Me äšurxoxun oša Isus šähärmoġo q̇a ayizmoġo tarapsane burqi. Šoṭin Buxaʒ́uġoy padčaġluġi barada karoozbsun Mu͑q Xavarane yäymišbsay. Šoṭoxun sagala Iz ṗac̣c̣e šagird q̇a
ičoġoxun murdar urufxo č̣eri saal q̇eräz azarxoxun \ q̇olaybaki sa hema čuuxe buy: ičuxun vu͑ġ murdar uruf č̣eri Magdallu Mariya,
Irodi ḳožin äšurxo be͑ġala Xuzay čuux Yoxanna, Susanna, q̇eräzäl gele čupux Isusaxunṭuniy. Me čupuġon Isusa q̇a Šoṭay šagirdxo ičoġoy kisinäxunṭun kömäybsay. *
; Mrḳ. 4:1-20)
; Mrk'. 4:1-20)
Isusi ṭo͑ġo͑l bütüm šähärmoġoxun amdarxone eysay. Sa ġi lap gele ǯamaat gireci vädine Isusen šoṭoġoynaḳ metär sa mäsäläne ečeri:
"Sa äkinči cil carṗsane č̣eysa. Carḳaṭan cilurxoy sa hemo yaq̇e ṭo͑ġo͑l biti turinoq̇a ćaxćuxesa, q̇ušurxonal šoṭoġo ṭuḳṭi uṭunksa.
Sa hemo źe͑luġane bisṭa, usumal göyünebaksa. Ama oćal mal baksuna görä xesuz mandi q̇arinebaksa.
Bäziyo cacluġane bisṭa, cacurxonal ciläxun sagala kalabaki šoṭoġo haq̇layinšebsa.
Ṭə͑yä͑minorox isä bäräkätlu oćalane bisṭa, kalabakiyal sabać q̇at avuzin bare tasṭa". Moṭo piṭuxun oša osṭaar pine: "U͑mu͑x bakalṭin ibakeq̇an!"
Izi šagirdxon isä Ičuxun xavarṭun haq̇i: "P̣oy me mäsälin määnä hiḳä?"
Šoṭin pine: "Buxaʒ́uġoy padčaġluġi sirurxo avabaksun vä͑xe tadece, ṭə͑yä͑miṭoġoynaḳ isä här šeya mäsäloġonez exlätpsa ki,
Me mäsälin määnä mone: cil - Buxaʒ́uġoy äyite.
Yaq̇e ṭo͑ġo͑l biti cilurxo - mo äyitä ibakalxone. Šoṭoġon äyitä iṭunbaksa, ama oša iblisen hari äyitä ičoġoy üḳexun exṭi tanešṭa ki, ve͑baki čarḳeces nubakaṭun.
Źeluġa biti cilurux - mo äyitä ibaki šoṭo mu͑qluġen q̇abulbaloroxe. Ama ičoġoy tum osṭaar tene, šoṭaynaḳal samal vädä ve͑ṭunbaksa, ama hari čätinluġa bafṭala ḳinäḳ qošṭunbaksa.
Cacluġa biti cilurux - mo äyitä ibaki, ama me dünyäni narahatčiluġxon (tängä q̇azayinšbsun, kef zapsun) ičoġo šaaṭ bar tasṭa nu barḳala amdarxone.
Bäräkätlu oćala biti cilurux isä äyitä ibaki, šoṭo ičoġoy üḳe boš düzgünluġen q̇a šaaṭluġen efi amdarxone. Šoṭoġon här šeya portṗi barṭun tasṭa.
Šuḳḳalen čiraġa bäč̣üḳṭi q̇aven buṭteneksa, nääl ki taxṭe oq̇a latenexsa. Ama čiraġi q̇ave loxole laxsa ki, baġalṭoġon aḳeq̇aṭun. *
Šoṭaynaḳ ki, ṭetär sa č̣äṗḳin äš teno ki, qavuna nu č̣eġane, ṭetär sa buṭ äšääl teno ki, iz ćo nu qayeġane. \ *
Moṭaynaḳal ef hetär u͑mu͑xlaxsuna fikir tadanan. Šoṭaynaḳ ki, ši bunesa šoṭo samalal gele tadeġale. Ama ši tenosa, izi baksuna zändbi šeyal iz kiyexun č̣eġale". *
; Mrḳ. 3:31-35)
; Mrk'. 3:31-35)
Sa ġi Isusi Nana q̇a vičimux Iz ṭo͑ġo͑lṭun hari, ama amdarxoy geleluġaxun Šoṭo ə͑śalayinšakes teṭun baki.
Isusa xavar tadi piṭun: "Vi Nana q̇a vičimux č̣öš čurpeṭun, Va aksunṭun čuresa".
Isusen šoṭoġo ǯoġabe tadi: "Bez Nana q̇a vičimux Buxaʒ́uġoy äyitä ibaki šoṭo bex ṗaṗesṗaloroxe".
; Mrḳ. 4:35-41)
; Mrk'. 4:35-41)
Sa ġi Isus Iz šagirdxoxun lodḳina laci šoṭoġo pine: "Ekinan göle ṭe täräf taġen". Šorox yaq̇aṭun bafṭi.
Šorox lodḳinen taġaṭan Isusa neṗen tanešeri, Šoval neṗaxeci. \ Birdän sa tufane e͑qeci. Lodḳa xenen buybaksane burqi, šoroxal xatalu väzyätäṭun bafṭi.
Šagirdxon Isusa ə͑śalayinšaki Šoṭo muġurbi piṭun: "Määlim, ay määlim, yan äfčiyan baksa!" Isusen hayzeri muša q̇a e͑qeġala xeyurxo q̇adaġanebi. Tufanal čurepi, šiṗluġe baki.
Me vädine Šoṭin Iz šagirdxo pine: "Ef ve͑baksun tene bu?" Šoṭoġon isä \ q̇ə͑ya bafṭi hamal määṭṭäl mandi sun-sunaxun xavarṭun haq̇say: "Me amdar hetär sa amdara ki, mušurxo q̇a xenal ämirebsa, šoroxal tabiṭun baksa?"
; Mrḳ. 5:1-20)
; Mrk'. 5:1-20)
Oša šorox Galileyin be͑ś bakala gadaraluġoy oćalaṭun hari.
Isus lodḳinaxun q̇ariluġa č̣eġaṭan šähärexun bakala sa išq̇are Šoṭoxun iräsṭhari. Me amdari boš murdar urufe bacey, šoṭin ene hema vaxṭe ki paltar tene laney hamal ḳoya tää, gärämzäluġxone yäšäyinšbsay.
Šoṭin Isusa aḳala ḳinäḳ haraypi Šoṭay be͑ś diz čökṭi osṭaar pine: "Zaxun ḳän čuresa, ay Ala Arciṭay Ġar? Va xoyinśezbsa, za äzyät ma tada!"
Šoṭin metär šoṭo göräne harayey ki, Isusen iz boš bakala murdar urufa č̣eysunane ämirbey. Murdar urufen gele vaxṭaxune me amdara äzyät tasṭay. Ṭetäre baksay ki, lap šoṭay kula-tura zinǯiren ġaćṭunney, ama šoṭin ṗurumal ṭe zinǯirxo ḳac̣ṗi ṭinesṭay, murdar urufenal šoṭo čölmoġone tašṭay.
Isusen šoṭoxun xavare haq̇i: "Vi c̣i hiḳä?" Šoṭin "Q̣ošun" pi ǯoġabe tadi, šoṭaynaḳ ki, iz boš murdar uruf geleney.
Šoṭoġon Isusaxun ičoġo bä͑ġä͑loyluġxo nu bosṭunaṭun xoyinśbsa burqi.
Ṭeṭiya - buruġoy bel kala sa bo͑q̇e sürüne otarišaksay. \ Murdar urufxon Isusa xoyinśṭunbi ki, ičoġo bo͑q̇u͑rxoy boš baysuna iǯaza tadane. Isusenal šoṭoġo iǯaza tanedi.
Murdar urufxo amdaraxun č̣eri bo͑q̇u͑rxoy bošṭun baci. Dirisṭ sürüyäl buruġoxun oq̇a - gölä bafṭi q̇ä͑q̇ä͑neci.
Bo͑q̇ otarišalxon moṭoġo aḳi ṭiṭeri me barada šähäre q̇a ayizmoġoṭun exlätṗi.
Ǯamaatal ḳä baksuna tamašabsane č̣eri. Šorox Isusi ṭo͑ġo͑l hari iz bošṭan murdar urufxo č̣eri amdara paltarla hamal iz haq̇əl iz bel Isusi turmoġosṭa arciṭun aḳi. Šoṭoġo q̇ə͑yene haq̇i.
