სიტყუაჲ, რომელ თქუა უფალმან ბაბილონსა ზედა ქუეყანასა ქალდეველთასა ჴელითა იერემია წინაწარმეტყუელისაჲთა.
მიუთხართ წარმართთა შორის, და სასმენელ ყავთ, და აღიღეთ ნიში, ასმინეთ, ნუ დაჰმალავთ, არქუთ; აღოჴრდა ბაბილონი; ჰრცხუენა ბელს უშიშსა. ფუფუნეული მიეცა მაროდაქ; ჰრცხუენა ქანდაკებულთა მათ მისთა.
რამეთუ აღჴდა მის ზედა ნათესავი ჩრდილოჲთ; მან დადვას ქუეყანაჲ მისი განსარყუნელად, და არა იყოს მკჳდრ მას შინა კაცითგან მი-პირუტყუადმდე. შეირყინეს და წარჴდეს.
მათ დღეთა შინა, თქუა უფალმან, <და> მას ჟამსა მოვიდენ ძენი ისრაჱლისანი. იგინი და ძენი იუდაჲსნი ერთბამად ვიდოდიან, და ტიროდიან, და წარვიდენ, და ეძიებდენ უფალსა ღმერთსა მათსა.
რამეთუ აქა მოიქცინენ პირნი მათნი, და მოვიდენ, და შეივლტოდიან უფლისა, რამეთუ აღთქუმაჲ საუკუნოჲ არა დაივიწყოს.
ვითარცა ცხოვარნი წყმედულნი <ეგრე იქმნა> ერი ჩემი; მწყემსთა მათთა Page of ms. J: B39v განსთხინეს იგინი მთათა ზედა;/ შეაცთუნნეს იგინი, მთათაგან ბორცუთა ზედა ვიდოდეს; დაავიწყდა საყოფელი მათი.
ყოველნი რომელნი ჰპოებდეს მათ აღიცრიდეს მათ. მტერთა მათთა თქუეს, არა ულხინოთ მათ მის წილ, რამეთუ შესცოდეს უფალსა, შჯული სიმართლისაჲ, რომელმან შეკრიბნა მამანი მათნი უფალმან.
უცხო იქმნენით ბაბილოვნისაგან, და ქუეყანისაგან ქალდეველთაჲსა გამოვედით, და იქმნენით ვითარცა ვეშაჴნი წინაშე პირსა ცხოვართასა.
რამეთუ აჰა ესერა მე აღვადგინნე და მოვიყვანნე ბაბილოვნსა ზედა კრებულნი წარმართთა დიდთანი ქუეყანით ჩრდილოჲთ, და ეწყვნენ მას, და მისგან მოისრნენ იგინი. ისარნი მათნი ვითარცა ისარი მბრძოლისა მეცნიერისაჲ, არა მოიქცის ცუდი.
და იყოს ქალდეაჲ წარსატყუენველად; ყოველთა რომელთა ტყუენონ იგი, განძღენ, თქუა უფალმან.
რამეთუ იხარებდით და იქადოდეთ მიტაცებასა სამკჳდრებელისა ჩემისასა, და რამეთუ სტრიობდით ვითარცა ზროხანი მწუანესა შინა, და ირქენდით ვითარცა კურონი.
ჰრცხუენა დედასა თქუენსა ფრიად, დაეფლა მშობელი დედაჲ თქუენი კეთილად, და აჰა ესერა აღსასრული წარმართთაჲ ოჴერ და ურწყულ და უგზო.
რისხვისაგან უფლისაჲსა არა დაეშჱნოს, და იყოს განსარყუნელად; ყოველი რომელი განვიდოდის ბაბილონს შინა დაწუხნეს, და დაისტჳნოს ყოველსა ზედა წყლულებასა მისსა.
განეწყვენით ბაბილონსა ზედა ყოველნი მშჳლდ-გარდაცუმულნი გარემოჲს; ესროდეთ მას; ნუ სწყალობთ ისართა თქუენთა, რამეთუ უფალსა შესცოდა.
და მძლე იქმნენით მის ზედა გარემოჲს, და ჰჴსნდეს ჴელნი მისნი, და დაემპუნეს არდაბაგნი მისნი, <და> დაირღუა ზღუდე მისი. რამეთუ შურის-გებაჲ უფლისა მიერ არს, შური იძიეთ მისგან. ვითარცა ყო, უყავთ მას.
