TITUS Texts: Biblia Udica, Versio Nizhensis: Novum Testamentum

TITUS
Biblia Udica, Versio Nizhensis: Novum Testamentum
Part No. 67

Chapter: 23

Isus Rimen täyinbi bašči P̣ilaṭi q̇a Galileyin kalo Irodi be͑ś
İsus Rimen təyinbi başçi P'ilat'i q'a Galileyin kalo İrodi běš

(Maṭ. 27:1-2

; 11-26; Mrḳ. 15:1-15

; Ioan. 18:28-19:16

)
(Mat'. 27:1-2

; 11-26; Mrk'. 15:1-15

; İoan. 18:28-19:16

)

Verse: 1

Ṭe vädä Kala Šurin üzviyox bito hayzeri Isusa P̣ilaṭi ṭo͑ġo͑lṭun tašeri.
T'e vədə Kala Şurin üzviyox bito hayzeri İsusa P'ilat'i t'ǒğǒlt'un taşeri.

Verse: 2

Šoṭo taxsərkär č̣evksun čureci piṭun: "Yan q̇ärarayan hari ki, me amdaren beš millätä yaq̇nuxune č̣evksa. Amdarxo imṗeraṭora nalog tasṭuna tene bare, iču isä Xrisṭos pi padčaġe hesabbsa".
Şot'o taxsırkər c'evksun çureśi pit'un: "Yan q'ərarayan hari ki, me amdaren beş millətə yaq'nuxune c'evksa. Amdarxo imp'erat'ora nalog tast'una tene bare, içu isə Xrist'os pi padçağe hesabbsa".

Verse: 3

P̣ilaṭen Šoṭoxun xavare haq̇i: "Hun iudeyxoy padčaġnu? Isusen ǯoġab tadi šoṭo pine: "Hunen metär nex".
P'ilat'en Şot'oxun xavare haq'i: "Hun iudeyxoy padçağnu? İsusen coğab tadi şot'o pine: "Hunen metər nex".

Verse: 4

P̣ilaṭen samǯi be͑yinśxo q̇a ǯamaata pine: "Zu me amdarasṭa sal sa taxsər atezaḳsa".
P'ilat'en samci běyinšxo q'a camaata pine: "Zu me amdarast'a sal sa taxsır atezak'sa".

Verse: 5

Ama šoṭoġon ičoġoy äyitin loxol čurpi piṭun: "Me amdaren Galileyinaxun burqi me oćalxol ciriḳ dirisṭ Iudeyina Iz zombsunen ǯamaata yaq̇nuxune č̣evksa".
Ama şot'oğon içoğoy əyitin loxol çurpi pit'un: "Me amdaren Galileyinaxun burqi me oç̌alxol śirik' dirist' İudeyina İz zombsunen camaata yaq'nuxune c'evksa".

Verse: 6

P̣ilaṭen Galileyin c̣iya ibaki xavare \ haq̇i: "Me amdar galileyalune ki?"
P'ilat'en Galileyin s'iya ibaki xavare \ haq'i: "Me amdar galileyalune ki?"

Verse: 7

Isusi Iroden kalaluġbala oćalaxun baksuna avabakiyal Šoṭo Irodi ṭo͑ġo͑le yaq̇abi. Šoṭaynaḳ ki, ṭe vädä Irodal Yerusalimaney.
İsusi İroden kalaluğbala oç̌alaxun baksuna avabakiyal Şot'o İrodi t'ǒğǒle yaq'abi. Şot'aynak' ki, t'e vədə İrodal Yerusalimaney.

Verse: 8

Iroden Isusa aḳi gele mu͑qebaki. Šoṭaynaḳ ki, Šoṭay barada ṭema ibakeney ki, Šoṭo gele vaxṭaxun aksune čuresay. Šoṭin Isusi ičeynaḳ sa möǯüzä aḳesṭunane čuresay.
İroden İsusa ak'i gele mǔqebaki. Şot'aynak' ki, Şot'ay barada t'ema ibakeney ki, Şot'o gele vaxt'axun aksune çuresay. Şot'in İsusi içeynak' sa möcüzə ak'est'unane çuresay.

Verse: 9

Iroden Šoṭo gele sualxone tadi, ama Isusen šoṭo sal sa ǯoġab tene tadi.
İroden Şot'o gele sualxone tadi, ama İsusen şot'o sal sa coğab tene tadi.

Verse: 10

Samǯi be͑yinśxon q̇a ḳanun zombalxon hayzeri gele äyitmux pi Šoṭo taxsərkärṭun č̣evksay.
Samci běyinšxon q'a k'anun zombalxon hayzeri gele əyitmux pi Şot'o taxsırkərt'un c'evksay.

