Isusen ǯamaata aḳi buruġo laci areci. Iz šagirdxo Iz ṭo͑ġo͑lṭun hari.
Isusen zombsane burqi. Šoṭin pine:
"He bäxṭävärṭun Buxaʒ́uġo ehṭiyäǯ bakalorox! *
He bäxṭävärṭun yaslu bakalorox!
He bäxṭävärṭun portbalorox!
He bäxṭävärṭun düzgünluġeynaḳ bakalorox! *
He bäxṭävärṭun üḳ boḳosṗalorox!
He bäxṭävärṭun üḳ tämiz bakalorox!
He bäxṭävärṭun serluġ yaratmišalxo!
He bäxṭävärṭun düzgünluġa görä tägib bakalxo!
Amdarxon Za görä vä͑x tähḳirbi šäṗeġaṭan, äfči exlätṗi ef loxol här ǯürä böhṭan bosaṭan vä͑n bäxṭävärnan! *
Mu͑qbaki mu͑qluġbanan! Šoṭaynaḳ ki, göynul ef mükäfät kalane. Axər vä͑xun be͑ś hari xavarečalxoval metär šäṗeceṭun. *
Vä͑n me dünyäneynaḳ elnan. Ama elen iz tada aćesṗayin, heṭina elaxbakon? Ene č̣öš boseci, amdarxoy täräfäxun ćaxćuxesunaxun q̇eräz hiḳḳala yarayinš tenebo. *
Vä͑n me dünyäneynaḳ išiġnan. Buruġoy bel bakala šähär č̣äṗḳin mandes tene bakon. *
Hametäräl, šuḳḳalen čiraġa bäč̣üḳṭi q̇ave oq̇a tene laxon. Ama čiraġi q̇ave loxole laxon ki, ḳožinṭoġo bitova išiġq̇an tadi. *
Haketäräl ef išiġen amdarxoy be͑ś ṭetärq̇an c̣aldi ki, šoṭoġon ef xeyir tadala äšurxo aḳi göynul bakala ef Bavay c̣iya alaq̇aṭunbi. * \ Ḳanuna bex ṗaṗespsun
Ma hesabbanan ki, Zu ḳanuni q̇a Xavarečalxoy äyitä läġbseynaḳez hare. Zu šoṭoġo läġbseynaḳ tää, bex ṗaṗespseynaḳez hare.
Vä͑x düzinäz nex: göye q̇a oćali axəral ciriḳ, här šey bex ṗaṗala vädinäl ciriḳ ḳanunaxun än mic̣iḳ sa ṭar nääl ki sa ġic̣ äfči tene bakal. *
Metärluġen, me ämirxoxun än mic̣iḳṭuval šiin pozmišayin, moṭo ṭə͑yä͑miṭoġoval zombayin, Göye padčaġluġa än mic̣iḳo ḳaleġale. Ama \ šiin me ämirxo bex ṗaṗesṗayin, ṭə͑yä͑miṭoġoval zombayin, Göye padčaġluġa kalo ḳaleġale.
Vä͑x moṭoz nex: ägär ef düzgünluġ ḳanun zombalxoy q̇a fariseyxoy düzgünluġaxun gele nu bakayin, Göye padčaġluġa sal bayes tenan bakon
Vä͑n gele damna dööräsṭä amdarxo "Ma besṗa, * šiin besṗayin, mähḳäminä ǯoġab tadale" upsuni barada ibakenan.
Zu isä vä͑x nexzu ki, iz vičä äǯuġläyinšakala här sa tanen mähḳäminä ǯoġab tadale. Šin iz vičä "axmaġ" uḳayin, Kala Šurin * be͑ś ǯoġab tadale. Šin isä iz vičä "haq̇əlsuz" uḳayin, ǯähännämi aruġo bafṭale.
Moṭo göräl q̇urban ečala gane be͑ś q̇urban tadala vädinä vi eyex bafṭayin ki, vi vičey vaxun sa šikääto,
q̇urbana q̇urban ečala gane be͑ś laxa, taki süfṭä vi vičäxun barišaka, oša eki vi q̇urbana tada.
Va taxsərkär balṭuxun hälä yaq̇a bakaṭan iräziläyinšaka ki, šoṭin va divanbala, divanbalenal q̇aroolčina nu tadane ki, zindana nu boseġan.
