TITUS Texts: Tetraevangelium (redactio praeathonensis)

TITUS
Tetraevangelium (redactio praeathonensis)
Part No. 5

Chapter: 5

Verse: 1

და ვითარცა იხილა იესუ ერი იგი, აღვიდა მთასა და დაჯდა იგი მუნ. და მოუჴდეს მას მოწაფენი მისნი.

Verse: 1V მუნ ] -- RPB; მისნი ] -- RPB.

Verse: 2

და აღაღო პირი თჳსი, ასწავებდა მათ და ეტყოდა:

Verse: 3

ნეტარ იყვნენ გლახაკნი სულითა, რამეთუ მათი არს სასუფეველი ცათაჲ.

Verse: 4

ნეტარ არიან მგლოვარენი გულითა, რამეთუ იგინი ნუგეშინისცემულ იყვნენ.

Verse: 4V იყვნენ ] არიან RF-ში გვიანდელი ხელით; მგლოვარენი ] მგლოარენი SF.

Verse: 5

ნეტარ იყვნენ მშჳდნი, რამეთუ მათ დაიმკჳდრონ ქუეყანაჲ.

Verse: 5V იყვნენ ] არიან F-ში გვიანდელი ხელით.

Verse: 6

ნეტარ არიან, რომელთა ჰმშიოდის და სწყუროდის სიმართლისათჳს, რამეთუ იგინი განძღენ.

Verse: 6V არიან ] იყვნენ B; ჰმშიოდის ] ჰშიოდის FG; ჰმშიოდის ] შიოდის SB.

Verse: 7

ნეტარ არიან მოწყალენი, რამეთუ იგინი შეიწყალნენ.

Verse: 7V არიან ] იყვნენ B

Verse: 8

ნეტარ არიან წმიდანი გულითა, რამეთუ მათ ღმერთი იხილონ.

Verse: 8V არიან ] იყვნენ B

Verse: 9

ნეტარ არიან მშჳდობისმყოფელნი, რამეთუ იგინი ძედ ღმრთისა იწოდნენ.

Verse: 9V არიან ] იყვნენ B; იგინი ] -- R; ძედ ] ნაშობ B; ღმრთისა ] ღმრთისად B.

Verse: 10

ნეტარ არიან დევნულნი სიმართლისათჳს, რამეთუ მათი არს სასუფეველი ცათაჲ.

Verse: 10V იყვნენ ] არიან BF (F-ში გვიანდელი ხელით)

Verse: 11

ნეტარ იყვნეთ თქუენ, რაჟამს გყუედრიდენ და გდევნიდენ და თქუან ყოველი სიტყუაჲ ბოროტი თქუენდა მიმართ სიცრუვით ჩემთჳს.

Verse: 11V გყუედრიდენ და გდევნიდენ ] გდევნიდენ და გყუედრიდენ RP; სიტყუაჲ ] -- SF; სიცრუვით ] სიცრუით F;

Verse: 12

   გიხაროდენ და მხიარულ იყვენით, რამეთუ სასყიდელი თქუენი *ფრიად არს ცათა შინა, რამეთუ ეგრეთვე დევნნეს წინაწარმეტყუელნი უწინარჱს თქუენსა.

Verse: 12V    ეგრეთვე ] ეგრევე RPBG; ეგრთვე ] ეგრე T; დევნნეს ] დევნეს TF; უწინარჱს ] უწინარეს SPBTFG.

Verse: 12VV    * აქედან გრძელდება Ts

Verse: 13

თქუენ ხართ მარილნი ქუეყანისანი. უკუეთუ მარილი იგი განქარდეს, რაჲთამე შეიმარილოს? არღარა საჴმარ არნ მიერითგან, არამედ განგდებად გარე და დათრგუნვად კაცთა მიერ.

Verse: 13V რაჲთამე ] რაჲთა G; საჴმარ ] შემძლებელ ] RPB; მიერითგან ] მერმე RPB; არამედ ] არამედ + აღებად და T; გარე ] გარჱ B

Verse: 14

თქუენ ხართ ნათელნი სოფლისანი. ვერ ჴელ-ეწიფების ქალაქსა დაფარვად, მთასა ზედა დაშჱნებულსა.

Verse: 14V მთასა ] მთა F; დაშჱნებულსა ] დაშენებულსა STFG.

Verse: 15

არცა აღანთიან სანთელი და დადგიან ქუეშე ჴჳმირსა, არამედ სასანთლესა ზედა, და ჰნათობნ იგი ყოველთა, რომელნი არიედ სახლსა შინა.

