მათსა.
და თითოეული წინაშე პირსა თჳსსა ვიდოდა; სადაცა იყო სული მავალი, ვიდოდეს და არა შეიქცეოდეს.
და საშუალ ცხოველთასა ხილვაჲ, ვითარცა ნაკუერცხალთა ცეცხ\ლისათა Page of ms. Ga: 250v მგზებარეთაჲ, ვითარცა შესახედავი ლამპართა მმიმოობთაჲ საშუალ ცხოველთასა, და მთოვარე ცეცხლისაჲ და ცეცხლისაგან გამოვიდოდა ელვაჲ.
და ცხოველნი რბიოდეს და მოიქცეოდეს მწრაფლ, ვითარცა სახე ბეზეკისაჲ.
და ვიხილე და აჰა ურმის თუალი ერთი ქუეყანასა ზედა, მახლობელად ცხოველთა ოთხთა.
და სახე ურმის თუალთაჲ და ქმნულებაჲ მათი, ვითარცა სახე თარშისაჲ. და მსგავსებაჲ ოთხთა შორის და ხედვაჲ მათი და საქმე მათი იყო, ვითარ-იგი იყვის ურმის თუალი ურმის თუალსა შინა.
ოთხთა მიმართ კერძოთა მათთა ვიდოდეს, არ შეიქცეოდეს სლვასა შინა მათსა.
არცა ზურგნი მათნი. და სიმაღლე იყო მათდა და საშინელ იყვნეს. და ვიხილენ იგინი და ზურგნი მათნი სავსე თუალებითა მრგულივ ოთხთასავე.
და სლვასა მას ცხოველთასა ვიდოდეს Page of ed. 1709: 153a ურმის თუალნიცა, მახლობელნი მათნი, და ამაღლებასა ცხოველთასა ქუეყანით ამაღლდებოდეს ურმის თუალნიცა.
სადაცა იყვის ღრუბელი, მუნ მიიმართის სულმან სლვად; ვიდოდეს ცხოველნი და ურმის თუალნიცა ამაღლდებოდეს მათ თანა, მით რამეთუ სული ცხოვლობისაჲ იყო ურმის თუალთა შორის.
და სლვასა მას ურმის თუალნიცა იგი ვლენან და დადგომასა მას ცხოველთასა ურმის თუალნიცა დადგიან და ქუეყანით ამაღლებასა მათსა მათ თანავე ამაღლდიან, რამეთუ სული ცხოველი იყო ურმის თუალთა თანა.
და მსგავსებაჲ ზეშთა თავისა მათ ცხოველთაჲსა, ვითარცა სამყაროჲ, ვითარცა ხილვაჲ ბროლისა საშინელისა, განმარტებულისაჲ ზეშთა თავისა მათისა ზედა კერძო.
და ქუეშე კერძო სამყაროჲსა ფრთენი მათნი განმარტებულებ, შეფრთეებულებ სხუაჲ სხჳსა; და თითოეული, ორნი შეუღლვილებ, ზედდამბურველნი სხეულთა მათთა.
და მესმოდა ჴმაჲ ფრთეთა მათთაჲ სლვასა შინა მათსა, ვითარცა ჴმაჲ წყლისა მრავლისაჲ, ვითარცა ჴმაჲ ღმრთისა სადდაისაჲ, სლვასა შინა მათსა ჴმაჲ სიტყჳსა, ვითარცა ჴმაჲ ბანაკისაჲ, და დგომასა მათსა შინა დასცხრიან ფრთენი მათნი.
და აჰა ჴმაჲ ზეშთა ზენა კერძო სამყაროჲსა, რომელი იყო ზეშთა თავისა მათისა; დგომასა შინა მათსა ამაღლდებოდეს ფრთენი მათნი, და ზეშთა ზენა სამყაროჲსა, ზეშთა თავისა მათისაჲსა,
ვითარცა ხილვაჲ ქვისა საპფირისა, მსგ\ავსებაჲ Page of ms. Ga: 251r საყდრისაჲ მის ზედა; და მსგავსებასა ზედა საყდრისასა მსგავსებაჲ, ვითარცა სახესა კაცისასა მის ზედა ზენა.
და ვიხილე, ვითარცა ხილვაჲ ილეკტროჲსაჲ, ვითარცა ხილვაჲ ცეცხლისაჲ შინაგან მისსა, მრგულივ, ხილვითგან წელთაჲთ და ვიდრე ზემდე და ხილვითგან წელთაჲთ და ვიდრე Page of ed. 1709: 153b ქუემდე; ვიხილე, ვითარცა ხილვაჲ ცეცხლისაჲ, და მთოვარე მრგულივ მისსა.
ვითარცა ხილვაჲ მშჳლდისაჲ, ოდეს იყოს ღრუბელსა შორის დღესა შინა წჳმისასა, ეგრეთ ხილვაჲ მთოვარისაჲ მრგულივ; ესე ხილვაჲ მსგავსებისა დიდებისა უფლისაჲ; და ვიხილე და დავვარდი პირსა ზედა ჩემსა და მესმა ჴმაჲ მეტყუელისაჲ ჩემდამო.