Va düzinäz nex: axərənǯi xuri tänginäl ciriḳ nu tadamin ṭeṭiin sal sa vädä č̣eġalatenu. *
"Äxlagsuzluġ maba" * upsuni baradal ibakenan.
Zu isä vä͑x nexzu ki, čuġoy loxol müštäri piin be͑ġala här amdaren, iz üḳe boš šoṭoxun äxlagsuzluġbine baksa.
Ägär vi yön piin va günax yaq̇a zaṗenesa, šoṭo č̣evḳa bosa. Šoṭaynaḳ ki, vaynaḳ vi bädäni maninesa sa hissä äfčibaksun bütüm bädäni ǯähännämä bosesunaxun šaaṭe. *
Ägär vi yön kiin va pis yaq̇a zaṗenesa, šoṭo boṭa bosa. Šoṭaynaḳ ki, vaynaḳ vi bädäni maninesa sa hissin äfčibaksun bütüm bädäni ǯähännämä bafsṭunaxun šaaṭe. *
"Šu iz čuġoxun ǯöybakayin, šoṭo ǯöybaksuni barada kaġəzq̇an tadi" äyit bakene.
Zu isä vä͑x nexzu ki, ǯinsi äxlagsuzluġaxun bašq̇a q̇eräz sa säbäbä görä iz čuġoxun ǯöybakala här sa tanen šoṭo äxlagsuzluġane yaq̇absa. Išq̇araxun č̣eri čuux haq̇alṭinal äxlagsuzluġebsa. * \ Elasbsuni barada
P̣urumal damna dööräsṭä amdarxo "äfčidän ma elasṗa, ama \ Q̣onʒ́uġoy be͑ś vi elasa bex ṗaṗesṗa" piṭu ibakenan. *
Zu isä vä͑x nexzu ki, sal elasmapa, nä göyä, šoṭaynaḳ ki, šo Buxaʒ́uġoy taxṭe,
nä oćala, šoṭaynaḳ ki, oćal Šoṭaynaḳ Iz turmoġo laxala gane; nääl Yerusalima, šoṭaynaḳ ki, šo kala Padčaġi šähäre. *
Vi belal elasmapa, šoṭaynaḳ ki, hun sal sa dänä popal, nä mac̣ibes nääl mä͑yinbes ten bakon.
Metärluġen, ef äyitäsṭa "hoo" äyit hooq̇an baki, "tää" äyit tääq̇an baki. Moṭoxun q̇eräzo šär bakalṭuxune.
"Pule äväzä pul, uluġoy äväzä ulux" * piṭu ibakenan.
Zu isä vä͑x nexzu ki, pis amdari tärsinä ma taki. Vi yön ćoyel sillä duġi tähkirbalṭaynaḳ ṭə͑yä͑mi ćoyal tarada.
Va mähḳäminä tadi urbašḳina exsṭun čureġalṭu xälätäl tada.
Šin va sa hazar lä͑ng yaq̇ taysuna mäǯburbayin, hun šoṭoxun ṗä͑ hazar lä͑ng yaq̇ taki.
Vaxun sa šey čureġalṭu tada, vaxun borǯ čureġalṭu qoš qaymada.
"Vi ə͑śaṭu čureki, * düšmänäl nifrätba" piṭu ibakenan.
Zu isä vä͑x nexzu ki, ef düšmänxo čurekinan, vä͑x tägib balxoynaḳal afərəpanan.
Metär ki, vä͑n göynul bakala ef Bavay ġarmux bakanan. Šoṭaynaḳ ki, Šoṭin Iz be͑ġe išiġa ham pisṭoġoy, ham šaaṭṭoġoy loxole saksa, aġalinal ham düzgünṭoġoy hamal düzgün nu bakalṭoġoy loxole ciye.
Šoṭaynaḳ ki, ägär vä͑x čureġalṭoġonan čuresasa, ef mükäfät ḳä bakala? Lap naloggirbalxonal metär teṭunbsa ki?
Ägär täkč̣ä ef vičimoġonan "xeyirq̇an baki" nexsa, ṭə͑yä͑minṭoġoxun avuzin ḳänan bi baksa? Buxaʒ́uġo nu čalxalṭoġonal metär teṭunbsa ki?
Šoṭaynaḳal ef göynul bakala Bava kamil bakalṭullariḳ vä͑nal kamil bakanan. *
