Page of ms. P: _ Page of ms. L: 537V მაშინ წარვიდეს ფარისეველნი იგი და ზრახვა-ყვეს მისთუის, რაჲთამცა მონადირეს იგი.
და მიუვლინნეს მოწაფენი მათნი ეროდიანელთა თანა და ჰრქუეს: მოძღუარ, ვიცით, რამეთუ ჭეშმარიტ ხარ და გზასა ღმრთისასა ჭეშმარიტად ასწავებ და არა ზრუნავ არავისთუის, რამეთუ არა თუალ-აღებ პირსა კაცისასა.
აწ მარქუ ჩუენ, რაჲ გნებავს შენ: ჯერ-არს ხარკისა მიცემად კეისარისა ანუ არა?
გულისხმა-ყო იესუ უკეთურებაჲ მათი და ჰრქუა: რაჲსა გამომცდით მე, ორგულნო?
მიჩუენით მე დრაჰკანი იგი Page of ms. L: 538R ხარკისაჲ. ხოლო მათ მოართვეს დრაჰკანი.
ჰრქუა მათ იესუ: ვისი არს ხატი ესე ანუ ზედაწერილი?
და ჰრქუეს მას: კეისრისაჲ. მაშინ ჰრქუა მათ: მიეცით ღმრთისაჲ ღმერთსა და კეისრისაჲ კეისარსა.
ხოლო მათ ვითარცა ესმა ესე, დაუკუირდა, დაუტევეს იგი და წარვიდეს.
Page of ms. L: _ Page of ms. P: 257R მას დღესა შინა მოუჴდეს სადუკეველნი და ეტყოდეს მას, ვითარმედ: არა არს აღდგომაჲ. ჰკითხვიდეს მას
და ჰრქუეს: მოძღუარ, მოსე ესრე თქუა: უკუეთუ ვინმე მოკუდეს და არა დაშთეს შვილი, შეირთოს ცოლი მისი ძმამან მისმან და აღუდგინოს მკჳდრი ძმასა მისსა.
იყვნეს ჩუენ შორის შჳდნი ძმანი. და პირველმან მან შეირთო ცოლი და მოკუდა, და არა ესუა შვილი, და დაუტევა ცოლი ძმასა თჳსსა.
ეგრევე მეორემან და მესამემან ვიდრე მეშჳდედმდე.
უკუანაჲსკნელ ყოველთასა მოკუდა დედაკაციცა იგი.
აწ უკუე აღდგომასა მკუდართასა რომლისა მათგანისა იყოს იგი ცოლად?
მიუგო იესუ და ჰრქუა მათ: ცთებით, რამეთუ არა იცით წიგნი, არცა ძალი ღმრთისაჲ,
რამეთუ დღესა მას აღდგომისასა არცა განჰქორწინებდენ, არცა იქორწინებოდიან, არამედ ვითარცა ანგელოზნი იყვნენ ცათა შინა.
ხოლო აღდგომისათჳს არა აღმოგიკითხავ[სა] თქუმული იგი ღმრთისა მიერ, ვითარ-იგი იტყჳს:
მე ვარ ღმერთი აბრამისი, ღმერთი ისაკისი და ღმერთი იაკობისი? არა არს ღმერთი მკუდართაჲ, არამედ ცხოველთაჲ.
Page of ms. P: 383V კრებულ რაჲ იყვნეს ფარისეველნი იგი, ჰკითხვიდა მათ იესუ
და ჰრქუა: ვითარ ჰგონებთ თქუენ ქრისტჱსთჳს, ვისი ძჱ არს? ხოლო მათ ჰრქუეს: დავითისი.
ჰრქუა მათ იესუ: ვითარ უკუე დავით უფლისა [ხადის] და იტყჳს:
ჰრქუა უფალმან უფალსა ჩემსა: დაჯედ მარჯუენით ჩემსა, ვიდრემდის დავხსნე მტერნი შენნი ქუეშე ფერჴთა შენთა?
ვინაჲთგან დავით უფლით ხადის, ვითარ ძჱ არს?
და ვერვინ იკადრა სიტყჳს-გებად მისა, არცაღა ჴელ-ვინ-იწიფა მიერითგან კითხვად მისა არღარაჲ.
