Ṭe ġimxosṭa imṗeraṭor Avgusṭen bütüm Rime oćalxo bakala amdarxoy siyäyinä haq̇esuni barada ämire tadi.
Mo samǯi siyäyinä haq̇suney, manu ki Ḳirini Siriin kalo bakaṭane č̣ovakey.
Bito siyäyinä haq̇eseynaḳ iz šähäräne yaq̇a bafṭi.
Iosifal Davidi äsil-näsiläxun baksuna görä Galileyin Nazareṭ šähärexun č̣eri Iudeyina, Davidi šähär bakala Beṭlexemane taci.
Šo ṭeṭiya siyäyinä haq̇eseynaḳ iz niśanlu Mariyaxune taci. Me vädine Mariya bə͑hiney, äyeläl bakala vädäney.
Beṭlexema äyel bakala vaxṭ hari ṗaneṗi,
Mariyanal iz süfṭin ġarane ečeri. Äyelä q̇ondaġbi nä͑vä͑ne laxi, šoṭaynaḳ ki, q̇onaġxo mandala ḳoya šoṭoġoynaḳ ga tene bä͑ġä͑yecey.
Ṭe oćala sürün ṭo͑ġo͑l üše navad zaṗḳala eġel be͑ġalxonoy. Šoṭoġon čölöṭun käybsay.
Bürdän Q̣onʒ́uġoy sa angel šoṭoġoy be͑śe č̣eri, Q̣onʒ́uġoy tamtaraġen šoṭoġoy ćoyel išiġe saki. Eġel be͑ġalxo kala q̇ə͑yene haq̇i.
Angelen šoṭoġo pine: "Ma q̇ə͑banan! Zu vä͑ynaḳ bütüm amdarxo mu͑q̇ṭala sa xavarez ečere.
Ġe Davidi šähäre efi Čarḳesṭale nanaxun baki. Mo Q̣onʒ́ux Xrisṭose.
Vä͑ynaḳ niśan mo bakale: vä͑n nä͑ve boš basḳi q̇ondaġbaki Körpä äyel bä͑ġä͑balnan".
Bürdän angeli ṭo͑ġo͑l Buxaʒ́uġo alxəšṗala kala göye q̇ošune aḳeci. Šoṭoġon metärṭun nexey:
"Än alloyluġxo Buxaʒ́uġo alxəš, \ Šoṭay čureġala amdarxoynaḳ isä oćali ćoyel serluġq̇an baki!"
Angelxo qaybaki göynul e͑qeciṭuxun oša eġel be͑ġalxon piṭun: \ "Ekinan Beṭlexema taġen, Q̣onʒ́uġon yax avabakesṭi me baki äšlä beš piin aḳen".
Šorox kap hayzeri taṭunci, hariyal Mariya, Iosifa saal nä͑ve boš basḳi Äylä bä͑ġä͑ṭunbi.
Eġel be͑ġalxon Äylä aḳaṭan Šoṭay barada ičoġo piṭoġo bitova exlätṭunbi.
Moṭo ibakalṭoġoy bitoṭin eġel be͑ġalxoy me exlätä määṭṭälṭun mansṭay.
Mariyan isä bütüm me exlätxo iz üḳe boš efi me barada fikirebsay.
Eġel be͑ġalxon bütüm ičoġoy aḳiṭoġo q̇a ibakiṭoġo görä Buxaʒ́uġo alxəšṗi tärifläyinšbsun qošṭun qaybaki. Šoṭaynaḳ ki, här šey angelen ičoġo exlätṗi ḳinäḳe baki.
Muġumǯi ġine Äylin sünnät bakala vaxṭ hari ṗaṗaṭan Šoṭay c̣iya Isusṭun laxi. Me c̣i Šoṭo hälä Nanay tapane bakalṭuxun be͑śe angeli täräfäxun tadecey. *
Moiseyi ḳanuna görä tämiz bakala vaxṭ čarḳiṭuxun oša * Iosifen q̇a Mariyan Äylä Q̣onʒ́uġo häsrbseynaḳ Yerusalimaṭun ečeri,
šoṭaynaḳ ki, Q̣onʒ́uġoy ḳanuna camecene: "Bütüm süfṭin ġar äylux Q̣onʒ́uġo häsrbakalane". *
Hamal šoṭoġon q̇urbanṭun ečeri, hetär ki \ Q̣onʒ́uġoy ḳanunasṭa ämir bakeney: "P̣ä͑ giyär, nääl ki ṗä͑ göyärčini bala". *
Ṭe vädä Yerusalima Simeon c̣ila sa amdare buy. Šo düzgün hamal Buxaʒ́uġo ve͑ amdarey. Šoṭin israilluġoy čarḳesunane yaq̇be͑ġsay, * ω͑vel Urufal šoṭoxuney.
ω͑vel Urufen šoṭo saturbe͑ś avabakesṭeney ki, šo Q̣onʒ́uġon yaq̇abi Xrisṭosa aḳinuṭ biyalatene.