აღჴოცეთ თესლი ბაბილოვნისაჲ მპყრობელი მანგლისაჲ ჟამსა მკისასა პირისაგან მახჳლისა წარმართთაჲსა; კაცად-კაცადი ერად თჳსა უკუნ-იქცეს, <და> კაცად-კაცადი ქუეყანადთჳს მიივლტოდის.
ცხოვარი ცთომილი არს/ Page of ms. J: B40r ისრაჱლი, ლომთა განიკრთვეს იგი. პირველად შეჭამა იგი მეფემან ასურასტანისამან, და შემდგომად მეფემან ბაბილოვნისამან ნაბუქოდონოსორ ძუალნი მისნი შეჭამნა.
ამისთჳს ესრე იტყჳს უფალი ძალთაჲ, ღმერთი ისრაჱლისაჲ; აჰა ესერა მე შური ვიძიო მეფესა ზედა ბაბილოვნისასა და ქუეყანასა ზედა მისსა, ვითარცა შური ვიძიე მეფესა ზედა ასურასტანისასა.
და კუალად ვაგო ისრაჱლი საძოვარსა თჳსსა, და ძოვდეს იგი კარმელსა შინა და ბას<ა>ანს და მთასა ეფრემისსა და ქუეყანასა გალაადისასა, და განძღენ სულნი მათნი.
მათ დღეთა შინა და მათ ჟამთა, თქუა უფალმან, ეძიებდენ უშჯულოებასა ისრაჱლისასა, და არა იყოს, და ცოდვათა იუდაჲსთა, და ვერ პოვნენ, რამეთუ მლხინებელ ვექმნე ნეშტთა მათ ქუეყანასა ზედა, თქუა უფალმან,
ქუეყანასა ზედა განმამწარებელთასა მიიწიე განმწარებულად, და მკჳდრთა ზედა მისთა შური იძიე, მახჳლო, და განრყუენ, რამეთუ შემდგომად მათსა ძჳრი, თქუა უფალმან, და იქმოდე ყოველსავე რავდენი გამცნო შენ.
ჴმაჲ ბრძოლისაჲ და შემუსრვაჲ დიდი ქუეყანასა ქალდეველთასა,
ვითარ იგი განტყდა და შეიმუსრა უროჲ ყოვლისა ქუეყანისაჲ, ვითარ იქმნა განსარყუნელ ბაბილონი შორის წარმართთა.
წინაწარმეტყუელებაჲ იერემიაჲსი. მე გბრძავ შენ, და გეწინენ შენ, და შეგიპყრან, ბაბილონ, და ვერ სცნა, იპოვე და შეიპყარ, რამეთუ უფალსა უჴდებოდე;
განაღო უფალმან საფასჱ თჳსი, და გამოიღო ჭურჭერი რისხვისა მისისაჲ, რამეთუ საქმჱ არს უფლისა ღმრთისა ძალთაჲსაჲ ქუეყანასა ქალდეველთასა;
რამეთუ მოწევნულ არიან ჟამნი მისნი, განახუენ<ი>თ საუნჯენი მისნი, აღიხილეთ იგი ვითარცა ქუაბი; აღიჴოცეთ იგი; ნუ იყოფინ მისა ნეშტ.
აღაჴმეთ ყოველი ნაყოფი მისი, და შთავიდედ კლვად; ვაჲ მათა, რამეთუ მოახს დღჱ მათი და ჟამი შურის-გებისა მათისაჲ.
ჴმაჲ მეოტთაჲ და განრინებულთაჲ ქუეყანისაგან ბაბილოვნელთაჲსა, მითხრობად სიონს შურის-ძიებაჲ უფლისა ღმრთისა ჩუენისაჲ, შურის-ძიებაჲ ტაძრისა მისისაჲ.
ამცენით ბაბილოვნისა ზედა მრავალთა, ყოველსა გარდამცუმელსა მშჳლდისასა, მოადეგით მას გარემოჲს; Page of ms. J: B40v ნუ იყოფინ მისი განრინებული, მიაგეთ მას საქმეთა მისთა-ებრ, ყოველი რაოდენი ყო, თქუენ<ცა> უყავთ მას, რამეთუ უფალსა უჴდებოდა ღმერთსა წმიდასა ისრაჱლისასა.
ამისთჳს დაეცნენ ჭაბუკნი მისნი უბანთა შორის მისთა, და ყოველნი მამანი მისნი მბრძოლნი დაცჳვენ მას დღესა შინა, თქუა უფალმან.
აჰა ესერა მე შენ ზედა, იტყჳს უფალი ძალთაჲ, მაგინებელო; რამეთუ მოვალს დღჱ დაცემისა შენისაჲ, და ჟამი შურის-გებისა შენისაჲ.
