Page of ms. P: 368r იაკობს, მონასა ჩემსა, შევეწიო მას; და ისრაჱლ, რჩეული ჩემი, შეიწყნაროს სულმან ჩემმან; მივსცე სული ჩემი მის ზედა, და სამართალი წარმართთა გამოართუას.
არა ღაღადებდეს, არცა დააცადოს, არცა ისმეს გარე ჴმაჲ მისი.
ლერწამი განტეხილი არა შეიმუსროს, და პატრუკი ბრდჳნვალჱ არა დაშრტეს, არამედ ჭეშმარიტად გამოიღოს სამართალი.
და ყოველი Page of ms. P: 368v [შეძ]რწულნდეს, [ვიდრემდე დ]ადვას ქუეყანასა სამართალი; და სახელსა მისსა წარმართნი ესვიდენ.
ესრე იტყჳს უფალი ღმერთი, რომელმან შექმნა ცანი და დაამყარნა იგინი; რომელმან დაამყარა ქუეყანაჲ და ყოველი, რაჲ არს მას შინა, და მოსცა საშუმინველი ერსა თჳსსა, და სულნი, რომელნი ვლენან მას ზედა.
მე ვარ უფალი ღმერთი, რომელმან გიწოდე შენ სიმართლით და გიპყარ ჴელი შენი და განგაძრიელე შენ და მიგეც აღნათქუემად ნათესავთა და ნათლად წარმართთა,
ახილვად თუალთა ბრმათასა და გამოყვანებად კრულნი საპყრაობილით, რომელნი სხენან ბნელსა.
მე ვარ უფალი, და ესე არს სახელი ჩემი.
Page of ms. P: 113v ესრე იტყჳს უფალი, რომელმან ქმნა ცაჲ და დაამყარა იგი; რომელმან დააფუძნა ქუეყანაჲ და რაოდენი-რაჲ არს Page of ms. P: 114r მას შინა, და მოსცა სული ერსა თჳსსა, რომელ არს მას ზედა, და საშუმინველნი, რომელნი ვლენან მას ზედა.
მე, უფალმან, გიწოდე შენ სიმართლით და გიპყარ ჴელი მარჯუენჱ შენი და განგაძრიელე შენ და მიგეც აღნათქუემად ნათესავთა და ნათლად წარმართთა,
ახილვად თუალთა ბრმათასა და გამოყვანებად საკრველთაგან კრულნი და სახლისაგან საპყრობილისა, რომელნი სხენან ბნელსა.
მე ვარ უფალი ღმერთი, და ესე არს სახელი ჩემი, და დიდებაჲ ჩემი სხუათა არა მივსცე, არცა სათნოებაჲ ჩემი გამოქანდაკებულთა.
დასაბამისანი იგი, აჰა, მოიწევიან და ახალი იგი მიგეთხრას თქუენ, ვიდრე თხრობადმდე გეუწყოს თქუენ.
უგალობდით უფალსა გალობითა ახლითა; რამეთუ დასაბამი მისი მაღალთა შინა იდიდების, და სახელი მისი დიდებულ არს კიდითგან კიდედმდე ქუეყანისა, ზღუასა და რომელნი ვლენან მას შინა, ჭალაკნი და ყოველნი მკჳდრნი მისნი.