Metärluġen, ω͑vel Urufen Simeona xrame määlinene ečeri. Me vädä körpä Isusa Iz bava-nanan xramaṭun ečeri. Šorox ḳanuna laxeci ädätä ämälbseynaḳṭun harey.
Simeonen Šoṭo iz q̇užel exṭi Buxaʒ́uġo alxəšpsun metäre pi:
"Ay bitoṭay Q̣onʒ́ux, isä Vi pi ḳinäḳ \ Me Vi nökär arxayin biyes banekon.
Šoṭaynaḳ ki, bütüm azuḳxoy aḳes bakal Vi häzirbi čarḳesuna,
Isusi nana q̇a bava isä Simeoni ičoġoy Äylin barada uḳala me äyitmoġoxun määṭṭälṭun mandi.
Simeonen šoṭoġo xeyir-bäräkät tadi Äylin Nana Mariya metäre pi: "Me Äyel Israila geleṭay bisṭuni q̇a e͑qesuni säbäbkär bakale. Šo amdarxoy nu q̇abulbala sa niśan bakseynaḳe täyin bake.
Morox bito geleṭay boš bakala fikirxo ćoyel č̣evkseynaḳ bakale. Vi üḳe isä q̇ələnǯ baġale".
Ṭeṭiya Ašer tayfinaxun bakala P̣enueli xuyär Xanna c̣ila čuux xavarečalal buney. Šo gele yäšluney. Izi ǯäyil vädine išq̇ara taci, vu͑ġ usene išq̇araxun yäšäyinši. Oša šo süpüre mandi.
Mo säksän biṗ yäšṭä süpür sa čuuxey. Šo xramaxun č̣etenesay, ġurux efi afərəpsun üše-ġena Q̣onʒ́uġone q̇ulluġbsay.
Iosif q̇a Mariya xrama bakaṭan, Xannal šoṭoġo ə͑śalayinšaki Buxaʒ́uġo šükürebi. Šoṭin Yerusalimi čarḳesuna yaq̇be͑ġala bütüm amdarxoynaḳ Körpä Isusi barada exlätpsane burqi.
Iosif q̇a Mariya Q̣onʒ́uġoy ḳanuna cameciṭoġoy bitova ämälbiṭuxun oša Galileyina - ičoġoy \ šähär bakala Nazareṭaṭun qaybaki.
Äyel isä kalabaksunen ičusṭa zor q̇a müdrikluġ avuze baksay. Buxaʒ́uġoy čuresunal Ičuxuney
Här usen Č̣ovaksuni axsibayasṭa * Isusi bava-nana Yerusalimaṭun taysay.
Isusi ṗac̣c̣e yäš bakaṭan šorox ṗurum ädätä görä ṭiyaṭun taci.
Axsibay čarḳiṭuxun oša šorox qaybaki ḳoya tayseynaḳ yaq̇aṭun bafṭi. Ama Isus Yerusalima manedi. Šoṭay bava-nanay isä moṭoxun xavar buteney.
Isusi ičoġoxun yaq̇ taġalṭoġoy arane baksunaṭun fikirbsay. Ama sa ġi dirisṭ yaq̇ taciṭuxun oša Šoṭo dosṭurxoy q̇a q̇oomxoy arane qä͑vesaṭun burqi.
Šoṭo bä͑ġä͑teṭunbi, šoṭaynaḳal qä͑vesun-qä͑vesun Yerusalimaṭun qaybaki.
Xib ġinaxun oša Šoṭo xramaxunṭun bä͑ġä͑bi. Isus määlimxoy ṭo͑ġo͑l arci šoṭoġo u͑mu͑xelaxsay, šoṭoġoxun ḳänesa exlätṗi xavare haq̇say.
Šoṭo u͑mu͑xlaxalṭoġoy bito Äyläsṭa bakala haq̇əla q̇a Šoṭay tadala ǯoġabxo matṭun mansṭay.
Iosifen q̇a Mariyan Šoṭo aḳi määṭṭälṭun mandi. Isusi Nanan pine: "Ay bez Ġar, mo hiḳä beš bel enčeri? Axəri vi bavan q̇a zu nigärän mandi vayan qä͑vesay".
Isusen šoṭoġo ǯoġabe tadi: "Za heṭaynaḳnan qä͑vesay? Avatenaniy \ ki, Zu Bez Bavay ḳoya bakalazu?"
Ama šoṭoġon Isusi ḳä upsun čuresuna q̇amiš teṭun baki.
Oša Isus Iz nana-bavaxun sagala Nazareṭane qaybaki. Šo šoṭoġoy äyitäxun tene č̣eysay. Iz Nanan isä bütüm me äšurxo iz üḳe boš enefsay.
Isus kalanebaksay, kalabaksunenal iz müdrikluġ avuze baksay. Buxaʒ́uġoy q̇a amdarxoy Šoṭo čuresunal ġiba-ġi avuzebaksay. *
