და ეტყოდა უფალი მოსეს და აჰრონს ქუეყანასა ეგჳპტისასა და ჰრქუა მათ:
ესე თუე არს თქუენდა დასაბამად თუეთა, პირველი არს ესე თქუენდა თუეთა შინა წელიწდისათა.
ეტყოდე შენ ყოველსა კრებულსა ძეთა ისრაჱლისათა და არქუ: ათსა ამის თჳსასა მოიბნ კაცად-კაცადმან ცხოვარი სახლად-სახლად ტომებისა მათისამან, თითოეულმან ცხოვარი სახლად-სახლად.
უკუეთუ მცირედ იყვნენ სახლსა შინა და ვერ უძლებდენ ცხოვარსა შეჭმად, თანა-შეირთენ მოძმჱ მოყუასი თჳსი რიცხჳსაებრ თავადისა, კაცად-კაცადმან აღირაცხენ, რავდენნი ეყვნენ ცხოვარსა მას.
Page of ms. O: 88r ცხოვარი სრული ვერძი წელიწდეული იყოს თქუენდა. კრავთაგან და თიკანთაგან მოიბათ.
და იყოს თქუენდა დამარხულ ვიდრე მეათხუთმეტედ დღედმდე თუესა ამას და დაკალნ იგი ყოველმან სიმრავლემან კრებულისა ძეთა ისრაჱლისათამან მიმწუხრი.
და მოიღოს სისხლისა მისისაგანი და სცხოს ორთავე წყირთლთა და ზღურბლსა კარისასა სახლსა შინა, რომელსა-იგი ჭამდენ მუნ.
და ჭამონ ჴორცი იგი მწუარი ცეცხლითა და უცომოჲ ველის ყრდელისა თანა ჭამედ.
არა შჭამოთ მისგანი უგბოლველი, არცა მგბარი წყლითა, არამედ მწუარი ცეცხლითა თავი ფერჴითურთ და ნაწლევით.
არა დაუტეოთ მისგანი განთიადმდე და ძუალი არა შეჰმუსროთ, და მისგანი რომელი დაშთეს განთიადმდე. ცეცხლითა დაწჳთ.
და ესრე ჭამდით მას: წელნი თქუენნი მორტყმულ იყვნენ და ჴამლნი თქუენნი ფერჴთა თქუენთა... და ჭამეთ იგი სწრაფით, რამეთუ ზატიკი არს უფლისაჲ.
და განვლო მე ქუეყანაჲ ეგჳპტისაჲ მას ღამესა და მოუვწყჳდო ყოველი პირმშოჲ ქუეყანასა ეგჳპტისასა კაცითგან მიპირუტყუამდე და ყოველთა ზედა ღმერთთა ეგჳპტისათა ვყო შურისგებაჲ მე უფალმან.
და სისხლი იგი იყოს თქუენდა საწამებელად: [სახლთა და] რომელსა იყვნეთ თქუენ, მუნ ვიხილო მე სისხლი იგი Page of ms. O: 88v და დაგიფარნე თქუენ და არა იყოს თქუენდა გუემაჲ იგი შესამუსრველი, რაჟამს დავსცე მე ქუეყანასა ეგჳპტისასა.
და იყოს თქუენდა დღჱ ესე საჴსენებელად და დღესასწაულობდით მას...
შჳდ დღე უცომოსა ჭამდით, ხოლო პირველით დღითგანვე განაქარვეთ ცომი სახლთა თქუენთა. ყოველმან რომელმან ჭამოს ცომი, მოისპოს სული იგი ისრაჱლისაგან პირველით დღითგან, ვიდრე მეშჳდედ დღედმდე.
და პირველსა მას დღესა ეწოდოს [წმიდა და დღჱ იგი მეშჳდჱ] წმიდა წოდებულ იყოს თქუენდა. ყოველი საქმჱ სამსახურებელი არა ჰქმნეთ მას დღესა შინა, გარნა რომელი იქმნების ყოვლისათჳს სულისა, ესე ხოლო ჰქმნეთ თქუენ.
და დაიმარხეთ მცნებაჲ ესე, რამეთუ ამას დღესა განვიყვანო ძალი თქუენი ქუეყანით ეგჳპტით და ჰყოფდით დღესა მას ნათესავთა შოვრის თქუენთა შჯულად საუკუნოდ.
