Page of ms. P: 197r უფალო, შემიწყალენ ჩუენ, რამეთუ ჩუენ შენ გესავთ; იქმნა ნათესავი ურჩთაჲ წარსაწყმედელ, რამეთუ ცხორებაჲ ჩუენი შენ მიერ ჟამსა ჭირსასა.
ჴელითა შიშისა შენისაჲთა განჰკრთეს ერნი და სიმაღლისა შენისაგან განეთესნეს წარმართნი.
ხოლო აწ შეკრბენ ტყუენი ჩუენნი მცირითგან ვიდრე დიდადმდე; ვითარცა ვინ შეკრიბის მკალი, ეგრე გემღერდენ თქუენ.
წმიდა არს ღმერთი, რომელი დამკჳდრებულ არს მაღალთა შინა, აივსო სიონი მსჯავრითა და სიმართლითა.
და შჯულსა მიეცეს, საუნჯეთა შინა არს მაცხოვარებაჲ ჩუენი, მოიწევის სიბრძნჱ და მეცნიერებაჲ და ღმრთისმსახურებაჲ უფლისა მიმართ; ესენი არიან საუნჯენი სიმართლისანი.
აჰა, ესერა, შიში თქუენი მათ ეშინოდის, რომელთათჳს თქუენ გეშინოდა; და მოციქულნი მოივლინნეს ვედრებად Page of ms. P: 197v მშჳდობისა; მწარედ ტიროდიან,
რამეთუ მოოჴრდეს გზანი მათნი; დაცხრომილ არს შიში წარმართთაჲ და მამათა მიმართ აღთქუმაჲ მოღებულ არს, და არად შეირაცხნედ იგინი კაცად.
იგლოვდა ქუეყანაჲ, ჰრცხუენოდა ლიბანსა, წყურნებ იქმნა სარონი; განცხადებულ იყო გალილეაჲ და კარმელი.
აწ აღვდგე, იტყჳს უფალი, აწ ვიდიდო, აწ ავმაღლდე, აწ იხილოთ და გრცხუენეს.
Page of ms. P: 321v მეუფჱ დიდებით იხილოთ და თუალთა თქუენთა იხილონ ქუეყანაჲ იგი შორით,
და სულმან თქუენმან დაიწუართოს შიში. სადა არიან მწიგნობარნი? ანუ სადა არიან მზრახვალნი? სადა არს, რომელი-იგი რაცხდა მათ?
მცირჱ და დიდი, რომელსა არა აზრახა არა ჴმამაღლისა მიერ; ვითარმცა არა ესმა, ერი განქარვებულ არს, და არა არს მსმენელისა მის გულისხმის-ყოფაჲ.
აჰა, ესერა, სიონი, ქალაქი მაცხოარებისა ჩუენისაჲ; თუალთა შენთა იხილონ, იერუსალჱმ, ქალაქო მდიდარო, კარავნი, რომელ არა შეიძრნენ, არცა შეირყინენ მანანი კარვისა მისისანი უკუნისამდე ჟამთა, რამეთუ არცა საბელნი მისნი განსთქდენ.
რამეთუ სახელი უფლისაჲ დიდ არს თქუენ ზედა, ადგილ თქუენდა იყოს, სადა მდინარენი და ჴევნი ფართონი და ვრცელნი. არა Page of ms. P: 322r ხჳდოდი შენ მას გზასა, ნუცა ვლენენ ნავნი შენნი.
რამეთუ ღმერთი ჩუენი დიდ არს, არა წარმჴდეს ჩუენ უფალი მსაჯული ჩუენდა, უფალი მთავარ ჩუენდა, უფალი მეუფჱ ჩუენდა, უფალი მაცხოარ ჩუენდა და მან თავადმან მიჴსნეს ჩუენ.