და მოუძლურდეს გინებაჲ იგი შენი, და დაეცეს, და არა ვინ იყოს აღმმართებელ მისა, და აღვაგზნე ცეცხლი მაღნართა მისთა, და შეჭამოს ყოველი გარემოჲს მისსა.
ესრე იტყჳს უფალი ძალთაჲ; ჰმძლავრობენ ძეთა ისრაჱლისათა და ძეთა იუდაჲსთა ერთბამად, ყოველნი წარმტყუენველნი მათნი ჰმ<ძლავ>რობენ მათ, რომელთა იგი არა ინებეს განტევებაჲ მათი.
და მჴსნელი მათი ძლიერი, უფალ ყოვლისა-მპყრობელ არს სახელი მისი, საშჯელი საჯოს მტერთა მისთა მიმართ, რაჲთა მოისპოს ქუეყანაჲ იგი, და განურისხოს მკჳდრთა ბაბილონისათა.
მახჳლი ქალდეველთა ზედა, თქუა უფალმან, და მკჳდრთა ზედა <ბა>ბილოვნისათა და მდიდართა მისთა,
მახჳლი გრძნებათა ზედა მისთა, და მოისპნენ, მახჳლი მბრძოლთა ზედა მისთა, და მოუძლურდენ, მახჳლი ჰუნეთა ზედა მისთა და ეტლთა ზედა მისთა;
მახჳლი მბრძოლთა ზედა მისთა და შერთულსა შორის მისსა, და იყვნენ იგინი ვითარცა დედანი, მახჳლი საფასეთა ზედა მისთა, და აღსაჭრელ იქმნნენ,
მახჳლი წყალსა ზედა მისსა, რომელსა ესვიდა, და განჴმეს.
და სირცხჳლეულ იქმნეს გამოქანდაკებულთაგან, და ჭალაკთა მათგან, რომელთაგან იქადოდა, ამისთჳს დაეშჱნნენ ურჩხულნი ჭალაკთა, და დაემკჳდრნენ მუნ ასულნი დედაჭუავთანი, და არღარა აღეშენოს უკუნისამდე, და არა დაიმკჳდრონ იგი თესლითი თესლამდე.
ვითარცა დააქცია ღმერთმან სოდომაჲ და გომორაჲ და საზ<ღ>ვარნი მისნი, თქუა უფალმან, არაჲ დაეშჱნოს მუნ კაცი, არცა დაადგრეს მუნ ძჱ კაცისაჲ.
აჰა ესერა ერი მოვალს ჩრდილოჲთ, და ნათესავი დიდი და მეფენი Page of ms. J: B41r მრავალნი აღდგენ დასასრულით/ ქუეყანისაჲთ.
მშჳლდოსანნი და ლახუროსანნი ურიდ არიან, და არა შეიწყალნენ იგინი, ჴმაჲ მათი ვითარცა ზღუაჲ ოხრიდეს, ჰუნეთა ზედა აღმჴედრნენ, განმზადებულნი ვითარცა ცეცხლნი ბრძოლად შენ ზედა, ასულო ბაბილონისაო.
ესმა მეფესა ბაბილოვნისასა სმენაჲ მათი; დასცჳვეს ჴელნი მისნი, ჭირმან შეიპყრა იგი სალმობათა ვითარცა შობადისათა.
აჰა ესერა ვითარცა ლომი აღმოჴდეს მაღნართაგან იორდანისათა ადგილსა მას ეთამისსა სამკჳდრებელსა მას ზედა პირველსა, რამეთუ მსთუად განვდევნენ იგინი მისგან, და ყოველნი ჭაპუკნი დავადგინნე მას ზედა, რამეთუ ვინ არს ვითარ მე, და ვინ წინა-აღმიდგეს მე, და ვინ არს ესე მწყემსი, რომელი დადგეს წინაშე პირსა ჩემსა.
ამისთჳს ისმინეთ ზრახვაჲ უფლისაჲ, რომელ უზრახავს ბაბილონსა ზედა, და გულის-ჴმაჲ, რომელ გულის-ჴმა-უყოფიეს მკჳდრთა ზედა ქალდეაჲსათა, ვიდრემდის არა მოისრნენ კრავნი ცხო<ვ>ართა მათთანი, ვიდრემდის არა განირყუნეს მათგან საძოვარი.
რამეთუ ჴმითა მოსრვისა ბაბილოვნისაჲთა შეიძრას ქუეყანაჲ, და ღაღადებაჲ მისი შორის ნათესავთა ესმეს.
