Page of ms. P: 382v და გამოვიდეს კუერთხი ძირისაგან იესჱსისა, და ყუავილი ძირისაგან მისისა აღმოჴდეს.
და განისუენოს მის ზედა სულმან ღმრთისამან, სულმან სიბრძნისამან და გულისხმის-ყოფისამან, სულმან ზრახვისამან და მეცნიერებისამან და ღმრთისმსახურებისამან,
სულმან ძრიელებისა და შიშისა ღმრთისამან; და აღავსოს იგი, არა დიდებისაებრ შჯიდეს, არცა სიტყჳსაებრ ამხილებდეს,
არამედ სჯიდეს სიმართლისა სასჯელსა და ამხილებდეს დიდებულთა ქუეყანისათა. დასცეს ქუეყანაჲ სიტყჳთა პირისა მისისაჲთა და სულითა ბაგეთა მისთაჲთა მოსპოს უღმრთოჲ.
და იყვნენ სიმართლითა მორტყმულ წელნი მისნი და ჭეშმარიტებითა მომტკიცებულ გუერდნი მისნი.
მაშინ ძოვდეს მგელი კრავთა თანა, და ვეფხი განისუენებდეს თიკანთა თანა, და ჴბოჲ და კუროჲ და ლომი ერთად ძოვდენ, და ყრმამან მცირემან მოიყვანნეს იგინი.
და ჴარი და ლომი ერთად ძოვდენ, და ერთად მართუენი მათნი იყვნენ.
და ყრმამან ჩჩჳლმან ჴურელსა ასპიდისასა ჴელი დასდვას;
და არარაჲ ავნოს მას და არცა შეუძლოს წარწყმედად მთასა მას ზედა წმიდასა ჩემსა, რამეთუ აღივსო ყოველი ქუეყანაჲ მეცნიერებითა ღმრთისაჲთა, ვითარცა წყალმან მრავალმან დაფარის ზღუაჲ.
Page of ms. P: 282r და იყოს მას დღესა შინა ძირი იგი იესესი და რომელი-იგი აღდგომად არს მთავრად წარმართთა, მას წარმართნი ესვიდენ, და იყოს გასუენებაჲ მისი პატივით.
და აღემართოს წყალობით საყდარი მისი და დაჯდეს მას ზედა ჭეშმარიტებით საყდარსა დავითისსა, შჯიდეს და გამოეძიებდეს სამართალსა და იწრაფდეს სიმართლესა.
