და იქმნა ჩემ ზედა უფლისა ჴელი და განმიყვანა მე სულითა უფლისაჲთა და დამდვა მე შორის სულსა ველისასა: და ესე იყო სავსე ძუალებითა კაცთაჲთა.
და მომავლო მე მათ ზედა გარემო მრგულივ; და აჰა მრავლებ ფრიად პირსა ზედა ველისასა და აჰა ჴმელ ფრიად იგინი.
და თქუა ჩემდამო: ძეო კაცისაო, უკუეთუ განცოცხლდეს ძუალები ესე? და ვთქუ: ადონაი უფალო, შენ უწყნი ეგენი.
და თქუა ჩემდამო: წინაწარმეტყუელებდ ძუალებსა ამას ზედა, წინაწარმეტყუელებდ, ძეო კაცისაო, და სთქუა მათდამი: ძუალთა ჴმელთა, ისმინეთ სიტყუაჲ უფლისაჲ!
ამათ ეტყჳს ადონაი უფალი ძუალებსა ამას: აჰა მე შემოვიყვანო თქუენ ზედა სული სიცოცხლისაჲ.
და მივსცე თქუენ ზედა ტყავი, და მივსცე სული ჩემი თქუენ ზედა და განსცოცხლდეთ, და სცნათ, რამეთუ მე ვარ უფალი.
და ვწინაჲსწარმეტყუელებდ ვითარცა მამცნო მე უფალმან. და იქმნა ჴმაჲ, ვწინაწარმეტყუელებდ რაჲ მე, და აჰა ძრვაჲ და მოიყვანნა ძუალნი, ძუალი ძუალისა მიმართ თითოეული შენაწევრებისა მიმართ მისისა.
და ვიხილე და აჰა ზედ-დაექმნეს მათ ძარღუნი და ჴორცნი აღმოსცენდებოდეს და აღმოვიდოდეს მათ ზედა, და გარე-მოერთხა მათ ზედა ტყავი ზედა კერძო და სული არა იყო მათ შორის.
და თქუა ჩემდამო: წინაწარმეტყუელებდ სულისა ზედა, წინაწარმეტყუელებდ, ძეო კაცისაო, და არქუ სულსა: ამათ იტყჳს ადონაი უფალი: ოთხთაგან Page of ed. 1709: 199b სულთა მოვედინ სული და მიებერენ მკუდართა ამათ მიმართ და განცოცხლდენ.
და ვიწინაწარმეტყუელე, ვითარ-იგი მამცნო მე; და შევიდა მათდამი სული და განცოცხლდეს და დადგეს ფერჴთა მათთა ზედა შესაკრებელი მრავალი ფრიად.
და იტყოდა უფალი ჩემდამო მეტყუელი ძეო კაცისაო, ძუალები ესე ყოველი სახლი ისრაჱლისაჲ არს, იგინი იტყჳან: ჴმელ იქმნეს ძუალნი ჩუენნი, წარწყმდა სასოებაჲ ჩუენი, მოვისრენით.
ამისთჳს წინაწარმეტყუელებდ, ძეო კაცისაო, და თქუ მათდამი: ამათ იტყჳს უფალი უფალი: აჰა მე აღვახუნე სამარენი თქუენნი, ერო ჩემო, და აღმოგიყვანნე თქუენ საფლავთაგან თქუენთა და შეგიყვანნე თქუენ ქუეყანად ისრაჱლისა.
და სცნათ, რამეთუ მე ვარ უფალი განღებასა შინა ჩემგან საფლავთა თქუენთასა, აღმოყვანებად თქუენდა საფლავთაგან თქუენთა, ერო ჩემო,
და მივსცე სული ჩემი თქუენ ზედა და განსცოცხლდეთ და დაგსხნე თქუენ ქუეყანასა ზედა თქუენსა და სცნათ, ვითარმედ მე უფალი ვიტყოდე და ვყო, -- იტყჳს ადონაი უფალი.
