Sa ġi Isusi ṭo͑ġo͑l fariseyxo q̇a Yerusalimaxun bakala sa hema ḳanun zombalxone hari.
Šoṭoġon aṭunḳi ki, Isusi šagirdxoy bäziṭoġon murdar kulmoġon, yäni pakbaksuni ädätä ämälbinuṭtun śuma arsṭa.
Axəri fariseyxon ičan bütüm iudeyxollariḳ ičoġoy bavoġoxun mandi ädätä tam dägig ämälṭunbsay. Ičoġoy kulmoġo oc̣ḳi pakbinuṭ śuma arteṭuncoy,
bazarexun hariṭuxun oša kulmoġo oc̣ḳi pakbinuṭ hiḳḳal uteṭunkoy. Šoṭoġon hälä q̇eräzäl gele ädätxoṭun ämälbsay. Metär ki, šoṭoġon ičoġoy ädätä görä lap ǯamurxo, vedroġo, tunǯe leveṭxoval oc̣ḳi pakṭunbsay.
Fariseyxon q̇a ḳanun zombalxon Isusaxun xavarṭun haq̇i: "Heṭaynaḳ Vi šagirdxon bavoġoxun mandi ädätxo teṭun ämälbsa? Šumaṭun arsṭa, ama kulmoġo teṭun oc̣ḳi pakbsa".
Isusen šoṭoġo pine: "Isaya xavarečalen vä͑xlariḳ ṗä͑ćolaṭoġoynaḳ, he šaaṭe campe!
Ičoġoy Za bul ḳoc̣bsunal amc̣ine,
Vä͑n Buxaʒ́uġoy ämirä ṭo͑o͑xbi amdarxoy č̣evḳi ädätxonnan taysa".
Isusen saal šoṭoġo pine: "Ef č̣evḳi ädätxo ämälbseynaḳ Buxaʒ́uġoy ämirä ṭo͑o͑x bosṭuna hetäräl šaaṭ baǯarnanbsa!
Moiseyen ḳä pey? "Nana-bava hörmätba", "nana nääl bava tähḳirbala amdara besṗanan"! *
P̣oy vä͑n ḳänan bsa? Sunṭin č̣eri uḳayin ki, "bezi nana-bava tadala bakalṭu Buxaʒ́uġoz q̇urbanbsa",
vä͑n ṭe amdari iz ehṭiyäǯi boš bakala nana-bava nu kömäybsuna pis tenan be͑ġsa.
Metärluġen vä͑n vä͑xun č̣evḳi ädäten taysunen Buxaʒ́uġoy äyitä hiḳḳalnanbsa! Hälä moṭo ošq̇ar q̇eräzäl gele äšurxonan biq̇sa!"
Isusen ṗurumal ǯamaata Iz ṭo͑ġo͑l ḳalpi pine: "Bitoṭin Za u͑mu͑xlaxanan ki, q̇amišakanan.
Źomo taġala sal sa šeyen amdara murdar tene bon, ama amdara murdar balo źomoxun č̣eġaloroxe".
Isus ǯamaataxun ǯöybaki ḳoya eġaṭan, Iz šagirdxon me äyitmoġoy mäninä q̇andərišbsunaṭun Šoṭoxun xaišbi.
Isusen šoṭoġo ǯoġabe tadi: "Vä͑nal hälä tenan q̇amišaki? Bex tenan bafsṭa ki, amdari boš taġala sal sa šeyen amdara murdar bes tene bakon?
Šoṭaynaḳ ki, źomo taġala \ šeymux šoṭay üḳe tää, tapanene taysa, ṭiyal mantenesṭa". (Isusen me äyitmoġon bito ukunxoy tämiz baksunane aḳesṭi.)
Isusen Iz äyitä davamebi: "Amdara murdar balo isä amdaraxun č̣eġalone.
Šoṭaynaḳ ki, amdarxoy bošṭan, üḳexune pis fikirxo, äxlagsuzluġ, oġriluġ, bespsun,
q̇eräz čuġoy loxol be͑ġsun, tamaxkärluġ, šär bosṭun, bič̣luġ, pozġunluġ, paxəlluġ, Buxaʒ́uġoy äleyinä äyitpsun, loġaluġ saal haq̇əlsuzluġ č̣eġon.
Bütüm me pis äšurxo amdari bošṭane č̣eri šoṭo murdar bsa"
Isus ṭeṭiin č̣eri Sur oćalane taci. Šo ṭeṭiya sa ḳoyane mandi, Izi miya baksunal šuḳḳala avabakesṭun tene čuresay. Ama moṭo ṗurumal č̣aṗ efes tene baki.
Ṭetiya sa čuġo hari ṗaneṗi ki, Isus ičoġoy aranene. Šoval haṭe saad Isusi ṭo͑ġo͑l hari Šoṭay turinoq̇a bineti. Šoṭay xuyäräsṭa murdar urufe buy.
Šo ič isä Siriin Finiḳina nanaxun baki sa greḳ čuuxey. Šoṭin Isusa xoyinśebi ki, iz xuyäräxun murdar urufa č̣evḳane.
Isusen šoṭo pine: "Barta süfṭä äyloxq̇aṭun boši, šoṭaynaḳ ki, äyloġoy śuma exṭi xä͑yoġo bosṭun düz tene bakon".
Čuġon isä Šoṭo ǯoġabe tadi: "Ay Q̣onʒ́ux, axəri yan xä͑yoġonal äyloġoy sulfinaxun oq̇a bari ḳoṭorxoxunyan uksa".
Isusen čuġo pine: "Vi me äyitä görä arxayin taki! Vi xuyäräxun murdar uruf č̣ere".
Čuġon iz ḳoya hari aneḳi ki, iz xuyär gane boš basḳene, murdar urufal šoṭoxun č̣erene.
Isus ṗurumal Sur oćalaxun č̣ere, Sidonal č̣ovaki, Deḳaṗolisi täräfäxun Galileya göläne ṗaṗi.
Ṭiya Isusi ṭo͑ġo͑l kar hamal lal bakala sa amdara ečeri xoyinśṭunbi ki, Iz kula šoṭay loxolq̇an laxi.
Isusen ṭe amdara ṭo͑o͑x tašeri, Iz ḳäšämoġo me amdari u͑mu͑xxone laxi, oša Iz ḳäšinä ćupunaxṗi šoṭay muzane lafṭesṭi.
Šoṭin göynul be͑ġi afərənepi, ošal bä͑ġä͑loy sa mindäfä saki pine: "Effata!", yäni "qayey".
Me amdari haṭe saad ham u͑mu͑xxo, hamal muz qayeci, šoṭinal ac̣ar äyitpsane burqi.
Isusen moṭo aḳiṭoġo tapšurebi ki, me barada šuḳḳala hiḳḳal maq̇aṭun exlätpi. Ama heq̇ädär gele tapšurebsaysa, ṭeq̇ädär geleyal bayanṭunbsay.
Ǯamaat määṭṭäl mandeney, šoṭoġon nexṭuniy: "Me amdari bala äšlin toy butene! Šoṭay ṭo͑ġo͑l karurxonal inebaksa, lalurxonal äyitene!"
