და მიჩუენნა უფალმან ორნი კიშტენი ლეღჳსანი, მდებარენი წინაშე პირსა ტაძრისა უფლისასა, შემდგომად გარდასახლები\სა Page of ed. 1709: 93a ნაბუხოდონოსორისაგან მეფისა ბაბილონისა იექონიაჲსსა, ძისა იოაკიმ მეფისა იუდაჲსსა და მთავართა იუდაჲსთა და ჴელოვანთა, შემწირავთა და მდიდართა იერუსალიმით და შთაყვანებისა მათისა ბაბილონდ.
კიშტე ერთი ლეღჳ ტკბილ ფრიად, ვითარცა ლეღუნი მსთუანი, და კიშტე სხუაჲ ლეღჳ ჯერკუალი ფრიად უჭამი ჯერკულებისაგან მისისა.
Page of ms. Ga: 234r და თქუა უფალმან ჩემდამო: რასა ჰხედავ შენ, იერემია? და ვთქუ: ლეღუთა და ტკბილთა ლეღუთა ფრიად და ჯერკუალთა, ლეღ[უ]თა ჯერკუალთა ფრიად, რომელნი არრა იჭამნენ ჯერკულობისაგან მათისა.
და იქმნა სიტყუაჲ უფლისაჲ ჩემდამო, მეტყუელი:
ამათ იტყჳს უფალი ღმერთი ისრაილისაჲ: ვითარცა ლეღუნი ესე ტკბილნი, ეგრეთ დავემონო გარდასახლებულთა იუდაჲსთა რომელნი განვავლინე ადგილისა ამისაგან ქუეყანად ხალდეველთად კეთილთათჳს.
და კუალად-ვაგნე იგინი ქუეყანადვე ამად და განვიმტკიცნე მათ ზედა თუალნი ჩემნი კეთილთათჳს და ავაშენნე იგინი და არ დავარღჳნე და დავჰნერგნე იგინი და არ მოვფხურნე.
და მივსცე მათ გული, მცნობელი მათგან ჩემი, ვითარმედ მე ვარ უფალი და იყვნენ ჩემდა ერად და მე ვიყო მათდა ღმერთად, რამეთუ მოიქცენ ჩემდა ფლობითა გულისა მათისაჲთა.
და ვითარცა ლეღუნი ჯერკუალნი, რომელნი არ იჭმებიან ჯერკულობისაგან მათისა, ამათ იტყჳს უფალი: ეგრეთ განვსცე სედეკია მეფე იუდაჲსი და დიდ-დიდნი მისნი და ნეშტი იერუსალიმისაჲ, დაშთომილი ქუეყანასა ამას შინა, და დამკჳდრებულნი ეგჳპტეს შინა.
და განვსცნე იგინი განსაბნეველად ყოველთა მეფობათა ქუეყანისათა და საიგავოდ და საძულელად და საწვევარად ყოველსა შინა ადგილსა, რომელსა განვაგარევნე ეგენი Page of ed. 1709: 93b მუნ.
და მიგავლინო მათდა მახჳლი და სიყმილი და სიკუდილი, ვიდრე მოაკლდენ ქუეყანისაგან, რომელი მივეც მათ და მამათა მათთა.
