Page of ms. P: 363v რომელთა გწყურის, წარვედით წყლად, და რომელთა არა გაქუს ვეცხლი, მივედით და იყიდეთ თჳნიერ ვეცხლისა და სასყიდლისა.
ღჳნოსა და ცმელსა რაჲსათჳს იყიდით ვეცხლითა და შრომაჲ ეგე თქუენი არა მაძღრივ არს? ისმინეთ ჩემი და ჭამეთ კეთილი და იშუებდენ კეთილსა შინა სულნი თქუენნი.
და აღგითქუა თქუენ აღთქუმაჲ საუკუნოჲ წმიდაჲ იგი დავითი სარწმუნოჲ.
აჰა, ესერა, საწამებელად წარმართთა Page of ms. P: 364r მივსცე იგი მთავრად და მბრძანებელად ნათესავთა.
აჰა, ესერა, ნათესავთა, რომელთა არა გიცოდიან, სახელით გხადოდიან ღმრთისა შენისათჳს წმიდისა ისრაჱლისა, რამეთუ გხადა შენ.
ეძიებდით ღმერთსა და რაჟამს ჰპოოთ იგი, ხადოდეთ მას და ოდეს მოგეახლოს,
დაუტევენინ უღმრთომან გზანი მისნი და კაცმან უსჯულომან ზრახვანი თჳსნი, და მოიქეცით უფლისა, და შეიწყალოს იგი ღმრთისა ჩუენისა მიმართ, და ფრიად მიგიტევნენ თქუენ ცოდვანი თქუენნი.
რამეთუ არა ეგრე არიან ზრახვანი ჩემნი, ვითარ-ეგე ზრახვანი თქუენნი, იტყჳს უფალი.
არამედ ვითარ განშორებულ არიან ცანი ქუეყანით, ეგრე განშორებულ არიან ზრახვანი ჩემნი ზრახვათაგან თქუენთა.
რამეთუ ვითარცა გარდამოჴდის წჳმაჲ გინა თოვლი და არა კუალად-იქცის მუნვე, ვიდრემდის განაძღის ქუეყანაჲ და გამოშვის და აღმოსცენდის, მოსცის თესლი მთესვარსა და პური საზრდელად,
ეგრჱთ იყვნენ სიტყუანი ჩემნი, რომელნი გამოვიდოდიან პირისაგან ჩემისა. არა კუალად მოიქცენ ჩემდავე ცარიელნი, ვიდრემდის აღასრულონ ყოველი, რომელი ვინებე, და წარმოვჰმართნე გზანი შენნი და ბრძანებანი ჩემნი.
რამეთუ სიხარულით განხჳდეთ და მხარულებით იქცეოდით. რამეთუ მთანი და ბორცუნი ხლდებოდიან და მოგეგებვოდიან თქუენ სიხარულით, და ყოველთა ხეთა ველისათა დაიტყუელნენ შტოებითა თჳსითა.
რამეთუ ძეძჳსა წილ აღმოგიცენო შენ საროჲ და ღჳიისა წილ მურტი. და იყოს უფალი სახელად და სასწაულად საუკუნოდ და არა მოაკლდეს.
