)
)
Ṭe vädä Isusen ǯamaata saal Iz šagirdxo pine:
"Ḳanun zombalxoy q̇a fariseyxoy Moiseyi gala arsṭuni exṭiyärebu.
Moṭaynaḳal vä͑x ämirbala här šeya ämälbi bex ṗaṗesṗanan. Ama šoṭoġon balṭu mabanan, šoṭaynaḳ ki, ičoġoy zombalṭoġo ičan ämäl teṭunbsa.
Šoṭoġon bə͑hi yükürxo amdarxoy ä͑mnäbelṭun yükläyinšbsa, ičan isä me yükürxo tašṭeynaḳ ičoġoy ḳäšinal teṭun duġsa.
Šoṭoġon hiḳḳäbsaṭunsa amdarxon aḳseynaḳṭunbsa. Šoṭaynaḳ ki, šoṭoġon afərəḳaṭan afərən q̇utiġo * \ gengbi ičoġoy paltari c̣oc̣iḳxoval boxoyṭunbsa. *
Šoṭoġon q̇onaxluġxo besṭa, sinagogxoval samǯi ǯörginä arsṭuna, *
amdarxon bazarin meydanxo ičoġo ṗä͑ kiin kul-kiye biq̇i "xeyirq̇an baki" upsuna, amdarxon ičoġo "Ravvi" * ḳalpsuna čurṭunsa.
Ama vä͑x "Ravvi" pi maq̇aṭun ḳalpi. Šoṭaynaḳ ki, ef täk sa Määlimebu. Vä͑nal sun-sunaynaḳ vičimuxnan.
Oćali ćoyel šuḳḳala "bava" pi ma ḳalpanan. Šoṭaynaḳ ki, ef täk sa Bavanebu, Šoval Göynul Bakala Bavane.
Vä͑x šuḳḳalen "kalaluġbalal" pi maq̇an ḳalpi. Šoṭaynaḳ ki, ef täk sa Kalaluġbalo, Šoval Xrisṭose.
Ef arane än kalo šunesa, šo ef q̇ulluġčiq̇an baki. *
Iču ala efala här sa amdara Buxaʒ́uġon oq̇a sakale, ama iču oq̇a efalṭu ala e͑qevḳale. *
Vay ef hala, ay ḳanun zombalxo q̇a fariseyxo - ṗä͑ćolorox! Vä͑n Göye padčaġluġa baġala ćomo amdarxoy ćoyel buṭnanksa. Nä vä͑n tenan baysa, nä baysun čureġalṭoġo tenan \ bare.
Vay ef hala, ay ḳanun zombalxo saal fariseyxo - ṗä͑ćolorox! Vä͑n dänizxo q̇a q̇ariluġxonan č̣ovaksa ki, sa tanal bakayin ef täräf zaṗḳanan. Vä͑x gärbi isä šoṭo vä͑xun ṗä͑ q̇at gele ǯähännämluġnanbsa.
Vay ef hala, ay ḳać̣i kalaluġbalxo! Zomnanbsa ki, "Buxaʒ́uġoy xrama elasḳalṭin iz elasaxun ġać tene, ama xrami q̇əzəla elasḳalṭin iz elasa ämälbalane".
Ay ḳać̣i haq̇əlsuzxo! Vaǯibo manuva? Q̣əzəl, yoxsa q̇əzəla ə͑velbala xram?
Saal nexnan: "šiin q̇urban ečala ganune elasesa, iz elasaxun ġać tene, ama q̇urban ečala gane loxol bakala q̇urbana elasḳalṭin isä iz elasa ämälbalane".
Ay ḳać̣iyox! Vaǯibo manuva? Q̣urban, yoxsa q̇urbana ə͑velbala q̇urban ečala ga?
Q̣urban ečala ganu elasḳala amdaren šoṭay loxol bakala šeyurxoval elasene.
Xrama elasḳala amdarenal xrama saal ṭeṭiya Yäšäyinšalṭune elase.
