Ehṭiyätlü bakanan, vä͑n düzgün äš biq̇aṭan moṭo amdarxoy be͑ś vä͑x aḳesṭeynaḳ mabanan. Tene göynul bakala ef Bavaxun mükäfät tenan haq̇al. *
Šoṭaynaḳal sadaġa tadaṭan zərna farpi koṭo bayan maba. Šoṭaynaḳ ki, amdarxon ičoġo tärifläyinšeq̇aṭunpi ṗä͑ćolaṭoġon sinagogurxo saal \ küčämoġo metärṭunbsa. Vä͑x düzinäz nex: šoṭoġon ičoġoy mükäfätä tam haq̇eṭun.
Ama hun sadaġa tadaṭan vi tärs kiin yön kule ḳäbsuna maq̇an avabaki.
Metär ki, vi tadi sadaġa č̣äṗḳinq̇an mandi. Ṭe vädä č̣äṗḳin bakala äšurxoval aḳala vi Bavan vi mükäfätä tadale
Afərəḳaṭanal ṗä͑ćolaṭoġollariḳ ma bakanan. Šoṭaynaḳ ki, metärṭoġonal amdarxon ičoġo aḳeq̇aṭunpi, sinagogurxo q̇a küčin dönboġo čurpi afərəpsuna čurṭunsa. Vä͑x düzinäz nex: šoṭoġon ičoġoy mükäfätä tam haq̇eṭun. *
Ama hun afərəḳaṭan vi otaġa baki, ćomo buṭḳi vaxun sagala bakala vi Bava afərəpa. Č̣äṗḳin bakala här šeyal aḳala vi Bavan va mükäfätläyinšale.
Afərəḳaṭan Buxaʒ́uġo nu čalxalṭoġollariḳ yänšäġluġ mabanan. Šoṭaynaḳ ki, šoṭoġonal fikirṭunbsa ki, gele äyit upsunen ičoġo ibakalṭun.
Vä͑n šoṭoġo ma ošq̇ardanan! Šoṭaynaḳ ki, ef Bavan ef heṭu ehṭiyäǯ baksuna vä͑n Šoṭoxun čureġalṭuxun be͑ś avane.
Vä͑n isä metär afərəpanan:
Vi padčaġluġq̇an hari,
Beš ġiluġ śuma yax ġe tada.
Yax borǯlu bakalṭoġo yan baġəšlayinšala ḳinäḳ
Yax sinäyinš maba,
Ägär q̇eräz amdarxoy taxsəra baġəšlayinšaynan, ef Göynul bakala Bavanal vä͑x baġəšlayinšale.
Ama vä͑n q̇eräz amdarxo nu baġəšlayinšaynan, ef Bavanal ef taxsərxo tene baġəšlayinšal. * \ Ġuruġa hetär efsun
Vä͑n ġurux efala vädine ṗä͑ćolaṭoġollariḳ q̇ašq̇abaġlu ma tarapanan. Šoṭoġon ičoġoy ġurux efsuna amdarxo aḳesṭeynaḳṭun q̇ašq̇abaġlu tarane. Vä͑x düzinäz nex: šoṭoġon ičoġoy mükäfätxo tam haq̇eṭun.
Ama hun ġurux efaṭan vi bula oxḳa, vi ćoyal oc̣ḳa ki,
amdaxron tää, č̣äṗḳin bakala här šeya aḳala vi Bavan avabakane ki, hun ġuruxen efsa. Ṭe vädä č̣äṗḳin bakala här šeya aḳala vi Bavan va mükäfätläyinšale.
Oćali ćoyel vä͑ynaḳ xäzinox ma girbanan. Memiya muġmuġen saal parsen šoṭoġo äfčinebo nääl ki, oġriġon baci bašṭunq̇o. *
Ama vä͑n göynul vä͑ynaḳ xäzinox girbanan. Ṭeṭiya nä muġmuġen, nä parsen šoṭoġo tene äfčibo, nääl oġriġon baci teṭun bašq̇o.
Šoṭaynaḳ ki, vi xäzinä mayanesa, vi üḳäl ṭeṭiya bakale.
Pulmux - bädäni čiraġe. Ägär vi pul saġlam bakayin, vi bütüm bädänäl išiġlu bakale.
Ama vi piin zäyif aḳayn, vi bütüm bädän zäyif bakale. Ägär vasṭa bakala "išiġ" bayinq̇esa, zülmät heq̇ädär kalane! \ Vaynaḳ Buxaʒ́uġon Ičin q̇onʒ́uxluġbale
Šuḳḳalen ṗä͑ aġa q̇ulluġbes bateneko. Šoṭaynaḳ ki, nä sunṭu nifrätbi ṭe sunṭu čureġale, nääl sunṭu ġać mandi ṭe sunṭu pis piin be͑ġale. Vä͑n ham Buxaʒ́uġo ham var-dövlätä q̇ulluġbes batenanko.
Moṭaynaḳal vä͑x nexzu: "Ḳä ukalyan?" nääl ki "Ḳä u͑ġä͑lyan?" pi, ef elmoġoy, "Ḳä laḳalyan?" pi, ef bädäni fikirä ma zapanan. Elmux uksunaxun, bädän isä lapsunaxun vaǯib tene ki?
Göynul purḳala q̇ušurxo be͑ġanan: šoṭoġon nä biteṭunsṭa, nä exteṭunbsa, nääl taxəla ambarxo teṭun baye, ama göynul bakala ef Bavan šoṭoġo ukesesṭa. Vä͑n šoṭoġoxun gele toyexlu tenan ki?
Ef maṭin fikir zapsunen iz ömürä samalǯääl bakayin boxoybesa bakon?
P̣oy heṭaynaḳ lapsuni fikiränän zaṗe? Be͑ġanan čöle vardurxo hetärṭun kalabaksa: šoṭoġon nä zähmät teṭun zaṗe, nä ä͑lteṭunsṭa.
Ama vä͑x moṭoz nex ki, bütüm iz tamtaraġi boš bakala Solomonenal, moṭoġoy sayǯäṭullariḳ latenepey. *
Ay ve͑luġ mal bakalxo, ġe baki, äyč̣ä aruġo boseġala čöle oya Buxaʒ́uġon metär lapesesṭasa, vä͑x tene lapesṭon ki?
Metärluġen, "Ḳä ukalyan?", "Ḳä u͑ġä͑lyan?" nääl ki "Ḳä laḳalyan?" pi, fikir ma zapanan.
Morox - Buxaʒ́uġo nu čalxayṭoġoy än kala fikire. Ama Göynul bakala ef Bavan moṭoġo bitova ef ehṭiyäǯ baksuna avane.
Vä͑n süfṭä Buxaʒ́uġoy padčaġluġa saal Šoṭay düzgünluġa qä͑vekinan, mandi här šey isä vä͑x avuzin tadeġale.
Metärluġen, äyč̣in ġine fikirä ma zapanan. Äyč̣in ġinen ičin iz fikirä \ zaṗḳale. Här ġiin iz yamanluġ bäsebaksa!
