და შემიყვანა მე წინაშე კარსესა მას ტაძრისასა, და აჰა ესერა წყალი გამოვიდოდა ქუეშჱ კერძო უსართულოსა მას მზის-აღმოსავალად კერძო, და წყალი იგი გარდამოვიდოდა კიდით კერძო მარჯუენით სამხრით-მო საკურთხეველად კერძო.
და გამომიყვანა მე გზასა მას ბჭისა მის ჩრდილოჲთ კერძოჲსა, და გარე-მომიყვანა მე გზასა მას გარეშესა ბჭედ ეზოჲსა მის, რომელი ჰხედავს მზის-აღმოსავალად კერძო; და აჰა ესერა წყალნი გარდამოეცემოდეს კიდით კერძო მარჯუენით.
ვითარცა გამოსავალი მამაკაცისაჲ წინაშე პირის-პირ, და საზომი აქუნდა ჴელსა მისსა, და გა<ნ>ზომა ათასი საზომითა მით, და განჴდა წყალსა მას წყალი მიტევებისაჲ.
და განზომა ათასი, და განვლო წყალი იგი წყალი ვიდრე ბარკალ სხჳლადმდე, და განზომა ათასი, და განვიდა წყალსა მას ვიდრე სარტყლადმდე.
და ვერღარა უძლო წიაღ-მოსლვად, რამეთუ აღქავნებოდა წყალი იგი ვითარცა სიმძაფრჱ ჴევისაჲ, რომელსა ვერ წიაღ-ვიდიან.
და მრქუა მე; იხილეა, ძეო კაცისაო; და მომიყვანა მე კიდესა მას მდინარისასა.
მოქცევასა ჩემსა და აჰა კიდესა მის მდინარისასა ხეები მრავალი ფრიად იმიერ და ამიერ.
და მრქუა მე; ესე წყალი, რომელი გამოვალს გალილეად Page of ms. J: B112v მზის-აღმოსავალად და გარდა/მოვიდოდა არაბიად, და მოვიდოდა ვიდრე ზღუადმდე წყალსა მას წიაღ-სავალისასა, და განაცოცხლებს წყალთა.
და იყოს ყოველი სული საცხოვართაჲ, რომელი გამოვიდოდის, რომელსა ზედა მივიდეს მუნ მდინარჱ იგი, ცხომდეს და იყოს მუნ თევზი მრავალი ფრიად, რამეთუ წყალი ესე მოვალს და განჰკურნებს, და ცხოვნდენ ყოველნი რომელთა ზედა მივიდეს მდინარე ესე, და განცოცხლდენ.
და დადგენ მუნ მესათხევლენი ენგადიმითგან საჴმობელ ბადეთა იყოს, და თევზნი ზღჳსა დიდისანი სიმრავლჱ დიდი ფრიად.
და წიაღ-სავალსა მისსა და უფროჲსად აღმალებასა მისსა არა განიკურნნენ, მარილად მიცემულ არიან.
და მდინარესა მას კიდეთა მისთა აღმოსცენდეს იმიერ და ამიერ ყოველი ხჱ საჭმელი, და არა დაძუელდეს მისგანი, არცა მოაკლდეს ნაყოფი მისი, სიახლისა მისისაჲ პირველ გამოიღოს; ამისთჳს რამეთუ წყალნი მათნი წმიდათაგან გამოვლენ, და იყოს ნაყოფი მათი საჭმლად, და აღმოცენებაჲ მათი სიცოცხლედ.
ამას იტყჳს უფალი ღმერთი; ესე საზღვარნი არიან, რომელი დაუმკჳდროთ ქუეყანისაჲ, ათორმეტთა ტოჰმთა ძეთა ისრაჱლისათა შეძინებაჲ განზომისაჲ.
და დაიმკჳდრეთ იგი კაცად-კაცადმან ვითარცა ძმამან მისმან, რომლისათჳს აღვიღე ჴელი ჩემი მიცემად მამათა მათთა, და იყოს ქუეყანაჲ ესე თქუენდა სამკჳდრებელი განწილვით.
ესე საზღვარნი არიან ქუეყანისანი, ჩრდილოჲთ კერძო, ზღჳთგან დიდით, რომელი გარდამოვალს და განჰყოფს შესავალსა ემათისასა, ელდაამაა,
ბეთარს, ებრემს, ელიამს შორის საზღვართა დამასკისათა, და შორის Page of ms. J: B113r საზღვართა ემათისათა, ეზონი სავნანისანი, რომელნი არიან/ ზემო კერძო საზღვართა აჳრანიტელთასა.
ესე საზღვარნი ზღჳთგან, ეზოჲთ სავნანისით, საზღვარით დამასკისაჲთ და ჩრდილოდ.
და მზის-აღმოსავალად, შორის აჳრანიტელთასა და შორის დამასკესა, და შორის გალაადელთა და შორის ქუეყანასა ისრაჱლისასა, იორდანე საზღვარ არს ზღუად და მზის-აღმოსავალად კერძო დანაკის-კუდოვნისა, ესე მზის-აღმოსავალად.
და სამხრად კერძო და ჩრდილოდ, თემანითგან და დანაკის-კუდოვნით ვიდრე წყლადმდე არიმოთისა კადესა, მიიწევის ვიდრე ზღუადმდე დიდად.
ესე ადგილი სამხრით და ჩრდილოჲთ; ესე ადგილნი ზღჳსა დიდისანი ეზღვარვის ვიდრე წინაშემდე შესავალად ემათისა, ვიდრე შესავალადმდე მისა; ესე არს ზღუად კერძო ემათისა.
და განუყავთ მათ ქუეყანაჲ ესე ტოჰმად ტოჰმად ისრაჱლსა.
განუყავთ მათ თქუენ წილით და გარე-მოსრულთა მათ, რომელნი მწირობენ თქუენ შორის, რომელთა ისხნენ შვილნი თქუენ თანა, იყვნედ იგინი თქუენდა ვითარცა თჳთ მპყრობელნი ქუეყანისანი ძეთა შორის ისრაჱლისათა; თქუენ თანა ჭამდენ მკჳდრობით შორის ძეთა ისრაჱლისათა.
და იყვნენ ტოჰმად მწირთა შორის, რომელნი იყვნენ მათ თანა, მუნ მიეცით სამკჳდრებელი მათი, იტყჳს უფალი ღმერთი.,