და იქმნა სიტყუაჲ უფლისაჲ ჩემდამო მეტყუელი:
ძეო კაცისაო, მოიღე თავისა შენისა კუერთხი ერთი და დაწერე მას ზედა იუდაჲ და ძენი ისრაჱლისანი, თანმდებარენი მისსა მიმართ. და კუერთხი მეორე მოიღო თავისა შენისად და დასწერო მას იოსები, კუერთხი ეფრემისი და ყოველნი ძენი ისრაჴლისანი, თანმდებარენი მისდამი.
და შეაყენე იგინი ურთიერთას მიმართ შენდად, ერთ კუერთხად შეკრვად იგინი. და იყვნენ ერთბამად ჴელსა შინა შენსა.
და იყოს, ოდეს იტყოდინ შენდამი ძენი ერისა შენისანი, მეტყუელნი: არ მომითხრობა ჩუენ, რაჲ არიან შენდა ესენი?
და სთქუა მათდამი: ამათ იტყჳს უფალი უფალი: აჰა მე მოვიღო ტომი იოსებისი ჴელისა მიერ ეფრემისისა და ტომნი ისრაჱლისანი, თანმდებარენი მის თანა, და მივსცნე იგინი Page of ed. 1709: 200a მის თანა ტომსა ზედა იუდაჲსსა და იყვნენ კუერთხად ერთად ჴელსა შინა იუდაჲსსა.
და იყვნენ კუერთხნი, რომელთა ზედა შენ დასწერე მათ ზედა, ჴელითა შენითა წინაშე მათსა.
და ჰრქუა მათ: ამათ იტყჳს ადონაი უფალი: აჰა მე მოვიღებ ყოველსა სახლსა ისრაჱლისასა საშუალისაგან წარმართთაჲსა, სადა შევიდეს მუნ, და შევკრიბნე იგინი ყოველთაგან გარემოჲსთა მათთა და შევიყვანნე იგინი ქუეყანად ისრაჱლისა.
და მივსცნე იგინი ნათესავად ერთად ქუეყანასა შინა ჩემსა, და მთათა შორის ისრაჱლისათა და მთავარი ერთი იყოს მათ ყოველთა მეფედ და არა იყვნენ მერმე ორ ნათესავად, არცა განიყოფვოდინ მერმე ორთა მეფეთა მიმართ.
რაჲთა არ შეიგინებოდინ მერმე კერპთა მიერ მათთა და მოსაწყინელთა მიერ მათთა და ყოველთა შინა უთნოობათა მათთა და ვიჴსნნე იგი\ნი Page of ms. Ga: 275r ყოველთაგან უთნოობათა მათთა, რომელთა ცოდეს მათ შინა, და განვწმიდნე იგინი და იყვნენ ჩემდა ერად და მე ვიყო მათდა ღმრთად.
და მონაჲ ჩემი დავით -- მთავარი შორის მათსა და მწყემსი ერთი იყოს ყოველთაჲ მათი და ბრძანებათა შინა ჩემთა ვიდოდინ და მშჯავრნი ჩემნი დაიცვნენ და ჰყოფდენ მათ.
და დაემკჳდრნენ ქუეყანასა ზედა მათსა, რომელი მივეც მე მონასა ჩემსა იაკობსა, სადა მკჳდრობდეს მუნ მამანი მათნი, და დაემკჳდრნენ მას ზედა იგინი და მენი მათნი და ძენი ძეთა მათთანი ვიდრე საუკუნომდე; და დავით მონაჳ ჩემი მთავარ მათდა იყოს უკუნისამდე.
და აღუთქუა მათ აღთქუმაჲ მშჳდობისაჲ, აღთქუმაჲ საუკუნოჲ იყოს მათ თანა და მივსცე მათ და განვამრავლნე იგინი და დავსხნე წმიდანი ჩემნი შორის მათსა საუკუნოდ.
და იყოს დაკარვებაჲ ჩემი მათ შორის და ვიყო მე მათდა ღმერთ და იგინი იყვნენ ჩემდა ერად.
და ცნან Page of ed. 1709: 200b წარმართთა, ვითარმედ მე ვარ უფალი, წმიდამყოფელი მათი ყოვლისა მიერ წმიდათა ჩემთაჲსა მათ შორის უკუნისამდე.