Verse: 11

Iroden q̇a iz äsḳärxon isä Isusi loxol boššamin axśumpi laġa haq̇iṭuxun oša Šoṭo padčaġ ḳinäḳ lapesṭi qaydi P̣ilaṭi ṭo͑ġo͑lṭun yaq̇abi.
İroden q'a iz əsk'ərxon isə İsusi loxol boşşamin axšumpi lağa haq'it'uxun oşa Şot'o padçağ k'inək' lapest'i qaydi P'ilat'i t'ǒğǒlt'un yaq'abi.

Verse: 12

Süfṭä sunaxun düšmän bakala P̣ilaṭ q̇a Irodal ṭe ġinaxun oša dosṭṭun baki.
Süft'ə sunaxun düşmən bakala P'ilat' q'a İrodal t'e ğinaxun oşa dost't'un baki.

Verse: 13

Ṭe vädä P̣ilaṭen samǯi be͑yinśxo, kalaluġbalxo saal ǯamaata topbi
T'e vədə P'ilat'en samci běyinšxo, kalaluğbalxo saal camaata topbi

Verse: 14

šoṭoġo pine: "Vä͑n me amdara bez ṭo͑ġo͑l šoṭaynaḳnan ečere ki, koṭin amdarxo yaq̇nuxune č̣evksa. Mone, zu ef piin be͑ś me mäsälinä be͑ġi q̇äraraz hari ki, me amdarasṭa ef uḳala äšurxosṭa saal sa taxsər butene.
şot'oğo pine: "Və̌n me amdara bez t'ǒğǒl şot'aynak'nan eçere ki, kot'in amdarxo yaq'nuxune c'evksa. Mone, zu ef piin běš me məsəlinə běği q'əraraz hari ki, me amdarast'a ef uk'ala əşurxost'a saal sa taxsır butene.

Verse: 15

Irodenal sa taxsər tene aḳi, šoṭaynaḳal beš loxole qaydi. Isä vä͑nǯä ananksa ki, me amdaren bisuna layiġ bakala sal sa äš tene biq̇e.
İrodenal sa taxsır tene ak'i, şot'aynak'al beş loxole qaydi. İsə və̌ncə ananksa ki, me amdaren bisuna layiğ bakala sal sa əş tene biq'e.

Verse: 16

Šoṭaynaḳal koṭo sayǯä ṭapsuni ǯaza tadi tärboz".
Şot'aynak'al kot'o saycə t'apsuni caza tadi tərboz".

Verse: 17

Här usen P̣ilaṭen me axsibaya görä sa biq̇eciṭu tärebsay.
Hər usen P'ilat'en me axsibaya görə sa biq'eśit'u tərebsay.

Verse: 18

Ama ǯamaaten harayepi: "P̣ureq̇an, ṗureq̇an! Yaynaḳ Barabbina tärba!"
Ama camaaten harayepi: "P'ureq'an, p'ureq'an! Yaynak' Barabbina tərba!"

Verse: 19

Barabba isä šähäre amdarxo hökmätä q̇arši e͑qevksuna göräne zindana bosecey.
Barabba isə şəhəre amdarxo hökmətə q'arşi ěqevksuna görəne zindana boseśey.

Verse: 20

P̣ilaṭen Isusa tärbsuni täräf baki ṗurum amdarxoxun äyitepi.
P'ilat'en İsusa tərbsuni tərəf baki p'urum amdarxoxun əyitepi.

Verse: 21

Ama šoṭoġon "koṭo xače loxol ṭä͑q̇ṭa, xače loxol ṭä͑q̇ṭa!" uḳa harayṭunney.
Ama şot'oğon "kot'o xaçe loxol t'ə̌q't'a, xaçe loxol t'ə̌q't'a!" uk'a harayt'unney.

Verse: 22

P̣ilaṭen xibimǯi käräm xavare haq̇i: "Axəri me amdaren ḳä pisluġa be? Zu koṭo besṗesṭuna layiġ bakala sal sa taxsər tez aksa. Moṭo göräl Koṭo sayǯä ṭapsuni ǯaza tadi tärboz".
P'ilat'en xibimci kərəm xavare haq'i: "Axıri me amdaren k'ə pisluğa be? Zu kot'o besp'est'una layiğ bakala sal sa taxsır tez aksa. Mot'o görəl Kot'o saycə t'apsuni caza tadi tərboz".