Verse: 15V არცა ] არცაღა S; დადგიან ] შედგიან ] T; ქუეშე ] ქუეშჱ P; იგი ] -- RPBT; არიედ ] არიან PRBG.

Verse: 16

   *ეგრე ბრწყინევდინ ნათელი თქუენი წინაშე კაცთა, რაჲთა იხილნენ საქმენი თქუენნი კეთილნი და ადიდებდენ მამასა თქუენსა ზეცათასა.

Verse: 16V    ეგრე ] ეგრეთ B; ეგრე ] ეგრეცა T

Verse: 16VV    * აქედან G-ს აკლია.

Verse: 17

ნუ ჰგონებთ, ვითარმედ მოვედ დაჴსნად შჯულისა გინა წინაწარმეტყუელთა, არა მოვედ დაჴსნად, არამედ აღსრულებად.

Verse: 17V დაჴსნად ] დაჰჴსნად S.

Verse: 18

ამენ გეტყჳ თქუენ: ვიდრემდე წარჴდეს ცაჲ და ქუეყანაჲ, იოტა მარტოჲ ერთი რქაჲ არა წარჴდეს შჯულისაგან და წინაწარმეტყუელთა, ვიდრემდე ყოველივე იყოს.

Verse: 18V ვიდრემდე ] ვიდრემდის T; წარჴდეს ცაჲ და ქუეყანაჲ ] ცაჲ და ქუეყანაჲ წარჴდეს RP; წარჴდეს ცაჲ და ქუეყანაჲ ] ცანი და ქუეყანაჲ წარჴდეს S; და ქუეყანაჲ ] -- T; ერთი რქაჲ ] რქაჲ ერთი T; წარჴდეს ] წარწყმდეს ] T; წინაწარმეტყუელთა ] წინასწარმეტყუელთა T; ყოველივე ] ყოველი RPB; ყოველივე ] ესე ყოელი T

Verse: 19

უკუეთუ ვინმე დაჰჴსნეს ერთი მცნებათა ამათგანი უმცირჱსთაჲ და ასწავებდეს ესრჱთ კაცთა, უმცირეს ეწოდოს მას სასუფეველსა ცათასა; ხოლო რომელმან ყოს და ასწავოს, ამას დიდ ერქუას სასუფეველსა ცათასა.

Verse: 19V დაჰჴსნეს ] დაჰჴსნას S; დაჰჴსნეს ] დაჴსნეს T; უმცირჱსთაჲ ] უმცირესთაჲ SBF; უმცირჱსთაჲ ] უმცირესთა T; ასწვებდეს ] ასწაოს RPBT; ესრჱთ ] ესრეთ SBTFF; უმცირეს ] უმრწემეს ] SRPBT; ხოლო ] -- T; ასწავოს ] ასწაოს SRPBT; ცათასა ] ცათა B

Verse: 20

ხოლო გეტყჳ თქუენ: უკუეთუ არა ემატოს სიმართლჱ თქუენი უფროჲს მწიგნობართა და ფარისეველთა, ვერ შეხჳდეთ სასუფეველსა ცათასა.

Verse: 20V სიმართლჱ ] სიმართლე STF.

Verse: 21

გასმიეს, რამეთუ ითქუა პირველთა მათ მიმართ: არა კაც-ჰკლა; ხოლო რომელმან მოკლას, თანამდებ არს სიკუდილისა.

Verse: 21V გასმიესა ] + თქუენ F; მიმართ ] -- T.

Verse: 22

ხოლო მე გეტყჳ თქუენ, რამეთუ რომელი განურისხნეს ძმასა თჳსსა ცუდად, თანამდებ არს საშჯელისა; და რომელმან ჰრქუას ძმასა თჳსსა რაკა, რომელ არს საძაგელ, თანამდებ არს იგი კრებულით განსლვად; და რომელმან ჰრქუას ძმასა თჳსსა ცოფ, თანამდებ არს იგი გეჰენიასა ცეცხლისასა.

