Page of ms. P: 206R და იყო, აყვანებასა მას ელიაჲსსა უფლისა მიერ ძლით ვითარცა ზეცად, და წარვიდეს ელია და ელისე გალგალით.
ჰრქუა ელია ელისეს: დადეგ შენ აქა, რამეთუ უფალსა მიუვლინებიე ვიდრე ბეთელდმდე. და ჰრქუა ელისე: ცხოველ არს უფალი და ცხოველ არს სული შენი, არა დაგიტეო შენ. და მოვიდეს იგინი ბეთელდ.
და მოვიდეს ძენი წინაჲსწარმეტყუელთანი, რომელნი იყვნეს ბეთელს, შემთხუევად მისა და ჰრქუეს: უწყი-მეა, რამეთუ დღეს მიიყვანებს უფალი უფალსა შენსა თავისაგან შენისა? და ჰრქუა ელისე: მეცა უწყი, თქუენ დუმენით.
და ჰრქუა ელია ელისეს: დადეგ შენ აქა, რამეთუ უფალსა მიუვლინებიე ვიდრე იერიქოდმდე. და ჰრქუა ელისე: ცხოველ არს უფალი და ცხოველ არს სული შენი, არა დაგიტეო შენ და მოვიდეს იერიქოდ.
და მოუჴდეს ძენი იგი წინაჲსწარმეტყუელთანი, რომელნი იყვნეს იერიქოს, და ჰრქუეს ელისეს: უკუეთუ უწყი, რამეთუ დღეს უფალი Page of ms. P: 206V აღამაღლებს უფალსა შენსა თავისაგან შენისა? ჰრქუა ელისე: მეცა უწყი, თქუენ დუმენით.
და ჰრქუა ელია ელისეს: დადეგ შენ აქა, რამეთუ უფალსა მიუვლინებიე ვიდრე იორდანედმდე. და ჰრქუა ელისე: ცხოველ არს უფალი და ცხოველ არს სული შენი, არა დაგიტეო შენ. და წარვიდეს იგინი.
და ერგასისნი კაცნი, ძენი წინაჲსწარმეტყუელთანი, მოვიდეს და დადგეს შორის მათსა შორსრე, ხოლო იგინი დგეს იორდანესა ზედა.
და მოიღო ელია ხალენი თჳსი, შეკეცა და სცა წყალთა მათ, და განიყო წყალი იგი იმიერ და ამიერ, და განვიდეს ორივე ჴმელად.
და იყო, ვითარცა განვიდეს იგინი, ჰრქუა ელია ელისეს: ითხოვე, რაჲ გიყო შენ ვიდრე ამაღლებასა ჩემსა შენგან. და ჰრქუა ელისე: იყავნ სული ეგე, რომელ არს შენ ზედა, მრჩობლი ჩემ ზედა.
და ჰრქუა ელია: განაფიცხე თხოვაჲ ეგე; გარნა თუ მიხილო მე ამაღლებული შენგან, გეყავნ ეგრე, უკუეთუ [არა], ვერ იყოს.
და იყო, სლვასა ოდენ მათსა და სიტყუასა, აჰა ესერა ეტლნი ცეცხლისანი და ცხენნი ცეცხლისანი, და განაშორეს ურთიერთას. და აღიტაცა ელია ძრვით ვითარცა ზეცად.
ხოლო ელისე ღაღადებდა: მამაო, მამაო, ეტლო ისრაჱლისაო და მჴედარო მისო! მერმე არღარა იხილა იგი. და უპყრა ელისე სამოსელი იგი მისი და განაპო იგი ორგან.
და მოიღო ელისე ხალენი იგი ელიაჲსი, რომელი დაეცა მის ზედა, და სცა წყალთა მათ, და არა განიპო წყალი იგი და თქუა ელისე: სადა არს ღმერთი იგი ელიაჲსი აფფო? და სცა წყალთა მათ ესრჱთ მეორედ; და განიყვნეს წყალნი იგი იმიერ და ამიერ და განვიდა იგი ჴმელად.
და იხილეს იგი ძეთა ...
