ესე არს იგი ქალაქი განქარვებული დამკჳდრებული სასოებით, რომელი იტყოდა გულსა თჳსსა, მე ვარ და არღა ვინ არს ჩემსა შემდგომად. ვითარ მე იქმნა განსარყუნელ, საძოვარი მჴეცთაჲ; ყოველი რომელი განვიდოდის მას შინა დაისტჳნოს, და განყარნას ჴელნი მისნი.
ჵ წარჩინებული და გამოჴსნილი ქალაქი ტრედი. არა ისმინა ჴმაჲ არცა მიიღო სწავლაჲ, და უფალსა არა ესვიდა, და ღმერთსა თჳსსა არა მიეახლა.
მთავარნი მისნი მას შინა, ვითარცა ლომნი მყჳრალენი. მსაჯულნი მისნი, ვითარცა მგელნი არაბიაჲსანი, არაჲ დაუშთა განთიადმდე.
წინაწარმეტყუელნი მისნი სულ-შემოსილნი კაცნი შეურაცხის-მყოფელნი. მღდელნი მისნი შეაგინებენ სიწმიდესა, და უმსახურებელ შჯულისა.
ხოლო უფალი მართალი შორის მისა, და არა ყოს სიცრუე; განთიად მოსცეს სამართალი მისი ნათლად, და არა დაეფაროს, და არა ცნა სიცრუვჱ შემთხუევასა, და არა ძლევად ყო სიცრუვე.
განხრწნილებასა შინა დავამჴუენ ამპარტავანნი, განირყუნეს საკიდურნი მათნი. მოაოჴრნა გზანი მათნი ყოვლად ვე, რაჲთა არა ვიდოდის კაცი; მოაკლდეს ქალაქნი მათნი ამისთჳს, რამეთუ არა ვინ არს რომელმანმცა დაიმკჳდრა.
ვთქუ; გარნა გეშინოდენ ჩემგან, და მიიღეთ სწავლაჲ, და არა მოისრას თუალთაგან მისთა იგი ყოველი რომელი შურ-ვიგე მისგან, განემზადე, აღიმსთუვე, რამეთუ განრყუნილ არს ყოველი საყურძენი მათი.
ამისთჳს დამითმე, Page of ms. J: A18v იტყჳს უფალი, დღედ აღდგომისა ჩემისა საწამებელად, რამეთუ სა/შჯელი ჩემი შესაკრებელსა წარმართთასა შემოყვანებად მეფეთა, მიფენად მათ ზედა რისხვაჲ ჩემი, ყოველივე რისხვაჲ გულის-წყრომისა ჩემისაჲ. რამეთუ ცეცხლითა შურისა ჩემისაჲთა შეიჭამოს ყოველი ქუეყანაჲ.
რამეთუ მაშინ მივაქცინნე ერთა მიმართ ენანი ნათესავსა მათსა, რაჲთა ხადოდიან ყოველნი სახელსა უფლისასა მონებად მისა უღელსა ქუეშჱ ერთსა,
კიდითგან მდინარისა ჰინდოეთისაჲთ შევიწყნარნე განთესულთა შორის ჩემთა, მომართუმიდენ მსხუერპლთა ჩემთა.
მას დღესა შინა არა გრცხუენეს ყოველთაგან საქმეთა შენთა, რომელი უღმრთოებაჲ ჰქმენ ჩემდა მომართ, რამეთუ მაშინ მოგისპო შენ სიცრუვჱ გინებისა შენისაჲ, და არღარა შესძინო ქედ მაღლოვად მთასა ზედა წმიდასა ჩემსა.
და დაუტეო შენ შორის, ერი მშჳდი და მდაბალი და ეშინოდის სახელისათჳს უფლისა
ნეშტთა მათ ისრაჱლისათა. და არა ქმნენ სიცრუვე, და არა იტყოდიან ამაოსა, და არცა იპოოს პირსა მათსა ენაჲ მზაკუვარი; რამეთუ იგინი ძოვდენ და დაიძინებოდიან. არა ვინ იყოს მაშინებელ მათა.
გიხაროდენ ასულო სიონისაო, ქადაგებდ იჱრუსალემ; იხარებდ და განსცხრებოდე ყოვლითა გულითა შენითა, ასულო იჱრუსალემისაო;
რამეთუ მოგისჴნა უფალმან სიცრუვენი შენნი. გიჴსნა შენ ჴელთაგან მტერთა შენთასა. მეუფჱ ისრაჱლისაჲ უფალი შორის შენსა, არა იხილო ბოროტი ამიერითგან არღარა.
მას ჟამსა შინა ჰრქუას უფალმან იჱრუსალემსა; ნუ გეშინინ სიონ, ნა დაჰჴსნებიედ ჴელნი შენნი.
უფალი ღმერთი შენი შენ შორის. ძლიერი გიჴსნეს შენ, მოაწიოს შენ ზედა მხიარულებაჲ, და განგაახლოს შენ სიყუარულითა Page of ms. J: A19r მისითა, და იხარებდეს შენდამი მხიარულებით/, ვითარცა დღესა დღესასწაულისასა.
და შევკრიბნე შემუსრვილნი იგი, ვაჲ რომელმან მოიღო მას ზედა ყუედრებაჲ;
რამეთუ აჰა ესერა მე ვყო შენ შორის შენთჳს მას ჟამსა შინა. და ვაცხოვნო გამოწურვილი იგი და განშორებული იგი შევიწყნარო, და დავსხნე იგინი სიქადულად და სახელოვანად ყოველსა ქუეყანასა.
და ჰრცხუენოდის მათ მას ჟამსა შინა, რაჟამს კეთილი გყო თქუენ, და ჟამსა მას ოდეს შეგიწყნარნე თქუენ, რამეთუ მიგცნე თქუენ სახელოვანად და სიქადულად ყოველთა შორის ერთა ქუეყანისათა, ოდეს მოვაქციო მე წინაშე თქუენსა ტყუჱ თქუენი, იტყჳს უფალი .: .: .:
