TITUS
Biblia Udica, Versio Nizhensis: Vetus Testamentum
Part No. 70
Previous part

Chapter: 30 

Tadi elasi loxol čurpsuni barada bakala q̇aydoox
Tadi elasi loxol çurpsuni barada bakala q'aydoox


Verse: 1  Link to rat Moiseyen israilluġoy boš bakala tayfoġoy kalaṭoġo pine: "Q̣ONƷ́UĠON metäre ämirbsa:
   Moiseyen israilluğoy boş bakala tayfoğoy kalat'oğo pine: "Q'ONČUĞON metəre əmirbsa:

Verse: 2  Link to rat "Ägär sa išq̇aren Q̣ONƷ́UĠO elasṗi heṭunesa äyite tadesa nääl ḳänesa niyätebesa, iz äyitin loxol čurḳalane. Barta šoṭin iz źomoxun č̣eri här äyitä bex ṗaṗesṗeq̇an. *
   "Əgər sa işq'aren Q'ONČUĞO elasp'i het'unesa əyite tadesa nəəl k'ənesa niyətebesa, iz əyitin loxol çurk'alane. Barta şot'in iz ǰomoxun c'eri hər əyitə bex p'ap'esp'eq'an. *

Verse: 3  Link to rat Ägär išq̇ara nu taci sa xuyären iz bavay ḳoya bakala vädine Q̣ONƷ́UĠO elasṗi heṭunesa äyit tadayin nääl ḳänesa niyätṗayin,
   Əgər işq'ara nu taśi sa xuyəren iz bavay k'oya bakala vədine Q'ONČUĞO elasp'i het'unesa əyit tadayin nəəl k'ənesa niyətp'ayin,

Verse: 4  Link to rat iz bavanal me barada ibaki iču hiḳḳal nu uḳayin, me xuyäräl iz pi äyitin loxol čurḳalane.
   iz bavanal me barada ibaki içu hik'k'al nu uk'ayin, me xuyərəl iz pi əyitin loxol çurk'alane.

Verse: 5  Link to rat Ama ägär iz bavan me barada ibaki šoṭay äyit tadiṭoġo bex ṗaṗespsuna iǯaza nu tadayin, ṭe vädä me xuyär iz pi äyitäxun č̣eyes banekon. Buxaʒ́uġon šoṭay iz tadi äyitäxun č̣eysuna pis tene be͑ġal, šoṭo görä ki, ṭe xuyärä iz bavan tene barti.
   Ama əgər iz bavan me barada ibaki şot'ay əyit tadit'oğo bex p'ap'espsuna icaza nu tadayin, t'e vədə me xuyər iz pi əyitəxun c'eyes banekon. Buxačuğon şot'ay iz tadi əyitəxun c'eysuna pis tene běğal, şot'o görə ki, t'e xuyərə iz bavan tene barti.

Verse: 6  Link to rat Ägär sa xuyär išq̇ara taġaṭan \ šoṭay ozane Q̣ONƷ́UĠO elasṗi tadi äyit nääl sa niyäte busa,
   Əgər sa xuyər işq'ara tağat'an \ şot'ay ozane Q'ONČUĞO elasp'i tadi əyit nəəl sa niyəte busa,

Verse: 7  Link to rat iz taci išq̇arenal me barada ibaki šoṭo hiḳḳal nextenesa, ṭe vädä me xuyär iz pi äyitin loxol čurḳalane.
   iz taśi işq'arenal me barada ibaki şot'o hik'k'al nextenesa, t'e vədə me xuyər iz pi əyitin loxol çurk'alane.

Verse: 8  Link to rat Ama ägär išq̇aren me barada ibaki šoṭay äyit tadiṭoġo bex ṗaṗespsuna iǯaza nu tadayin, ṭe vädä me xuyär iz pi äyitäxun č̣eyes banekon. Buxaʒ́uġon šoṭay iz tadi äyitäxun č̣eysuna pis tene be͑ġal, šoṭo görä ki, ṭe xuyärä iz išq̇aren tene barti.
   Ama əgər işq'aren me barada ibaki şot'ay əyit tadit'oğo bex p'ap'espsuna icaza nu tadayin, t'e vədə me xuyər iz pi əyitəxun c'eyes banekon. Buxačuğon şot'ay iz tadi əyitəxun c'eysuna pis tene běğal, şot'o görə ki, t'e xuyərə iz işq'aren tene barti.

Verse: 9  Link to rat Süpür nääl išq̇araxun č̣eri sa čuġon Q̣ONƷ́UĠO elasṗi heṭunesa äyit tadayin, šo iz tadi äyiti loxol čurḳalane.
   Süpür nəəl işq'araxun c'eri sa çuğon Q'ONČUĞO elasp'i het'unesa əyit tadayin, şo iz tadi əyiti loxol çurk'alane.

Verse: 10  Link to rat Ägär išq̇ara bakala sa čuġon iz išq̇ari ḳoya bakala vädine Q̣ONƷ́UĠO elasṗi heṭunesa äyit tadayin nääl ḳänesa niyätṗayin,
   Əgər işq'ara bakala sa çuğon iz işq'ari k'oya bakala vədine Q'ONČUĞO elasp'i het'unesa əyit tadayin nəəl k'ənesa niyətp'ayin,

Verse: 11  Link to rat iz išq̇arenal me barada ibaki iču hiḳḳal nu uḳayin, me čuux iz pi äyiti loxol čurḳalane.
   iz işq'arenal me barada ibaki içu hik'k'al nu uk'ayin, me çuux iz pi əyiti loxol çurk'alane.

Verse: 12  Link to rat Ama ägär iz išq̇aren me barada ibaki šoṭay äyit tadiṭoġo bex ṗaṗespsuna iǯaza nu tadayin, ṭe vädä me čuux iz pi äyitäxun č̣eyes banekon. Buxaʒ́uġon šoṭay iz tadi äyitäxun č̣eysuna pis tene be͑ġal, šoṭo görä ki, ṭe čuġo iz išq̇aren tene barti.
   Ama əgər iz işq'aren me barada ibaki şot'ay əyit tadit'oğo bex p'ap'espsuna icaza nu tadayin, t'e vədə me çuux iz pi əyitəxun c'eyes banekon. Buxačuğon şot'ay iz tadi əyitəxun c'eysuna pis tene běğal, şot'o görə ki, t'e çuğo iz işq'aren tene barti.

Verse: 13  Link to rat Išq̇ara bakala čuġoy Q̣ONƷ́UĠO elasṗi tadi här äyitä nääl iču heṭuxunesa efsuna iz išq̇aren iǯaza tadesal banekon, nu tadesal.
   İşq'ara bakala çuğoy Q'ONČUĞO elasp'i tadi hər əyitə nəəl içu het'uxunesa efsuna iz işq'aren icaza tadesal banekon, nu tadesal.

Verse: 14  Link to rat Ama ägär išq̇aren iz čuġoy Q̣ONƷ́UĠO tadi äyitin barada ibaki ġine šoṭo hiḳḳal tene nexesa, metär bsunen šoṭay äyit tadiṭoġo bex \ ṗaṗespsuna iǯaza tadine baksa. Moṭo ṭe išq̇aren me barada ibaki, ama iz čuġo hiḳḳal nu upsunene aḳesṭa.
   Ama əgər işq'aren iz çuğoy Q'ONČUĞO tadi əyitin barada ibaki ğine şot'o hik'k'al tene nexesa, metər bsunen şot'ay əyit tadit'oğo bex \ p'ap'espsuna icaza tadine baksa. Mot'o t'e işq'aren me barada ibaki, ama iz çuğo hik'k'al nu upsunene ak'est'a.

Verse: 15  Link to rat Ägär išq̇aren iz čuġoy Q̣ONƷ́UĠO tadi äyitin barada ibakiṭuxun sa hema vädä oša izi nu iräzi baksuna avabakesṭayin, ṭe vädä Q̣ONƷ́UĠO tadi äyitin loxol nu čurpsuna görä ǯoġaba ičin tadale".
   Əgər işq'aren iz çuğoy Q'ONČUĞO tadi əyitin barada ibakit'uxun sa hema vədə oşa izi nu irəzi baksuna avabakest'ayin, t'e vədə Q'ONČUĞO tadi əyitin loxol nu çurpsuna görə coğaba için tadale".

Verse: 16  Link to rat Mo išq̇areynaḳ q̇a iz čuġoynaḳ, bavaynaḳ q̇a iz ḳoya bakala išq̇ara nu taci xuyäreynaḳ bakala, Q̣ONƷ́UĠON Moiseya tadi q̇aydooxe.
   Mo işq'areynak' q'a iz çuğoynak', bavaynak' q'a iz k'oya bakala işq'ara nu taśi xuyəreynak' bakala, Q'ONČUĞON Moiseya tadi q'aydooxe.



Next part


This text is part of the TITUS edition of Biblia Udica, Versio Nizhensis: Vetus Testamentum.

Copyright TITUS Project, Frankfurt a/M, 18.11.2023. No parts of this document may be republished in any form without prior permission by the copyright holder.