Verse: 23

Ama šoṭoġon ṗurum ičoġoy äyiti loxol čurpi harayḳa Šoṭay xače loxol ṭä͑q̇tesunaṭun täläbbsay. Ǯamaaten uḳaloval baneki.
Ama şot'oğon p'urum içoğoy əyiti loxol çurpi harayk'a Şot'ay xaçe loxol t'ə̌q'tesunat'un tələbbsay. Camaaten uk'aloval baneki.

Verse: 24

P̣ilaṭen šoṭoġoy čureġalṭu bine:
P'ilat'en şot'oğoy çureğalt'u bine:

Verse: 25

šoṭin amdar bespsuna görä, amdarxo hökmätä q̇arši e͑qevksuna görä biq̇eci amdara tärebi. Isusa isä šoṭoġoy kiyele tadi.
şot'in amdar bespsuna görə, amdarxo hökmətə q'arşi ěqevksuna görə biq'eśi amdara tərebi. İsusa isə şot'oğoy kiyele tadi.

Isusi xače loxol ṭä͑q̇ṭesun
İsusi xaçe loxol t'ə̌q't'esun

(Maṭ. 27:32-44

; Mrḳ. 15:21-32

; Ioan. 19:17-25

)
(Mat'. 27:32-44

; Mrk'. 15:21-32

; İoan. 19:17-25

)

Verse: 26

Äsḳärxon Isusa ṭä͑q̇sṭa tašaṭan, hame vädine ayizexun eġala Simon c̣iyen ḳirenalu sa amdara biq̇i xača šoṭay bać̣ane laṭunxi. Šoṭin Isusi bać̣anexun taci xača tašalaney.
Əsk'ərxon İsusa t'ə̌q'st'a taşat'an, hame vədine ayizexun eğala Simon s'iyen k'irenalu sa amdara biq'i xaça şot'ay bač'ane lat'unxi. Şot'in İsusi bač'anexun taśi xaça taşalaney.

Verse: 27

Isusi bać̣anexun gele amdarxo, Šoṭaynaḳ o͑no͑pi neġ ciḳala čupuxe taysay.
İsusi bač'anexun gele amdarxo, Şot'aynak' ǒnǒpi neğ śik'ala çupuxe taysay.

Verse: 28

Isusen fərəpi šoṭoġo pine: "Ay Yerusalimi xuyärmux, Bez därden ma o͑no͑panan. Vä͑ynaḳ q̇a ef \ äyloġoynaḳ o͑no͑panan.
İsusen fırıpi şot'oğo pine: "Ay Yerusalimi xuyərmux, Bez dərden ma ǒnǒpanan. Və̌ynak' q'a ef \ əyloğoynak' ǒnǒpanan.

Verse: 29

Šoṭaynaḳ ki, ṭetär ġimxone eysa ki, "he bäxṭäväre songsuzxo, me dünyäne äyel nu ečeri q̇a döš nu tadi čupuxxo!" uḳalṭun.
Şot'aynak' ki, t'etər ğimxone eysa ki, "he bəxt'əvəre songsuzxo, me dünyəne əyel nu eçeri q'a döş nu tadi çupuxxo!" uk'alt'un.

Verse: 30

Me vädä "buruxmoġo <beš loxol bitanan!>, täpoġo <yax buṭḳanan!> uḳalṭun". ^*
Me vədə "buruxmoğo <beş loxol bitanan!>, təpoğo <yax but'k'anan!> uk'alt'un". ^*

Verse: 31

Šoṭaynaḳ ki, ägär göyün xode bel me äšurxo eṭunšṭasa, ṭe vädä q̇ari xoda ḳäṭun bon?" ^*
Şot'aynak' ki, əgər göyün xode bel me əşurxo et'unşt'asa, t'e vədə q'ari xoda k'ət'un bon?" ^*

Verse: 32

Isusaxun sagala ṗä͑ ǯinäyätkäräl bespsaṭun tašṭay.
İsusaxun sagala p'ə̌ cinəyətkərəl bespsat'un taşt'ay.

Verse: 33

Šorox "Källä" uḳala gala hari ṗaṭunṗi. Ṭiya Šoṭoval ṭe ṗä͑ ǯinäyätkäräl - sunṭu Iz yön, ṭe sunṭu isä Iz tärs täräf xače loxol ṭä͑q̇ṭundi.
Şorox "Kəllə" uk'ala gala hari p'at'unp'i. T'iya Şot'oval t'e p'ə̌ cinəyətkərəl - sunt'u İz yön, t'e sunt'u isə İz tərs tərəf xaçe loxol t'ə̌q't'undi.