Verse: 22V მე ] -- T; განურისხნეს ] განურისხდეს T; თჳსსა (1) ] თჳსა TF; თჳსსა (2) ] თჳსა T; რაკა ] რაკ SF; იგი ] -- TF; კრებულით ] კრებულისაგან F; კრებულით ] კრებულისაგან გარე T; განსლვად ] გასლვად S; თჳსსა (3) ] თჳსა STF; ცეცხლისასა ] ცეცხლსა T

Verse: 23

უკუეთუ შესწირვიდე შესაწირავსა საკურთხეველსა ზედა და მუნ მოგეჴსენოს შენ, ვითარმედ ძმაჲ შენი გულძჳრ რაჲმე არს შენთჳს,

Verse: 23V შენ ] შენდა SRPBT.

Verse: 24

დაუტევე შესაწირავი იგი წინაშე საკურთხეველსა მას და მივედ პირველად და დაეგე ძმასა შენსა და მაშინ მოვედ და შეწირე შესაწირავი შენი.

Verse: 24V იგი ] შენი ] T; მას ] -- T; და (1) ] -- SRPT; მივედ ] მიედ S; პირველად და დაეგე ] დაეგე პირველად RPBT; მაშინ ] -- T; მოვედ ] მოედ S; და (4) ] -- RPBT.

Verse: 25

იყავ კეთილად მცნობელ წინამოსაჯულისა მის შენისა ადრე, ვიდრემდე ხარ მის თანა გზასა ზედა, ნუუკუე მიგცეს შენ წინამოსაჯულმან მან შენმან მსაჯულსა და მსაჯულმან მან ბჭესა და ბჭემან მან მიგცეს შენ მსახურთა, და მათ შეგაგდონ საპყრობილესა.

Verse: 25V ადრე ] ადრჱ B; მსაჯულმან ] მოსაჯულმან S; ბჭესა და ბჭემან მან მიგცეს შენ ] -- RPBT; შენმან მსაჯულსა და მსაჯულმან მან ] -- T; მსახურთა ] მსახურსა PRBT; და (2) ] -- T; მათ შეგაგდონ საპყრობილესა ] საპყრობილედ შეჰვარდე RPBT.

Verse: 26

ამენ გეტყჳ შენ: ვერ გამოხჳდე მიერ, ვიდრე არა მისცე დანგისა კოტორი.

Verse: 26V დანგისა კოტორი ] დანგის იგი კოტორი B; დანგისა კოტორი ] უკუანაჲსკნელი კოდრატი F-ში გვიანდელი ხელით.

Verse: 27

გასმიეს სამე, რამეთუ ითქუა პირველთა მათ მიმართ: არა იმრუშო.

Verse: 27V სამე ] -- RPBT.

Verse: 28

ხოლო მე გეტყჳ თქუენ: ყოველი რომელი ჰხედვიდეს დედაკაცსა და გული უთქუმიდეს მისთჳს, მუნთქუესვე იმრუშა მის თანა გულსა შინა თჳსსა.

Verse: 28V მე ] -- T; ჰხედვიდეს ] ხედვიდეს STF; და გული უთქუმიდეს მისთჳს ] გულისთქუმით მას RP; უთქუმიდეს ] უთქმიდეს S; და გული უთქუმიდეს მისთჳს ] გულისთქუმად მას B; და გული უთქუმიდეს მისთჳს ] გულისთქუმად მან T; მუნთქუესვე ] მუნვე ] RPBT; თჳსსა ] თჳსა T; შინა ] -- RP.

Verse: 29

უკუეთუ თუალი შენი მარჯუენჱ გაცთუნებდეს შენ, აღმოიღე იგი და განაგდე შენგან, რამეთუ უმჯობჱს არს შენდა, რაჲთა წარწყმდეს ერთი ასოთა შენთაგანი, ვიდრე არა ყოველი გუამი შენი შთავრდომად გეჰენიასა მას ცეცხლისასა.

Verse: 29V მარჯუენჱ ] მარჯუენაჲ S; მარჯუენჱ ] მარჯუენე TF; იგი ] -- F; განაგდე ] + იგი F; უმჯობჱს ] უმჯობეს RSBTF; წარწყმდეს ] წარწმდეს S; შენი ] -- T; შთავრდომად ] შთავარდეს ] T; მას ცეცხლისასა ] -- RPBT.

Verse: 30

და უკუეთუ მარჯუენჱ ჴელი შენი გაცთუნებდეს შენ, მოიკუეთე და განაგდე შენგან, რამეთუ უმჯობჱს არს შენდა, რაჲთა წარწყმდეს ერთი ასოთა შენთაგანი, და არა ყოველი გუამი შენი შთავარდეს გეჰენიასა.

Verse: 30V და ] -- T; მარჯუენჱ ] მარჯუენე TF; მარჯუენჱ ] მარჯუენაჲ S; შენ ] -- T; მოიკუეთე ] + იგი BF; უმჯობჱს ] უმჯობეს SBTF; წარწყმდეს ერთი ასოთა შენთაგანი ] ერთი ასოთა შენთაგანი წარწყმდეს T; და ] ვიდრე T; შთავარდეს ] შთავრდომად T

Verse: 31

თქუმულ არს, რამეთუ რომელმან განუტეოს ცოლი თჳსი, მიეცინ მას განსატევებელი.

Verse: 31V რამეთუ ] -- T; განსატევებელი ] განსატევებელად T

Verse: 32

ხოლო მე გეტყჳ თქუენ, რამეთუ ყოველმან რომელმან განუტეოს ცოლი თჳსი თჳნიერ სიტყჳსა მის სიძჳსა, მან ამრუშა იგი; და რომელმან განტევებული შეირთოს, მანცა იმრუშა.

Verse: 32V მე ] -- T; რამეთუ ] -- T; ყოველმან ] ყოველმანვე T; განუტეოს ] დაუტეოს T; თჳსი ] -- T; სიტყჳსა ] -- T; მის ] -- RPBT; მან ამრუშა იგი ] მან იმრუშა T; შეირთოს ] ცოლ-იყოს T; იმრუშა ] ისიძვოს T.

Verse: 33

კუალად გასმიეს, რამეთუ ითქუა პირველთა მათ მიმართ: არა ცილი ჰფუცო, არამედ მიეც უფალსა ფიცისა შენისათჳს.

Verse: 33V კუალად ] მერმე T; ითქუა ] თქუმულ არს T; მიმართ ] -- T; არა ცილი ჰფუცო ] ნუ ცილსა ჰფუცავ T

Verse: 34

ხოლო მე გეტყჳ თქუენ არაფუცვად ყოვლადვე ნუცა ცასა, რამეთუ საყდარი არს ღმრთისაჲ;

Verse: 34V არაფუცვად ] ნუ ჰფუცავთ T; ყოვლადვე ] ყოვლად PRBT; R-ში გვიანდელი ხელით. არაფუცვად ყოვლადვე ] ყოვლადვე არაფუცვად S.

Verse: 35

ნუცა ქუეყანასა, რამეთუ კუარცხლბერკი არს ფერჴთა მისთაჲ; ნუცა იერუსალჱმსა, რამეთუ ქალაქი არს მეუფისა დიდისაჲ.

Verse: 35V კუარცხლბერკი ] კუარცხბერკი RPB; კუარცხლბერკი ] კუარცხლბეკი S; კუარცხლბერკი ] კუარცხბეკია T; მისთაჲ ] მისთა ST; დიდისაჲ ] დიდისა T

Verse: 36

ნუცა თავსა შენსა ჰფუცავ, რამეთუ ვერ ძალ-გიც ერთისა თმისა განსპეტაკებად გინა დაშავებად.

Verse: 36V განსპეტაკებად ] განთეთრებაჲ RP.

Verse: 37

არამედ იყავნ თქუენი ჰჱ ჰე და არაჲ არა. ხოლო უმეტჱსი ამათსა უკეთურისაგანი არს.

Verse: 37V თქუენი ] თქუენდა F; ჰჱ ჰე ] ჰჱ ჰჱ TF; ჰჱ ჰე ] ჰე ჰე B; არაჲ არა ] არა არა S; არაჲ არა ] არა არაჲ T; ხოლო ... არს ] -- B; უმეტჱსი ] უმეტესი STF; უმეტჱსი ] უუმეტესი P; ამათსა ] + ყოველი T; უკეთურისაგანი ] უკეთურისაგან S; უკეთურისაგანი ] უკეთურებისაგან T; არს ] არის P.

Verse: 38

გასმიეს, *რამეთუ თქუმულ არს: თუალი თუალისა წილ და კბილი კბილისა წილ.

Verse: 38V * აქედან გრძელდება G.

Verse: 39

ხოლო მე გეტყჳ თქუენ არა წინააღდგომად ბოროტსა, არამედ რომელმან გცეს შენ ყურიმალსა შენსა მარჯუენესა, მიუპყარ ერთკერძოჲცა.

Verse: 39V წინააღდგომად ] წინააღმდგომად S; შენ ] -- TG; ყურიმალსა შენსა მარჯუენესა ] მარჯუენესა ყურიმალსა შენსა T; მარჯუენესა ] მარჯუენასა FG; მიუპყარ ] + მას T; ერთკერძოჲცა ] კერძოჲცა იგი T

Verse: 40

და რომელსა უნდეს საშჯელად და მიღებად კუართი შენი, მიუტევე მას სამოსელიცა შენი.

Verse: 40V და (2) ] -- TG; სამოსელიცა ] სამუსელიცა F

Verse: 41

და რომელი წარგიქცევდეს შენ მძღურად მილიონ ერთ, მივლე მის თანა ორიცა.

Verse: 41V მძღურად ] მოძღურად T; მივლე ] მივლჱ B

Verse: 42

და რომელი გთხოვდეს შენ, მიეც; და რომელსა უნდეს სესხებად შენგან, ნუ გარემიიქცევი.

Verse: 42V გარემიიქცევი ] გარემიაქცევ S; სესხებად ] სესხების B; შენგან ] შენდა F;

Verse: 43

გასმიეს, რამეთუ თქუმულ არს: შეიყუარო მოყუასი შენი და მოიძულო მტერი შენი.

Verse: 43V მოიძულო ] მოიძულე T

Verse: 44

ხოლო მე გეტყჳ თქუენ: გიყუარდედ მტერნი თქუენნი და აკურთხევდით მწყევართა თქუენთა და კეთილ-უყავთ მოძულეთა თქუენთა და ულოცევდით მათ, რომელნი გმძლავრობდენ თქუენ და გდევნიდენ თქუენ

Verse: 44V მე ] -- T; გიყუარდედ ] გიყუარდენ F; გიყუარდედ ] გიყუარდინ SG; და (2) ] -- RPT; კეთილ-უყავთ ] კეთილსა უყოფდით SRPBT; ულოცევდით მათ ] ილოცევდით მათთჳს RPB; თქუენ ] -- SRPBG; გდევნიდენ თქუენ ] გდევნიდენ თქუენ F -ში გვიანდელი ხელით.

Verse: 45

რაჲთა იყვნეთ თქუენ შვილ მამისა თქუენისა ზეცათაჲსა, რამეთუ მზჱ მისი მიეფინის ბოროტთა ზედა და კეთილთა, და აწჳმის მართალთა ზედა და ცოდვილთა.

Verse: 45V ზეცათაჲსა ] ზეცათასა F; ზეცათაჲსა ] ზეცაჲსა T; რამეთუ ] -- G; მზჱ ] მზე SFG; მიეფინის ] მიჰფინის G; მიეფინის ] აღმოვალს RPB; მიეფინის ] აღმოავლინის T; აწჳმის ] წჳმს B; და აწჳმის ] დაწჳმის P; და აწჳმის ] და წჳმაჲ T; ცოდვილთა ] ცოდვილთაცა T; ცოდვილთა ] ცრუთა RPB.

Verse: 46

უკუეთუ გიყუარდენ მოყუარენი ხოლო თქუენნი, რაჲ სასყიდელი გაქუს? რამეთუ მეზუერენიცა და ცოდვილნი ამასვე იქმან.

Verse: 46V უკუეთუ ] და უკუეთუ G; ხოლო ] -- F; რამეთუ მეზუერენიცა და ცოდვილნი ამასვე იქმან ] ანუ არა მეზუერეთაცა იგივე ყვიან RPB; ამასვე იქმან ] ამას ჰყოფენ T.

Verse: 47

და უკუეთუ მოიკითხვიდეთ მეგობართა ხოლო თქუენთა, რასა უმეტჱს იქმთ? ანუ არა მეზუერეთაცა და ცოდვილთა ეგრევე ყვიან?

Verse: 47V ხოლო თქუენთა ] თქუენთა ხოლო T; უმეტჱს ] უმეტეს PBT; უმეტჱს ] უმეტესსა SFG; მეზუერეთაცა ] მეზუერეთა T; და ცოდვილთა ] -- RPBT; ეგრევე ] ესრევე S; ეგრევე ] იგივე RPBT.

Verse: 48

იყვენით თქუენ სრულ, ვითარცა მამაჲ თქუენი ზეცათაჲ სრულ არს.

Verse: 48V ზეცათაჲ ] -- RP.

This text is part of the TITUS edition of Tetraevangelium (redactio praeathonensis).

Copyright TITUS Project, Frankfurt a/M, 15.2.2022. No parts of this document may be republished in any form without prior permission by the copyright holder.