Page of ms. P: 61r გესმოდენ, ცაო, და ყურად-იღე, ქუეყანაო, რამეთუ უფალი იტყოდა: შვილ ვისხენ და აღვიზარდენ, და მათ შეურაცხ-მყვეს.
იცნა ჴარმან მომგებელი თჳსი და ვირმან _ ბაგაჲ უფლისა თჳსისაჲ. ხოლო ისრაჱლმან მე არა მიცნა, და ერმან ჩემმან რა გულისხმა-ყო.
ვაჲ, ნათესავი ცთომილი და თესლი უკეთური, ნაშობნი ურჩულოებისანი! დაუტევეეს უფალი და განარისხეს წმიდაჲ იგი ისრაჱლისაჲ, უცხო იქმნნეს და უკუნდგეს.
რაჲსა შესძინებთ წყლულებასა ზედა წყლულებათა ურჩულოებითა თქუენითა? ყოველი თავი სალმობად, და ყოველი გული ჭუვილითა.
ფერჴითი თავადმდე გუემულ არს, არა არს მას შინა ადგილი სულნელების, და არცა წყლულებანი განცხადებულ, არცა ნაგუემთა განსივებაჲ, არცა არს ადგილ წამლის ზედადასადებელ, არცა ზეთის და არცა შესახუეველი.
ქუეყანაჲ თქუენი ოჴერ, და ქალაქები თქუენი ცეცხლითა მომწუარ; სოფელსა თქუენსა თქუენ წინაშე უცხონი შესჭამდენ; და მოოჴრებულ და დაქცეულ ჴელთა მიერ უცხოთასა.
დაგდებულ და დატევებულ იყოს ასული ეგე სიონისაჲ ვითარცა ტალავარი მყოდოლთაჲ, და ვითარცა საგრილობელნი ხილისმცველთანი შორის ნესოანსა მას, და ვითარცა ქალაქი შეცვული.
არა თუმცა უფალმან ძალთამან დამიტევნა ჩუენ თესლი მკჳდრობისაჲ, სოდომელთაებრმცა დაქცეულ ვიყვენით Page of ms. P: 61v და გომორელთამცა მიმსგავსებულ ვართ.
ისმინეთ სიტყუაჲ უფლისაჲ მთავართა სოდომისათა და ეკრძალენით რჩულსა ღმრთისასა ერი ეგე გომორისაჲ.
რაჲ ძეს ჩემი და თქუენი და განმრავლებისა მაგის მსხუერპლისა თქუენისაჲ? თქუა უფალმან: მაძღარ ვარ აწ, კმა არს ჩემდა საკუერთხი ვერძთაჲ; და ცმელი კრავთაჲ და ვაცთა თქუენთაჲ არა მნებავს;
ხილვაჲ, მოსლვაჲვე და ჩუენებაჲ თქუენი არა მნებავს. ვინმე ითხოვდა ამას ჴელთაგან თქუენთა დათრგუნვად? ამიერითგან ეზოსა ჩემსა არღარა შესძინოთ შემთხუევად.
უკუეთუ შემოსწიროთ თქუენ სამინდოჲ, მსხუერპლი იგი ცუდად არს თქუენდა; მიკუმიოთ თუ საკუმეველი, იგიცა საძაგელადვე შერაცხილ არს ჩემდა. თთჳსთავები თქუენი და შაბათები თქუენი და დღენი თქუენნი შერაცხილნი დიდნი წელიწადთანი არა თავს-ვისხნე.
უზმელებანი და უქმელებანი და თთჳსთავნი თქუენნი სძულან სულსა ჩემსა, რამეთუ განმაძღარ ვარ აწ თქუენითა. არა ეგების ამიერითგან, მერმე არღარა გილხინო ცოდვათა თქუენთა.
რაჟამს აღიპყრნეთ ჴელნი თქუენნი ჩემდა მომართ, გარემივიქციო პირი ჩემი თქუენგან, და თუ განამრავლებდეთ ლოცვათა თქუენთა, არავე ვისმინო თქუენი, რამეთუ ჴელნი თქუენნი სავსე არიან სისხლითა.
Page of ms. P: 360v განიბანენით, განიწმიდენით, განიშორეთ უკეთურებაჲ სულთაგან თქუენთა წინაშე თუალთა ჩემთა, დასცხერით ბოროტისაგან თქუენისა;
ისწავეთ კეთილისა საქმჱ, გამოიძიეთ სამართალი, იჴსენით დაწუნებული, უსაჯეთ ობოლსა, განამართლეთ ქურივი.
და მოვედით და შევიტყუნეთ, იტყჳს უფალი. და უკუეთუ იყვნენ ცოდვანი თქუენნი ვითარცა ღებილნი, ვითარცა თოვლი განვასპეტაკო; და თუ იყვნენ მეწამულნი, ვითარცა მატყლი განვასპეტაკო.
და უკუეთუ გინდეს და ისმინოთ ჩემი, კეთილსა ქუეყანასა სჭამდეთ.
და უკუეთუ არა ისმინოთ ჩემი და არა ინებოთ, მახჳლმან შეგჭამნეს თქუენ, რამეთუ პირი უფლისაჲ იტყოდა ამას.
Page of ms. P: 319v ამას იტყჳს უფალი ღმერთი ძრიელი საბაოთ ისრაჱლისაჲ: [ვაჲ, ძრიელთა ისრაჱლისათა], რამეთუ არა დასცხრეს გულისწყრომაჲ ჩემი წინააღმდგომთა ჩემთა ზედა, და სასჯელი ვყო მტერთა ჩემთაჲ;
და მივყო ჴელი ჩემი შენ ზედა და გამოგაჴურვო წმიდად; ხოლო ურჩნი იგი წარვწყმიდნე და მოვსპნე ყოველნი უსჯულონი შენგნ და ყოველნი ამპარტავანნი დავამდაბლნე.
და დავადგინნე მსაჯულნი შენნი, ვითარცა პირველ, და ზრახვანი შენნი, ვითარცა დასაბამსა, და მისა შემდგომად გეწოდოს შენ ქალაქი სიმართლისაჲ და ქალაქი სარწმუნოჲ, სიონ.
რამეთუ სამართლით განერეს ტყუჱ მისი და მოწყალებით.
და შეიმუსრნენ ცოდვილნი და უსჯულონი ერთად და, რომელთა დაუტევეს უფალი, მოისრნენ.
რამეთუ ჰრცხუენეს კერპთა მათთა ზედა, რომელთა-იგი მათ ინებეს, და ჰრცხუენეს გამოქანდაკებულთა მათთა ზედა, რომელნი მათ ქმნნეს, და ჰრცხუენეს მტილებსა მათსა, რომელთათჳს გული უთქუმიდა.
რამეთუ იყვნენ იგინი ვითარცა ბელეკონნი ფურცელდაყრილნი და ვითარცა სამოთხჱ, რომელსა არა აქუნ წყალი.
და იყოს ძალი მათი ვითარცა ნაძეძი სელისაჲ და საქმენი მათნი ვითარცა ნაბერწყალნი ცეცხლისანი, და დაიწუნენ უსჯულონი და ცოდვილნი ერთად და არავინ იყოს დამშრეტელ.