დასაბამსა მეათოთხმეტესა დღესა თჳსა მის პირველისასა მწუხრითგან ჭამეთ უცომოჲ ვიდრე დღედმდე ოც და მეერთედ მის თჳსა ვიდრე მწუხრადმდე.
შჳდ დღე ცომი არა იპოვოს სახლთა თქუენთა. ყოველმან რომელმან ჭამოს ცომოვანი, აღიჴოცოს სული იგი კრებულისაგან ისრაჱლისა ქუეყანის მოქმედთაგან ვიდრე ქუეყანის მთავართამდე.
ყოველივე ცომოანი არა შჭამოთ, ყოველსავე სამკჳდრებელსა თქუენსა Page of ms. O: 89r შჭამდეთ უცომოსა.
მოუწოდა მოსე ყოველთა მათ მოხუცებულთა ძეთა ისრაჱლისათა და ჰრქუა მათ: წარვედით და მოიბთ თქუენ თავისა თქუენისა ცხოვარი ნათესავად-ნათესავადმან თქუენმან და დაკალთ ზატიკად.
და მოიღეთ კონაჲ უსუპი და დააწეთ სისხლსა მას და სცხეთ წინაშე კარსა და ზღურბლსა და ორკერძოვე წყირთლთა სისხლისა მისგან, რომელ-იგი არს კარისაჲ, ხოლო თქუენ არა გამოხჳდეთ კაცად-კაცადი კართა სახლისა თჳსისათა განთიადმდე
და გარდამოვიდეს უფალი მოწყუედად ეგჳპტელთა მათ და იხილოს სისხლი იგი ზღურბლთა მათ და წყირთლთა და თანა-წარჰჴდეს უფალი კარსა მას და არა უტეოს მომსრველი იგი შესლვად სახლსა მას თქუენსა მისრვად.
დაიმარხეთ სიტყუაჲ ესე შჯულად საუკუნოდ და შვილთა თქუენთა უკუნისადმდე
უკუეთუ შეხჳდეთ ქუეყანასა მას, რომელი მოგცა თქუენ უფალმან ღმერთმან, ვითარცა-იგი გეტყოდა თქუენ დამარხვად თქუენდა მსახურებაჲ ესე,
იყოს, რაჟამს გრქუან თქუენ შვილთა თქუენთა: რაჲ არს მსახურებაჲ ესე?
და ჰრქუათ მათ: მსხუერპლი არს ესე უფლისაჲ, რომელმან დაიფარნა სახლნი ძეთა ისრაჱლისათანი ეგჳპტეს შინა, რაჟამს მოსწყუედდა ეგჳპტესა, ხოლო სახლნი ჩუენნი იჴსნნა.
Page of ms. O: 89v მოდრკა ერი იგი და თაყუანისსცეს უფალსა და წარვიდეს და ყვეს ძეთა ისრაჱლისათა, ვითარცა ამცნო მათ მოსე და აჰრონ, ეგრეცა ყვეს.
და იყო შუვაღამეს ოდენ, და უფალმან მოწყჳდა ყოველი პირმშოჲ ქუეყანასა ეგჳპტისასა პირმშოჲთგან ფარაოჲსით, [რომელი ჯდა საყდართა ზედა] ვიდრე პირმშოდმდე ტყჳსა, რომელი ჯდა ჯურღმულსა შიდა და ვიდრე პირმშოდმდე ყოვლისა პირუტყჳსა.
აღდგა ფარაო ღამე და ყოველნი მსახურნი მისნი და ყოველნი ეგჳპტელნი და იყო ღაღადებაჲ დიდი ყოველსა ეგჳპტესა, რამეთუ არა იყო სახლი, რომელსამცა შინა არა იყო მკუდარი.
მოუწოდა ფარაო მოსეს და აჰრონს და ჰრქუა მათ ღამე: აღდეგით და განვედით ერისაგან ჩემისა თქუენ და ძენი ისრაჱლისანი და ჰმსახურეთ უფალსა ღმერთსა თქუენსა, ვითარცა-ეგე იტყჳთ.
ცხოვარი და ზროხაჲ თქუენი განასხთ და ვიდოდეთ, ვითარცა-ეგე სთქუთ, არამედ მაკურთხეთ მეცა.
