Page of ms. L: _ Page of ms. P: 214V პეტრე, მოციქული იესუ ქრისტჱსი, რჩეულთა მწირთა, განთესულთა პონტოჲსა და გალატიაჲსა და ბითჳნიაჲსათა,
წინაჲსწარ ცნობითა ღმრთისა მამისაჲთა და სიწმიდითა სულისაჲთა დასამორჩილებელად და დასაპკურებელად სისხლითა იესუ ქრისტჱსითა, მადლი თქუენდა და მშჳდობაჲ განმრავლდინ.
კურთხეულ არს ღმერთი და მამაჲ უფლისა ჩუენისა იესუ ქრისტჱსი, რომელმან-იგი მრავლითა მით წყალობითა თჳსითა კუალად გუშვნა ჩუენ სასოებად ცხორებისა აღდგომითა იესუ ქრისტჱსითა მკუდრეთით,
სამკჳდრებელად უხრწნელად და შეუგინებელად. დაუჭნობელად დამარხული ცათა შინა თქუენდა მიმართ,
რომელნი-ეგე ძალითა ღმრთისაჲთა მოცვულ ხართ სარწმუნოებითა ცხორებასა მას განმზადებულსა გამოჩინებად ჟამსა მარჯუესა,
რომლითა გიხარის მცირედ, აწ უკუეთუ ჯერ-არს, რომელნი-ეგე შეწუხებულ იყვენით მრავალ-ფერთა ზედა განსაცდელთა,
რაჲთა გამოცდილებაჲ ეგე სარწმუნოებისა თქუენისაჲ უპატიოსნჱს ოქროჲსა მის წარწყმედადისა და ვეცხლისა გამოცდილისა იპოოს საქებელად. დიდებად და პატივად გამოჩინებასა იესუ ქრისტჱსსა,
რომელი-იგი არა იცოდეთ და გიყუარს, რომელსა-იგი აწ არა ხედავთ და გრწამს. Page of ms. P: _ Page of ms. K: 254V იხარებდით სიხარულითა გამოუთქუმელითა და დიდებითა.
და მოიღოთ აღსასრულსა მას სარწმუნოებისა თქუენისასა ცხორებაჲ სულთაჲ.
რომლისა ცხორებისათჳს გამოიძიეს და გამოიკულიეს წინაწარმეტყუელთა, რომელნი თქუენდამი მადლსა მას წინაწარმეტყუელებდეს,
[გამოეძიებდეს] ოდეს ანუ რომელსა ჟამსა ეუწყებოდა მათ შორის სული იგი ქრისტჱსი, წინაჲსწარ წამებდეს ქრისტჱსთა მათ ვნებათა Page of ms. K: 255R და მისა შემდგომად [დიდებათა].
რომელი-იგი გამოეცხადა, [რამეთუ არა] თავსა თჳსსა, არამედ თქუენ გმსახურებდეს მას, რომელცა აწ [მიგეთ]ხრა თქუენ მახარებელთა მ[ათ თქუენთ]ა მიერ სულითა წმიდითა მოვლინებული ზეცით, [რომლის]ათჳს გული უთქუამს ანგელოზთა ხილვად.
Page of ms. K: _ Page of ms. P: 220R ამისთჳს მოირტყენით წელნი გონებისა თქუენისანი, ფრთხილ იყვენით და სრულიად Page of ms. P: 220V ესევდით მოწევნულსა მას მათსა მადლსა გამოცხადებასა იესუ ქრისტჱსსა.
ვითარცა შვილნი მორჩილებისანი. და ნუ თანა-ხატ ექმნებით პირველთავე უმეცრებისა თქუენისა გულის-თქუმათა,
არამედ მოწოდებისა მისებრ თქუენის[ა] წმიდისა თქუენცა წმიდა იყვენით ყოველსავე შინა სლვასა თქუენსა.
რამეთუ წერილ არს: წმიდა იყვენით, რამეთუ მე წმიდა ვარ. {2}
და უკუეთუ მამით ხადით მას, რომელი-იგი თუალ-უხუავად მსაჯულ არს თითოეულისა საქმისათჳს, შიშით მწირობის მაგის თქუენისა ჟამნი აღასრულენით.
უწყოდეთ, რამეთუ არა განხრწნადითა ვეცხლითა გინა ოქროჲთა იჴსნნეთ თქუენ ამაოჲსა მის მამათა მოცემულისა სლვისა.
არამედ პატიოსნითა სისხლითა, ვითარცა ტარიგისა უმანკოჲსა და უბიწოჲსა ქრისტჱსისა,
რომელი წინაჲსწარ უწყებულ იყო უწინარჱს სოფლის დაბადებისა და გამოჩნდა უკუანაჲსკნელთა დღეთა თქუენთჳს,
რომელნი-ეგე მორწმუნენი ხართ ღმრთისანი, რომელმანიგი აღადგინა მკუდრეთით და მისცა მას დიდებაჲ, რაჲთა თქუენი ეგე სარწმუნოებაჲ იყოს ღმრთისა თანა.
სულნი თქუენნი განიწმიდენით მორჩილებითა, ჭეშმარიტებითა, ძმათ მოყუარებისათჳს შეუორგულებელ იყვენით გულითა, ურთიერთას იყუარებოდეთ განმარტებულად,
რამეთუ მეორედ შობილ ხართ არა თესლისაგან განხრწნადისა, არამედ უხრწნელითა სიტყჳთა ღმრთისაჲთა და საუკუნოჲთა.
რამეთუ ყოველი ჴორციელი თივაჲ არს და ყოველი დიდებაჲ მისი, ვითარცა ყუავილი თივისაჲ: განჴმა თივაჲ იგი და ყუავილი მისი დასცჳვა.
ხოლო სიტყუაჲ უფლისაჲ ჰგიეს უკუნისამდე.