Verse: 34

Isusen pine: "Ay Bava! Me amdarxo baġəšlayinša, šoṭaynaḳ ki, ičoġoy ḳä bsuna ičanal teṭun ava!" Äsḳärxon isä čöp bosi Isusi paltara ičoġoy arane ǯöyṭunbi. ^*
İsusen pine: "Ay Bava! Me amdarxo bağışlayinşa, şot'aynak' ki, içoğoy k'ə bsuna içanal tet'un ava!" Əsk'ərxon isə çöp bosi İsusi paltara içoğoy arane cöyt'unbi. ^*

Verse: 35

Ǯamaaten čurpi tamašanebsay. Ṭiya samǯi be͑yinśxon q̇a ḳanun zombalxonal Isusa laġa haq̇i nexṭuniy: "Moṭin q̇eräzṭoġone čarḳesṭay. Ägär Buxaʒ́uġon č̣äḳṗi Xrisṭosesa, ṭe vädä Ičuval čarḳesṭeq̇an!"
Camaaten çurpi tamaşanebsay. T'iya samci běyinšxon q'a k'anun zombalxonal İsusa lağa haq'i next'uniy: "Mot'in q'erəzt'oğone çark'est'ay. Əgər Buxačuğon c'ək'p'i Xrist'osesa, t'e vədə İçuval çark'est'eq'an!"

Verse: 36

Äsḳärxonal ə͑śalayinšaki Šoṭo laġaṭun haq̇say. Šoṭo fine oq̇oy tadi
Əsk'ərxonal ı̌šalayinşaki Şot'o lağat'un haq'say. Şot'o fine oq'oy tadi

Verse: 37

nexṭuniy: "Ägär hun iudeyxoy padčaġnusa, va \ čarḳesṭa!"
next'uniy: "Əgər hun iudeyxoy padçağnusa, va \ çark'est'a!"

Verse: 38

Šoṭay besṭa xače loxol "me amdar iudeyxoy padčaġe" came buy. ^*
Şot'ay best'a xaçe loxol "me amdar iudeyxoy padçağe" śame buy. ^*

Verse: 39

Xače loxol ṭä͑q̇ṭeci ǯinäyätkärxoy sunṭinal Šoṭo tähḳirbi pine: "P̣oy Xrisṭosnuy, ṭe vädä vaal, yaxal čarḳesṭa!"
Xaçe loxol t'ə̌q't'eśi cinəyətkərxoy sunt'inal Şot'o təhk'irbi pine: "P'oy Xrist'osnuy, t'e vədə vaal, yaxal çark'est'a!"

Verse: 40

Ṭə͑yämi ǯinayätkären isä šoṭo q̇adaġanbi pine: "Hun sal Buxaʒ́uġoxun q̇ə͑tenbsa? Axəri hunal xače loxolnu!
T'ı̌yəmi cinayətkəren isə şot'o q'adağanbi pine: "Hun sal Buxačuğoxun q'ı̌tenbsa? Axıri hunal xaçe loxolnu!

Verse: 41

Yan beš ämälxo göräyan ǯazina zaṗe, me Amdari isä sal sa taxsər butene".
Yan beş əməlxo görəyan cazina zap'e, me Amdari isə sal sa taxsır butene".

Verse: 42

Oša Isusane pi: "Ay Isus, Vi padčaġluġa padčaġ ḳinäḳ eġaṭan za eyex bada!"
Oşa İsusane pi: "Ay İsus, Vi padçağluğa padçağ k'inək' eğat'an za eyex bada!"

Verse: 43

Isusen šoṭo pine: "Va düzinäz nex, ġe hun Zaxun sagala ǯännäte bakalnu".
İsusen şot'o pine: "Va düzinəz nex, ğe hun Zaxun sagala cənnəte bakalnu".

Isusi bisun
İsusi bisun

(Maṭ. 27:45-56

; Mrḳ. 15:33-41

; Ioan. 19:25-30

)
(Mat'. 27:45-56

; Mrk'. 15:33-41

; İoan. 19:25-30

)

Verse: 44

U͑qu͑mǯi saadey, ^* ama dirisṭ oćali ćoyel vuyumǯi saadal ciriḳ ^* bayinq̇luġe baki.
Ǔqǔmci saadey, ^* ama dirist' oç̌ali ç̌oyel vuyumci saadal śirik' ^* bayinq'luğe baki.

Verse: 45

Be͑ġen iz išiġa sateneḳsay, xrame pärdääl bə͑yexun ǯöyebaki. ^*
Běğen iz işiğa satenek'say, xrame pərdəəl bı̌yexun cöyebaki. ^*

Verse: 46

Isusen osṭaar "ay Bava! Bez Urufa Vaz tapšurbsa" ^* pi elmuxe tadi. Šo pure.
İsusen ost'aar "ay Bava! Bez Urufa Vaz tapşurbsa" ^* pi elmuxe tadi. Şo pure.