აიძულებდეს მეეგჳპტელნი იგი ძეთა ისრაჱლისათა მწრაფლ განსლვად ქუეყანით ეგჳპტით, რამეთუ თქუეს, ვითარმედ: ჩუენ ყოველნი მოვწყდით.
აღიღო ერმან მან ცმელი იგი ვიდრე შესუარვადმდე თბისა მათისა, შეყოფილი სამოსლითა მათითა და აღიკიდეს ზურგსა მათსა.
ხოლო ძეთა ისრაჱლისათა ეგრე ყვეს, ვითარცა უბრძანა მათ მოსე. ითხოვეს ჭურჭერი ოქროჲსაჲ და ვეც/ხლისაჲ Page of ms. O: 90r და სამოსელი.
და უფალმან მოსცა მადლი ერსა თჳსსა წინაშე ეგჳპტელთა მათ და ათხოვეს მათ. და გამოტყუენნეს ეგჳპტელნი იგი.
წარმოვიდეს ძენი ისრაჱლისანი რამესით სოქოთად ექუს[ას] ათასი მამაკაცი მკჳრცხლი გარეშე ჭურჭლისა მათისა.
და მწირი გამოჰყვა მათ მრავალი, ცხოვარი და ზროხაჲ და კარაული ფრიად.
და შეიცვალეს ცმელოვანი იგი, რომელ გამოიღეს ეგჳპტით, ყურბეულად უცომოდ, რამეთუ ვერ შესუარეს, და გამოასხნეს იგინი ეგჳპტელთა მათ, რამეთუ ვერ უძლებდეს დათმენად, ვერცა-ღა საზრდელი იქმნეს საგზლად.
ხოლო მწირობაჲ ძეთა ისრაჱლისათაჲ, რავდენ მწირობდეს იგინი და მამანი მათნი ქუეყანასა ეგჳპტისასა და ქუეყანასა ქანაანისასა, ოთხ ას ოც და ათ წელ.
და იყო შემდგომად ოთხ ას ოც და ათისა წლისა. გამოვიდა ყოველი ერი უფლისაჲ ქუეყანით ეგჳპტით.
პირველი საჴუმილავი არს ესე გამოყვანებაჲ მათი ქუეყანით ეგჳპტით. იგი ღამე არს და ესე პირველი საცავი არს უფლისაჲ და ყოველთა შოვრის ძეთა ისრაჱლისათა იყოს ესე და ნათესავსა მათსა.
ეტყოდა უფალი მოსეს და აჰრონს და ჰრქუა: ესე შჯული იყავნ ზატიკისაჲ: ყოველმან უცხო თესლმან არა ჭამოს მისგანი.
და ყოველმან მონამან ვისმანვე და ვეცხლით სყიდულმან წინა/-დაიცჳთოს Page of ms. O: 90v და ეგრე ჭამოს მისგანი.
მწირმან და სასყიდლით დადბინებულმან არა ჭამოს მისგანი.
ერთსა სახლსა შინა შჭამდეთ, არა დაუტეოთ ჴორცისა მისგანი განთიადმდე და არა განიღო ჴორცისა მისგანი გარე, ძუალი არა შეჰმუსრო მისგანი.
ყოველმან კრებულმან ძეთა ისრაჱლისათამან ყოს ესე.
უკუეთუ ვინმე მწირი მოგიჴდეს თქუენ ყოფად ზატიკისა ამის უფლისა, წინა-დასცჳთო ყოველსავე წულსა მისსა და მაშინ-ღა მოვიდეს და იყოს იგი ვითარცა მკჳდრი ქუეყანისაჲ. ყოველმან წინა-დაუცუეთელმან არა ჭამოს მისგან.
შჯული ერთი იყოს მსოფლიოჲსაჲ და მწირისაჲ, რომელი მოსრულ იყოს თქუენ შოვრის.
და ყვეს ძეთა ისრაჱლისათა, ვითარცა უბრძანა და ამცნო უფალმან მოსეს და აჰრონს მათა მიმართ ეგრეცა ყვეს.
და იყო მას დღესა შინა გამოიყვანნა ძენი ისრაჱლისანი ეგჳპტით ძალითურთ მათით.
