Page of ms. P: 201v და იყო სიტყუაჲ უფლისაჲ იონაჲსა მიმართ, ძისა ამათისა, და თქუა:
აღდეგ და წარვედ ნინევედ ქალაქად და ღაღადებდ მუნ, რამეთუ ამაღლდა ღაღადებაჲ უკეთურებისა მათისაჲ.
და აღდგა იონა სივლტოლად თარშით კერძო პირისაგან უფლისაჲსა და შთავიდა იოპედ და პოვა მუნ ნავი, რომელსა მიემართა, და მივიდოდა თარშით კერძო, და მისცა მან სასყიდელი ნავისაჲ და აღჴდა მას წარსლვად მათ თანა თარშით პირისაგან უფლისაჲსა.
და აღადგინა ღმერთმან ქარი სასტიკი ზღუასა მას შინა და ნავი იგი მიიწია შემუსრვად.
და ზარი განჰჴდა მენავეთა მათ შიშითა დიდითა და ხადად იწყო კაცად-კაცადმან ღმრთისა მიმართ თჳსისა და გარდაჰყრიდეს ჭურჭელსა მათსა ნავით ზღუად, რაჲთა აღამცირონ ნავი იგი. და იონა შთასრულ იყო უბესა მის ნავისასა, ეძინა და ხურინვიდა.
მივიდა მისა მენავეთმოძღუარი იგი, ჰრქუა: Page of ms. P: 202r რაჲ არ ეგე, რამეთუ სძე და ხურინავ? აღდეგ და ხადოდე უფალსა ღმერთსა შენსა, გინაცა განგუარინნეს ჩუენ და არა მოვწყდეთ.
მერმე იწყო კაცად-კაცადმან მოყუსისა მიმართ თჳსისა და თქუეს: მოვედით და წილს-ვიგდოთ და გულისხმა-ვყოთ, ვისთჳს-ძი არს ესე ყოველი ჩუენ ზედა. წილს-ითხინეს და წილი იგი აღმოჴდა იონას ზედა.
და ეტყოდეს მას: მითხარ ჩუენ, რაჲ არს ესე ძჳრი ჩუენ ზედა, რაჲ არიან საქმენი შენნი, ანუ ვინაჲ ხარ, ანუ რომლისა სოფლისაჲ ხარ შენ, ანუ რომლისა ერისაჲ?
და ჰრქუა მათ იონა: მონაჲ ვარი მე ღმრთისაჲ და უფალსა ღმერთსა ვჰმსახურებ, რომელმან შექმნა ცაჲ და ქუეყანაჲ, ზღუაჲ და ჴმელი.
და შეეშინა კაცთა მათ შიშითა დიდითა, რამეთუ გულისხმა-ყვეს, ვითარმედ პირისაგან ღმრთისა ლტოლვილ იყო, რამეთუ მან უთხრა მათ.
და ჰრქუეს მას: აწ რაჲ გიყოთ შენ, და დასცხრეს ზღუაჲ ესე ჩუენ ზედა? რამეთუ ზღუაჲ ესე უფროჲს აღიმრღურევის და ღელვანი ესე უფროჲს განრისხნებიან ჩუენ ზედა.
ჰრქუა მათ იონა: აღმიქჳთ და შთამაგდეთ მე ზღუასა მაგას. და დასცხრეს ზღუაჲ ესე თქუენ ზედა, რამეთუ ჩემ გამო იყო ყოველი ესე ჭირი თქუენ ზედა.
და მენავენი იგი აიძულებდეს ნავსა მას, რაჲთამცა უკუნ-აქციეს ჴმელადვე, და ვერ შეუძლეს, რამეთუ ზღუაჲ იგი უფროჲს აღიმრღუეოდა და განსასტიკნებოდა მათ ზედა.
იწყეს ღაღადებად უფლისა მიმართ და თქუეს: ნუსადა იყოფინ, უფალო, ნუ წარმწყმედ ჩუენ სულისათჳს ამის კაცისა და ნუ მოჰჴდი ჩუენ ზედა სისხლსა მართლისასა, რამეთუ შენ, უფალო, რაჲცა გინდა, ჰყავ.
და აღიქუეს იონა და შთააგდეს ზღუასა მას; Page of ms. P: 202v და დასცხრა მუნთქუესვე ზღუაჲ იგი ამრღუევისა მისგან.
და შეეშინა კაცთა მათ შიშითა დიდითა; იწყეს თაყუანისცემად და მსხუერპლისა შეწირვად ღმრთისა და აღთქუმად აღნათქუემთა.