Verse: 47

Me äšurxo aḳi q̇ošuni baćtani kalaṭin "hägigiyal, me Amdar düzgün amdarey" pi Buxaʒ́uġo alxəšebi.
Me əşurxo ak'i q'oşuni baç̌tani kalat'in "həgigiyal, me Amdar düzgün amdarey" pi Buxačuğo alxışebi.

Verse: 48

Tamašabseynaḳ ṭiya gireci amdarxonal bütüm me äšurxo aḳi ičoġoy bel ṭaṗsun qošṭun qaybaki.
Tamaşabseynak' t'iya gireśi amdarxonal bütüm me əşurxo ak'i içoğoy bel t'ap'sun qoşt'un qaybaki.

Verse: 49

Isusa čalxalṭoġon isä Galileyinaxun Iz bać̣anexun hari čupuxxoxun sagala bütüm me baki äšurxo ṭo͑o͑xun čurpi be͑ṭunġsay. ^*
İsusa çalxalt'oğon isə Galileyinaxun İz bač'anexun hari çupuxxoxun sagala bütüm me baki əşurxo t'ǒǒxun çurpi bět'unğsay. ^*

Isusa oćalaxbsun
İsusa oç̌alaxbsun

(Maṭ. 27:57-61

; Mrḳ. 15:42-47

; Ioan. 19:38-42

)
(Mat'. 27:57-61

; Mrk'. 15:42-47

; İoan. 19:38-42

)

Verse: 50-51

Ṭiya Iosif c̣iyen sa amdare buy. Šo Kala Šurin üzviney, ama šoṭay č̣evḳi q̇äraraxun iräzi teney, šoṭaynaḳ ki, düzgün, xeyirxax hamal Buxaʒ́uġoy padčaġluġi eysuna yaq̇be͑ġala sa amdarey. Šo Iudeyin Arimaṭeya šähärexuney.
T'iya İosif s'iyen sa amdare buy. Şo Kala Şurin üzviney, ama şot'ay c'evk'i q'əraraxun irəzi teney, şot'aynak' ki, düzgün, xeyirxax hamal Buxačuğoy padçağluği eysuna yaq'běğala sa amdarey. Şo İudeyin Arimat'eya şəhərexuney.

Verse: 52

Šoṭin P̣ilaṭi ṭo͑ġo͑l taci Isusi meyidäne čureci.
Şot'in P'ilat'i t'ǒğǒl taśi İsusi meyidəne çureśi.

Verse: 53

Meyidä xače loxolxun civḳi parčina bäč̣ürepi. Oša q̇ayane kaśeci, hälä memačaġ šuḳḳal nu oćalaxeci sa maġarina lanexi.
Meyidə xaçe loxolxun śivk'i parçina bəc'ürepi. Oşa q'ayane kašeśi, hələ memaçağ şuk'k'al nu oç̌alaxeśi sa mağarina lanexi.

Verse: 54

Ṭe ġi Häzirluġ be͑ġala ġiney, ^* Šamaṭ ġiyal ə͑śalayinšebaksay.
T'e ği Həzirluğ běğala ğiney, ^* Şamat' ğiyal ı̌šalayinşebaksay.

Verse: 55

Isusaxun sagala Galileyinaxun hari čupuxal Iosifi bać̣anexun taci maġarina q̇a Šoṭay meyidä ṭiya hetär laxsuna aṭunḳi.
İsusaxun sagala Galileyinaxun hari çupuxal İosifi bač'anexun taśi mağarina q'a Şot'ay meyidə t'iya hetər laxsuna at'unk'i.

Verse: 56

Šoṭoġon ḳoya taci šaaṭ adeġala oyurxoxun \ toyexlu č̣äyinxoṭun häzirbi. Šamaṭ ġine isä Buxaʒ́uġon bürüši ḳinäḳ hiḳḳal äšteṭunbi. ^*
Şot'oğon k'oya taśi şaat' adeğala oyurxoxun \ toyexlu c'əyinxot'un həzirbi. Şamat' ğine isə Buxačuğon bürüşi k'inək' hik'k'al əştet'unbi. ^*

This text is part of the TITUS edition of Biblia Udica, Versio Nizhensis: Novum Testamentum.

Copyright TITUS Project, Frankfurt a/M, 18.11.2023. No parts of this document may be republished in any form without prior permission by the copyright holder.