Isusen xrama bakala näziri q̇utin ṭo͑ġo͑l näzir laxala dövlätlü amdarxone be͑ġsay.
Šoṭin sa käsib süpür čuġoyal näziri q̇utina ṗä͑ leṗṭon * tängä laxsuna aneḳi.
Isusen pine: "Vä͑x düzinäz nex: me käsib süpür čuġon bitoṭuxun gele tängäne laxi.
Šoṭaynaḳ ki, bitoṭin ičoġoy bakala ganuxunṭun laxi, me čuġon isä iz käsib ganuxun, iz xašluġeynaḳ kiyel bakalṭune tadi".
; Mrḳ. 13:1-23)
; Mrk'. 13:1-23)
Ṭiya bakalṭoġon xrame q̇äšäng źe͑yurxoxun, Buxaʒ́uġoy c̣iyal laxeci payurxoxun exlätṗaṭan Isusen pine:
"Ṭetär ġimxo eġale ki, vä͑n memiya aḳalṭoġoxun hiḳḳal tene mandal. Źe͑ne loxol źe͑ tene mandal, bito oćalaxun barabar bakale".
Šoṭoxun xavarṭun haq̇i: "Määlim, me Vi piyorox hevaxṭ bakale? Me äšurxoy ə͑śalayinšaksuna mani möǯüzälü niśanxon aḳesṭale?"
Isusen pine: "Ehṭiyaṭlu bakanan, fereṭ ma bakanan! Šoṭaynaḳ ki, Bez c̣iyen gele amdaren hari "zu Šozu", "vaxṭ ə͑śalayinšakene" uḳale. Šoṭoġoy bać̣anexun ma bafṭanan.
Davoġoy q̇a amdarxoy e͑qesuni c̣iya \ ibakaṭan ma q̇ə͑banan. Šoṭaynaḳ ki, morox süfṭä bakalane. Ama mo hälä axər tene".
Oša šoṭoġo metäre pi: "Azuḳ azuḳi, padčaġluġ padčaġluġi loxol e͑qeġale.
Osṭaar oćal galpsunxo, här gala busaluġ, pis azarxo saal dähšätlü äšur bakale, göyenal yax möǯüzälü niśanxo aḳesṭale.
Ama bito me äšurxoxun be͑ś Za görä vä͑x biq̇alṭun, täqibbalṭun, zindanxo badalṭun. Vä͑x sinagogxo q̇a padčaġxoy saal kalaluġbalxoy be͑ś ǯoġab tasṭeynaḳ tašalṭun.
Morox vä͑ynaḳ Mu͑q Xavara yäymišbseynak sa fürsät bakale.
Vä͑nal saturbe͑ś ḳä ǯoġab tasṭuni barada ma fikirbanan.
Šoṭaynaḳ ki, Zu vä͑x ṭetär sa exlätpsuni yönä avabaksun q̇a haq̇əl tadoz ki, ef be͑ś č̣eġalṭoġoy sayǯäṭin nä ef sa äyitä ṗä͑ bes tene bakal, nääl ki šoṭay be͑ś čurpes tene bakal. *
Ṭetär bakale ki, vä͑x lap ef nanoġon, bavoġon, vičimoġon, q̇oomxon q̇a dosṭurxonal biq̇esṭalṭun, vä͑xun bäziṭoġo besṗesaldalṭun.
Za görä bitoṭin vä͑x nifrät balṭun. *
Ama ef belxun sa popal kam tene bakal.
Här šeya portbsunen ef elmoġo čarḳesṭalnan.
Q̣ošunxoy Yerusalimi biṗ ṭo͑ġä͑ haq̇layinšbsuna aḳaṭan avabakanan ki, šoṭay värän baksuni vaxṭ ə͑śalayinšakene.
Ṭe vädä Iudeyina bakalorox bito buruxmoġoq̇aṭun \ ṭiṭeri, barta šähäre bakalorox ṭeṭiin č̣ereq̇aṭun, šähärexun ṭo͑o͑x bakalorox isä ṭeṭiya maq̇aṭun baci.
Šoṭaynaḳ ki, me ġimxo häyif haq̇ala ġimxo bakale, bito cameciyorox bex ṗaṗale. *
Ṭe ġimxosṭa bə͑hi čupuġoy q̇a döš tadala čupuġoy vay hala! Šoṭaynaḳ ki, me ölkin bel kala bälä eġale, Buxaʒ́uġoy äǯuġal me azuḳi bel barale.
Šorox q̇ələnǯaxun biyalṭun, q̇eräz millätxonal šoṭoġo kiyel badi ičoġoy äsir balṭun. Hametäräl, Yerusalim q̇eräz millätxoy kiyel bakala vaxṭ čarḳamin, šähär šoṭoġoy turin oq̇a ćaxćuxeġale.
Göynul bakala be͑ġen, xašen, muć̣uliġon möǯüzälü niśanxo aḳesṭalṭun. Millätxo oćali ćoyel bakala dänizi gürultinaxun q̇ə͑ya bafṭalṭun, šoṭoġon koruġ aḳalṭun. *
Oćali loxol eġala bälinäxun amdarxon ičoġo aćesṗalṭun, šoṭaynaḳ ki, göynul bakala ṗlaneṭxo žə͑ḳeġale.
Ṭe vädä šoṭoġon Amdari Ġare asoyxoy loxol tamtaraġen q̇a Iz kala zoren eysuna aḳalṭun.
Me äšurxo bex ṗaṗsa burqaṭan tikbaki ef bula alabanan, šoṭaynaḳ ki, ef čarḳesun ene ə͑śane".
Oša Isusen šoṭoġoynaḳ sa \ mäsäläl enečeri: "Inǯilnä xoda q̇a mandi xodurxo be͑ġanan:
šoṭoġon xazal qayḳaṭan vä͑n moṭo aḳi avananbaksa ki, yäy ene ə͑śane.
Haketäräl vä͑n me šeymoġoy burqesuna aḳaṭan avabakanan ki, Buxaʒ́uġoy padčaġluġ ə͑śane.
Vä͑x düzinäz nex: hälä me näsil č̣ovaki taġamin morox bito bex ṗaṗale.
Göy q̇a oćal č̣ovaki taneġon, ama Bezi äyitmux sal sa vädä č̣ovaki tene taġon.
Be͑ġanan ki, ef fikir tarapsuni, u͑ġsuni saal hetär yäšäyinšbsuni loxol maq̇an baki, tene ṭe ġinen vä͑x bürdän biq̇ale, sal ef xavaral tene bakal!
Axəri ṭe ġi oćali ćoyel yäšäyinšala amdarxoy bitoṭaynaḳ eġale.
Vä͑nal ef bel eġala me bäloġoxun čarḳeci Amdari Ġare be͑ś ćomac̣i čurpes bakseynaḳ afərəpsunaxun čurmapanan".
Isusen här ġi xrama amdarxo zomebsay, üšena isä taci Zeytuni burux uḳala galane č̣ovakesṭay. *
Savaxṭan üšenen isä ǯamaat Isusa u͑mu͑xlaxseynaḳ Šoṭay ṭo͑ġo͑l, xramaṭun eysay.
