რომელთა გწყურის, წარვედით წყლად, და რომელთა არა გაქუს ვეცხლი, მივედით და იყიდეთ თჳნიერ ვეცხლისა და სასყიდლისა ღჳნოსა და ცმელსა.
რაჲსათჳს იყიდით ვეცხლითა, და შრომაჲ იგი თქუენი არა მაძღრივ არს.
ისმინეთ ჩემი და ჭამეთ კეთილი, და იშუებდენ კეთილსა შინა სულნი თქუენნი. და აღგითქუა თქუენ აღთქუმაჲ საუკუნოჲ, წმიდაჲ იგი დავითისი სარწმუნოჲ.
აჰა ესერა საწამებელად წარმართთა მივსცე იგი მთავრად და მბრძანებელად ნათესავთა.
აჰა ესერა ნათესავთა, რომელთა არა გიცოდიან შენ, Page of ms. J: A88v სახელით გხადოდიან შენ, და ერ/თა, რომელთა არა გიცოდიან შენ, შენ შეგევედრნენ ღმრთისა შენისათჳს, წმიდისა ისრაჱლისა, რამეთუ გადიდა შენ.
ეძიებდით ღმერთსა, და რაჟამს ჰპოოთ თქუენ იგი, ჰხადოდეთ მას, და ოდეს მოგეახლოს თქუენ.
დაუტევენინ უღმრთომან გზანი თჳსნი, და კაცმან უშჯულომან ზრახვანი თჳსნი, და მოიქეცინ უფლისა, და შეიწყალოს იგი, და ღმერთმან ჩუენმან მოგჳტევნეს ცოდვანი ჩუენნი მრავალნი.
რამეთუ არა ეგრე არიან ზრახვანი ჩემნი, ვითარ ეგე ზრახვანი თქუენნი, არცაღა გზანი ჩემნი, ვითარ გზანი თქუენნი, იტყჳს უფალი.
არამედ ვითარცა განჰშორებიან ცანი ქუეყანით, ეგრეთ განჰშორებიან გზანი ჩემნი გზათაგან თქუენთა, და ზრახვანი ჩემნი ზრახვათაგან თქუენთა.
რამეთუ ვითარცა გარდამოჴდის წჳმაჲ გინა თოვლი ზეცით, და არა კუალად იქცის მუნვე, ვიდრემდე განაძღოს ქუეყანაჲ, და გამოშვეს, და აღმოაცენოს, და მოსცეს თესლი მთესვარსა, და პური საზრდელად.
ეგრეთ იყვნენ სიტყუანი ჩემნი, რომელნი გამოვიდენ პირისაგან ჩემისა, არა კუალად მოიქცეს ჩემდა ცალიერი, ვიდრემდე აღასრულოს ყოველი რომელი ვინებე, და წარვჰმართნე გზანი ჩემნი და ბრძანებანი ჩემნი.
რამეთუ სიხარულით განხჳდეთ, და მხიარულებით იქცეოდით. რამეთუ მთანი და ბორცუნი ხლდებოდიან, და მოგეგებვოდიან თქუენ სიხარულით, და ყოველთა ხეთა ველისათა დაიტყუელნენ რტოებითა მათითა.
რამეთუ ძეძჳსა მის წილ აღმოგიცენდეს შენ საროჲ, და ღჳვისა წილ მურტი, და იყოს უფალი სახელად, და სასწაულად საუკუნოდ, და არა მოაკლდეს.
