და მოსე მწყსიდა ცხოვართა იოთორ სიმამრისა თჳსისათა, მღდელისა Page of ms. O: 74r მადიამელისათა, და მოჰყვანდეს ცხოვარნი იგი უდაბნოდ და მოვიდა მთასა მას ღმრთისასა ქორებს.
ეჩუენა მას ანგელოზი ცეცხლითა ალისაჲთა მაყულოანით გამო, და იხილა, ვითარმედ მაყულოანსა აღატყდების ცეცხლი და მაყუალი იგი არა შეიწუების.
თქუა მოსე: წარვიდე და ვიხილო ხილვაჲ ესე დიდი, რამეთუ მაყუალი არა დაიწუების.
ვითარცა იხილა ღმერთმან, რამეთუ მოვალს ხილვად, უწოდა მას უფალმან მაყულოანით გამო და ჰრქუა: მოსე, მოსე! ხოლო მან ჰრქუა: რაჲ არს?
ხოლო უფალმან ჰრქუა: ნუ მოეახლები აქა, წარიჴადენ ჴამლნი ფერჴთაგან შენთა, რამეთუ ადგილი ეგე, რომელსა შენ სდგა, ქუეყანაჲ წმიდა არს.
და ჰრქუა: მე ვარ ღმერთი მამისა შენისაჲ, ღმერთი აბრაჰამისი, ღმერთი ისაკისი და ღმერთი იაკობისი. გარე მიიქცია პირი მისი მოსე, რამეთუ ეშინოდა მიხედვად წინაშე ღმრთისა.
ჰრქუა უფალმან მოსეს: ხილვით ვიხილე ძჳრი იგი ერისა ჩემისაჲ, რომელ არს ეგჳპტეს შინა, და ღაღადებაჲ მათი მესმა საქმის მაწუეველთაგან, რამეთუ ვიცი ჭირი იგი მათი.
და გარდამოვჴედ განრინებად მათა ჴელთაგან ეგჳპტელთაჲსა, გამოყვანებად მიერ ქუეყანით და შეყვანებად მათა ქუეყანასა ფრიად კეთილსა, ქუეყანასა მას გამომადინებელსა სძისა და თაფლისასა, ადგილსა მას ქანანელთასა Page of ms. O: 74v და ქეტელთასა, ამორეველთასა და ეველთასა, ფერეზელთასა და გერგესეველთასა და იებოსელთასა.
და აწ ღაღადებაჲ ძეთა ისრაჱლისათაჲ მოიწია ჩემდა და მე ვიხილე ჭირი იგი მათი, რომელსა ეგჳპტელნი იგი აჭირვებენ მათ.
და აწ მოვედ და მიგავლინო შენ ფარაოჲსა, მეფისა მის მეეგჳპტელთაჲსა, და გამოიყვანო ერი ჩემი, ძენი ისრჱლიანი, ქუეყანით ეგჳპტით.
და ჰრქუა მოსე ღმერთსა: ვინ ვარ მე, და მივიდე მე ფარაოჲსა, მეფისა მეეგჳპტელთაჲსა და გამოვიყვანნე ძენი ისრაჱლისანი ქუეყანით ეგჳპტით?
ეტყოდა ღმერთი მოსეს და ჰრქუა, ვითარმედ: მე ვიყო შენ თანა და ესე იყავნ სასწაულად შენდა, რამეთუ მე მიგავლინო შენ, რაჲთა გამოიყვანო შენ ერი ჩემი ქუეყანით ეგჳპტით. და მსახურებდენ ღმერთსა ადგილსა ამას.
ჰრქუა მოსე ღმერთსა: აჰა მე მივიდე ძეთა ისრაჱლისათა და ვჰრქუა მათ: ღმერთმან მამათა თქუენთამან მომავლინა მე თქუენდა, და მკითხვიდენ, თუ რაჲ არს სახელი მისი, რაჲ ვჰრქუა მათ?
და ჰრქუა ღმერთმან მოსეს: მე ვარ, რომელი ვარ. და თქუა: ესრე არქუ ძეთა ისრაჱლისათა: რომელ არს მომავლინა მე თქუენდა.
და ჰრქუა ღმერთმან მერმე კუალად მოსეს: ესრე არქუ ძეთა ისრაჱლისათა: უფალმან ღმერთმან მამათა თქუენთამან, ღმერთმან...
