რამეთუ თქუეს გულითა მათითა და განიზრახეს არამართლ: "მცირე არს და მწუხარჱ ცხოვრებაჲ ჩუენი, და არა არს კურნებაჲ ჩუენი აღსასრულსა კაცისასა, და არასადა ვინ იცის, რომელიმცა მოიქცა ჯოჯოხეთით.
რამეთუ თჳთ-ჴელმწიფედ შევიქმნენით და ამისა შემდგომად ვიქმნენით ვითარცა არაყოფილნი, რამეთუ კუამლ არს სული ცხჳრთა შინა ჩუენთა და სიტყუაჲ-ნაბერწყალ Page of ms. O: 273r ძრვასა გულისა ჩუენისასა
რომელი დაშრტეს, და ნაცარ იქმნეს ჴორცნი, და სული დაჰჴსნდეს და მოჰლპეს აერი.
და სახელი ჩუენი დაივიწყოს ჟამად-ჟამად, და არავინ მოიჴსენნეს საქმენი ჩუენნი*; და წარჴდეს ცხოვრებაჲ ჩუენი, ვითარცა კუალი ღრუბლისაჲ, და ვითარცა ნისლი განქარდეს, და წარ-რაჲ-იდევნის გამოტევებითა მზის-თუალისაჲთა, და სიცხისაგან მისისა დამძიმდის.
რამეთუ, ვითარცა აჩრდილი, წარმავალი არს ცხოვრებაჲ ჩუენი, და არა არს და კუალად-მოქცევაჲ აღსრულებასა ჩუენსა, რამეთუ დაებეჭდა და არავინ მოიქცეს.
მოვედით და ვიხაროთ ყოფილთა ამათგან კეთილთა, და ვამსახუროთ დაბადებული, ვითარცა სიჭაპუკესა.
ღჳნითა მრავალფერითა და ნელსაცხებლითა აღვივსნეთ, და ნუ თანა-წარგუვალნ ჩუენ ყუავილი ზაფხულისაჲ.
გჳრგჳნი დავიდგათ ვარდისა რტოთაჲ ვიდრე დაჭნობადმდე
და ნუმცა ვინ ჩუენგანი დაკლებულ არს ჩუენისა ამისგან სიხარულისა; ყოველსა ადგილსა დაუტეოთ განცხრომაჲ ესე სიხარულისა ჩუენისაჲ, რამეთუ ესე არს ჩუენდა ხუედრებული ნაწილი იგი.
ვჰმძლავრობდეთ გლახაკსა და მართალსა, არა ვერიდნეთ ქურივსა და არცა მოხუცებულისაგან შევიკდიმოთ, მჴცეთა მრავლისა ჟამისათა.
იყავნ ჩუენდა ძალი შჯულად სიმართლისა, რამეთუ უძლურებასა უჴმარად Page of ms. O: 273v ემხილების.
დავაპრკოლოთ მართალი იგი, რამეთუ განმაძნელებელ ჩუენდა არს და წინა-აღმიდგების საქმეთა ჩუენთა, და მაყუედრებს ჩუენ ცოდვათა შჯულისათა, და მიმომდებს ჩუენ ცოდვათათჳს სწავლისა ჩუენისათა.
აღიარებს, ვითარმედ ცნობაჲ აქუს ღმრთისაჲ, და ძედ ღმრთისადად თავსა თჳსსა იტყჳს.
და მექმნა ჩუენ მამხილებელ ზრახვათა გულისა ჩუენისათა.
მძიმე არს ჩუენდა ხილვაჲცა, რამეთუ არა მსგავს არს სხუათა ცხოვრებაჲ მისი, და ცვალებელ -- ალაგნი მისნი
საძაგელად შეურაცხიეთ მას, და განშოვრებულ არს გზათაგან ჩუენთა, ვითარცა არაწმიდათა, ჰნატრის აღსასრულსა მართალთასა, განლაღებულ არს და მამად ღმერთსა იტყჳს.
ვიხილოთ, უკუეთუ სიტყუანი მისნი არიან ჭეშმარიტ, და გამოვცადოთ, რაჲ-ძი იყოს უკუანაჲსკნელი მისი.
უკუეთუ არს მართალი იგი ძჱ ღმრთისაჲ, შეეწიენ მას, და იჴსენინ იგი ჴელთაგან წინააღმდგომთაჲსა.
გინებითა და ტანჯვითა განვიკითხოთ იგი, რაჲთა ვცნათ სახიერებაჲ მისი და გამოვცადოთ თავს-დებაჲ განბოროტებისა მისისაჲ.
სიკუდილითა სარცხჳნებითა დავსაჯოთ იგი, რამეთუ იყოს მოხედვაჲ მისი სიტყუთაგან მისთა."
ესე განიზრახეს და შესცთეს, რამეთუ დააბრმნა იგინი უკეთურებამან მათმან.
და ვერ ცნეს საიდუმლოჲ ღმრთისაჲ, არცა სასყიდელსა ესვიდეს სიწმიდისასა და არცა გამოიკითხეს Page of ms. O: 274r პატივი სულთა უბიწოთაჲ.
რამეთუ ღმერთმან დაჰბადა კაცი უხრწნელებისათჳს და ხატად თჳსა თჳსობისა შექმნა იგი.
და შურითა ეშმაკისაჲთა სიკუდილი სოფლად შემოჴდა, და განსცდიან მას, რომელნი არიან ნაწილისა მისისანი.