Göyä elasḳalṭinal Buxaʒ́uġoy taxṭa saal taxṭe loxol Arcalṭune elase. *
Vay ef hala, ay ḳanun zombalxo q̇a fariseyxo! P̣ä͑ćolorox! Vä͑n püšnüḳi, samiṭi saal zirä uḳala cile vic̣ paye sunṭu tanansṭa, ama ḳanuni än vaǯib šeymoġo: düzgünluġa, üḳ boḳospsuna saal sädagätlu * baksuna ṭo͑o͑xnan bosṭa! \ Ama sunṭubaṭan, tə͑yä͑miṭoġoval gäräy eyexun nu č̣evḳanan. *
Ay ḳać̣i kalaluġbalxo! Moc̣aḳa ef u͑ġä͑lä q̇ave bošṭan c̣orobi č̣evnanksa, buša isä * q̇uč̣nanne!
Vay ef hala, ay ḳanun zombalxo q̇a fariseyxo! P̣ä͑ćolorox! Vä͑n ǯame saal ṭaliḳi č̣öšin täräfänan tämizbsa, ama šorox ef puldešiluġen fu͑q̇ṗi šeyurxon buyṭun.
Ay ḳać̣i farisey! Süfṭä q̇ave bošṭan tämizba, ṭe vädä šoṭay č̣öšin täräfäl tämiz bakale!
Vay ef hala, ay ḳanun zombalxo q̇a fariseyxo! P̣ä͑ćolorox! Vä͑n mac̣ibi mäġbäroġonan * ošq̇arsṭa: šoṭoġoy č̣öšin täräf gözäle aḳesa, iz boš isä ṗuriṭoġoy u͑q̇e͑nxon saal här ǯürä murdarluġen buye. *
Haketäräl vä͑n: \ ćoyexun amdarxoynaḳ düzgün amdarnan aḳesa, ef boš isä ṗä͑ćolaluġen saal ḳanunsuzluġen buye.
Vay ef hala, ay ḳanun zombalxo q̇a fariseyxo! P̣ä͑ćolorox! Vä͑n xavarečalxoynaḳ mäġbäroxnan biq̇sa, düzgün amdarxoy heykälxonan bäzäyinšbsa.
Vä͑n nexnan: "Ägär yan beš bavoġoy-kalboġoy yäšäyinši vädine yäšäyinšiyaniy, xavarečalxoy ṗiya cipsuna šoṭoġoxun sa teyan bakoy".
Vä͑nǯä ef barada šahidluġnanbsa: vä͑n xavarečalxo besṗiṭoġoy ġarmuxnan.
Metäre isä, ef bavoġon-kalboġon burqi äšä bex ṗaṗesṗanan!
Vä͑n, ay diziḳxo, gürzoġoy näsil! Divanbaki ǯähännämä bosesunaxun ṭiṭes tenan bakal! *
Ibakanan! Zu vä͑ynaḳ xavarečalxo, müdrik amdarxo saal määlimxoz yaq̇absa. Vä͑n šoṭoġoy bäziṭoġo xače loxol ṭä͑q̇ṭi besṗalnan, bäziṭoġo sinagogxoy boš tatarlayinšalnan, bäziṭoġo isä šähärexun šähäre šäṗeġalnan.
Metäre, vä͑n oćali ćoyel bari bütüm düzgün amdarxoy ṗiya görä ǯoġab tadalnan: düzgün bakala Aveli ṗiyaxun burqi xrami q̇a q̇urban ečala gane arane ef besṗi Berekyay ġar Zäkäriyäy ṗiyal ciriḳ. *
Hoo, vä͑x düzinäz nex: bütüm me äšurxo görä ǯazina zaṗḳalo me näsil bakale.
Ay Yerusalim, Yerusalim! Xavarečalxo besṗala saal kiya yaq̇abakiṭoġo źe͑layinšala šähär! Q̣urten iz c̣iriḳxo q̇änädxoy oq̇a girbalṭullariḳ Zuval sa hema käräm vi amdarxo Bez härrämine girbsun čurezci, vä͑n isä tenan čureci!
Mone, "ef ḳož väräne mande." *
Zu vä͑x nexzu:
