და მომაქცია მე გზისა მიმართ ბჭისა წმიდათაჲსა გარეშისა, რომელი ჰხედავს აღმოსავალთა მიმართ, და იგი იყო დაჴშულ.
და თქუა ჩემდამო უფალმან: ბჭე ესე დაჭმულ იყოს, არა განეღოს და არცა ერთი ვინ არა განვიდეს მის მიერ, რამეთუ უფალი ღმერთი ისრაჱლისაჲ შევიდეს მის მიერ და იყოს დაჴშულ
წინამძღურისა, მით რამეთუ თჳთ წინამძღუარი დაჯდეს მას შინა ჭამად პურისა წინაშე უფლისა; გზისაგან ელამისა ბჭისა შევიდეს და მისვე გზისაგან გამოვიდეს.
და შემიყვანა მე გზისა მიერ გზისა მიმართ, ჩრდილოდ მიმართისა, წინაშე სახლისა; და ვიხილე და აჰა სავსე დიდებითა უფლისაჲთა სახლი უფლისაჲ და დავვარდი პირსა ზედა ჩემსა.
და თქუა უფალმან ჩემდამო: ძეო კაცისაო, დააწესე გულსა შენსა და იხილე თუალითა შენითა და ყურითა შენითა ისმინენ ყოველნი, რაოდენთამე მე ვიტყჳ შენ თანა, ყოველთაებრ სამართალთა სახლისა უფლისათა და ყოველთა შჯულვილთა მისთა. და დააწესო გული შენი გზასა ზედა სახლისასა, ყოველთაებრ გამოსავალთა მისთა, შორის ყოველთა წმიდათა.
და სთქუა სახლისა მიმართ განმამწარებელისა, სახლისა მიმართ ისრაჱლისა: ამათ იტყჳს უფალი ღმერთი: კმა არს თქუენდა ყოველთა მიერ უშჯულოებათა თქუენთა, სახლო ისრაჱლისაო,
შეყვანებად თქუენდა ძეთა უცხო ნათესავთასა და წინადაუცუეთელთა გულითა და წინადაუცუეთელთა ჴორცითა ქუეყანად, წმიდათა შორის ჩემთა, რაჲთა შეაგინებდენ სახლთა ჩემთა ესენი, ვითარ მორთუმასა შინა თქუენგან პურთა ჩემთასა, ჴორცთა, ცმელსა და სისხლსა. და გარდაჰჴდებით აღთქუმასა ჩემსა ყოველთა მიერ უშჯულოებათა თქუენთა.
და არ დაიცევ\ით Page of ed. 1709: 210b დაცვაჲ წმიდათა ჩემთაჲ და განაწესენით თქუენ ცმად მცველნი წმიდათა შორის ჩემთა.
ამისთჳს ამათ იტყჳს ადონაი უფალი: ყოველი ძე უცხო ნათესავი, წინადაუცუეთელი გულითა და წინადაუცუეთელი ჴორცითა, არა შევიდეს წმიდათა მიმართ ჩემთა, ყოველთა შორის ძეთა უცხო ნათესავთასა, საშუალ სახლისა ისრაჱლისსა.
არამედ ლევიტელთა, განშორებულთა ჩემგან ცთომასა შინა ძეთა ისრაჱლისათა, ცთომილთასა ჩემგან უკუანა გულის ზრახვათა მათთაისა, მიიღონ შეურაცხებაჲ მათი.
და იყვნეს სიწმიდესა შინა ჩემსა მსახურნი, მეკარენი ბჭეთა ზედა სახლისათა, და მსახურნი სახლისათანი, ესენი დაჰკლვიდეს ყოვლად დასაწუელსა და მსხუერპლსა ერისასა და ესენი დგეს წინაშე მისსა მსახურებად მისსა,
მის წილ, რომელ ჰმსახურებდეს იგინი წინაშე კერპებისა მათისა; და იქმნეს სახლისა ისრაჱლისა ტანჯვა სიცრუვის, ამისთჳს აღვიღე ჴელი ჩემი მათ ზედა, -- იტყჳს ადონაი უფალი, და მიიღონ უშჯულოებაჲ მათი;
და არ მომეახლებიან ჩემდამო მღდელობად ჩემდა, არცა შეეხნენ ყოველთა წმიდათა ძეთა ისრაჱლისათასა, არცა ყოველთა წმიდათაწმიდათა ჩემთასა, და მიიღონ შეურაცხებაჲ თავთა მათთაჲ და საძაგელებანი თავთა მათთანი ცთომასა შინა, რომელსა ცთეს.
დააწესნენ იგინი ცმად საცავთა სახლისა ჩემისათა, ყოველსა კუთნვასა მისსა და ყოველთა მიმართ ქმნადთა მას შინა.
ხოლო მღდელნი ლევიტელნი, ძენი სადუკისნი, რომელთა დაიცვნეს საცავნი წმიდათა ჩემთანი, ოდეს შეცთეს ძენი ისრაჱლისანი ჩემგან, იგინი მომეახლნენ ჩემდამო მსახურებად ჩემდა და დადგენ წინაშე პირსა ჩემსა შეწირვად ჩემდა მსხუერპლსა, ცმელსა და სისხლსა, -- იტყჳს ადონაი უფალი.
იგინი შემოვიდოდინ სიწმიდედ ჩემდა, და Page of ed. 1709: 211a იგინი მოუჴდებოდინ ტრაპეზისა მიმართ ჩემისა მსახურებად ჩემდა, დაცვად საცავთა ჩემთა.
და იყოს შემოსლვასა მათსა ბჭეთა ეზოჲსა შინაგანისასა სამოსელთა სელისათა შეიმოსდენ და არ შეიმოსდენ მატყლიერთა მსახურებასა შინა მათსა ბჭითგან უშინაგანესისა ეზოჲსაჲთა.
კიდარნი სელისანი აქუნდენ-ყე თავთა ზედა მათთა და წჳვისგარემონი სელისანი აქუნდენ წელთა ზედა მათთა და არ მოირტყმიდენ მჭირსიედ.
და გა-რაჲ-ვიდოდინ იგინი გარეშედ ეზოდ ერისა მიმართ, განიძარცუვიდენ შესამოსელთა მათთა, რომელთა მიერ ჰმსახურებენ მათ მიერ, და დასხმიდენ მათ საყდრებისა შორის წმიდათაჲსა და შეიმოსდენ სამოსელთა სხუათა და არაწმიდა ვყო ერი შესამოსელთა მათთა მიერ.
და თავთა მათთა არა იპარსვიდენ და გარჯითა მათთა არ აღიმცირებდენ, დამბურველნი დაიბურვიდენ თავთა მათთა.
და ღჳნოსა ნუ სუამნ ყოველი მღდელი შესლვასა შინა მათსა უშინაგანესად ეზოდ.
და ქურივი და განტევებული არ მიიყვანონ თავისა მათისა ცოლად, არამედ ქალწული თესლისაგან სახლისა ისრაჱლისა და ქურივი, უკუეთუ იყოს მღდელისაგან, მიიყვანებდენ.
და ერსა ჩემსა ასწავებდენ შორის წმიდისა და ხენეშისა და შორის უბიწოჲსა და ბიწიანისა.
და აუწყებდედ მათ და სასჯელსა შინა სისხლისასა ესენი დადგენ განშჯად; სამართალთა ჩემთა განამართლებდენ და საშჯელთა ჩემთა შჯიდენ და შჯულთა ჩემთა და ბრძანებათა ჩემთა, ყოველთა შინა დღესასწაულთა ჩემთა დაიცვიდენ და შაბათთა ჩემთა წმიდა
ჰყოფდენ და მძორსა ზედა კაცისასა არა შევიდენ შემწიკულებად, არამედ მამასა ზედა და დედასა და ძესა ზედა და ასულსა და ძმასა ზედა და დასა მისსა, რომელი Page of ed. 1709: 211b არა ქმნილ იყოს ქმრისად, შეიმწიკულეს.
და შემდგომად განწმედისა მისისა შჳდნი დღენი აღურიცხუნეს თავსა თჳსსა
და დღესა, რომელსაცა შევიდოდეს წმიდად მიმართ უშინაგანესად ეზოდ მსახურებად წმიდასა შინა, მოიღონ სალხინებელი, -- იტყვს ადონაი უფალი.
და იყოს მათდა სამკჳდრებელად, მე -- სამკჳდრებელ მათდა, და დასაპყრობელი მათი არა მიეცეს ძეთა შორის ისრაჱლისათა, რამეთუ მე ვარ დასაპყრობელ მათდა.
და მსხუერპლთა და ცოდვისა ძლითთა და უმეცრებისა ძლითთა იგინი ჭამდენ და ყოველი განნაჩინები ისრაჱლისა შორის მათდა იყოს.
და დასაბამნი ყოველნი და პირმშონი ყოველნი და მოღებულნი ყოველნი ყოველთაგან დასაბამთა თქუენთა მღდელთად იყვნენ; და პირველი ნაშრომი თქუენი მიეცით მღდელსა დადებად კურთხევანი სახლთა ზედა თქუენთა.
და ყოველი მძორი და ნამჴეცავი მფრინველთაგან და საცხოვართაგან არა ჭამონ მღდელთა.