Me äšurxo aḳiṭoġon isä iz boš murdar urufxo baci amdari hetär q̇olaybaksuna exlätṭunbi.
Ṭe vädä bütüm gadaraluġon Isusa ičoġoy oćalaxun č̣eri taysunaṭun xoyinśbsa burqi, šoṭaynaḳ ki, geleṭun q̇ə͑bey. Isusal lodḳina laci qoše qaybaki.
Iz bošṭan murdar urufxo č̣eri išq̇aren Isusi ṭo͑ġo͑l mansṭeynaḳ Šoṭo xoyinśebi.
Ama Isusen šoṭo metäre pi yaq̇a badi: "Qaybaka vi ḳoya, Buxaʒ́uġon vaynaḳ biṭoġoval bitova exlätṗa". Me amdarenal taci Isusi ičeynaḳ biṭoġo dirisṭ šähäre yäymišebi.
; Mrḳ. 5:21-43)
; Mrk'. 5:21-43)
Isus qoš qaybakaṭan gele amdare Šoṭay be͑ś č̣eri, šoṭaynaḳ ki, bitoṭin Šoṭay yaq̇ane be͑ġsay.
Me vädä sinagogi kalo bakala Yair c̣iyen sa išq̇ar hari Isusi turmoġo biti Šoṭo xoyinśebi ki, iz ḳoyaq̇an hari.
Ṭe amdari bakal nu bakal sa dänä ṗac̣c̣e yäšṭä xuyäre buy, šoval elmoġoy loxoley. Isus ṭiya taġaṭan Iz härrämine ṭema amdare buy ki, šoṭoġoy aranexun satärene č̣ovaksay.
Me amdarxoy boš ičusṭa ṗac̣c̣e usen ṗi taysuni azar bakala sa čuuxe buy. Šoṭin izi bakalṭu doxṭurxone xašlayinšey, ama šoṭoġoy sayǯäṭin iču q̇olaybes tene bakey.
Me čuux Isusi bać̣anexun hari Šoṭay paltari ätäyä lafedi, haṭe saadal iz ṗi taysun čurepi.
Isusen pine: "Šuvay Za lafṭiyo?" Ama šuḳḳalen iz ozane tene exṭi. Ṭe vädä P̣eṭeren pine: "Määlim, axəri Vi härrämine amdar gelene!"
Ama Isusen pine: "Tää, Za šunesa lafedi, šoṭaynaḳ ki, Zaxun zor č̣eysunaz hisṗi".
Ṭe vädä čuġon izi č̣aṗ nu mandes baksuna aḳaṭan ṭuṭupsun hari Isusi turnoq̇a bineti. Bütüm ǯamaati be͑ś izi heṭaynaḳ Šoṭo lafsṭuna saal haṭe saad hetär q̇olaybaksuna Isusa exlätebi.
Isusen šoṭo pine: "Bez xuyär, vi ve͑baksunen va čarḳesedi. Arxayin taki".
Isusen me äyitmoġo uḳaṭan sinagogi kalaṭay ḳoyaxun sa amdar hari pine: "Vi xuyär ṗurene, määlimä ene naraat maba".
Ama Isusen moṭo ibaki sinagogi kalaṭu pine: "Ma q̇ə͑ba, sayǯä ve͑baka, Vi xuyär \ yäšäyinšale".
Isus šoṭay ḳoya eġaṭan P̣eṭeraxun, Ioanaxun, Iaḳovaxun saal xuyäri bava-nanaxun bašq̇a šuḳḳala Ičuxun ḳoya baysa tene barti.
Bitoṭin xuyäreynaḳ o͑no͑pi šivanṭunbsay. Ama Isusen pine: "O͑no͑mapanan, ko ṗuritene, haṭetär baseḳe".
Šoṭoġon isä Isusi loxol axśumsaṭun burqi, šoṭaynaḳ ki, xuyäri bisuna avaṭuniy.
Isusen isä xuyäri kiyexun biq̇i pine: "Hayza, bez bala!"
Xuyäri uruf iz bädänäne qaybaki, šoval haṭe saad turele hayzeri. Oša Isusen pine ki, xuyärä ukunq̇aṭun tadi.
Xuyäri bava-nana mat mandeṭuniy. Ama Isusen šoṭoġo tapšurebi ki, me äšlin barada šuḳḳala maq̇aṭun exlätṗi.
