Page of ms. P: 9R აწ უკუე ჩუენცა მაქუს ესოდენი გარემოდგომილი ჩუენსა სიმრავლჱ წმიდათა მოწამეთაჲ, სიმძიმჱ ყოველი განვიშოროთ და მწრაფლ მომავალი იგი ცოდვაჲ, მოთმინებით ვრბიოდით წინაგანმზადებულსა მას ჩუენსა ღუაწლსა.
და ვხედვიდეთ სარწმუნოებისა ჩუენისა წინამძღუარსა და სრულებისა მოქმედსა იესუს, რომელმან-იგი წინაგანმზადებულისა მის წილ სიხარულისა დაითმინა ჯუარი და სირცხჳლი შეურაცხ-ყო და საყდართა მარჯუენით ღმრთისა დაჯდა.
განიზრახეთ, რომელმან-იგი ესევითარი დაითმინა ჩუენ ცოდვილთათჳს, მისა მიმართი იგი სიტყჳს-გებაჲ, რაჲთა არა დაშურეთ სულითა თქუენითა და მოჰმედგრდეთ.
არღა სისხლთაგან წინადადგრომილ ხართ თქუენ ცოდვისა მიმართ ახოვნად
და მოჰმედგრდით ნუგეშინის-ცემისაგან, რამეთუ ვითარცა შვილთა გეტყჳს თქუენ: შვილო, ნუ სულმოკლე იქმნები სწავლასა უფლისასა, ნუცა დაჰჴსნდები მის მიერ მხილებასა;
რამეთუ რომელი უყუარნ უფალსა, სწავლის; და ტანჯის ყოველი შვილი, რომელი შეიწყნარის.
სწავლასა დაუთმეთ, რამეთუ ვითარცა შვილთა შეგიწყნარებს თქუენ ღმერთი. ვინმე არს შვილი, რომელი არა სწავლის მამამან?
უკუეთუ შორს ხართ სწავლასა, რომლისა ზიარ ქმნულ არიან ყოველნი, მწირნი ვიდრემე ხართ და არა შვილნი.
და აწ უკუეთუმცა გუესხნეს ჴორციელნი მამანი მასწავლელად, გუეკდიმებოდამცა; არამე უფროჲს დავემორჩილნეთა მამასა სულთასა და ვცხონდეთ?
რომელნი მცირეთა დღეთა მათისაებრ ნებისა სწავლიდენ; ხოლო ესე უმჯობჱსისათჳს, Page of ms. P: 9V რაჲთა მოიღონ სიწმიდისაგან მისისა.
ყოველივე სწავლაჲ მეყსეულად არა არნ სიხარულ, არამედ მწუხარება; ხოლო უკუანაჲსკნელ ნაყოფი მშჳდობისაჲ მის მიერ წურთილთა მოაგის -- სიმართლჱ.
Page of ms. P: _ Page of ms. K: 248V ამისთჳს დაშთომილნი ჴელნი და დაჴსნილნი მუჴლნი აღემართენით.
და ალაგნი მართლ-ყვენით ფერჴთა თქუენთანი, რაჲთა არა მკელობელი იგი დაეცეს, არამედ უფროჲსღა განიკურნენ.
მშუიდობასა შეუდეგით ყოველთა თანა და სიწმიდესა, რამეთუ ამისა თჳნიერ ვერვინ იხილოს უფალი
ეკრძალენით, ნუ ვინმე დაკლებულ იყოს მადლისაგან ღმრთისაჲსა.
Page of ms. K: _ Page of ms. P: 266V რამეთუ არა მოსრულ ხართ თქუენ მთასა მას ჴელითშესახებელსა და აგზნებულსა ცეცხლითა და წყუდიადითა ბნელითა და ნისლითა,
სადა-იგი ოხრაჲ საყჳრისაჲ და ჴმაჲ სიტყუათაჲ, რომელთა-იგი ვიეთმე ესმა და იჯმნეს, რაჲთა არა შეეძინოს მათ მერმე სიტყუაჲ.
რამეთუ ვერ ითმენდეს ბრძანებულსა მას; მჴეცი ღათუ შეეხებოდა მთასა მას, ქვითა განიდევნებოდა.
და ესრჱთ საშინელ იყო საუცრებაჲ იგი, მოსე თქუა: შეშინებულ ვარ და შეძრწუნებულ.
არამედ მოსრულ ხართ თქუენ მთასა სიონსა და ქალაქსა ღმრთისა ცხოველისასა და ბევრეულსა ანგელოზთა კრებულსა
და ეკლესიასა პირმშოთასა, აღწერილსა ცათა შინა, და მსაჯულისა ყოველთაჲსა აღსრულებულთა.
და შჯულისა მის ახლისა შუამდგომელისა იესუჲსა და სისხლისა პკურებასა, უმჯობესისა Page of ms. P: 267R თქუმულისა მისებრ აბელის მართლისა.
ეკრძალენით, ნუუკუე იჯმნეთ მეტყუელისა მისგან. უკუეთუ იგინი ვერ განერნეს, რომელთა-იგი ქუეყანასა იჯმნეს ბრძანებისა მისგან, რაოდენ უფროჲს ჩუენ, უკუეთუ ზეცისასა მას გარემოვიქცეთ,
რომლისა ჴმამან ქუეყანაჲ შეძრა და აწ უთქუამს და იტყჳს: ერთგზისღა შევძრა მე არა ხოლო ქუეყანაჲ, არამედ ცანიცა.
ხოლო "ერთგზის" ესრე გამოაჩინებს შეძრულთასა მას ცვალებასა, ვითარცა ქმნულთასა, რაჲთა ეგოს შეუძრავი იგი.
ამისთჳსცა შეუძრავი სასუფეველი დავიპყრათ.
